2 Kronik 4
4
Lekipman pour Tanp
1Lerwa Salomon ti fer fabrik en lotel an bronz ki ti mezir 10 met sak kote e 5 met oter. 2I ti osi fer fabrik en gran basen laform ron, an bronz ki ti mezir 5 met dyamet, i ti mezir 2 met edmi fonder e 15 met otour. 3Anba son bor ti annan dekorasyon dan laform bef; 20 bef par met kare. Zot ti form de ranze, enn par lao lot; zot ti'n ganny fonn ansanm avek leres basen. 4Sa basen ti repoz lo 12 bef an bronz, trwa lo sak kote: Trwa ti vir dan Nor, trwa ti vir dan Sid, trwa ti vir dan Was e trwa ti vir dan Les. Parti deryer sa bann bef, ti vir anndan, anba basen. 5Basen ti lepeser lanmen, son bor ti parey bor en lakoup, dan laform en flerdelis. Sa basen ti kapab kontenir anviron 120,000 lit delo. 6I ti osi fer dis kivet an bronz, e plas senk lo kote drwat e senk lo kote gos tanp. Sa ti servi pour lav bann zannimo pour sakrifis, tandis ki bann pret, ti servi sa gran basen pour bennyen.
7I ti osi fabrik dis portlanp annor, dapre lareg fikse, ki i ti plas dan Tanp: Senk lo kote drwat e senk lo kote gos. 8I ti osi fer dis latab, senk lo sak kote. I ti osi fer 100 bol annor pour aspersyon.
9Salomon ti donn lord fer en lakour zis pour bann pret, e bann laport kouver an bronz pour en gran lakour. 10Sa gran basen ki zot ti apel lanmer ti ganny plase lo kote drwat, pre avek kwen, lo Sides tanp.
11Hiranm ti osi fabrik bann sandriye, lapel, ek bol. I ti fini tou travay tanp ki Salomon ti'n donn li:
122 kolonn,
2 kornis plase anler lo kolonn,
13400 fri parey grenad, ki ti tenir avek girlann lo sak kornis,
setadir, sak girlann ti tenir 2 ranze grenad.
1410 kivet avek zot sipor,
15sa gran basen ron,
avek son 12 bef ki ti anba li,
16bann sandriye, bann lapel ek gran fourset pour lavyann.
Tousala, ti bann lekipman ki Houranm-Abi ti fabrike lo lord lerwa Salomon pour met dan tanp SENYER. Tou ti ganny fer avek bronz poli.
17Lerwa ti fer koul sa bann lobze, ant Soukot ek Seredata, ki trouv dan vale Zourden. 18Salomon ti fer fabrik en sitan gran kantite lobze, ki personn pa konn pwa total bronz ki i ti servi pour fabrik tousala.
19Lerwa Salomon ti fer osi fabrik bann lobze annor pour tanp Bondye: Lotel ek bann latab pour dipen ki ganny ofer devan Bondye; 20bann portlanp ek bann lalanp annor ki ti ganny alimen dapre lord, devan Lasal Tre Sen, 21bann fler dekorasyon, bann lalanp, ek bann penset, ti annor pir; 22bann tennywar lalanp, bol pour met disan, lansanswar, plak pour anmenn labrez, ti osi annor pir. Bann laport Tanp ek bann laport ki al dan Lasal Tre Sen ti osi kouver annor.
دیاریکراوەکانی ئێستا:
2 Kronik 4: BSK
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Labib An Kreol Seselwa © Seychelles Bible Society, 2013.