ܡܬܠ̈ܐ 28
28
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ ܡܟܘܼܦܫܹܐ ܒܝܲܕ ܐ݇ܢܵܫܹ̈ܐ ܕܚܹܙܲܩܝܵܐ
1ܟܹܐ ܥܵܪܩܝܼ ܪ̈ܲܫܝܼܥܹܐ ܟܲܕ ܠܲܝܬ ܢܵܦܠܵܢܵܐ ܒܵܬ݇ܪܲܝܗܝ،
ܐܝܼܢܵܐ ܙܲܕܝܼܩܹ̈ܐ ܐܲܝܟ݂ ܐܲܪܝܵܐ ܟܹܐ ܗܵܘܝܼ ܠܸܒܵܢܹ̈ܐ.
2ܟܲܕ ܐܝܼܬ ܡܵܪܘܿܕܘܼܬܵܐ ܒܐܲܬܪܵܐ، ܪܵܒܵܐ ܟܹܐ ܗܵܘܝܼ ܫܲܠܝܼܛܘܼ̈ܗܝ،
ܐܝܼܢܵܐ ܒܝܲܕ ܐ݇ܢܵܫܵܐ ܦܲܪܡܝܼܵܢܵܐ ܘܝܵܕܥܵܢܵܐ، ܟܹܐܢܘܼܬܵܐ ܟܹܐ ܥܲܪܩܸܠܵܐ.
3ܐ݇ܢܵܫܵܐ ܣܢܝܼܩܵܐ ܘܕܛܵܠܹܡ ܠܡܸܣܟܹܢܹ̈ܐ،
ܐܲܝܟ݂ ܡܸܛܪܵܐ ܩܲܫܩܸܫܵܢܬܵܐ ܝܠܹܗ ܕܡܲܚܪܸܒ݂ܵܐ ܕܲܚܠܵܐ.
4ܡܲܚܦܸܠܵܢܹ̈ܐ ܕܢܵܡܘܿܣܵܐ ܟܹܐ ܚܵܩܪܝܼ ܠܪ̈ܲܫܝܼܥܹܐ،
ܐܝܼܢܵܐ ܢܵܛܪ̈ܵܢܹܐ ܕܢܵܡܘܿܣܵܐ ܟܹܐ ܕܵܪܫܝܼ ܥܲܡܲܝܗܝ.
5ܐ݇ܢܵܫܹ̈ܐ ܒܝܼܫܹ̈ܐ ܠܹܐ ܦܲܪܡܝܼ ܗܵܩܘܼܬܵܐ،
ܐܝܼܢܵܐ ܛܵܥܝܵܢܹ̈ܐ ܠܡܵܪܝܵܐ ܟܹܐ ܦܲܪܡܝܼ ܟܠ ܡܸܢܕܝܼ.
6ܒܘܼܫ ܨܦܵܝܝܼ ܝܠܹܗ ܡܸܣܟܹܢܵܐ ܕܚܵܕܹܪ ܒܬܲܡܝܼܡܘܼܬܹܗ،
ܡ̣ܢ ܥܲܬܝܼܪܵܐ ܒܐܘܼܪ̈ܚܵܬܹܐ ܦܟ̰ܝܼܠܹ̈ܐ.
7ܢܵܛܪܵܢܵܐ ܕܢܵܡܘܿܣܵܐ ܒܪܘܿܢܵܐ ܦܲܪܡܝܼܵܢܵܐ ܝܠܹܗ،
ܐܝܼܢܵܐ ܚܲܒ݂ܪܵܐ ܕܐ݇ܢܵܫܹ̈ܐ ܣܪ̈ܝܼܩܹܐ ܟܹܐ ܡܲܢܟܸܦ ܒܵܒܘܼܗܝ.
8ܗ̇ܘ ܕܡܲܙܝܸܕ ܥܘܼܬܪܹܗ ܒܙܵܘܕܘܼܢܝܵܐ ܘܪܸܒܝܼܬܵܐ،
ܟܹܐ ܓ̰ܲܡܸܥ ܠܹܗ ܩܵܐ ܡ̇ܢ ܕܪܲܚܸܡ ܥܲܠ ܡܸܣܟܹܢܹ̈ܐ.
9ܗ̇ܘ ܕܡܲܕܸܪ ܢܵܬܹܗ ܡ̣ܢ ܠܸܫܡܵܥܵܐ ܢܵܡܘܿܣܵܐ،
ܐܘܼܦ ܨܠܘܿܬܹܗ ܛܲܡܐܘܼܬܵܐ ܝܠܵܗ̇.
10ܗ̇ܘ ܕܡܲܚܠܸܛ ܬܪ̈ܘܼܨܹܐ ܒܐܘܼܪܚܵܐ ܒܝܼܫܬܵܐ،
ܒܓܘܼܒܵܐ ܕܓܵܢܹܗ ܒܸܬ ܢܵܦܹܠ،
ܐܝܼܢܵܐ ܬܲܡܝܼܡܹ̈ܐ ܒܸܬ ܝܵܪܬܝܼ ܛܵܒ݂ܬܵܐ.
11ܐ݇ܢܵܫܵܐ ܥܲܬܝܼܪܵܐ ܚܲܟܝܼܡܵܐ ܝܠܹܗ ܒܥܲܝܢܹ̈ܐ ܕܓܵܢܹܗ،
ܐܝܼܢܵܐ ܡܸܣܟܹܢܵܐ ܦܲܪܡܝܼܵܢܵܐ ܟܹܐ ܝܵܕܹܥ ܐܸܠܹܗ.
12ܟܲܕ ܦܵܨܚܝܼ ܙܲܕܝܼܩܹ̈ܐ ܟܹܐ ܙܵܐܹܕ ܚܸܩܪܵܐ،
ܐܝܼܢܵܐ ܟܲܕ ܩܵܝܡܝܼ ܪ̈ܲܫܝܼܥܹܐ ܟܹܐ ܛܲܫܝܼ ܠܵܗ̇ ܓܵܢܲܝܗܝ ܐ݇ܢܵܫܹ̈ܐ.
13ܗ̇ܘ ܕܟܲܣܹܐ ܓܢܵܗܘܼ̈ܗܝ ܠܹܐ ܡܲܢܬܹܐ،
ܐܝܼܢܵܐ ܗ̇ܘ ܕܡܵܘܕܹܐ ܘܫܵܒܹܩ ܠܗܘܿܢ ܒܸܬ ܡܲܫ݇ܟ̰ܸܚ ܪ̈ܲܚܡܹܐ.
14ܛܘܼܒ݂ܵܐ ܠܐ݇ܢܵܫܵܐ ܕܗܵܘܹܐ ܒܙܕܘܼܥܬܵܐ ܒܟܠ ܥܕܵܢܵܐ،
ܐܝܼܢܵܐ ܗ̇ܘ ܕܡܲܩܫܹܐ ܠܸܒܹܗ ܒܸܬ ܢܵܦܹܠ ܓܵܘ ܒܝܼܫܬܵܐ.
15ܐܲܪܝܵܐ ܓܲܪܓܸܡܵܢܵܐ ܘܕܸܒܵܐ ܫܘܼܠܛܝܼܬܵܐ ܝܠܹܗ
ܫܲܠܝܼܛܵܐ ܪܲܫܝܼܥܵܐ ܥܲܠ ܥܲܡܵܐ ܡܸܣܟܹܢܵܐ.
16ܚܣܝܼܪ ܦܲܪܡܵܝܬܵܐ ܝܠܹܗ ܡܗܲܕܝܵܢܵܐ ܕܪܵܒܵܐ ܛܵܠܹܡ،
ܐܝܼܢܵܐ ܣܵܢܝܵܢܵܐ ܕܚܛܘܼܦܝܵܐ ܒܸܬ ܡܲܪܝܸܟ݂ ܝܵܘܡܵܢܘܼ̈ܗܝ.
17ܐ݇ܢܵܫܵܐ ܕܐܸܢܝܲܬܹܗ ܓ̰ܲܢܓ̰ܘܼܪܹܐ ܝܠܵܗ̇ ܒܘܼܬ ܫܦܵܟ݂ܬܵܐ ܕܕܸܡܵܐ
ܗܲܠ ܓܘܼܒܵܐ ܒܸܬ ܥܵܪܹܩ، ܠܵܐ ܗܲܝܸܪܝܼ ܠܹܗ.
18ܗ̇ܘ ܕܚܵܕܹܪ ܒܬܲܡܝܼܡܘܼܬܵܐ ܒܸܬ ܦܵܐܹܫ ܦܘܼܪܩܵܐ،
ܐܝܼܢܵܐ ܗ̇ܘ ܕܦܟ̰ܝܼܠܵܐ ܝܠܹܗ ܒܐܘܼܪ̈ܚܵܬܹܗ ܒܸܬ ܢܵܦܹܠ ܚܲܕ ܒܚܲܕ.
19ܗ̇ܘ ܕܦܵܠܹܚ ܐܲܪܥܹܗ ܒܸܬ ܣܵܒܹܥ ܒܠܲܚܡܵܐ،
ܐܝܼܢܵܐ ܗ̇ܘ ܕܢܵܦܹܠ ܒܵܬ݇ܪ ܣܪܝܼܩܘܼܬܵܐ ܒܸܬ ܣܵܒܹܥ ܒܡܸܣܟܹܢܘܼܬܵܐ.
20ܐ݇ܢܵܫܵܐ ܡܗܘܼܡܢܵܐ ܪܵܒܵܐ ܝܢܵܐ ܒܘܼܪ̈ܟܵܬܹܗ،
ܐܝܼܢܵܐ ܗ̇ܘ ܕܡܲܠܝܸܙ ܠܸܗܘܵܝܵܐ ܥܲܬܝܼܪܵܐ ܠܹܐ ܗܵܘܹܐ ܙܲܟܵܝܵܐ.
21ܚܙܵܝܬܵܐ ܕܦܵܬܵܐ ܠܹܐ ܝܠܵܗ̇ ܨܦܵܝܝܼ،
ܐܝܼܢܵܐ ܒܘܼܬ ܩܸܛܥܵܐ ܕܠܲܚܡܵܐ ܒܸܬ ܥܵܒܹܕ ܓܢܵܗܵܐ ܐ݇ܢܵܫܵܐ.
22ܟܹܐ ܡܲܠܝܸܙ ܒܵܬ݇ܪ ܥܘܼܬܪܵܐ ܐ݇ܢܵܫܵܐ ܥܲܝܢܹܗ ܥܝܼܩܬܵܐ،
ܘܠܹܐ ܝܵܕܹܥ ܕܚܘܼܣܪܵܢܵܐ ܒܸܬ ܐܵܬܹܐ ܥܲܠܘܼܗܝ.
23ܗ̇ܘ ܕܡܲܢܟܸܣ ܠܒܲܪܢܵܫܵܐ، ܒܚܲܪܬܵܐ ܫܵܦܵܩܲܬ ܒܸܬ ܡܲܫ݇ܟ̰ܸܚ،
ܒܘܼܫ ܙܵܘܕܵܐ ܡ̣ܢ ܗ̇ܘ ܕܡܲܟ̰ܥܹܐ ܠܸܫܵܢܹܗ.
24ܗ̇ܘ ܕܓܵܢܹܒ݂ ܡ̣ܢ ܒܵܒܘܼܗܝ ܘܝܸܡܹܗ، ܘܐܵܡܹܪ، ”ܠܲܝܬ ܓܢܵܗܵܐ،“
ܚܲܒ݂ܪܵܐ ܝܠܹܗ ܠܐ݇ܢܵܫܵܐ ܡܲܚܪܸܒ݂ܵܢܵܐ.
25ܓܵܢܵܐ ܛܲܡܲܥܟܵܪ ܟܹܐ ܡܲܩܸܡܵܐ ܕܘܼܪܵܫܵܐ،
ܐܝܼܢܵܐ ܣܵܒܪܵܢܵܐ ܥܲܠ ܡܵܪܝܵܐ ܒܸܬ ܡܲܢܬܹܐ.
26ܣܵܒܪܵܢܵܐ ܥܲܠ ܠܸܒܵܐ ܕܓܵܢܹܗ ܣܲܟ݂ܠܵܐ ܝܠܹܗ،
ܐܝܼܢܵܐ ܚܵܕܪܵܢܵܐ ܒܚܸܟ݂ܡܬܵܐ ܒܸܬ ܦܵܐܹܫ ܦܘܼܨܝܵܐ.
27ܗ̇ܘ ܕܝܲܗ݇ܒܸܠ ܠܡܸܣܟܹܢܵܐ ܠܹܐ ܚܵܣܹܪ،
ܐܝܼܢܵܐ ܠܗ̇ܘ ܕܡܲܦܬܸܠ ܥܲܝܢܘܼ̈ܗܝ ܡܸܢܹܗ ܪܵܒܵܐ ܒܸܬ ܗܵܘܝܼ ܠܵܘܛܵܬܹ̈ܐ.
28ܒܩܝܵܡܬܵܐ ܕܪ̈ܲܫܝܼܥܹܐ ܐ݇ܢܵܫܹ̈ܐ ܟܹܐ ܛܲܫܝܼ ܠܵܗ̇ ܓܵܢܲܝܗܝ،
ܐܝܼܢܵܐ ܒܛܠܵܩܲܝܗܝ ܟܹܐ ܙܵܝܕܝܼ ܙܲܕܝܼܩܹ̈ܐ.
دیاریکراوەکانی ئێستا:
ܡܬܠ̈ܐ 28: ABTAB
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Aramaic Bible Translation Assyrian Bible © 2025 Aramaic Bible Translation