Mumpar 13
13
Abram ne Lɔt dɔŋa baah peɡra
1Asɛ Abram kpɔ o haah ne komɛlbwa waa dɔa le Ijipt harɛ weekaŋle nyunduabɔr, dɛ kaa Keenan harɛ weekaŋle harɛbɔr. O kpɔ Lɔt ja ba kaa. 2Dɛ Abram nɔn bini wer, peera te kɛɛ, boohna kɛɛ nae ɔ? Suuɡapoŋa ne suuɡaswɛm bwa, dɛ o dɔa. 3Waa le bela la, o ɡaaɡɔ dɛ choɡ bwɛɛre ta ɡɛ naaa dɛ ba tel bela o fa aa baa choɡ mumpar bwa la. Bela lɔ Bɛtel ne Ai baah ta,#Mum 12:8 4bela o fa aa pa bwea dawɛ dɔŋa nɛ dɛ kwaa kon dɛ kpo kwaa dɛɛ tɛ Korowii o ta la, dɛ tomɛ Korowii bela kɛrɛdɛ. 5Dɛ Lɔt ɡe dɔ kondɛɛra kɛŋɔ peera, boohna ne nae taeh, dɛ dɔ haah ne bii dɛ bonɔɔna ɡe. 6Dɛ harɛ baa soɡe o ta la aa kanɛ ásɛ ba bwa kondɛɛra la won dɔ dibɔra. 7A ɡɛ nomanta, naɡra chole Abram bonɔɔna baa dɛ nyiŋi o kondɛɛra ta la, ne Lɔt bonɔɔna baa dɛ nyiŋi o ɡe kwaa ta la baah. Gɛ saŋ dɛ Keenan harɛ tena ne nɛra bane baa dɛ yer ba Pɛrɛs tena ta soɡe harɛ la ta.
8Belaa Abram ŋɔ Lɔt be ŋɔ, “Nɛmbeŋkpoŋii n ne he bwa, anomanta, a ta chɛɛ kɛŋɔ n ne he yo, a ta chɛɛ kɛŋɔ n bonɔɔna ne he bonɔɔna ɡe yo. 9Anomanta, ya peɡri dɔŋa baah. Nyiŋi harɛ nɔ waa chɔa kaa nɔ bwa, ásɛ dɛ kpɔ baŋ bela bwa waa wera he be, ásɛ he do baŋ bɛl, ń ɡe do baŋ bɛl.”
10Belaa Lɔt ha sie dɛ nyiŋi harɛ la, asɛ dɛ na ɡɛ Jɔɔdan Moo nyoa harɛ aa sɔna ka le Soar harɛ ta, dɛ do wer kɛŋɔ bela Korowii aa du daa Eden bodɛɛɡe ne Ijipt harɛ la ken. Gɛ waa nɔ chiɡo mɔɔ Korowii chɔɡ bwɛɛre ane baa dɛ yera Sodom ne Gomoora la.#Mum 18—19 11Lɔt kpɔ deŋɡarere doa harɛ waa chɔa kaa Jɔɔdan Moo nyoa la te bwa, asɛ dɛ kpɔ sie chaɡɛ wee leebɔr pera. Gɛɛ a do ba nɛra banɛ la peɡri dɔŋa baah. 12Abram soɡe Keenan harɛ ta, asɛ Lɔt te ka baŋre o tɛnte deene deŋɡarere dor harɛ waa chɔa kaa Jɔɔdan Moo nyoa bwɛɛre ane baah ta dɛ bɛne Sodom. 13A ɡɛ Sodom tena nɔ, dɛ ba nyubini kpeɡri ba wechɔɡa do kan Korowii be.
Abram kaa so Hɛbrɔn
14Belaa Abram ne Lɔt aa peɡri dɔŋa baah la, asɛ Korowii ŋɔ Abram be ŋɔ, “Che bela haa lole nɔ, dɛ́ nyiŋi he sie ne habɔɔ, he diɡ ne ɡal. 15A ɡɛ harɛ nɔ bwaa mɛɛ ba kpɔe tɛ he ne he naanar ó den ɛ he kon saŋ bɛlbwa dɛɛ la. 16Mɛɛ ɡeloo he naanar warɛ kɛŋɔ hɛŋle ken, nomɛlbwa aa wola won jemɛ ba nyoa bwa. 17Anomanta, ɡaaɡe harɛ la bwa ta, dɛ́ na ɡɛ waa doa dɛkalkɛŋɔ he nɔn taa mɛɛ ba kpɔe do.” 18Asɛ o ir bela waa soɡa la, dɛ ba so dajena ane mun Mamre, o bɛne bwɛɛ bɛl sɔne Hɛbrɔn. Asɛ o kwaa kon waa kpoo kwaa dɛɛ ɛ saraha o ta tɛ Korowii bela.
دیاریکراوەکانی ئێستا:
Mumpar 13: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.