AmaHubo 22:1-31 - Compare All Versions

Dlulisela

Nkulunkulu wami, Nkulunkulu wami, ungishiyeleni na? Ukude namazwi okububula kwami nokusindiswa kwami. Nkulunkulu wami, ngikhala emini, kepha awuphenduli, nasebusuku, ngingabi nakuthula. Kepha Wena ungoNgcwele, uhlezi ezibongweni zika-Israyeli. Okhokho bethu bethembela kuwe; bakwethemba, Wena wabakhulula. Bakhala kuwe, bakhululwa; bethembela kuwe, abaze bajabha. Kepha mina angisemuntu, ngiyimpethu nje; ngiyisigcono sabantu, nendelelo ezizweni. Bonke abangibonayo bayangibhinqa, banginkonkozele, banikine amakhanda, basho nokusho bathi: “Makabeke indaba yakhe kuSimakade; Yena makamkhulule. Makamsindise ngoba uthokozile ngaye!” Nguwe owangihlenga esibelethweni ngaze ngazalwa, wangikhoselisa, ngavikeleka esifubeni sikamame. Nganikelwa kuwe kwasekuzalweni kwami; nguwe owaba nguNkulunkulu wami. Ungabi kude nami, ngokuba inhlupheko iseduze, akekho ongisizayo. Ngihaqwe yizinkunzi zaseBhashani eziningi, ezinamandla, zingizungezile. Zingikhamisele imilomo yazo njengebhubesi elibhodlayo nelidwengulayo. Ngichithiwe njengamanzi; kuxega wonke amalungu ami. Inhliziyo yami incibilika njengengcina ezibilini zami. Umlomo wami wome njengodengezi, ulimi lunamathele olwangeni; ungilalise othulini lokufa. Ngokuba izinja zingihaqile, umgwamanda wabenzi bokubi ungizungezile. Izandla nezinyawo zami bazibhobozile. Sengingawabala wonke amathambo ami. Bangigqolozela, beklibhiza. Behlukaniselana ngezingubo zami, benza unkatho ngesembatho sami. Kepha Wena Simakade, mawungabi kude, Wena mandla ami, shesha ungisize. Hlenga umphefumulo wami enkembeni, impilo yami, esidladleni senja. Ngisindise emlonyeni webhubesi, nasezimpondweni zenyathi; uyangiphendula. Ngiyomemezela ngegama lakho kubafowethu, ngikudumise phakathi kwebandla. Nina enesaba uSimakade, mdumiseni! Nina nonke, bozalo lukaJakobe, mdumiseni, nani nonke, bozalo luka-Israyeli, nimesabe, ngokuba akamedelelanga, akanengwanga yinhlupheko yohlushwayo. Akamfihlelanga ubuso bakhe, kodwa wamuzwa ngesikhathi enxusa. Ukudumisa kwami kuyakuvela kuwe ebandleni elikhulu, izithembiso zami ngiyozifeza phambi kwalabo abamesabayo. Abahluphekayo bayokudla, basuthe; labo abamfunayo uSimakade, bayomdumisa. Sengathi izinhliziyo zenu zingaphila ingunaphakade. Yonke imikhawulo yomhlaba iyokhumbula, bese iphendukela kuSimakade, nayo yonke imindeni yezizwe iyokhothama phambi kwakho; ngokuba umbuso ungokaSimakade; nguye obusa izizwe. Bonke abomhlaba abacebileyo bayokudla, badumise, nalabo asebewuthuli othulini, bayokhothama phambi kwakhe, ngisho nalowo ongenakuwugcina umphefumulo wakhe uphilile. Izizukulwane ziyomkhonza, kulandwe ngayo iNkosi isizukulwane ngesizukulwane. Bayokuza bamemezele ngokulunga kwayo kubantu abasazozalwa, babatshele ukuthi lokho kwenziwa yiyo.

Nkulunkulu wami, Nkulunkulu wami, ungishiyeleni na? Ukude namazwi okubububula kwami nokusindiswa kwami. Nkulunkulu wami, ngikhala emini, kepha awuphenduli, nasebusuku, ngingabi nakuthula. Kepha wena ungoNgcwele ohlezi ezibongweni zika-Israyeli. Obaba bethu babekwethemba; babethemba, wena wabakhulula. Bakhala kuwe, bakhululwa; bethemba wena, abaze bajabha. Kepha mina ngiyimphethu, angisiye umuntu; ngiyisithuko sabantu, ngiyindelelo yabantu. Bonke abangibonayo bayangiklolodela, baphukule imilomo, banikine amakhanda, bathi: “Zinikele kuJehova; makamsindise, amkhulule, njengokuba emthanda.” Impela nguwe owangikhipha esizalweni, wangikhoselisa ngasemabeleni kamame. Ngaphonswa phezu kwakho kwasesizalweni; unguNkulunkulu wami kwasesizalweni sikamame. Ungabi kude nami, ngokuba inhlupheko iseduze, nosizayo akakho. Izinkunzi eziningi zingibunganyele, ezinamandla zaseBashani zingizungezile. Zingikhamisele umlomo wazo njengengonyama edwengulayo nebhodlayo. Ngichithiwe njengamanzi; onke amathambo ami enyele; inhliziyo yami injengengcina, incibilikile phakathi kwezibilini zami. Amandla ami omile njengodengezi; ulimi lwami lunamathela olwangeni lwami; ungibeka othulini lokufa. Ngokuba izinja ziyangibungayela; umbonda wababi ungizungezile; izandla zami nezinyawo zami bazibhobozile. Ngingabala onke amathambo ami; bayabukela, bangibuke bengiklibhizela. Babelana izingubo zami, benzelana inkatho ngesambatho sami. Kepha wena Jehova mawungabi kude, wena mandla ami, shesha ungisize. Sindisa umphefumulo wami enkembeni, ukuphila kwami emandleni ezinja. Ngisindise emlonyeni wengonyama; nasezimpondweni zezinyathi uyangizwa. Ngiyakushumayeza abafowethu igama lakho, ngikudumise phakathi kwebandla. Nina enesaba uJehova, mbongeni; nina nonke nzalo kaJakobe, mdumiseni, nimesabe nina nonke nzalo ka-Israyeli. Ngokuba akadelelanga, akanengwanga yinhlupheko yohluphekayo; akamfihlelanga ubuso bakhe, kepha nalapha ekhala kuye, wezwa. Kuyakuvela kuwe ukudumisa kwami ebandleni elikhulu; izithembiso zami ngiyakuzigcwalisa phambi kwabamesabayo. Abamnene bayakudla, basuthe; abafuna uJehova bayakumdumisa; inhliziyo yenu mayiphile kuze kube phakade. Imikhawulo yonke yomhlaba iyakukhumbula, iphendukele kuJehova, nezizukulwane zonke zezizwe ziyakukhuleka ebusweni bakho. Ngokuba umbuso ungokaJehova; nguye obusa izizwe. Bonke abacebileyo bomhlaba bayakudla, bakhuleke; bonke abehlela othulini bayakukhothama phambi kwakhe, naye ongenakugcina umphefumulo wakhe ekuphileni. Inzalo iyakumkhonza; isizukulwane esizayo siyakulandiswa ngayo iNkosi. Bayakuza bashumayele ukulunga kwayo kuso isizwe esiyakuzalwa ngokuthi ikwenzile.

Kumholi wokuhlabelela. Ihubo likaDavide. Nkulunkulu wami, Nkulunkulu wami, ungishiyeleni na? Kungani nikude kangaka ekungisizeni nasemazwini okubhonga kwami na? Nkulunkulu wami, ngiyabiza emini, kepha awuzwa; nasebusuku, angithuli. Kodwa wena ungcwele, wena ohlala ezibongweni zikaIsrayeli. Okhokho bethu bathembela kuwe: bathemba, wena wabasindisa. Bakhala kuwe, basindiswa; bathembele Kuwe futhi abazange bajabhiswe. Kepha mina ngiyisibungu, angikho; ihlazo labantu nokudelelwa ngabantu. Bonke abangibonayo bayangihleka; bakhiphe izindebe zabo, banikine amakhanda bathi: Wathembela kuJehova ukuthi uzakumsindisa; makamsindise, ngokuba ethokoza ngaye. Kodwa nguwe owangikhupha esizalweni sikanina; Wangenza ngaba nethemba ngisesemabeleni kamama. Ngaphonswa phezu kwakho kwasesiswini sikanina; Wena unguNkulunkulu wami kwasesiswini sikamame. Ungabi kude nami; ngoba inkathazo iseduze; ngoba akekho ongasiza. Izinkunzi eziningi zangihaqa, izinkunzi zaseBashani ezinamandla zangihaqa. Zangikhamisela imilomo yazo njengengonyama edwengulayo nebhodlayo. Ngithululiwe njengamanzi, namathambo ami onke ahlangene; inhliziyo yami injengengcina; kuncibilike phakathi kwamathumbu ami. Amandla ami omile njengodoti lombumbi; ulimi lwami lunamathele emhlathini wami; wangingenisa othulini lokufa. Ngokuba izinja zingihaqile, isixuku sababi singihaqile; babhoboza izandla zami nezinyawo zami. Ngiyakwazi ukuwabala onke amathambo ami; bayangibona, bangigqolozele. Bahlukaniselana izingubo zami, benzelana inkatho ngezambatho zami. Kodwa ungabi khatshana lami, O Jehova, mandla ami, shesha ungisize. Sindisa umphefumulo wami enkembeni; sithandwa sami emandleni enja. Ngisindise emlonyeni wengonyama, ngokuba ungizwile ezimpondweni zenyathi. Ngiyakumemezela igama lakho kubafowethu; ngizakudumisa phakathi kwebandla. Nina enimesabayo uJehova, mdumiseni; nonke nina nzalo kaJakobe, mdumiseni; nimesabe nina nonke nzalo ka-Israyeli! Ngokuba akadelelanga, akanengwanga ukuhlupheka kwabadabukileyo; futhi akamfihlelanga ubuso bakhe; kodwa lapho embiza, wezwa. Ukudumisa kwami kuyakuba kuwe ebandleni elikhulu; ngizagcwalisa izithembiso zami phambi kwabamesabayo. Abathobekileyo bazakudla basuthe; bayakumdumisa uJehova abamfunayo; inhliziyo yakho iyophila phakade. Yonke imikhawulo yomhlaba iyokukhumbula futhi iphendukele kuJehova, futhi yonke imindeni yezizwe iyakukhuleka phambi kwakho. Ngoba umbuso ungokaJehova, futhi yena ungumbusi phakathi kwezizwe. Bonke abakhulupheleyo emhlabeni bayakudla, bakhuleke; bonke abehlela othulini bayakukhothama phambi kwakhe; futhi akekho ongagcina umphefumulo wakhe uphila. Inzalo iyakumkhonza; kuyakubalelwa eNkosini isizukulwane. Bazakuza, bamemezele ukulunga kwayo ebantwini abazazalwa, ukuthi ukwenzile lokhu.