Mumpar 11
11
Babelɔn Dejaŋ wa
1Wubwa la, dɛ nɛwɛnyina bwa fa ɛ beŋkpoŋ dɛɛ bol wobol beŋkpoŋ. 2Ba iro dɛ ɡaaɡe wee leebɔr dɛ ka le Babelɔn tena deŋɡarere harɛ waa chɔa kaa ta, dɛ ka so bela. 3Belaa ba ŋɔ dɔŋa be ŋɔ, “Bwɛɛla, hé ɡel ya teŋe berekese, dɛ́ wɔɔra a won do kpeɡri kohona.” Ba ta bwea dɔe bela dɛ́ ma deene, a waa ba kpɔ berekese dɛ nyin kwaa aa won kwaa mara kɛ kootal dɛ kpɔ ma deene la. 4Belaa ba yerɛ dɔŋa dɛ ŋɔ, “Amɔ hé ɡel ya pɛ nyoa, dɛ́ vɔrɔwe bwɛjen dɛ́ ma dejaŋ o ka tel nyundujaɡla, ásɛ a ɛ sɔn tɛ yaa ya bɛ lɔ peɡre harɛ nɔ ta.”
5Asɛ Korowii tu ba harɛ dɛ ba na bwɛjen la ne dejaŋ nɛwɛnyina aa dɛ ma la ɡɛ waa kaa nyundua. 6Anee o ŋɔ, “Dɛ nɛnsiwi beŋkpoŋ ne wobol beŋkpoŋ nɛra soɡe harɛ nɔ ta, asɛ dɛ dɔ nyopɛo dɛ den won ɛ anɔ bwa ken tenaa, ate aa biɡri bɛlbwa komɛlbwa toole bá ŋɔ baa ɛɔ baa wola won ɛ.” 7Korowii aa bera kaa nyundua la, o ŋɔ, “Amɔ hé ɡel ya tu kaa harɛ ta ásɛ dɛ ka beɡre ba wobol, ásɛ bane kapa bɛ ba dɔŋa wobol no kpa.” 8Ate, Korowii ɛ ɡɛ dɛ lɔ ba peɡre harɛ ta bwa, asɛ ba vɔrɔwe bwɛɛ la kahonɛ. Asɛ bɛlbwa nyin o bɔr kpɔ. 9Gɛɛ a ɛ baa yerɛ bwɛjen la Babelɔn,#11:9 Wubwa la, dɛ Babelɔn sɔne Babel. o munii kɛŋɔ kooraŋkoora, dɛkalkɛŋɔ belaa Korowii ka koɡre nɛra wobol asɛ bɛlbwa dɔ o wobol korɛ, asɛ dɛ lɔ ba peɡre harɛ nɔ ta bobɛlbwa.
Sem naanar wa
10Kenii Sɛm naanar bwara waa do. Nee la fa aa sua bɔle harɛ nɔ ta bwa la, bene anɛ habɔɔ la, a taa Sɛm di bene lafa, asɛ dɛ lolɛ bibaa dɛ pa o sɔn Aafaksad.#Luk 3:35-36 11A habɔɔ la, o berɔ so bene lafraanue, dɛ lolɛ bibaala ne haahna bane ɡe.
12Aafaksad ɡe aa kpeɡa dɛ di bene fifraatoro dɛ anue la, o lolɛ bibaa dɛ pa o sɔn Seela. 13A habɔɔ la, o berɔ so bene lafraanaarɛ dɛ atoro, dɛ lolɛ bibaala ne haahna bane ɡe.
14Seela ɡe aa kpeɡa dɛ di bene fifraatoro la, o lolɛ bibaa dɛ pa o sɔn Iba. 15A habɔɔ la, o berɔ so bene lafraanaarɛ dɛ atoro, dɛ lolɛ bibaala ne bihaahna bane ɡe.
16Iba ɡe aa kpeɡa dɛ di bene fifraatoro dɛ anaarɛ la, o lolɛ bibaa dɛ pa o sɔn Pɛlɛɡ. 17A habɔɔ la, o berɔ so bene lafraanaarɛ fifraatoro, dɛ lolɛ bibaala ne bihaahna bane ɡe.
18Pɛlɛɡ ɡe aa kpeɡa dɛ di bene fifraatoro la, o lolɛ Reu. 19A habɔɔ la, o berɔ so bene lafraanɛ dɛ anuanaarɛ, dɛ lolɛ bibaala ne bihaahna bane ɡe.
20Reu ɡe aa kpeɡa dɛ di bene fifraatoro dɛ anɛ la, o lolɛ Sɛrɔɡ. 21A habɔɔ la, o berɔ so bene lafraanɛ dɛ anuanɛ, dɛ lolɛ bibaala ne bihaahna bane ɡe.
22Sɛrɔɡ ɡe aa kpeɡa dɛ dɔ bene fifraatoro la, o lolɛ Neehɔ. 23A habɔɔ la, o berɔ so bene lafraanɛ, dɛ lolɛ bibaala ne bihaahna bane ɡe.
24Neehɔ ɡe aa di bene fifraanɛ dɛ anuanaarɛ la, o lolɛ Tɛɛra. 25A habɔɔ, la o berɔ so bene lafa dɛ fi dɛ anuanaarɛ, dɛ lolɛ bibaala ne bihaahna bane ɡe.
26Tɛɛra ɡe aa kpeɡa dɛ di bene fifraanuanɛ la, o lolɛ Abram ne Neehɔ dɛ Haaran.
Tɛɛra naanar wa
27Kenii Tɛɛra bwara waa do. Onee lolɛ Abram ne Neehɔ dɛ Haaran. Asɛ Haaran ɡe aa kpeɡa la, o lolɛ Lɔt. 28Haaran mɛɛ ta soɡe le, asɛ o sewɛ bwɛɛ baa lolɔ o ta baa yerɔ Ur, o do Kaldea harɛ ta. 29Abram ne Neehɔ bwa aa baa kpeɡ la, ba mo haahna. Abram haah sɔne Sarai, asɛ Neehɔ ɡe haah sɔne Milka, o ne Eska bwa mɛɛ baa yerɛ Haaran la. 30Dɛ Sarai te ɛ hambara o ta bie dɔe.
31Asɛ Tɛɛra kpɔ o bie Abram, ne o bibaa Haaran ɡe bibaa Lɔt, ne Sarai waa ɛ o hela dɛ ɛ o bibaa Abram haah la. Ba le Ur waa lɔ Kaldea harɛ ta la ŋɔ ba dɛ kaa Keenan harɛ ta. Baa bera ba tel Haran harɛ ta la, ba soɡe bela. 32Belaa Tɛɛra soŋni asɛ waa baa di bene lafraanɛ dɛ anue la, o sewɛ.
دیاریکراوەکانی ئێستا:
Mumpar 11: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.