उत्पत्ति 8
8
पैनेरी हड़ाई बन्द भोनी
1परमेशरे नूह ते ज़ेत्रे जंगली जानबर ते पैलतू जानबर तैस सेइं साथी ज़िहाज़े मां थिये, तैना सब याद किये: ते परमेशरे धेरती पुड़ हवा च़लाई, ते पानी घटने लग्गू। 2डुग्घे समुन्दरेरे चशमे ते अम्बरेरी दैरी बंद भोइ जेई; ते तैस सेइं ज़ै झ़ड़ी भोती थी तै भी रुकी जेई। 3ते 150 दिहाड़ना बाद पानी धेरती पुड़ां लगातार घटने लग्गू। 4तैस सालेरे सत्तोवं महीनेरे सतारोवं दिहाड़े, ज़िहाज़ अरारात नंव्वेरे पहाड़े पुड़ रुकी जेवं। 5ते पानी दशोवं महीने तगर घटतू जेवं, ते दशोवं महीनेरे पेइले दिहाड़े, पहाड़ां केरि च़ोटां लेइहोने लेगि।
6फिरी एरू भोवं कि 40 दिहाड़ना बाद नूहे ज़ैन ज़िहाज़ बनेवरू थियूं तैसेरी दारी खोलतां, 7अक कंव्व उडारू: ज़ांतगर पानी धेरती पुड़ेरां शुक्की न जेवं, तांतगर कंव्व इरां-उरां फिरतू रावं। 8फिरी नूहे एप्पु करां अक कबूतरी भी उडारी कि हेरे कि पानी धेरती पुड़ां घट भोवं कि नईं। 9तैस कबूतरी अपने पव रखनेरे लेई कोई ठार न मैल्ही, त तै तैस कां ज़िहाज़े मां वापस अई: किजोकि सैरी धरती पुड़ पानी-पानी थियूं तैखन नूहे अपनो हथ अग्रोवं केरतां तै एप्पु कां ज़िहाज़े मां नेही। 10फिरी होरे सत दिहाड़न तगर बेलगतां, तैने तैए कबूतरी ज़िहाज़े मरां फिरी उडारी। 11ते कबूतरी ड्लवझ़रे मौके तैस कां अई, त कुन हेरू कि तैसेरी च़ुंच़ी मां ज़ैतूनेरू अक नंव्वू पट्लोवे; एन हेरतां नूहे पतो लग्गो, कि पानी धेरती पुड़ेरां घेटी जेवरूए। 12फिरी तैने सत दिहाड़े होरे बेलगतां तैए कबूतरी फिरी उडारी; ते तै तैस कां फिरी कधे वापस न अई।
13नूहेरी उमरारे 601 सालेरे पेइले महीनेरे पेइले दिहाड़े पानी धेरती पुड़ेरां शुक्की जेवं। तैखन नूहे ज़िहाज़ेरी छत पुटतां कुन हेरू कि ज़मीन शुकोरीए। 14ते दूइयोवं महीनेरे#8:14 दूइयोवं महीनेरे पैनेरी हड़ाई अरे अक साल ते दश दिहैड़ना बाद सताइयोवं दिहाड़े ज़मीन पूरे तरीके सेइं शुक्की जेई।
परमेशरेरो करार
15तैखन परमेशरे नूहे सेइं ज़ोवं, 16“तू अपने मट्ठन, कौन्शी ते नुशन सने ज़िहाज़े मरां निस्सी एई। 17कुन च़ुड़ोलू, कुन जानबर, कुन सब किसमेरे रेंगनेबाले जीप ज़ैना धेरती पुड़ पेटेरे भारे च़लने बालेन; ज़ेत्रे तीं सेइं साथी जीप जन्तू आन, तैना सब एप्पु साथी केढतां एई कि धेरती पुड़ तैन सेइं बड़े बच्चे पैदा भोन; ते तैना फुल्लन-फलन, ते धेरती पुड़ फैली गान।” 18तैखन नूह ते तैसेरां मट्ठां ते कौन्श ते नुश्शां, निस्सी एई। 19ते सब च़ेवर ज़ंघन बाले जानबर, पेटेरे भारे च़लनेबाले जीप, ते च़ुड़ोलू, ते ज़ेत्रे जीप जन्तू धेरती पुड़ च़लतन-फिरतन, सेब्भी किसमां केरे आन ज़िहाज़े मरां बेइर आए।
नूह होमबलि च़ाढ़ते
20तैखन नूहे यहोवारे लेई अक वेदी बनाई ते सब शुच्चे जानबरन, ते सब शुद्ध च़ुड़ोलन मरां, किछ-किछ नेइतां वेदी पुड़ होमबलि कियां। 21इस पुड़ यहोवाए खुश केरनेबाले खुशबू मैलतां सोचू, “इन्सानेरे वजाई सेइं अवं फिरी कधे धेरती जो लानत न देइलो, हांलाकि इन्सानेरे मने मां बचपनेरे देइतां ज़ैन किछ पैदा भोते तैन बुरू भोते; फिरी भी ज़ेरे मीं सब जीप हुन्ना मारोरेन, तेन्च़रे तैन फिरी कधे न मैरेलो। 22अज़्ज़ेरे बाद ज़ांतगर धरती बनोरी राहेली, तांतगर फसल बेनेरे ते कटनेरे वक्त, ठंड ते गर्मी, ते रितरी दिहाड़े, ते हिवंतड़ेरे दिहाड़े, दिहाड़ी ते रात, लगातार च़लते राले।”
বর্তমানে নির্বাচিত:
उत्पत्ति 8: BHDNT
হাইলাইট
কপি
তুলনা করুন
শেয়ার
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
