उत्पत्ति 35
35
याकूबेरू बेतेले जो वापस एजनू
1थोड़े दिहाड़ना बाद परमेशरे याकूबे सेइं ज़ोवं, “इट्ठां निस्तां बेतेल नगरे जो च़लो गा, ते तैड़ी रेइयां; ते तैड़ी परमेशरेरे लेई अक वेदी बना, ज़ैनी तीं तैस वक्ते दर्शन दित्तेरू थियूं, ज़ैखन तू अपने ढ्ला एसावेरे डरे सेइं नश्शोरो थियो।” 2तैखन याकूबे अपने टब्बरे सेइं, ते तैन सेब्भन भी ज़ैना तैस सेइं साथी थिये, ज़ोवं, “तुश्शे दरमियान ज़ैना बखले देबतां केरि मूरतिन, तैन केढतां शारा; ते अपने आपे शुच्चे केरतां अपना धोवरां लिगड़ां लाथ; 3ते एज्जा, अस इट्ठां निस्तां बेतेल नगरे जो गाम; तैड़ी अवं परमेशरेरे लेई अक वेदी बनेइलो, ज़ैनी दुखेरे दिहाड़े मेरी प्राथना शुनी, ते ज़ैस बत्तां अवं च़लतो थियो, तैस मां तै मीं सेइं साथी राव।” 4एल्हेरेलेइ तैनेईं ज़ेत्रे बखले देबते ते कन्नां केरे कुण्डल तैन कां थिये, तैना सब याकूबे कां दित्ते, ते तैनी तैना सब बंज़ेरे बुट्टे हैठ दब्बे, ज़ै ठार शेकेमेरे नेड़े।
5तैखन तैना अग्रोवं च़ले ते तैन केरे च़ेवरे पासां केरे नगरां केरे रानेबाले लोकन मां परमेशरेरी तरफां एरहो डर पैदा भोव, कि तैनेईं याकूबेरे मट्ठां केरो पीछो न कियो। 6याकूब ते ज़ैना तैस सेइं साथी थिये, तैना कनान मुल्खेरां लूज नगरे जो च़ले जे। तैस नगरे जो बेतेल#35:6 बेतेल बेतेलेरो परमेशर भी ज़ोतन। 7तैड़ी तैनी अक वेदी बनाई, ते तैस ठारारू नवं एल-बेतेल#35:7 एल-बेतेल मतलब बेतेलेरो परमेशर। रख्खू; किजोकि ज़ैखन तै अपने ढ्लाएरे डरे सेइं नेश्शी जेवरो थियो तैखन परमेशर तैस पुड़ तैड़ी बांदो भोवरो थियो। 8तैखन रिबकारी घाई भी ज़ेसेरू नवं दबोरा थियूं मेरि जेई, ते तैस बेतेलेरे बंज़ेरे बुट्टे हैठ मित्ती दित्ती, ते तैस बंज़ेरे बुट्टेरू नवं अल्लोनबक्कूत#35:8 अल्लोनबक्कूत मतलब इन बुट्टे हैठ दबनेरे बारे मां हिराते। रख्खू।
9फिरी याकूबे पद्दनरामेरां एजनेरां बाद परमेशरे दूइयोवं फेरे दर्शन देइतां तैस बरकत दित्ती। 10ते परमेशरे तैस सेइं ज़ोवं, “हुन्ना तगर त तेरू नवं याकूब राहोरूए; पन अग्रोवं जो तेरू नवं याकूब न रालू, तींजो इस्राएल ज़ोले।” एन्च़रां परमेशरे तैसेरू नवं इस्राएल रख्खू। 11फिरी परमेशरे तैस सेइं ज़ोवं, “अवं सर्वशक्तिमान परमेशर आईं। तू फुलस-फलस ते बधस; ते तीं मरां अक कौम बल्के कौमां केरि अक मण्डली पैदा भोल्ही, ते तेरे कौमी मरां राज़े पैदा भोल्हे। 12ते ज़ै मुल्ख मीं अब्राहम ते इसहाके दित्तोरोए, तैए मुल्ख तीं देताईं, ते तेरे बाद तेरे खानदाने भी देइलो।” 13तैखन परमेशरे तैस ठारी करां, ज़ैड़ी तैनी याकूबे सेइं गल्लां कियोरी थी, तैन करां निस्तां च़लो जेव। 14ते ज़ैस ठारी परमेशरे याकूबे सेइं गल्लां कियोरी थी, तैड़ी याकूबे अक घोड़ खड़ो कियो, ते तैस पुड़ पीनेरी च़ढ़तल#35:14 पीनेरी च़ढ़तल अक पीनेरी च़ढ़तल पीनेरी कोई भी चीज़ भोइ सकतीए इसेरो मकसद पवित्र बनानू आहे। ते तेल उलटाव। 15ज़ैड़ी परमेशरे याकूबे सेइं गल्लां कियोरी थी, तैनी तैस ठारारू नवं बेतेल रख्खू।
राहेलरी मौत
16फिरी तैना बेतेल नगरे मरां अग्रोवं च़ले जे; ते एप्राता ज़ैन थोड़े ज़ेरे दूर थियूं, कि राहेली बच्चो ज़ांनेरी तकलीफ भोने लगी। 17ज़ैखन तैस बड़ी जादे तकलीफ भोती थी तैखन घैइयाँ तैस सेइं ज़ोवं, “डर न; इस फेरे भी तीं मट्ठू भोनूए।” 18तैखन एरू भोवं कि तै मेरि जेई, ते तैसां मरते बार तैस मट्ठेरू नवं बेनोनी#35:18 बेनोनी दुखेरू मट्ठू रख्खू। रख्खू; पन तैसेरे बाजी तैसेरू नवं बिन्यामीन #35:18 बिन्यामीन मेरे दुखेरू मट्ठू।रख्खू। 19ते राहेल मेरि जेई, ते एप्राता, मतलब बैतलहम नगरेरे बत्ती मां तै दब्बो जेई। 20ते याकूबे तैसेरी कब्री पुड़ अक बड्डो घोड़ खड़ो कियो: राहेलरी कब्रारो तै घोड़ अज़ तगर हेजू भी आहे। 21फिरी इस्राएले अग्रोवं च़लनू शुरू कियूं, ते एदेर नंव्वेरे बुर्ज़े करां अग्गर गेइतां अपनो डेरो लव।
याकूबेरां मट्ठां
22ज़ैखन इस्राएल तैस मुल्खे मां बस्सोरो थियो, तैखन एक्सां एरू भोवं कि रूबेने गेइतां अपने बाजेरी रखैली बिल्हा सेइं कुकर्म कियो; ते इस गल्लरो इस्राएले पतो लग्गो। याकूबेरां 12 मट्ठां भोआं। 23तैन मरां लिआरां मट्ठां इना थियां: याकूबेरू बड्डू मट्ठू रूबेन, फिरी शिमोन, लेवी, यहूदा, इस्साकार, ते जबूलून। 24ते राहेलेरां मट्ठां इना थियां: यूसुफ ते बिन्यामीन। 25ते राहेलरी नौकरानी बिल्हारां मट्ठां इना थियां: दान ते नप्ताली। 26ते लिआरी नौकरानी जिल्पारां मट्ठां इना थियां: गाद ते आशेर। याकूबेरां इना मट्ठां भोआं, ज़ैना तैस सेइं पद्दनरामे मां पैदा भोआं।
इसहाकेरि मौत
27याकूब मम्रेरे किर्यतअर्बा मां ज़ैस जो हेब्रोन ज़ोतन अपने बाजी इसहाके कांजो अव, ज़ैड़ी अब्राहम ते इसहाक परदेशी भोइतां राहोरे थिये। 28इसहाकेरि उमर 180 साल भोइ। 29ते इसहाक मेरि जेव, ते तै बुढो भोइतां ते लम्मी उमरारो भोइतां अपने मुओरे दादे-पड़दादन मां गेइतां मिली जेव; ते तैसेरे मट्ठेईं एसाव ते याकूबे तैस मित्ती दित्ती।
বর্তমানে নির্বাচিত:
उत्पत्ति 35: BHDNT
হাইলাইট
কপি
তুলনা করুন
শেয়ার
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
