Mithumo 27

Paulo a txi tsula Roma ngu txitimela

1Ku ti ngako ku di sungilwe ti to hi tsula Italiya ngu txitimela, Paulo ni vamwani va nga ti sungilwe kumweko nayo, va to ningelwa ka mthangeli wa dizana, a dhanwako ku i Juliyo, ya “Nyumbani ka mfumeli wa hombe” #27:1 Nyumbani ka mfumeli wa hombe: Mwendo Dizumboni ka Mkhozisi. 2Ku ti ngako hi di wulete ka txitimela txa kuta ngu Adramita, ayi yi nga ti txhatukela kuya phuho ya Aziya, hi to ñola nzila hi tsula. Hi ti ni Aristarkusi wa Tesalonika, didhoropa da Makedhoniya. 3Mangwanani ka kona, ngako hi di hokile Sidhoni, Juliyo a to mahela wuxinji Paulo, e mu tumelela kuya wonana ni vangana vakwe, ni kuamukelwa ngu vona. 4Ku ti ngako hi txi khukha haleya, hi to tsimbila ngu ligungusa la Kipra, nguko txitimela txi ti lambelwa ngu diphuho. 5Ku ti ngako hi di tshawunyetile Linene la Kilikiya, ni la Panfiliya, hi to hoka Mira, ka Likiya. 6Se mthangeli wa dizana, ngako a di mani koneyo txitimela txa kuta ngu Alexandriya, yi nga tiya Italiya, a to hi wuleta ka txona.

7Kambe ngako hi nga ti tsimbila ngu kudotho-kudotho, masiku o tala, hi to hoka ngu kukarateka hafuhi ni Kinidha; se ngako diphuho di nga ti hi lambela, hi to vayilela Kreta ngu didhawa da Salmona. 8Ku ti ngako hi di longolokile ngu ligungusa ngu kukarateka, hi to hoka ahawa kudhanwako ku “Txithoni ko Tshura,” hafuhi ni didhoropa da Laseya. 9Yi di pindile mbimo yo lapha, kutsimbila ngu txitimela ku ti ni phango, nguko hambi ditshiku da hombe da kutitona sakudya di ti pindile. Paulo a to va laya, 10a txi khene: “He manuwe, ni wona ti to dipfhumba diya di na va ni phango ni kuluzekelwa ka hombe, i si nga ka thundu ni txitimela dwe, aniko ni wona wutomi wathu.” 11Hambi keto, mthangeli wa dizana yi to engisa ta mtsimbitisi wa txitimela ni nyamne wa yona, kupinda ti ti wombwako ngu Paulo. 12Kambe ngako txitho txi nga ti sa lulama kutemela ka txona ngu mbimo ya wuxika, vavangi va ti ti kha vona i txhuko kuduketa kuya fungala masiku a wuxika va di Fenikisi, i ku txitho txa Kreta, txi nga dingetana ni wulenge ka kuya wulambwe, ni wulenge ka kuya wuphemba.

Txihuhuri txi nga humelela lineneni

13Ku ti ngako diphuho da wulambwe di di khatile kufuteta kha kwati, va to alakanya ti to va mani txi va nga ti vilela txona. Va to khukha ve longoloka ngu ligungusa la Kreta.

14Kambe kunukunuko ku to wuka diphuho da txivhungwavhungwani, da kuta ngu txitondoloni, diphuho di di dhanwako ku i Euroakiloni. 15Se ngako txitimela txi nga ti susumetwa ngu diphuho, txi to tandeka ku di xula, hi to txi leka txi londeta moya. 16Ku ti ngako hi di longolokile, na hi txi vhikelwa ngu tximwani txitondoloanyana txi txi dhanwako ku i Kawudha, ngu kukarateka hi zile hi sikota ku ndindela txingalavana txo lumukela phango hi txi wuyisa txitimelani ka hombe. 17Msana ka kuva hi di txi hayekile txitimwi, hi to lava tinszila, hi sungelela txitimela ngu majoke; se ngu kuthava kuya khima ha mafuni ka Siriti, hi to phutela matanga, hi ya masoni ngu kulondeta moya. 18Mangwanani ka kona, ngako hi nga ti pekwa ngutu ngu diphuho, da txihuhuri, va to wungela thundu ya txitimela ve tshotsha. 19Se ngu ditshiku da wuraru, vatxungeli va txitimela va to tshotsha ngu manza awe siya sa txitimela. 20Ngako ku nga ti si woneki ditambo hambi tinyeleti ka masiku o tala, na txihuhuri txi ya masoni ngu kupeka ngu mtamo, hi to gumelwa ngu kuthemba kotshe ku hi nga ti nako ka kuhuluka.

21Ku ti pindile masiku amangi hi si dyi txilo. Konako Paulo a to khukha a txi ema hagari kwawe, a txi khene: “He manuwe, idiku mi ti ni engisile, mi si khukhi Kreta, nga hi sa humelelwa ngu phango yiya ni kuluza kuwa ka hombe. 22Hambi keto, na mi laya konkuwa ti to mi si gumi mtamo, nguko awalo ni mmweyo kwanu a no luzekelwa ngu wutomi wakwe; txitimela ngu yona yi no luzeka dwe. 23Nguko ka wona wusiku wuwa, Ngelozi ya Txizimu, atxi ani ni lumbako txona, atxi ni txi thumelako, yi ti wonekisile kwangu, wusiku wuwa, 24yi txi kha yona: ‘U nga thave, Paulo! U fanete kuhoka masoni ka Khezari; wona, Txizimu txi vekile manzani kwako wutomi wa votshe va u endako navo mu txitimelani.’ 25Ngu toneto, manuwe, tsanisani misana. Ni na ni txithembo ka Txizimu, ti to ti na maheka nga ti txi nga ni gelisa tona. 26Se hi fanete kuya tshotshwa txitondoloni kokari.”

Txitimela txi phatulelwa ngu mavimbi

27Ka wusiku wa ditshiku da wugumi ni mune, na hi txi pengapengiswa lineneni ka Adriya, vatxungeli va txitimela va to pimisa, hagari ka wusiku, ti to va hafuhi ni mabambe. 28Ngako va txi pima kueta ka mati, va to mana magumi mambidi wa tipimo to pima ngu diwoko; va di yite masoni va to engeta ve pima, ve mana digumi da mipimo ni mtxhanu. 29Ngu kuthava ti to hi nga thuka hi khwekela siwindini ka linene, vona va to rinza mune wa tihangi matini, na hi txi wonelela kutxa. 30Kambe vatxungeli va ti lava kuthava; ngu toneto va to txhikisa txingalavana, va txi nga vo lava kugwimba tingoti ta tihangi ta masoni ka txitimela. 31Se Paulo a txi gela mthangeli wa dizana ni masotxhwa, a txi khene: “Ngako vona va si zumbi txitimelani, kha mi na kuhuluka.”

32Sekoko masotxhwa ma to wila majoke a txingalavana, se me txi leka txi txi wa. 33Ngako va di ngadi va txi verela kutxa ka dona, Paulo a to gela votshe ti to ve dya sakudya, a txi khene:

“Nyamsi ditshiku da wugumi ni mune mi di tsanisete, mi ti tona sakudya, mi si dyi txilo. 34Na mi khongotela ti to mi dya sakudya, nguko ngu tona ti ti no mi hanyisa. Kha ku na mbi luzeka hambi i di msisi wumwewo wa ha msungo kwanu.” 35Ngako a di wombile tiya, a to teka dipawu e bonga Txizimu masoni ka votshe, e di bhanda e khata kudya. 36Se votshe va to henemene ve dya sakudya, ni vona. 37Se ngako va txi balwa votshe va va nga ti txitimelani, i ti ti 276. 38Ngako va di khuri ngu sakudya, va to hehukisa txitimela ngu kuhungula fulaho ve tshotsha lineneni. 39Ngako di di txite, vatxungeli va to timelelwa ngu ditiko di va nga ti ka dona; va to wona disonga di nga ti ni mtxhefa, se ve pimisa kususumetela koneyo txitimela, ngako ti txi koteka. 40Va to thukunyula tihangi ve ti leka matini, ve thukunyula kambe ni tingoti ta mphesu wa txitimela. Msana keto, va to gwimba ditanga da hombe, ve tsimbitiswa ngu diphuho kala ligungusani. 41Se ngako txitimela yi di khimile ha mafuni, hagari ka tidhonga timbidi, yi to khwekela. Khana ya txitimela, ngu kukhwekela ngu mtamo, yi to ñolwa yi si dekadeki; se mmidi wa txitimela wu txi funyekela ngu mtamo wa mavimbi.

42Sekoko masotxhwa ma to pimisa kudaya sibotxhwa, ma txi kha ona: Simwani si nga thava ngu kusambela. 43Aniko mthangeli wa dizana, ngu kulava kuhulukisa Paulo, yi to va tsimbisa kumaha eto: Yi to womba ti to ava va sikotako kusambela va na thange vona ve bhumwala matini, ve sambela ve huma; 44Ava va nga sala, va na ti vhune ngu mapulango, mwendo ngu sipepu sa txitimela. Ngu toneto, votshe va to huluka ve huma va txi hanya.

বর্তমানে নির্বাচিত:

Mithumo 27: BEC2016

হাইলাইট

তুলনা করুন

কপি