मत्ती 11

यीशु ते यूहन्ना बपतिस्मो देनेबालो

(लूक. 7:18-35)

1ज़ैखन यीशुए अपने 12 चेलन हुक्म दित्तो, त तै तैट्ठां च़लो जेव, ताके चेलां केरे नगरन मां गेइतां शिक्षा दे ते प्रचार केरे।

2यूहन्ना नेबे कैदखाने मां मसीहेरे कम्मां केरे बारे मां शुन्तां तैस कां अपने चेले इन पुछ़ने भेज़े। 3तैनी तैन सेइं ज़ोवं, “एजनेबालो मसीह तू आस, ज़ेसेरे बारे मां परमेशरे वाधो कियोरोए, या आस केन्ची होरि बलगम?” 4यीशुए तैन जुवाब दित्तो, “ज़ैन किछ तुस शुन्तन ते लहतथ तैन गेइतां यूहन्ना सेइं ज़ोथ। 5कि काने लहतन, ते टोन्टे च़लतन, ते कोढ़ी केरू कोढ़ शुद्ध भोते, ते टोंऊने शुन्तन, ते मुड़दे ज़ींते भोतन, ते गरीबन खुशखबरी शुनाई गातीए 6परमेशर तैस बरकत देते, ज़ै मीं पुड़ शक न केरे।”

7ज़ैखन यूहन्नारे चेले तैट्ठां च़ले जे, त यीशु लोकन सेइं यूहन्नारे बारे मां ज़ोने लगो, “तुस सुनसान ठैरी कुन हेरने जेवरे थिये? कुन हवाई सेइं हिलते निरैठरे डाले? 8त फिरी होरू कुन हेरने जोरे थिये? माघां लिगड़ां लेइतां कोई? हेरा ज़ैन माघां लिगड़ां लेइतां भोतन तैना राज़ मेहलन मां रातन। 9फिरी तुस कुन हेरने जेवरे थिये? कुन कोई नेबी? हाँ पन अवं तुसन सेइं ज़ोताईं कि नेबी करां भी बड्डे हेरने जेवरे थिये। 10ई तैए यूहन्ना आए ज़ेसेरे बारे मां परमेशर पवित्रशास्त्रे मां ज़ोते,

कि हेरा, ‘अवं अपने बिस्तार देनेबालो तीं अग्री भेज़ताईं,

ज़ै तेरे लेई बत तियार केरेलो।’”

11अवं तुसन सेइं सच़ ज़ोताईं, कि ज़ै कुआन्शन करां ज़र्मोरोए तैन मां यूहन्ना बपतिस्मो देनेबाले करां कोई बड्डो नईं भोवरो, पन ज़ै सुर्गेरे राज़्ज़े मां निकड़े करां निकड़ोए तै तैस करां भी बड्डोए। 12यूहन्ना बपतिस्मो देनेबालेरे दिहाड़न करां अज़ तगर प्रचार भोइ राहोरोए, ते सुर्गेरू राज़ जल्दी बधने लगोरूए, पन बड़े निग्गर लोक तैस पुड़ हमलो केरतन। 13सारे नेबी केरे लेख, ते मूसेरो कानून यूहन्ना तगर भविष्यिवाणी केरते राए। 14अगर तुस चाथ ते मन्नथ, एलिय्याह ज़ेसेरे बारे मां नेबेईं ज़ोवरू थियूं, कि तै एजनेबालो थियो तै ईए। 15ज़ै कोई समझ़नू चाते, तै ध्याने सेइं शुने ते समझ़े। 16“अवं इस ज़मानेरे लोकां केरि मिसाल केस सेइं देईं, इना तैन मट्ठां केरे ज़ेरेन ज़ैना बज़ारन मां बिशतां अपने दोस्तन सेइं शिकायत केरतन, 17कि असेईं तुश्शे लेई बाज़ो बज़ाव, ते तुस न नच़्च़े, ते असेईं शोग कियो ते तुसेईं छाती न पिट्टी। 18किजोकि यूहन्ना बपतिस्मो देनेबालो#11:18 यूहन्ना: यूहन्ना टिट्टां ते जंगली माछ़ी खातो थियो। जादे तर बरत रखतो थियो, ते शराब न थियो पीतो, ते तैना तैस जो ज़ोतन कि एस पुड़ भूतेरो सैयो आए। 19ते मैन्हेरू मट्ठू यानी अवं खातो पीतो अव, हेरा, ते तैना ज़ोतन पेटू ते शराबी मैन्हु ते चुंगी नेनेबाले ते पापी लोकां केरो दोस्त, पन अक्लमन्द कौने तैसेरे कम्मेईं सेइं पतो च़लते।”

अविश्वासे पुड़ अफ़सोस

(लूक. 10:13-15)

20तैखन यीशु फिरी तैन नगरन मां गेइतां तैट्ठेरे लोकन झ़िड़कतां ज़ोने लगो, ज़ैन मां तैनी चमत्कार कियोरे थी, पन तैनेईं अपने पापन करां मन न फिराव। 21“हे खुराजीन नगरेरे लोकव! तुसन पुड़ अफ़सोस, हे बैतसैदा नगरेरे लोकव तुसन पुड़ अफ़सोस, कि ज़ैना चमत्कार तुसन मां किये, अगर एना चमत्कार सूर ते सैदा नगरन मां कियोरे भोथे, त तैन लोकेईं केइसेरे देंतेरी टाट पलेटतां ते मांज़नी मां बिशतां#11:21 टाट पलेटतां ते मांज़नी मां बिशतां: बड़े पेइले लोक टाट पलेटतां ते मांज़नी मां बिशतां अपने पापन करां मन फिराते थी। अपने पापन करां मन फिरावरो भोथो। 22पन अवं तुसन सेइं ज़ोताईं, कि न्यायेरे दिहाड़े परमेशर, ज़ै सज़ा सूर ते सैदा नगरां केरे लोकन देलो, तुश्शी सज़ा तैस करां भी जादे भोल्ही। 23ते हे कफरनहूम नगरेरे लोकव, कुन तुस सोचतथ कि सुर्गे मां तुश्शी आदर भोनीए! नईं तुस त नरके गाले ज़ैड़ी पापी लोकन सज़ा मैल्हेली! किजोकि ज़ैना चमत्कार तुसन मां किये, अगर मीं एना सदोम नगरे मां कियोरे भोथे त सदोम नगर अज़ तगर भी भोनू थियूं। 24पन अवं तुसन ज़ोतां कि न्यायेरे दिहाड़े परमेशर ज़ै सज़ा सदोम नगरेरे लोकन देलो, तुश्शी सज़ा तैस करां भी जादे भोल्ही।”

बोझे मां दबोरे लोकां केरे लेई आराम

(लूक. 10:21-22)

25तैखन यीशुए ज़ोवं, “हे बाजी, सुर्ग ते धेरतरे प्रभु, अवं तेरू शुक्र केरतां कि तीं एना गल्‍लां अक्लमन्द ते समझ़दार लोकन करां छ़ुपेइतां रेखी ते तैन लोकन पुड़ बैंदी की, ज़ैना निक्‍के बच्‍चां केरे ज़ेरे आन। 26हाँ, हे बाजी तीं एन्ने रोड़ू लग्गू।

27“मेरे बाजेईं सब किछ मेरे सुपुर्द कियोरूए; कोई होरो मट्ठे#11:27 मट्ठे: मट्ठे यानी यीशुए न ज़ांने, सिर्फ बाजी ज़ानते; कोई बाजी#11:27 बाजी: बाजी मतलब परमेशर। न ज़ांने सिर्फ मट्ठू ज़ानते, या तै मैन्हु बाजी ज़ानते ज़ैस पुड़ मट्ठू बांदो केरने चाए।

28“हे मेहनत केरनेबाले#11:28 मेहनत केरनेबाले लोकव, ते भारे सेइं थकोरे लोकव मीं कां एज्जा; अवं तुसन आराम देइलो। 29मेरे अधीन एन्च़रे भोथ ज़ेन्च़रे दांत जूंए हैठ भोते, ते ज़ैन किछ अवं तुसन शिखालताईं तैस शिख्खा, किजोकि अवं हलीम आईं ते दिलेरो नम्र आईं ते तुश्शी जानी आराम मैल्हेलो। 30ज़ै भार अवं तुसन देइलो तै पोल्‍लोए, तुस तैस आरामे सेइं छ़ुई सकतथ।”

বর্তমানে নির্বাচিত:

मत्ती 11: BHDNT

হাইলাইট

তুলনা করুন

কপি