Popular Bible Verses from Pʉɔ-Lɔ́mɑ 8

শেয়ার

Pɛkŋɛ pɛn ḿbɔ́ ńjí ŋɡɔ mɛnu mi ɛ́ ɡɛnɛ pʉɔ pi pɔ́p sɛ́ ŋ́kɔŋ Sɛ́, Sɛ́ ɡɛ mîmɑ́ mɛnu, ŋ́ɡɛ pɔ nu sʉ́Ꞌnɛ nǔu pɔ́p, pɔ́p ẅi ɑ kɑ tsɔ́Ꞌnɛ nǔu ntɛ́ yi ɑ kɑ zɑ́Ꞌnɛ njí ŋ́kwɑŋɛ.

N zɛɛ ḿbɔ́ ńtsuŋ ńjí ŋɡɔ, yɛcɔ́ yúu mi mbɔ ɛ́ fyɑk wɛkŋɛ pɛ Sɛ́ kɑ́ pɔ́ ɡú pɔ́, tɛ pɑ́Ꞌ ɛ́ lɑɑ ḿbɔ́ pɔ nɛvú, ḿbɔ́ pɔ ŋɡʉ̈ɔ́Ꞌ yi ɛ́ nǔu luk, ńzɛɛ ḿbɔ́ pɔ pɛcʉ̈ɔ́Ꞌ-Sɛ́, ḿbɔ́ pɔ yúu mi ɛ́ sɑ́Ꞌnɛ mbí, ḿbɔ́ pɔ yɔ ŋkɑ́ mbí kɛ pɔ yi ɛ́ ɡʉ ŋ́ɡɛ lɑ ńtɔ́ ɔɔ, ḿbɔ́ pɔ mɛtʉʉ ntɛ́ nɛ́ ntɛ́ mi ɛ́ ndǔmbí, mi ɛ́ tʉ́, kɛ mi ɛ́ tsɛt sɛ́ ɔɔ, ḿbɔ́ pɔ yɛcɔ́ yúu ndɛꞋ yi Sɛ́ kɑ pɔ́ɔnɛ, mbɔ yɛcɔ́ yúu kɛ́ lɑ́Ꞌ ŋ́kuꞋ nɛtɑɑtɛ Sɛ́ nɛkɔŋ wɛkŋɛ pɔ́. A kɑ lɛɛ nǔu Yɛ́su Kɛlístɔ, Tsɑpʉɔ wɛkŋɛ, ńnyɛt ŋɡɔ ɑ kɔŋ wɛkŋɛ.

NɛzẅíꞋlɛ ɛ̂wɑ́ pɛn ḿbɔ́ pɔ ndʉ́ŋndʉŋ pɑ́Ꞌ Zẅikŋɛ-Sɛ́ tɔ́nɛ ńcẅɛ́lɛ wɛkŋɛ ẅí pɛkŋɛ kɑ́ɑ kɑ́ɑnɛ lɑ́. Pɛkŋɛ pɔɔ jí nɛcɛꞋlɛ Sɛ́ nǔu ntɛ́ yi ɛ́ sɛ́ ḿbíkŋɛ pɔ́, Zẅikŋɛ-Sɛ́ cɛꞋlɛ Sɛ́ nǔu tú yɛkŋɛ, wɛ nɛpúꞋ mbɔ́ mbɔ̌ Sɛ́ lɛɛ yúu mi ḿbɔ́ pɛkŋɛ cú mbɔ̌ Sɛ́.

Mbɔ pɛkŋɛ pɛn ŋ́kẅiꞋ kʉ̈ɔ́ nǔu nu yi pɛkŋɛ cúnɛ lɑɑ? Pɑ́Ꞌ Sɛ́ lɑɑ ḿbɔ́ nǔu yɛkŋɛ ɡúŋ, mbɔ wɔ̌ pɛn ŋ́kuꞋ nǔu pɛkŋɛ?

Ɛ́ lɔk ḿbɔ́ ŋɡɔ pʉɔ pi pɔ́p lɑtnɛ mbʉʉ yɔp nǔu Yɛ́su Kɛlístɔ, kɛ́ ɡʉ ńdɑ́Ꞌ ḿbɛn ḿvu ntsɑŋ pɔ́

Ŋu lɔk pɔ ntɛ́ yi mbʉʉ yɛ́ sɛ́ ɛ́sẅíi wɛ́ ńdɔk ńnɑ́ŋ, mbɔ ŋɡɑŋ nǔu sɛ̂ndúŋ-nɛvú. Lɑ́ ŋu ẅi ɑ lɔknɛ ntɛ́ yi Zẅikŋɛ Lɛ́ɛnɛ́nɛ sɛ́ ɛ́sẅíi wɛ́ ńdɔk ńnɑ́ŋ, mbɔ ŋɡɑŋ nǔu sɛ̂ndúŋ-luk, ɛ́ pɛn ḿbɔ́ sɛ̂ndúŋ-mbɔ́tnɛ.

Lɑ́ ɛ́ kɛ́ ŋ́ɡʉ nǔu yúu ɛ̂pɑ́ tsʉʉ, pɛkŋɛ pɔ́ pɛtɑ́mɛtʉʉ, pɑlɛɛ nǔu mîmɑ́ mɛyúu ńdúꞋnɛ pɔ́ pʉɔ pi pɔ́p kɑ kɔŋnɛ wɛkŋɛ.

N zɛɛ ḿbɔ́ ŋ́kwɑŋɛ ŋɡɔ, ŋɡʉ̈ɔ́Ꞌ yi pɛkŋɛ ŋkɔ̂ɔnɛ ḿbɔ́ ńjʉ́ɔ kɑ́ síi ŋ́kuꞋ yɛcɔ́ yúu nǔu nɛɡúꞋ ẅi Sɛ́ ɡʉ ŋ́ɡɛ ŋ́ɡɛ pɛkŋɛ jʉ́ɔ pɔ́.

Tɛ yɛcɔ́ yúu ɡú yi mbɔ ɛ́ fyɑk wɛkŋɛ pɛ Kɛlístɔ tɛ ɑ pɔɔ pɛn ŋ́kɔŋ wɛkŋɛ pɔ́ ɔɔ? Ŋɡʉ̈ɔ́Ꞌ ɔ́ɔ? NɛpúꞋ mbʉʉ ɔ́ɔ? Pɛ́ nɛkʉ́ʉnɛ wɛkŋɛ ɔ́ɔ? Nji ɔ́ɔ? Púŋ ɔ́ɔ? Yúu mi ɛ́ vukŋɛ́nɛ wɛkŋɛ ɔ́ɔ? Kɛ pɔ nɛvú?

Sɛ́ jí yúu mi ɛ́ tsɛt tʉ́m-pʉɔmɛsɔŋ, ɑ jí yúu mi Zẅikŋɛ yɛ́ sɛ́ ńcú, Zẅikŋɛ-Sɛ́ zɛɛ ḿbúꞋ mbɔ́ mbɔ̌ Sɛ́ nǔu tú-pʉɔ-Sɛ́ pɔ nǔu ntɛ́ yi Sɛ́ sɛ́ ŋ́kɔŋ.

MbíꞋŋɡɔ pʉɔ pi Zẅikŋɛ-Sɛ́ tsiinɛ́nɛ wɔ́p pɔ́ɔ-Sɛ́.

Pʉɔ pi pɔ́p zɛɛ ńnɑ́ŋ pɔ nǔu ntɛ́ yi mbʉʉ yɔp sɛ́ ɛ́sẅíi wɔ́p, ńtík tʉ́m yɔ́p pɔ nǔu yúu mi mbʉʉ yɔp sɛ́ ŋ́kɔŋ, lɑ́ pʉɔ pi pɔ́p nɑ́ŋnɛ nǔu ntɛ́ yi Zẅikŋɛ Lɛ́ɛnɛ́nɛ sɛ́ ɛ́sẅíi wɔ́p, tík tʉ́m yɔ́p pɔ nǔu yúu mi Zẅikŋɛ Lɛ́ɛnɛ́nɛ sɛ́ ŋ́kɔŋ.

Jʉ́ ẅi ɑ ŋkɑɑ pɑ́ɑ kwɑꞋ Mɔ́ɔ nɛ nɛjʉ́ɔ ŋɡʉ̈ɔ́Ꞌ pɔ́, jʉ́ ẅi ɑ kɑ ɡɛnɛ pɛ́ jẅí wɛ́ mbíꞋ wɛkŋɛ pɛ́tsʉʉ, ɛ́ ɡʉ ŋ́ɡɛ pɑ́Ꞌ lɑ́ ɑ pɔɔ pɛn ŋ́ɡɑ́ pɔ fuꞋ níinɛ yɛkŋɛ ńdɔk pɔ jʉ́ mɔ́ɔ nɛ ŋ́ɡɑ́ mɛcɔ́ mɛyúu tsʉʉ mbɔ̌ pɛkŋɛ pɔ́ ɔɔ?

KwɑꞋ jʉ́ Zẅikŋɛ ɛ̂yɑ́ pɔ́ ŋ́ɡɛ pɛkŋɛ tsuŋ ńjí tsɛt tʉ́m pɛkŋɛ ŋɡɔ pɛkŋɛ pɔ́ɔ-Sɛ́. Pɑ́Ꞌ pɛkŋɛ pɔ́ɔ-Sɛ́ lɑ́, pɛkŋɛ ɡʉ ńdɑ́Ꞌ ŋ́ɡẅɛɛ yɛkŋɛ yúu nǔu fuꞋ yi Sɛ́ kɑ kɑꞋnɛ mbɔ̌ pʉɔ pɛ́, ńdɔk ŋ́ɡẅɛɛ yɛkŋɛ yúu nǔu yúu-Sɛ́, pɛkŋɛ pɛ Kɛlístɔ lɔk ńtɛmtɛ ŋ́ɡẅɛɛ. Pɑ́Ꞌ pɛkŋɛ sɛ́ ḿbɛ́m nɛjʉ́ɔ ŋɡʉ̈ɔ́Ꞌ pɑ́Ꞌ ɑ kɑ pɛ́mnɛ yɛ́ lɑ́, pɛkŋɛ pɛpɔ́p ɡʉ ŋ́ɡɛ ḿbɛn tɛmtɛ ḿbɔ́ tsɛt nɛɡúꞋ wɛ.

Pɛcɔ́ pʉɔ nǔu sɛ̂ndúŋ-nɛvú mbíꞋŋɡɔ pʉɔ pi pɔ́p nɑ́ŋnɛ ńtík tʉ́m yɔ́p pɔ nǔu yúu mi mbʉʉ yɔp sɛ́ ɛ́sẅíi wɔ́p, pɛɡɑŋmbuu-Sɛ́. Pɔ́p kɑ́ kúꞋlɛ nɛpʉ́ʉ-Sɛ́ pɔ́, wɛcɔ́ shʉ́ nɛzɛɛ ŋ́kúꞋlɛ kɑ́ pɔ́ mbɔ̌ pɔ́p pɔ́.

Kʉ̈ɔ́ lɑ́ yi Sɛ́ kɑ niitɛ́nɛ zɛɛ ḿbɔ́ ńzẅíꞋlɛ tɛꞋ nɛjʉ́ɔ ŋkɑ́ yi Sɛ́ ɡʉ ŋ́ɡɛ pɛ́ jʉ́ɔ nɛɡúꞋ pʉɔ-pɛ́.

Pɛkŋɛ zɛɛ ḿbɔ́ ńjí ŋɡɔ kʉ̈ɔ́ lɑ́ yi Sɛ́ kɑ niitɛ́nɛ, tɛ ŋ́kúu ŋkɔ̂ɔnɛ ɛ́ sɛ́ ńtsẅii, ńjʉ́ɔ ŋɡʉ̈ɔ́Ꞌ pɑ́Ꞌ mɑŋɡɛ́ ẅi ɑ ɡʉ ḿbɔ́ ḿbí lɑ́.