Mumpar 23
23
Saara seo wa
1Saara di bene lafa fifraanɛ dɛ anuanɛ mɔɔ dɛ sewɛ. 2Keenan harɛ ta bobɛl baa dɛ yerɛ bela Kiriat Aaba, dɛ berɛ dɛɛ yerɛ bela Hɛbrɔnee o ka sewɛ. Asɛ Abraham la ka ɛ o lwe dɛ wiu.
3Abraham le bela o haah lale aa chɔa la, dɛ ka na Hiti tena o ne ba bol o ŋɔ ba be ŋɔ, 4“N ɛ hɔɔh dɛ ba pu heyaa so, bonɔ laa n le. Anomanta, hé tɛ mɛ harɛ asɛ n yawɛ dɛ huɡe n haah.”
5Asɛ ba chaŋo ŋɔ, 6“Nomoa, dɛɛ no, nomonjenii hen ya bini bonɔ. Yaa won vɔmɛ lalbɔɔ ŋɔ he bɛ he lale huɡe. He won o huɡa ya lalbɔɔne nɔ bɛlbwa he tea aa too o ta bini.”
7Belaa Abraham ir dɛ baa ba harɛ,#Mum 25:9 8dɛ soŋ ba ŋɔ, “Dɛ he sɛoh ŋɔ n huɡe n nɛn tenaa, amɔ he no n be, dɛ́ soŋe Soha bie Efron tɛ mɛ 9kɛŋɔ ó tɛ mɛ bwebɔɔ waa lɔ Makpɛla dɛ ɛ o kon dɛ chɔ o harɛ nyoa la. He ŋɔ o be ŋɔ ó yoɡu ɡɛ o yoɡ aa chɛa tɛ mɛ, ásɛ n dɔ lala huɡri bɔr he be bonɔ.”
10Anee Efron chaŋe Abraham o bala Hiti tena baa soɡe bwɛɛ la doonyoa la sie dɛ ŋɔ, 11“Akai, nomoa, dɛɛ no n be. N kpɔ harɛ la tɛɛ, dɛ kpɔ bwebɔɔ la ɡe tɛɛ. N nɛra nɔ bwa siwi taa n kpɔ harɛ la dɛɛ tɛɛ. Huɡe he nɛn o ta.”
12Asɛ Abraham ba Hiti tena la harɛ ja, 13dɛ ŋɔ Efron be nɛra la bwa sie ŋɔ, “Dɛɛ no, dɛ hɛɛ sɛoh tenaa, mɛɛ bɔe harɛ la kemee. N dɛ soŋe kɛ he lɛ, ásɛ n won huɡe n lale la bela.”
14Belaa Efron chaŋo ŋɔ, 15“Nomoa, dɛɛ no. Harɛ la yoɡ lɔ suuɡapoŋa lafraanaarɛ, kɛ a ta kwaane ɛɛ n ne he baah. He te ka huɡe he nɛn.” 16Asɛ Abraham sɛh dɛ bɔ suuɡapoŋa lafraanaarɛ, ɡɛ Efron aa di harɛ la yoɡ ba bala la bwa no la tɛo ba siwi ta. O bɔ ba ɡɛ ba bonadiire aa dɛ peɡra ɡɛ saŋ la.
17Belaa ba kpɔ Efron harɛ waa lɔ Makpɛla dɛ do Mamre wee leebɔr la, ne bwebɔɔ la, ne daa aa lɔ koo la ta bwa, 18dɛ do Abraham nɔn ta Hiti tena baa lɔ bwɛɛ doonyoa la ta la bwa sie.
19A habɔɔ la, Abraham huɡe o haah Saara bwebɔɔ la ta. Belaa baa yerɛ Hɛbrɔn, o do Keenan harɛ ta la. 20Gɛɛ a ɛ Hiti tena kpɔ harɛ la ne bwebɔɔ la do Abraham nɔn ta ŋɔ ó kpɔ ɛ o lala huɡribɔr.
دیاریکراوەکانی ئێستا:
Mumpar 23: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.