मत्ती 10
10
चुङ्ङ्य्ही प्रेरीत्माकी लक्
(मर्कुस् ३:१३-१९; ६:७-१३; लुका ६:१२-२६; ९:१-६)
1येसुचे थेङ्की डबमा चुङ्ङ्य्हीतनो तीच्छङ् ङ्होत्जेत्ज्यी, ओसेम् थेङ्यीमात म्हङ्मा ल्हब्लाबतेङ् जम्म थोइ नेत्मा फेन्न लबे अधीकार् न्हङ्जेत्ज्यी।
2चुङ्ङ्य्ही प्रेरीत्माकी मीन् चुमा य्हीन्ब- ङोन्ग्यम्लमी पत्रुस् पङ्बे सीमोन्, ओसेम् थेइ अले अन्द्रीयास्, याकुब्तेङ् युहन्न पङ्बे जब्दीयाकी जमा, 3ओसेम् फीलीप्, बार्थोलोमाइ, थोमा, तीरो दुत्पे मत्ती, याकुब् पङ्बे अल्फायस्की ज, थेदीयस्, 4र्हङ्की य्हुल्त म्होइबे सीमोन्, ओसेम् येसुत चुङ्नलपीन्बे यहुदा इस्करीयोत्।
5येसुचे चु चुङ्ङ्य्ही प्रेरीत्मात चोले कुल्ज्यीम् पीत्जेत्ज्यी, “एङ्यीमा यहुदी अय्हीन्बे म्हीमाइ गुङ्री ओसेम् सामरीमाकी ज्यीद सहर्मारी थवङो। 6तर म्हबे ग्युः र्हङ्बे इस्राएली म्हीमाजकीनो ङ्यीउ। 7ओसेम् म्हीमात ‘स्वर्गइ य्हुल् खयम्बल मुब’ पङ्ज्यीम् स्येतो। 8नबमात फेन्नलउ, स्यीबलमात सोनलउ, पुन् स्यप्पलमात फेन्नलउ, ओसेम् म्हङ्मात तेत्लाको। एङ्यीमाचे चु ओलेन्नो यङ्ज्यी, ओसेम् एङ्यीमाचेएनो ओलेनो पीन्थोब। 9एङ्यीमाचे र्हङ्की फोर्स्योरी म्हर्, म्हुइ ओसेम् स्हङ्मोइ टङएनो थनाको। 10ब्रबे बेलोरी झोल, पोयेन्, पनेइ ओसेम् दाबे बेर्कएनो थनाको, तलेपङ्सम् लक् स्य्हेङ्बलचे तोःबे स्हेः यङ्नोथोब।
11 “एङ्यीमा ज्यीद सहर् वुइ नम्स खजु ग्लारी ङ्यीलेनो हुजुरी खजु म्हील एङ्यीमात स्वागत् स्य्हेङ्बे सेम् मुज्यी म्हयो, ओसेम् हुजु ग्ला अपीत्थेन् गदे हुजु म्हीजानो टीउ। 12एङ्यीमा दीम्री वङ्बे बेलोरी ‘एत सान्ती तखइ’ पङो। 13ओसेम् हुजु दीम्की म्हीमाचे स्वागत् स्य्हेङ्ज्यी पङ्सम् सान्ती हुजुरी तस्ये मुब। तर थेङ्यीमाचे स्वागत् अस्य्हेङ्ज्यी पङ्सम् एङ्यीमाकी सान्ती एङ्यीमातेङ्नो दोःखस्ये मुब। 14खल्चे पङ्लेनो एङ्यीमात स्वागत् अस्य्हेङ्ज्यी, ओसेम् एङ्यीमाकी तम् अङ्येन्ज्यी पङ्सम् हुजु ग्ला ग्यम्से डोङ्बे बेलोरी एङ्यीमाचे कङ्की बुफ्र तथेनो#१०:१४ कङ्की बुफ्र तथेनो- कङ्की बुप्फ्र थेमात चेतावनीकी लागीरी तथेनो पङ्बलमी पर्मेस्वर्चे हुजु ग्लाकी म्हीमात सजाय न्हङ्जेत्स्ये मुब। तलेपङ्सम् थेङ्यीमाचे थेङ्की डबमातेङ् फ्रोइत बीस्वास् अल।। 15ङ एङ्यीमात देमेन्नो पङ्ब, न्यायकी दीन्री हुजु ग्लाकी दुख बीमम् सदोम्तेङ् गमोरा#१०:१५ सदोम्तेङ् गमोरा- पर्मेस्वर्चे चु सहर् ङ्य्हीरी मुबे म्हीमातेङ् सहर्तनो नास् स्य्हेङ्जेत्ज्यी। तलेपङ्सम् थेङ्यीमाचे य्हक्को पाप्मा स्य्हेङ्बल मुबल। सहर्की दुख नाखम्बल तस्ये मुब।
खयम्बे दुखइ बारेरी येसुचे सुङ्बल
(मर्कुस् १३:९-१३; लुका २१:१२-१७)
16 “ङ्येनो, ङ एङ्यीमात ग्युःमात फरमाकी गुङ्री पीत्प र्हङ्ले पीत्टीब। होत्तज्यीम् एङ्यीमा पुख्री र्हङ्बे चनाखो ओसेम् ढुकुर् र्हङ्बे सोझो तउ। 17होसीयार् तउ, तलेपङ्सम् एङ्यीमात म्हीमाचे चुङ्ज्यीम् अदालत्री बोर्स्ये मुब, ओसेम् यहुदीमा र्हुब् तबे दीम्मारी बोर्ज्यीम् कोर्रचे ग्यङ्स्ये मुब। 18एङ्यीमा ङइ म्ही य्हीन्बल तज्यीम् सासक्मातेङ् ग्यल्बोमाकी ङोन्ग्यम् रप्पुङ्स्ये मुब। ओसेम् एङ्यीमाचे हुजुमातेङ् यहुदी अय्हीन्बे म्हीमात ङइ बारेरी स्येत्म्यङ्स्ये मुब। 19एङ्यीमात चुङ्ज्यीम् बोर्बे बेलोरी ता पङ्स्ये ओसेम् खले पङ्स्ये बी थछेरो। एङ्यीमाचे ता पङ्स्ये बी पर्मेस्वर्चे होदे बेलोरीनो एङ्यीमात सुङ्स्ये मुब। 20तलेपङ्सम् तम् लबल एङ्यीमा तस्ये अरे, तर एङ्यीमा ग्यम्से तज्यीम् पर्मेस्वर् अपइ आत्माचे तम् लजेत्स्ये मुब।”
21 “म्हीमाचे र्हङ्की अज्यो-अलेमात सेत्परी पीन्स्ये मुब। अपचे ज-जमेमात ओसेम् ज-जमेमाचे अप-अमत सेत्परी पीन्स्ये मुब। 22एङ्यीमा ङल य्हीन्बल तज्यीम् जम्मचेनो अखोस्ये मुब। तर लीक्यम् सम्म बीस्वास्री कोङ्ज्यीम् टीबलमा थर्स्ये मुब। 23म्हीमाचे एङ्यीमात ज्यीद सहर् गीरी सतइतीज्यी पङ्सम् ल्हो-ल्हो ज्यीद सहर्री छ्योङ्य्हरो। ङ एङ्यीमात देमेन्नो पङ्ब, म्हीइ ज दोःज्यीम् युब बीम ङोन्ग्यम् एङ्यीमाचे इस्राएल्की जम्मनो ज्यीद सहर्मारी ङ्यीज्यीन्बल तस्ये अरे।
24 “डब लोप्पोन् बीम ङ्हच्छ्यङ् अय्हीन्, ओसेम् बानएनो मालीक् बीम ङ्हच्छ्यङ् अय्हीन्। 25डब र्हङ्की लोप्पोन् गदे ओसेम् बान मालीक् गदे तबरीनो तङ्थोब। थेङ्यीमाचे दीम्की न्याबोतनो म्हङ्की ग्यल्बो बाल्जीबुल्#१०:२५ बाल्जीबुल्- सैतान्की ल्हो-ल्हो मीन् बाल्जीबुल् य्हीन्ब। पङ्ब पङ्सम् दीम्की म्हेम्यमात झेन् गदे अज्यब पङ्ल?
खल्तेङ् लोङ्थोब?
(लुका १२:२-७)
26 “होत्तज्यीम् म्हीमातेङ् थलोङो, तलेपङ्सम् उप्पे तम्म जम्मनो म्रङ्स्ये मुब, ओसेम् छुम्बे तम्मा जम्मनो स्येःस्ये मुब। 27ङचे एङ्यीमात म्हुन्दुङ्री पङ्बे तम् य्हल् तबतेङ् जम्मत स्येतो, ओसेम् ङचे एङ्यीमात स्युप्तम्री पङ्बे तम् दीम्की थोकुम् जोचे प्रचार् स्य्हेङो। 28खल्चे ल्हीःतकीनो सेत्प, तर आत्मात तेएनो लअखम् थेङ्यीमातेङ् थलोङो। ल्हीःतेङ् आत्मा ङ्य्हीतनो नर्करी पीत्पखम्बे पर्मेस्वर्तेङ् लोङो। 29पइस गीरी कर् ङ्यम्ङ्य ङ्य्ही अग्युरो स्यीम्? होले ग्युर्लेनो कर् ङ्यम्ङ्य गीएनो एङ्यीमाइ अपचे थुः अलगदे सरी तइस्ये अरे। 30एङ्यीमालमी झेन् क्रइ बाएनो काकर्ले ज्यबल मुब। 31होत्तज्यीम् एङ्यीमा थलोङो, एङ्यीमा य्हक्को कर् ङ्यम्ङ्यमा बीम य्हक्को सेइल य्हीन्ब।
32 “ङत म्हीमाइ ङ्होन्सङ् स्वीकार् स्य्हेङ्बलमात ङचेएनो थेङ्यीमात ङइ स्वर्गइ अपइ ङ्होन्सङ् स्वीकार् स्य्हेङ्स्ये मुब। 33तर ङत म्हीमाइ ङ्होन्सङ् स्वीकार् अस्य्हेङ्बलमात ङचेएनो थेङ्यीमात ङइ स्वर्गइ अपइ ङ्होन्सङ् स्वीकार् स्य्हेङ्स्ये अरे।
डबचे फाथोबे सेइ
(लुका १२:५१-५३; १४:२६-२७)
34 “ङ जम्बुलीङ्री सान्ती पीन्बरी खबल बी थम्हेनो। सान्ती पीन्बरी खबल अय्हीन्, तर तर्वार् पीन्बरी खबल य्हीन्ब। 35ङ जचे र्हङ्की अपइ बीरोद् स्य्हेङ्नलबरी, जमेचे अमइ बीरोद् ओसेम् चङ्चे स्युमेइ बीरोद् स्य्हेङ्नलबरी खबल य्हीन्ब। 36म्हीइ अज्यबे सत्तुर् र्हङ्की दीम्की म्हीनो तस्ये मुब।
37 “ङत बीमम् य्हक्को र्हङ्की अप-अमत म्होइबे म्ही ङइ म्ही तबरी जेःबल अत, ओसेम् ङत बीमम् य्हक्को र्हङ्की ज-जमेमात म्होइबे म्हीएनो ङइ म्ही तबरी जेःबल अत। 38ओसेम् र्हङ्की क्रुस् नाज्यीम्#१०:३८ क्रुस् नाज्यीम्- क्रुस् नाब पङ्बलमी येसुइ लागीरी दुख नाबतेङ् स्यीबरीएनो तयार् तथोब पङ्बल य्हीन्ब। ङइ लीप्चे अब्रबे म्ही ङइ म्ही तबरी जेःबल अत। 39र्हङ्की जीवन् थर्नलब म्हइबलमाचे, थेङ्यीमाइ जीवन् म्हलास्ये मुब, तर ङइ लागीरी र्हङ्की जीवन् म्हन लबलचे जीवन् यङ्स्ये मुब।
डबचे यङ्बे बक्सीस्
(मर्कुस् ९:४१; लुका १०:१६)
40 “एङ्यीमात ग्रहन् स्य्हेङ्बलचे ङत ग्रहन् स्य्हेङ्ब, ओसेम् ङत ग्रहन् स्य्हेङ्बलचे ङत पीत्युजेत्पलत ग्रहन् स्य्हेङ्ब। 41खल्चे अगम्बक्तत अगम्बक्तनो पङ्ज्यीम् ग्रहन् स्य्हेङ्ज्यी, थेचे अगम्बक्तचे यङ्ब र्हङ्बे बक्सीस् यङ्स्ये मुब। होलेनो धर्मीत धर्मी पङ्ज्यीम् ग्रहन् स्य्हेङ्बलचे धर्मीचे यङ्ब र्हङ्बे बक्सीस् यङ्स्ये मुब। 42खल्चे ज्यीद बीम ज्यीदत ङइ डब पङ्ज्यीम् खोरेनङ् स्यीम् यी थुङ्बुङ्ल देमेन्नो थेचे बक्सीस् यङ्स्येनो मुब।”
বর্তমানে নির্বাচিত:
मत्ती 10: WTDG
হাইলাইট
শেয়ার
কপি
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
