MATEUS Bindu 10
Bindu 10
Dipaborhat Tuhan Jesus siseanna na sampuludua i jala dipodai nasida 1-42.
(Ay. 10:1-15; patud. Mrk 6:7-13; Luk 9:1-5)
1Jadi dijou Jesus ma siseanna na sampuludua i tu jolona, dilehon ma tu nasida sahala mangalo dompak angka tondi na hodar, laho pabalihonsa jala laho pamalum nasa sahit dohot tihas.
(Ay. 10:2-4; patud. Mrk 3:14-19; Luk 6:13-16; Joh 1:40-49)
2Ianggo goar ni apostel na sampuludua i, angka on do: Na parjolo si Simon, na ginoar huhut si Petrus, dohot donganna saama si Andreas; dung i si Jakobus dohot donganna saama si Johannes, i ma angka anak ni si Sebedeus; 3dung i si Pilippus dohot si Bartolomeus; si Tomas dohot si Mateus, sijalobeo i; dung i si Jakobus, anak ni si Alpeus, dohot si Tadeus; 4dung i si Simon, halak Kana, dohot si Judas Iskariot, parjehe i. 5Na sampuludua ondeng ma disuru Jesus, dipatihi ma nasida, ninna ma: Unang tondong hamu dalan na tu halak sipelebegu, jala unang topot hamu tu huta ni halak Samaria! 6Tu angka birubiru na mago na sian pinompar ni halak Israel sambing ma hamu laho! #Mat 15:24; Ul 13:46 7Alai borhat ma hamu mamaritahon hata on: Nunga songgop harajaon banua ginjang i! #Mat 3:2, 4:17; Luk 10:9 8Pamalum hamu ma sahit ni na marsahit, pangolu hamu ma angka na mate, ias ma bahen hamu angka na huliton, pabali hamu ma angka sibolis! Sibasabasa do i tu hamu; antong, basabasahon hamu ma i! #Ul 20:33 9Unang ma sarihon hamu hian sere, manang perak, manang hepeng tu hohosmuna, 10manang singkop siboanon tu pardalanan, manang ulos dua, songon i nang sipatu manang tungkot pe; ai tama do dapotan bohalna pangula. #1Tim 5:18 11Alai laho mambongoti huta manang sosor pe, diori hamu ma disi halak na tama soranganmuna, jadi disi ma hamu manongtong, paima borhat muse. 12Jala laho mambongoti jabu i, tabii hamu ma nasida! #Luk 10:5-6 13Laos songgop ma damemuna tu isi ni jabu i, anggo na tama nasida manjalosa; alai molo so i, mulak ma tu hamuna damemuna i. 14Jadi anggo so dijangkon nasida hamu manang so olo tumangihon hatamuna, tadingkon hamu ma bagas dohot hutanasida, laos pirpirhon hamu ma dompak nasida nang orbuk na lohot di patmuna! #Ul 13:51, 18:6 15Situtu do na hudok on tu hamu: Numeang do sitaonon ni luat Sodom dohot Gumora di ari uhum sogot, unang huta ondeng. #Mat 11:24; Luk 20:47 16Husuru do hamu songon birubiru tu tongatonga ni angka babiat; dibahen i pantas ma hamu marroha songon ulok, huhut lidang ma rohamuna songon darapati! #Luk 10:3; Rom 16:19; Eps 5:15
(Ay. 10:17-22; patud. Mrk 13:9-13; Luk 21:12-17)
17Jaga ma hamu di angka jolma, ai pasahatonna do hamu tu angka paruhuman, jala linsinganna do hamu di angka parguruannasida. #Mat 24:9 18Toguonnasida do hamu tu jolo ni angka panggomgomi dohot tu jolo ni angka raja ala ni Ahu, bahen panindangion tu nasida dohot tu angka sipelebegu. #Mat 24:14; Ul 25:23, 27:24 19Alai jumpa dipajongjong nasida hamu, unang ma holsoan rohamu di sidohononmuna i, ai di na sangombas i do lehononna tu hamu hata sidohononmuna i. #Luk 12:11-12 20Ai apala hamu na mandok hata disi; Tondi ni Amamuna do marturasi di bagasan hamu. #1Kor 2:4 21Pasahaton ni hahana do anggina tu hamatean, jala pasahaton ni amaama do anakna; jala na hehe do angka anakkon dompak natorasna, laho pabunuhonsa. #Mat 10:35 22Hosoman ni saluhut jolma do hamu ala ni Goarhu; alai nasa na manahan ro di ujungna, i do paluaonna! #Mat 24:13 23Ia dilele nasida hamu sian huta na sada, maporus ma hamu tu huta na asing, ai na tutu do na hudok on tu hamu: Ndang sanga topotonmuna sude huta na di tano Israel, nunga ro Anak ni jolma i. #Mat 16:28 24Apala sumurung anak sisean sian guruna, manang naposo sian indukna. #Luk 6:40; Joh 13:16, 15:20 25Nunga antong jadi di anak sisean i, molo songon na di guruna di ibana; nang di naposo, molo songon na di indukna di ibana. Molo digoar halak nampuna bagas si Belsebul, lam tu donganna sajabu ma, lam so dohononna sisongon i! #Mat 12:24
(Ay. 10:26-33; patud. Luk 12:2-9)
26Unang ma habiari hamu nasida, ai ndang adong na holip, na so sipapataron sogot; jala ndang adong na buni, na so dapot botoon sogot. #Mrk 4:22; Luk 8:17 27Na hupaboa tu hamu di na holom, hatahon hamu ma i di na tiur; na huhusiphon tu pinggolmuna, baritahon hamu ma i di angka partungkoan! 28Unang pola mabiar hamu mida angka na mambunu daging, angka na so tuk mambunu tondi; alai na marhuaso mangagohon daging dohot tondi tu na roko, i do sihabiaranmuna. #Jak 4:12 29Nda digadis halak dua amporik arga sauang? Alai ndang madabu nanggo sada sisongon i tu tano, anggo so binoto ni Amamuna. 30Ianggo di hamu, gari obuk saluhutna na di ulumuna i nunga dibilang. 31Dibahen i unang ma hamu mabiar, ai ummangat dope hamu sian torop amporik! 32Ai ganup na mangkatindangkon Ahu di jolo ni jolma, i do hatindangkononku di jolo ni Damang na di banua ginjang i; 33alai ganup na mansoadahon Ahu di jolo ni jolma, laos soadahononku do i di jolo ni Damang na di banua ginjang i! #Luk 9:26
(Ay. 10:34-36; patud. Luk 12:51-53)
34Unang ma dirimpu rohamuna, na mamboan dame Ahu, umbahen na ro tu tano on; ndada na ro Ahu mamboan dame, tung podang do! 35Ai na ro do Ahu pabadahon anak tu amana, boru tu inana, parumaen tu simatuana boru; 36jala tung donganna sajabu gabe musu ni jolma i. #Mik 7:6 37Na humolong roha di amana manang di inana asa di Ahu, ndang tama i siseanku; jala na humolong roha di anakna dohot di boruna asa di Ahu, ndang tama i siseanku. #Luk 14:26-27 38Jala na so mamorsan silang na tu ibana i, laho mangihuthon Ahu, ndang na tama i siseanku. #Mat 16:24-25 39Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot. #Luk 17:33; Joh 12:25 40Na manjangkon hamu, Ahu do jinangkonna: Jala na manjangkon Ahu, Na marsuru Ahu do jinangkonna disi. #Mat 18:5; Luk 10:16; Joh 13:20 41Na manjangkon panurirang, ala targoar panurirang, dapotan upa ni panurirang; na manjangkon partigor, ala targoar partigor, dapotan upa ni partigor. 42Na painumhon aek tabar santahu tu sahalak sian angka na metmet on, ala targoar siseanku ibana: Na tutu situtu do na hudok on tu hamu, ndang na mago upana! #Mat 25:40; Mrk 9:41
دیاریکراوەکانی ئێستا:
MATEUS Bindu 10: BBC
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Batak Toba Bible Revised Edition © Indonesian Bible Society, 1998.