मूल 2
2
पवित्र आत्मा फेप्खबा
1पेन्तिकोस#२:१ पेन्तिकोस भिबा चा मिश्र य्हुल्साग्याम फेसी खबा धिनदा ढन्सी धाङ्बा चाड धङ्माहेन्से बोगल न्हीसे च्युइ धिनकुनु हिन्ना। चुला बारेरी अझै गोबाला लागिरी बाइबलला घ्याबपट्टि मुबा गाह्रो छिकगदेला अर्थरी स्हीगो।ला धिनकुनु प्रभु येशूदा विश्वास लबा म्हिगदे जम्मान ग्ला गिकरीन पोप तबा मुबा।#लेवी २३:१५-२१; ठिम १६:९-११ 2थे धुइरी तिख्खुरी स्वर्गग्याम लाबा खबा ह्रङ्बा घ्रेन काइ खजी। थे काइसे थेनीगदे चिबा दिम प्लिङ्जी। 3ओच्छे मेला ल्हाम ह्रङ्बा स्हेगदे थेनीगदे ह्राङ ह्राङथोरी भो भो तसी चिबा म्राङ्जी। थे मेला ल्हाम चा ले ह्रङ्बान म्राङ्मुबा। 4जमाहेन्से थेनीगदे जम्मान पवित्र आत्मासे प्लिङ्जी।#२:४ “पवित्र आत्मासे प्लिङ्जी” भिबा चा म्हिदा परमेश्वरला आत्माला शक्तिसे पूरन चलब लबा हिन्ना। ओच्छे पवित्र आत्माग्याम पाङ्खम्बा शक्ति याङ्सी थेनीगदेसे पाङ्आसेबा अर्गु ग्योइगदेरी ताम पाङ्बारी छ्याइजी।
5थे धुइरी परमेश्वरदा तेन्बा यहूदीगदे जम्बुलिङला जम्मान य्हुल्साग्याम यरूशलेमरी खसी चिबा मुबा। 6चुह्रङ्बा काइ थेःमाहेन्से थेरी म्हिगदे पोप तजी। ओच्छे प्रभु येशूदा विश्वास लबा म्हिगदेसे ह्राङ ह्राङला ग्योइरी ताम पाङ्बा म्राङ्सी थेनीगदे उदेक तजी।
7जमाहेन्से थेनीगदे उदेक तसी चुह्रङ् भिसी पाङ्बारी छ्याइजी, “तिग चु ताम पाङ्बा जम्मान म्हिगदे गालीलला आहिन? 8तर चुगदेसे खाह्रङ् लसी य्हाङला ग्योइ पाङ्खम्जी! 9य्हाङ चुरी पार्थीला म्हिगदे, मादीला म्हिगदे, एलामला म्हिगदे, मेसोपोटामीयाला म्हिगदे, यहूदियाला म्हिगदे, कापाडोकियाला म्हिगदे, पोन्टसदेन एशियारी चिबा म्हिगदे, 10ओच्छे फ्रिगियाला म्हिगदे, पामफिलियाला म्हिगदे, मिश्रदेन कुरेनीरी परब तबा लिबियाला ङाम ङाम्ला ग्लागदेदेन रोमग्याम खबा 11यहूदीदेन यहूदी धर्म तेन्बा अर्गु य्हुल्ला म्हिगदे मुला। ओच्छे क्रेट य्हुल्सारी चिबा म्हिगदेदेन अरबला म्हिगदेएनोन मुला, थेनीगदेसे मि य्हाङला ह्राङ ह्राङलान ग्योइरी परमेश्वरसे लबा घ्रेन गेला बारेरी पाङ्बान चिम।”
12चुह्रङ्बा म्राङ्सी थेनीगदे जम्मान उदेक तसी अलमल तबान गिकसेम गिकदा “चु तिग तबा?” भिसी ङ्योइबा छार्बा लबारी छ्याइजी। 13तर स्य्हान्दोगदेसे थेनीगदेदा “चुगदे मि कलिलो निङ्गुसे ङ्य्होइजीम” भिसी खिसी लजी।
पत्रुससे म्हिला हुलदा घोना लबा
14जमाहेन्से पत्रुस च्युक गिक चेलागदेदेन छ्याम राप्सी जजाकी ङाच्छा निसी घ्रेन काइरी चुह्रङ् भिसी पाङ्जी, “यहूदिया अञ्चलग्याम फेप्खबा यहूदी ह्रोगदेदेन यरूशलेमरी धन्छ्याबा जम्मान म्हिगदे, चु तिग तबा हिन्ना ङाइ ह्राङनीदा घोना लला। ह्राङनीसे ङाला ताम ज्यना लसी ङ्यन्गो। 15ह्राङनीसे म्हन्बा ह्रङ् चुगदे ङ्य्होइबा आरे। दन्दे स्य्होला नौ बजब जे तबा मुला, चु धुइरी खालैसेन निङ्गु आथुङ्। 16तर चु ताम तला भिसी योएल अगमवक्तासे चुह्रङ् भिसी भ्रिबा मुला,
17“‘परमेश्वरसे चुह्रङ् भिसी सुङ्बा मुला,
लिच्छाला धिनरी ङाइ ङाला आत्मा जम्मान म्हिगदेथोरी पुइखला।
जमाहेन्से एनीगदेला झा झामेगदेसे अगमवाणी लला,
ओच्छे एनीगदेला भ्योन म्हिगदेसे परमेश्वरसे उन्बा ताम म्राङ्ला,
ओच्छे एनीगदेला खेप्पा दोबा म्हिगदेसे म्हङ् म्राङ्ला।
18थे धिनकुनु ङाला गे लबा ह्रेम्बोकोला म्रिङ्कोला न्हीनोनथोरी ङाइ ङाला आत्मा पुइखला,
ओच्छे थेनीगदेसे अगमवाणी लला।
19ङाइ तोर मुदेन जम्बुलिङरी का, मेदेन म्युगुला मुस्लोगदे उन्सी उदेकला गेगदे लला।
20धिनीसे य्हाल पिन्बा ख्लाला, ओच्छे लनी का ह्रङ्बान वाला तला।
जमाहेन्से ङा परमप्रभुला लोङ्बा खबा घ्रेन धिन खला।
21जुन जुन म्हिसे ङा परमप्रभुदेन छ्याम ह्रो याङ्बाला लागिरी बिन्ती लला, थेनीगदेसे थार्बा याङ्ला।’#योए २:२८-३२
22“इस्राएलला म्हिगदे ङाला ताम ङ्यन्गो, परमेश्वरसे येशूग्याम ह्राङनीला गुङ्री शक्तिशाली गेगदे लबान उदेकला चिनुगदे उन्बा ताम ह्राङनीदा थानोन मुला। थे चिनुगदेग्याम परमेश्वरसे नासरतला येशूदा ङाइनोन पुइखबा हिन्ना भिसी उन्बा मुबा। 23परमेश्वरसे ङाच्छान म्हन्बा अन्छार येशूदा ह्राङनीसे चुङ्जी। ओच्छे येशूदा ह्राङनीसे पापी म्हिगदेला यारी जिम्मा पिन्सी क्रूसरी टाँगब लसी साइपुङ्जी।#मत्ती २७:३५; मर्कू १५:२४; लूका २३:३३; यूह १९:१८ 24तर येशूदा कालला शक्तिसे साइबाला साइबान लबारी आखम्नी। तिग्दा भिसम परमेश्वरसे येशूदा कालला तहग्याम फेसी सोना लजी।#मत्ती २८:५-६; मर्कू १६:६; लूका २४:५ 25तिग्दा भिसम दाऊद ग्लेसे येशूला बारेरी चुह्रङ् भिसी पाङ्बा मुला,
“‘ङाइ प्रभुदा सदन ङाला ङाच्छापट्टि म्राङ्बा मुला।
थे ङादेन छ्यामनोन मुला।
थेतबासेलमा ङाइ तिगै तामरी धन्दा सुर्दा लआतोः।
26थेतबासेलमा ङा सेमहेन्सेन ताङ्बा मुला,
ओच्छे ताङ्बान ङाइ सेमहेन्सेन ङाला सुङग्याम प्रभुला जयजयकार लबा मुला।
ओच्छे ङाला ल्हुइ सिसी निसैनोन ङा दोःसी सोला भिसी ङाइ प्रभुथोरी आश लबा मुला।
27तिग्दा भिसम ह्राङसे ङाला प्राणदा सिबागदे निबा ग्लारी आख्ला।
ओच्छे ह्राङदा जे तेन्बा म्हिला ल्हुइदा ह्राङसे नइना आल।
28ह्राङसे ङादा जुनी याङ्बा ग्याम उन्बा मुला
ओच्छे ह्राङ ङादेन छ्याम तसी ङादा ल्हानान ताङ्ना लला।’#व्हाइ १६:८-११
29“ज्योज्यो आले नाना आङागदे, ङाइ य्हाङला म्हेमे दाऊद ग्लेला बारेरी ढुक्क तसी पाङ्ला। थे सिसी ल्हुजी, ओच्छे दन्देधोना थेला धुर्सा मुनोन मुला। 30दाऊद ग्ले अगमवक्ता तबासेलमा थेला ग्लारी ह्राङलान सन्तानना गिकदा परमेश्वरसे ग्ले स्होला भिसी परमेश्वरसे कबुल लबा ताम थेदा था मुबा।#व्हाइ १३२:११; २ शमू ७:१२-१३ 31परमेश्वरसे लिच्छा तिग लला भिसी दाऊदसे ङाच्छान म्राङ्बा मुबा। थेतबासेलमा थेसे थार्बा पिन्बा ख्रीष्ट सिबाग्याम सोला भिसी पाङ्बा मुबा, ‘थेदा सिबागदे निबा ग्लारी आख्लानी ओच्छे थेला सिबा ल्हुइ नइना आलनी।’
32“ओच्छे चुनोन येशूदा परमेश्वरसे सिबाग्याम सोना लजी। चु तामला ङनी जम्मान साक्षी मुला। 33परमेश्वर आबासे येशूदा घ्रेन मान पिन्सी ह्राङला दाहिने छ्यापट्टि थान्जी, ओच्छे कबुल लबा अन्छार परमेश्वरसे येशूदा पवित्र आत्मा पिन्जी। दन्दे ह्राङनीसे म्राङ्बा चु तामदेन थेःबा तामगदे थेनोन पवित्र आत्मा प्रभु येशूसे ङन्दा पिन्बा हिन्ना। 34-35दाऊद ह्राङनोन स्वर्गरी आनिनी, तर थेसे चुह्रङ् भिसी पाङ्बा मुला,
“‘परमप्रभुसे ङाला प्रभुदा चुह्रङ् भिसी सुङ्बा मुला,
ङाइ एला शत्रुगदेदा ब्रेना आलदेधोना
ए ङाला दाहिने यापट्टि चिउ।’#व्हाइ ११०:१
36“थेतबासेलमा इस्राएलला जम्मान म्हिगदेसे चु ताम पक्का हिन्ना भिसी था याङ्गै, जुन येशूदा ह्राङनीसे क्रूसरी टाँगब लसी साइबा मुबा, थेनोन येशूदा परमेश्वरसे प्रभुदेन थार्बा पिन्बा ख्रीष्ट स्होबा मुला।”
37जमाहेन्से पत्रुसला ताम थेःसी थेनीगदेला सेमरी ल्हानान दुख तजी, ओच्छे पत्रुसदेन स्य्हान्दो मूल चेलागदेदा थेनीगदेसे चुह्रङ् भिसी ङ्योइजी, “ज्योज्यो आलेगदे, दाहेन्से ङन्से तिग लतोःला?”
38जमाहेन्से पत्रुससे थेनीगदेदा चुह्रङ् भिसी जोहाब पिन्जी, “दाहेन्से एनीगदेसे ह्राङ ह्राङला पाप ख्लासी परमेश्वरपट्टि दोःगो। ओच्छे पाप माफ याङ्बाला लागिरी एनीगदेसे येशू ख्रीष्टला मिनरी बप्तिस्मा किन्गो। जमाहेन्से एनीगदेसे पवित्र आत्माला वरदान याङ्ला। 39तिग्दा भिसम परमेश्वरसे लबा चु कबुल एनीगदेदेन छ्याम एनीगदेला कोलागदेला लागिरी हिन्ना, ओच्छे य्हाङला प्रभु परमेश्वरसे ङ्योइबा थारेङ् थारेङ् चिबा जम्मान म्हिगदेला#२:३९ “थारेङ् थारेङ् चिबा जम्मान म्हिगदे” भिबा चा लिच्छा लिच्छाला म्हिगदे अथवा थारेङ् थारेङ्ला ग्ला हिन्ना। लागिरीनोन हिन्ना।”
40ओच्छे पत्रुससे ल्हानान तामग्याम होशियार तना लजी। ओच्छे थेनीगदेदा अर्ती पिन्बान चुह्रङ् भिसी पाङ्जी, “दन्देला नाइबा म्हिगदेथोरी खबारी छ्याइबा सजायग्याम एनीगदे ह्राङनोन जोगब तसी चिउ।”
41जमाहेन्से ल्हानान म्हिगदेसे पत्रुससे पाङ्बा तामरी विश्वास लसी बप्तिस्मा किन्जी। थेनोन धिनकुनु थेनीगदेला गुङ्री विश्वास लबा म्हिगदे ओस्पन हजार सोम ते बढब तजी।
विश्वासीगदेला संगती
42जमाहेन्से थेनीगदेसे मूल चेलागदेसे लोप्बा ताम ङ्यन्मुबा, संगती लमुबा, प्रभु भोज चमुबा, ओच्छे सेम गिक तसी सदन प्रार्थना लमुबा। 43मूल चेलागदेसे ल्हानान उदेकला गेगदेदेन उदेकला चिनुगदे उन्जी। थेतबासेलमा जम्मान म्हिगदेसे परमेश्वरदा ल्हानान मान लजी। 44प्रभुदा विश्वास लबा जम्मान म्हिगदे ग्ला गिकरीन ह्रुप तमुबा, ओच्छे थेनीगदेदेन छ्याम मुबा स्हेगदे जम्मालान हिन्ना भिसी चलब लमुबा।#मूल ४:३२-३५ 45ओच्छे थेनीगदेसे ह्राङदेन छ्याम मुबा सम्पत्तिदेन मालसामान चूङ्सी जुन जुन म्हिदा जुन जुन स्हे खाँचो तमुबा, थे स्हे जम्मादान भो लसी पिन्मुबा। 46ओच्छे थेनीगदे धिन धिननोन जम्मान सेम गिक तसी परमेश्वरला मन्दिररी ह्रुप तमुबा। ओच्छे थेनीगदे दिम दिमरी निसी प्रभु भोज चबादेन ज्यबा सेम थोसी ताङ्सी चबा थुङ्बा लमुबा। 47ओच्छे सदन परमेश्वरला जयजयकार लमुबा। स्य्हान्दो म्हिगदेसे थेनीगदेदा ज्यबा म्हि भिसी पाङ्मुबा। ओच्छे थार्बा याङ्बा म्हिगदे धिन धिननोन प्रभुसे थेनीगदेला गुङ्री बढब लसी पिन्जी।
© 2026 Eastern Tamang Language Team and Wycliffe Bible Translators, Inc.