مَتّا 1
1
ایسّائے بێه و بُنیاد
(لوکا 3:23–38)
1ایسّا مَسیه، داوود و اِبراهێمئے چُکّ اِنت. آییئے بێه و بُنیاد#1:1 بێه و بُنیاد، بزان پت و پیرُک، اسل و نسب. اے ڈئولا اِنت:
2اِبراهێمئے چُکّ اِساک اَت، اِساکئے چُکّ آکوب، آکوبئے چُکّ یَهودا و آییئے برات اَتنت. 3یَهودائے چُکّ پارِس و زارَه اَتنت و آیانی ماتئے نام تامار اَت. پارِسئے چُکّ هِسْرون، هِسْرونئے چُکّ اَرَم، 4اَرَمئے چُکّ اَمیناداب، اَمینادابئے چُکّ نَهْشون، نَهْشونئے چُکّ سَلْمون، 5سَلْمونئے چُکّ بواز که ماتئے نامی رَهاب اَت. بوازئے چُکّ اۆبئید، که ماتئے نامی روت اَت. اۆبئیدئے چُکّ یَسّی، 6یَسّیئے چُکّ بادشاه داوود.
داوودئے چُکّ سُلئیمان، که ماتی پێسرا اوریائے لۆگی بوتگ‌اَت، 7سُلئیمانئے چُکّ رِهۆبام، رِهۆبامئے چُکّ اَبیا، اَبیائے چُکّ آسا، 8آسائے چُکّ یِهوشاپات، یِهوشاپاتئے چُکّ یورام، یورامئے چُکّ اُزّیا، 9اُزّیائے چُکّ یوتام، یوتامئے چُکّ آهاز، آهازئے چُکّ هِزِکیا، 10هِزِکیائے چُکّ مَنَسی، مَنَسیئے چُکّ آمون، آمونئے چُکّ یوسیا، 11یوسیائے چُکّ یَکۆنیا و آییئے سجّهێن برات. همے وهدا یَهودی دَرانڈێه#1:11 دَرانڈێه، بزان جَلاوتن. کنگ و بابِلا بَرگ بوتنت.
12بابِلا دَرانڈێه بئیگا رند اے مردم پێدا بوتنت: یَکۆنیائے چُکّ شیالتێل، شیالتێلئے چُکّ زِروبابِل، 13زِروبابِلئے چُکّ اَبیهود، اَبیهودئے چُکّ اِلیاکیم، اِلیاکیمئے چُکّ آزور، 14آزورئے چُکّ سَدوک، سَدوکئے چُکّ آکیم، آکیمئے چُکّ اِلیهود، 15اِلیهودئے چُکّ اِلیازر، اِلیازرئے چُکّ مَتّان، مَتّانئے چُکّ آکوب، 16آکوبئے چُکّ ایسُّپ، مریَمئے مَرد. چه مَریَما ایسّا پێدا بوت که مَسیهئے ناما زانگَ بیت.
17اے ڈئولا، چه اِبراهێما بگر تان داوودا چارده پُشت و چه داوودا بگر تان یَهودیانی دَرانڈێه بئیگ و بابِلا رئوگا دگه چارده پُشت و چه دَرانڈێهیا بگر تان ایسّا مَسیها هم چارده پُشت اَنت.
ایسّا مَسیهئے پێدائِش
(لوکا 1:26–38؛ 2:21)
18ایسّا مَسیهئے پێدائِش اے ڈئولا اَت: ایسّائے مات مریَمئے هبرسِندی گۆن ایسُّپا بوتگ‌اَت، بله چه آیانی سور و آرۆسا پێسر، زانگ بوت که مریَم چه هُدائے پاکێن روهئے#1:18 هُدائے پاکێن روه، بزان روه‌اُلکُدُس. برکتا لاپ‌پُرّ اِنت. 19مَریَمئے دشتار ایسُّپ راست و پهرێزکارێن مردمے اَت، نلۆٹتی که مَریَما بَنّام بکنت، پمێشکا وتی دلا گوَشتی که چێرُکایی اے سانگا پرۆشان. 20اے بارئوا اَنگت پِگر کنگا اَت که هُداوندئے پرێشتگے آییئے وابا آتک و گوَشتی: ”ایسُّپ، او داوود بادشاهئے چُکّ! مَریَمئے زورگا متُرس، چێا که آییا اے لاپ‌پرّی چه پاکێن روها رَستگ. 21مریَم چِلّگَ بیت و مردێن‌چُکّے کاریت. چُکّئے ناما ایسّا#1:21 ایسّائے مانا ”هُداوندَ رَکّێنیت“ اِنت. بکن، چێا که آ وتی کئوما چه آیانی گناهانَ رکّێنیت.“
22اے سجّهێن کار بوتنت و اے ڈئولا هما هبر راست و سرجم بوتنت که هُداوندا چه نبیئے زبانا گوَشتگ‌اَتنت: 23نِشتگێن جِنکّێئے لاپ پُرَّ بیت. آ چِلّگَ بیت و مردێن‌چُکّے کاریت و چُکّئے ناما اِمانوییلَ کننت،#1:23 اِشئیا نبیئے کتاب 7:14. که اِشیئے مانا ”هُدا گۆن ما“ اِنت. 24وهدے ایسُّپ چه وابا پاد آتک، هما ڈئولا که هُداوندئے پرێشتگا هُکم داتگ‌اَت، وتی جنی زرت، 25بله تان آ وهدا که چُکّ پێدا نبوتگ‌اَت، گۆن آییا وپت و وابی نکرت و چُکّئے نامی ایسّا کرت.
Currently Selected:
مَتّا 1: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.