Mumpar 43
43
Josef dɔɔranar ne Bɛnjamen Ijipt harɛ ta kaala
1Lɔr la nyoa baa do kpeɡri Keenan harɛ la ta, 2Jekɔb ne o bii aa di boyu baa kaa yawɛ le Ijipt harɛ ta ba tonɛ la, o ŋɔ ba be ŋɔ, “Hé berɛ la ka yawɛ boyu la tama ba ja.”
3Anee Juda ŋɔ o mɛɛ be ŋɔ, “Baa la kpɔ kon kpaa ya nyu ta ŋɔ ya ta ya nime la ne balaa, ya bɛ ɡel o na ya siwi. 4Dɛ hɛɛ sɛoh ya ne ya nime la kaa tenaa, yaa lao dɛ́ ka yawɛ kondikwaa la ba tɛɛ. 5Kɛ dɛ haa sɛh tenaa, yaa la. Baa la ɡelɔ ya jemɛ kɛŋɔ dɛ ya ta ya nime la ne balaa, waa ya siwi nyin dɛ na kwara.”
6Anee Jekɔb ŋɔ, “Bɔkwaa dɔ baa nɔ be ŋɔe ŋɔ he dɔ nime bɛl dɛ kpɔ waa nɔ ba ta n nɛɛ ken?”
7Asɛ ba ɡe chaŋe ŋɔ, “O teŋɔ dɛɛ bɔɔ ya ne ya lolanar wa. Dɛ́ ya mɛɛ ta soɡe le naa? Ya dɔ nime bɛl dɛ ja ya nɛ aa? Waa waa bɔɔra laanee ya ɡe chaŋe. N mɛɛ, dɛ ya ta jemɛ kɛŋɔ wɛɛ ŋɔɔ ya kpɔ ya nime la ba.”
8Belaa Juda ŋɔ o mɛɛ be ŋɔ, “Kpɔ Bɛnjamen do n nɔn ta n ne o kaa warane, ásɛ lɔr bɛ yaa kpo ya ba serewe. 9Mɛɛ cheo tɛ wobɛlbwa. Dɛ n ta o ne balɛ ba tɛɛ naa, bɔɔ mɛ. Dɛ n ta o ne balɛ sɔnɔnɔɔ ba tɛɛ naa, n nɛɛ wobɛlbwa dawɛ. 10Ken laa ya do waa nɔ ta dɛɛ tɛɡre aa, ya fe la kera anɛ ba.”
11Ba mɛɛ ɡe ŋɔ, “Dɛ ɡɛɛ tenaa, hé kpɔ ya harɛ nɔ ta kwaa kɛŋɔ, noo tama ne tooh tama ne konsɔɔhsoma, ne korobo ne daa nɔna aa dɔ pɛla do he pure bini ka tɛ nomoa la. 12Bɛ́lbwa kpɔ suuɡa bele anɛ, anɔ la haa naa he bɔɡtɔre nyoo la ken ɛ soohla. 13Hé lawɛ he nime Bɛnjamen, he ne o kaa baa la be warane. 14Kórowii Waa Ɛ Kpeɡri Bwa Dɔɔ la ja he nɛɛ dɛ́ ɡel nomoa la na he sum, dɛ́ kpɔ Simeon ne Bɛnjamen tɛ heya he ba tɛ mɛ. Dɛ baa le n nɔn taa yaa, ba den le n nɔn ta.”
15Kɛ ane a bwa, ba kpɔ koŋkɛɛla la ne suuɡa bele anɛ la ne Bɛnjamen, dɛ chiɡ ŋwɛnɛ ta kaa Ijipt harɛ ta warane, dɛ kpɔ ba te ka chaɡle Josef. 16Josef aa naa kɛ Bɛnjamen ja ba bini la, o ŋɔ o bonɔɔ waa dɛ nyiŋi o dem la be ŋɔ, “Kpɔ nɛra nɔ kaa n dem, dɛ́ ka kpo kon ɛ kondikwa, n dɛ́ ba n ne bá di kondikwa webaŋa nɔ ne.” 17Bonɔɔ la ɛ ɡɛ Josef aa doo la, asɛ dɛ lawɛ nɛra la kaa o dem.
18Waa kpɔ ba dɛɛ kaa dem la, dɛ ba dɛ ɔmɛ, asɛ dɛɛ bol dɔŋa be ŋɔ, “Suuɡa la baa bera do ya bone bini la waa baa ba ya ne dem bonɔ la. Baa ɡuɡri yaa, dɛ́ lawɛ yaa yoma, dɛ́ kpɔ ya keeɡore.” 19Anomanta, baa tel dem la doonyoa la, ba ŋɔ bonɔɔ la be ŋɔ, 20“Nomoa, ya fa ba bonɔ dɛ ba yawɛ kondikwa, 21yaa chiɡ ŋwɛnɛ ta bɔr jo ya ka chɔ bobɛl la, ya pur ya bɔɡtɔre nyoo, dɛ na kɛŋɔ ya suuɡare yaa kpɔa ba yawɛ kondikwaa la lɔ a bini. Anomanta, ya berɔ ba a ne, anee la. 22Ya berɔ ba suuɡa ne, dɛ́ ba yawɛ kondikwaa ja. Ya ta wone jemɛ naate waa kpɔ anɔ la do ya bɔɡtɔre la bini.”
23Anee bonɔɔ la chaŋe ŋɔ, “He bɛ ɡel a hiah heya hɛɛ ɔmɛ. Korowii he ne he nimanar aa dɛ tomɔ laanee ken kpɔa do he bone bini la. Gɛ suuɡa la tel n be.” Asɛ o le Simeon tɛɛ ba.
24Ate, o laɡ ba jo dem dɛ tɛɛ ba nee ba sarame ba nakpale, dɛ tɛ ba keeɡore ɡe kwaa a di. 25Ba noɔ kɛŋɔ baa di webaŋkwaa dem belaa, anomanta, ba kwaa ba koŋkɛɛla la cheɡ dɛɛ kpa Josef bala webaŋa la ne. 26Josef aa ba dem la, ba kpɔ koŋkɛɛla la ka ɡuŋi o sie dɛ kpɔ tɛo. 27Asɛ o bɔɔ ba ɡɛ ba bwara aa doa dɛ berɛ ŋɔ, “Hé fa bol he mɛɛ wa n be. Ɛrɛɛ o bwara doɔ? O ta soɡe le o bwara do kpeɡri aa?”
28Anee ba chaŋe ŋɔ, “Nomoa, he bonɔɔ waa ɛ ya mɛɛ la ta soɡe le o bwara do kpeɡri.” Asɛ ba ɡuŋi o sie dɛ kpɔ ba sie piiɡi harɛ.
29Josef aa nyiŋa dɛ na Bɛnjamen waa ɛ o nyabie pɔrɔdɔ la, o ŋɔ, “Hé nime haa bol o waa n be laanee nɔ naa? Korowii chae, n bie.” 30Nyina Josef aa dɛ nyin o nime la kohona nomanta, o haŋrɔ kahonɛ, dɛ le bela warane, dɛ ka jo o dea dɛ wi.
31Waa tona la, o samɛ o sie dɛ le buse dɛ kwaa sie do, asɛ dɛ ŋɔ bá kpɔ kondikwaa la le ba bá di.
32Ba kpɔ Josef kwaa cheɡo korɛ, asɛ o dɔɔranar la ɡe kwaa korɛ. Dɛ Ijipt tena bane jao dɛ ɡee di kwaa la ane. Dɛ Ijipt tena kii ba ne Hibru tena nɔn pɛɛ dɛ́ di kwa, anomanta, ba korɛ ba kwa. 33Josef dɔɔranar ne o nime la soɡo ba sie pa dɔŋa nɛ. O ɡelɔ ba so teŋɛ dɔŋa nɛɛ le ba nomonome bini kaa bechale ta. Baa na ɡɛ baa soɡa teŋɛ dɔŋa nɛɛ la, ba nyoa kpoo. 34Ba kpɔ Josef kondikwaa la ane ba bɔne ba. Ba tɛ Bɛnjamen bɔre anue, dɛ ɡwaa ɡɛ baa tɛ ba kar la. Ba di kondikwaa la dɛ vaɡre, dɛ nyɔ sen lɛ ba sie.
دیاریکراوەکانی ئێستا:
Mumpar 43: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.