U-Eksodusi 2:1-25
U-Eksodusi 2:1-25 IsiZulu 2020 (ZUL20)
Kwasuka indoda kwabendlu kaLevi yaganwa yindodakazi kaLevi. Wakhulelwa lowo wesifazane wazala indodana; kwathi lapho eyibona ukuthi yinhle, wayifihla izinyanga ezintathu. Kuthe lapho engasakwazi ukuyifihla wayithatha wayifaka ebhokisini elaliphicwe ngekhwani, lahuqwa ngebhithumeni nekoliyati, walibeka emhlangeni owawusosebeni lomfula. Udadewabo wema buqamama ukuze abone ukuthi kuzokwenzekani kuye. Kwase kwehla indodakazi kaFaro iyogeza emfuleni, abaphelezeli bayo bagudla osebeni lomfula; yayisibona ubhasikidi emhlangeni, yayisithumela umsizi wayo ukuyowulanda. Kwathi lapho iwuvula yabona; bheka, kwakungumfana; wayekhala. Yamhawukela, yayisithi: “Lona ngomunye wezingane zamaHebheru.” Udadewabo wathi endodakazini kaFaro: “Ngihambe yini ngiyokulandela umzanyana kwabesifazane bamaHebheru ukuba akuncelisele yona na?” Indodakazi kaFaro yathi kuye: “Hamba.” Intombazane yahamba yayobiza unina wengane. Indodakazi kaFaro yathi kuye: “Thatha lo mntwana uyongincelisela yena, ngizokukhokhela.” Owesifazane wamthatha umntwana wamncelisa. Umntwana wakhula, wayesemyisa endodakazini kaFaro, waba yindodana yayo; yamqamba ngokuthi nguMose, ngokuba yathi: “Ngamkhipha emanzini.” Langa limbe uMose esekhulile, waya kubantu bakubo, wabubona ubunzima ababebuthwele; wabona umGibhithe eshaya umHebheru ongomunye wabantu bakubo. Waqalaza ngapha nangapha, wangabona muntu, wayesembulala umGibhithe, wamfihla esihlabathini. Ngakusasa lapho ephuma, nanka amadoda amabili amaHebheru elwa; wayesethi kuleyo ndoda eyayonile: “Umshayelani umfowenu na?” Yaphendula yathi: “Ngubani okubeke inkosi nomehluleli phezu kwethu na? Ufuna ukungibulala njengalokhu ubulele umGibhithe na?” UMose wayesesaba, wacabanga wathi: “Impela lokhu sekuyaziwa.” Lapho uFaro esezwile ngalokho wafuna ukumbulala uMose. Kepha uMose wabaleka phambi kukaFaro, wayohlala kwaMidiyani, wahlala phansi eduze komthombo. Kwakukhona umphristi kwaMidiyani owayenamadodakazi ayisikhombisa; eza ezokukha amanzi, ukuba agcwalise imikhombe ukuze imfuyo kayise iphuze. Abelusi bafika bawaxosha, kodwa uMose wasukuma wawasiza, wawuphuzisa umhlambi wawo. Lapho efika kuyise uRehuweli, wathi kuwo: “Yini eyenze nabuya masinya namuhla na?” Athi kuye: “UmGibhithe usikhululile esandleni sabelusi, wabuye wasikhelela amanzi, wawuphuzisa nomhlambi.” Wathi emadodakazini akhe: “Pho uphi na? Nimshiyeleni? Mbizeni ukuze azokudla.” UMose wavuma ukuhlala nalowo muntu. Waganisela uMose indodakazi yakhe uZiphora. Wazala indodana wayibiza ngokuthi nguGereshomu, ngokuba ethi: “Ngingumfokazi ezweni labezizwe.” Sekwedlule izinsuku eziningi, inkosi yaseGibhithe yakhothama. Abantu bakwa-Israyeli babubula ngenxa yokucindezelwa, bakhala benxusa, ukukhala kwabo kwafinyelela kuNkulunkulu. UNkulunkulu wakuzwa ukububula kwabo, wayesesikhumbula isivumelwano ayesenze no-Abhrahama, no-Isaka, noJakobe. UNkulunkulu wababheka abantu bakwa-Israyeli, futhi wabanakekela.
U-Eksodusi 2:1-25 IBHAYIBHELI ELINGCWELE (ZUL59)
Kwasuka umuntu wendlu kaLevi, wathatha indodakazi kaLevi. Wakhulelwa lowo mfazi, wazala indodana; esebonile ukuthi inhle, wayithukusa izinyanga ezintathu. Engasenakuyithukusa wayithathela ibhokisi lebungu, walihuqa ngebitume* nangekolitayi,* wamfaka umfana kulo, walibeka emhlangeni ngasogwini lomfula. Udadewabo wayemi kudana, ukuze azi ukuthi kuyakwenziwani kuye. Kwase kwehla indodakazi kaFaro ukuyogeza emfuleni; amantombazana ayo ahamba eceleni komfula; ibona ibhokisi emhlangeni yathuma intombazana ukulilanda. Yalivula, yabona umntwana; bheka, kwakungumfana; wakhala. Yamhawukela, yathi: “Lona ungowabantwana bamaHeberu.” Udadewabo wayesethi kuyo indodakazi kaFaro: “Ngihambe ngikubizele umzanyana kuwo amaHeberu ukuba akuncelisele ingane na?” Indodakazi kaFaro yathi kuye: “Hamba.” Yasuka intombazana, yabiza unina wengane. Indodakazi kaFaro yathi kuye: “Hamba nalo mntwana, ungincelisele yena; ngizakukukhokhela.” Owesifazane wamthatha-ke umntwana, wamncelisa. Umfana wakhula, wayiswa kuyo indodakazi kaFaro, waba yindodana yayo. Yamqamba igama lokuthi uMose, ithi: “Ngokuba ngamkhipha emanzini.” Kwathi ngalezo zinsuku uMose esekhulile, waphuma, waya kubafowabo, wabuka imithwalo yabo; wabona owaseGibithe eshaya umHeberu, omunye wabafowabo. Waphendukela ngalapha nangalapha; esebonile ukuthi akukho muntu, wambulala owaseGibithe, wamthukusa esihlabathini. Waphuma nangosuku olulandelayo; bheka, nanko amadoda amabili amaHeberu exabene; wathi kowonileyo: “Umshayelani owakini na?” Wathi yena: “Ngubani okumise induna nomahluleli phezu kwethu na? Ufuna ukungibulala mina, njengalokho ubulele owaseGibithe, na?” UMose wayesesaba, ethi: “Impela le ndaba iyazeka.” UFaro esekuzwile lokho wafuna ukumbulala uMose. Kepha uMose wabaleka ebusweni bukaFaro, wahlala ezweni lakwaMidiyani; wahlala phansi ngasemthonjeni. UMpristi wakwaMidiyani wayenamadodakazi ayisikhombisa; afika ukukha amanzi, agcwalisa imiqengqe eyophuzisa izimvu zikayise. Kwafika abelusi, bawaxosha. Kepha wayesesukuma uMose, wawasiza, waphuzisa izimvu zawo. Lapho esefika kuRehuweli uyise, wathi yena: “Yini ukuba nisheshe nibuye namuhla na?” Athi: “OwaseGibithe usophulile esandleni sabelusi, futhi wasikhelela amanzi, waphuzisa izimvu.” Wathi kuwo amadodakazi akhe: “Uphi yena? Nimshiyeleni na? Mbizeni, eze ukuzokudla.” UMose wazimisela ukuhlala kulowo muntu; wamupha uMose uSipora indodakazi yakhe. Wazala indodana, wayiqamba igama lokuthi uGereshomu,* ngokuba wathi: “Ngangingumfokazi ezweni elingesilo elami.” Kwathi sekudlulile izinsuku eziningi, inkosi yaseGibithe yafa; abakwa-Israyeli babubula ngenxa yobugqila, bakhala; ukukhala kwabo kwenyukela kuNkulunkulu ngobugqila babo. UNkulunkulu wezwa ukububula kwabo; uNkulunkulu wakhumbula isivumelwano sakhe no-Abrahama, no-Isaka, noJakobe. UNkulunkulu wabona abantwana bakwa-Israyeli, wabanakekela.
U-Eksodusi 2:1-25 Contemporary Zulu Bible 2024 (CZB24)
Kwasekuphuma umuntu wendlu kaLevi, wathatha indodakazi kaLevi. Owesifazane wakhulelwa, wazala indodana; lapho embona ukuthi ungumntwana omuhle, wamthukusa izinyanga ezintathu. Kwathi engasakwazi ukumfihla, wamthathela umphongolo wemizi, wawumboza ngodaka nangekolitayi, wamlalisa kuwo umntwana; wayibeka emhlangeni ngasosebeni lomfula. Udadewabo wema khatshana ukuze azi okuzakwenziwa kuye. Indodakazi kaFaro yehla ukuyogeza emfuleni; bheka, intombazane yayihamba eceleni komfula; lapho ebona umkhumbi phakathi kwezinhlaka, wathumela incekukazi yakhe ukuba iwulande. Eseyivula, wabona umntwana, bheka, umntwana wayekhala. Wamhawukela kakhulu, wathi: “Lo ungomunye wabantwana bamaHeberu.” Wayesethi udadewabo endodakazini kaFaro: “Ngihambe ngikubizele umzanyana phakathi kwabesifazane bamaHebheru ukuba akuncelisele umntwana na?” Indodakazi kaFaro yathi kuye: “Hamba!” Yahamba incekukazi yabiza unina womntwana. Indodakazi kaFaro yathi kuye: “Thatha lo mntwana omncane, ungincelisele yena, futhi ngizokunika umvuzo wakho.” Owesifazane wathatha umntwana, wamupha. Wakhula umntwana, wamyisa endodakazini kaFaro, waba yindodana yayo. Wambiza uMose, wathi: “Ngokuba ngamkhipha emanzini.” Ngalezo zinsuku uMose esekhulile waphuma ukuyobheka abafowabo nemithwalo yabo; futhi wabulala umGibhithe owayeshaye umHebheru, omunye wabafowabo. Wabheka ngapha nangapha, wabona ukuthi akukho muntu, wambulala owaseGibithe, wamthukusa esihlabathini. Esephuma ngosuku lwesibili, bheka, amadoda amabili amaHeberu ephikisana omunye komunye, wathi kowonileyo: “Umshayelani umngane wakho na? Wathi: “Ubekwe ngubani umbusi nomahluleli phezu kwethu na?” ubuhlose ukungibulala mina njengalokho ubulele umGibithe na? UMose wayesesaba, wathi: “Impela le ndaba yaziwa.” UFaro esekuzwile lokho wazama ukumbulala uMose. Kepha uMose wabaleka ebusweni bukaFaro, waya wahlala ezweni lakwaMidiyani, wahlala phansi ngasemthonjeni. Umpristi wakwaMidiyani wayenamadodakazi ayisikhombisa; afika akha amanzi, agcwalisa izitsha zokuphuzisa umhlambi kayise. Abelusi bafika, bawaxosha, kepha uMose wasukuma, wawasiza, waphuzisa imihlambi yawo. Base befika kuyise uRehuweli, wathi: “Nifike kanjani masinyane kangaka namuhla na?” Base bethi: “UmGibithe wasisindisa esandleni sabelusi, wasidalela amanzi, waphuzisa umhlambi.” Wathi emadodakazini akhe: “Uphi na?” umshiyeleni umuntu ukuthi adle isinkwa. UMose wavuma ukuhlala kulowo muntu, wamupha uMose indodakazi yakhe uZipora. Wamzalela indodana, wayiqamba igama lokuthi uGereshomu, ngokuba wathi: “Ngangingowezizwe ezweni labezizwe.” Kwathi ngokuhamba kwesikhathi inkosi yaseGibhithe yafa, abantwana bakoIsrayeli babubula ngenxa yobugqili, bakhala inyembezi, bakhala kuNkulunkulu ngobugqili. UNkulunkulu wezwa ukububula kwabo, uNkulunkulu wakhumbula isivumelwano sakhe no-Abrahama, no-Isaka, noJakobe. UNkulunkulu wababheka abantwana bakwa-Israyeli, futhi uNkulunkulu wababona.