Mumpar 28
28
1Belaa Aesek yerɛ Jekɔb dɛ swee andɛɛɡa tɛo dɛ berɛ ŋɔ, “Bɛ Keenan harɛ nɔ ta haahna nɔ bini bɛlbwa mo. 2Ir dɛ́ kaa Mɛsopoteemea harɛ ta, dɛ ka mo haah le he nya mɛɛ Bɛtoɛl dem. Ka mo he naara Laban bihaahna la bini bɛl. 3Kórowii Waa ɛ Kpeɡri Bwa Dɔɔ la che he mun ta, dɛ́ swee andɛɛɡa tɛɛ he hahmor ta, ásɛ he lolɛ bii kohona á che a ta he ɛ harɛre nɛra ɡalɡa naa. 4Onee dɛ́ che he ne he naanar mun ta, ɡɛ waa cheɡɛ Abraham mun ta la, ásɛ harɛ nɔ yaa ɛ hɔɔhra o ta Korowii kpɔ tɛ Abraham nɔ ɛ he kon.” 5Belaa Aesek ta Jekɔb ŋwɛnɛ o kaa Mɛsopoteemea harɛ ta Bɛtoɛl bibaa Laban be. Rebɛka waa lolɛ Jekɔb ne Esɔ la dɔɔree. O ɛ Aram te.#Mum 24:29
6Esɔ nao kɛŋɔ Aesek swee andɛɛɡa tɛ Jekɔb, dɛ tao ŋwɛnɛ ŋɔ o kaa Mɛsopoteemea harɛ ka mo haah bela, dɛ ŋɔ o bɛ Keenan harɛ bihaah mo, 7asɛ Jekɔb no o nya ne o mɛɛ deŋna wa dɛ kaa bela. 8Esɔ ɡe nao kɛŋɔ Keenan harɛ haahna wa aa were o mɛɛ be kwaraa,#Mum 26:35 9asɛ o chiɡ ŋwɛnɛ ta dɛ kaa Ismael waa ɛ Abraham bie la be dɛ ka mo o bihaah baa dɛ yerɔ Mahalat la ja o haahna la nɛ. O nime sɔne Nɛbayɔt.
Jekɔb deera waa deera Bɛtel
10Belaa Jekɔb le Beɛseeba dɛ chiɡ ŋwɛnɛ ta dɛɛ kaa Haran. 11Waa dɛ kaa la, o kaa tel bobɛl bɔr joo o chɔ, dɛ kpɔ nyu serɛ bwe bɛl. 12O chɔe bini la, o deero dɛ na kɛŋɔ sanjol le nyundua ba chiɡ harɛ, asɛ nyundua toroma teeh dɛ la dɛɛ ba. 13Dɛ Korowii cheɡɛ o jwɛh dɛ ŋɔ, “Menee Korowii, menee he mɛɛ Abraham ne Aesek tomɛ la. Harɛ haa chɔ o ta nɔ, he ne he naanaree mɛɛ ba kpɔe tɛ.#Mum 12:2; 13:14-15 14He naanar ɛɛ warɔɔ kɛŋɔ harɛ nɔ ta teera, dɛ́ yɛɛ kaa harɛ nɔ ta bobɛlbwa. He ne he naanar nɛɛ aa ba cheɡa, ásɛ n swee andɛɛɡa tɛ harɛ nɔ ta nɛra bwa. 15Berɛ lii kɛŋɔ mɛɛ teŋɛ he nɛɛ, dɛ́ tɔ he nɛɛ bobɛlbwa haa dɛ ba kaala, dɛ́ berɛ ba he ne harɛ nɔ ta ja. Maa hen ta bwa, nemenɛ n ɛ waa maa baɡɛ nyoa la.”#Mum 33:18
16Jekɔb aa ir dom ta la, o ŋɔ, “Amɔ Korowii lɔ bonɔ asɛ n ta jemɛ!” 17Asɛ ɔmee lawɔ o ŋɔ, “Bonɔ ɔma kɛrɛdɛ! Bonɔ ɛɛ ɛ Korowii demii. Bonɔ ɛ doonyoa baa kpɔ o ta dɛɛ kaa nyundua.”
18Tɔ aa pera chɔmbibi la, o kpɔ bwe waa kpɔ o nyu serɛ o ta la pa bela harɛ la ta, dɛ́ kpɔ dɛɛ lii bela, dɛ fuɡe noo ta o ta dɛ kpɔ do Korowii nɔn ta. 19Dɛ pa bela sɔn Bɛtel. Wubwa la dɛ o sɔne Lus. 20Asɛ Jekɔb baɡɛ Korowii nyoa ŋɔ, “Dɛ hɛɛ ja n nɛɛ dɛ́ kpɔ nɔn tɔ n nɛɛ n ŋwɛnɛ maa dɛ kaa nɔ ta, dɛ́ tɛ mɛ kondikwaa ne yal maa tɔ, 21ásɛ n berɛ ba n mɛɛ dem deŋnesɔɔhna ne naa, hɛɛ ɛ Korowii maa dɛɛ tomɛɛ. 22Bwe maa kpɔa pa dɛ kpɔ dɛɛ liiri nɔɔ dɛɛ ba he torome bɔr ɛɛ. Ásɛ komɛlbwa ɡe haa tɛ mɛ la, bɔre fi bɛlbwa la, mɛɛ tɛɛ bɔrbeŋkpoŋii.”#Mum 14:20
دیاریکراوەکانی ئێستا:
Mumpar 28: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.