Isáak 2
2
Nutiɛlɛ́ túsalasala
1Paandimán, panɔ́ nuákanɛ́ɛ kuátap kúánɔ́ kɔ́ Ɔkɔ́n waasɔ́ u nukúm Yésus Kilíise, nutiákán túsalasala ké etényi ú pɛɛnd. 2Túkɔ́l pulinsí epue: Índɛ pɛɛnd páandi siepíkin káánɔ́ ɔ́ kiɔp, ewue ɛpílɛŋɛ́ peseé, amánda ú kóol kí inɛɛ́, ewue ɔsúkɔsukɔ u mɔɔnd ɛpílɛŋɛ́ nɛ mɛyɛ́ɛ́wɛ; 3índɛ nusiɔkɔ́l mɔɔnd unyɛɛ́ ɛpílɛŋɛ́ peseé nuɛlɛ kɛ́ɛ́yɛ́ ɛ́ɛ́: «Nyɔ́mbɛ́t á kiták kí ninyɔ́lí ekie»; nuɔyitɛn ɔsúkɔsukɔ ɛ́ɛ́: «Lɔpɔ́ pitényée kúnyaánɛ nyɔ́mbɛ́t e kúúsí káámɛ ká ambaná», 4akáánɛ́ nutimɛ́ɛlɛ́ túsalasala káánɔ́ ɔ́ kiɔ́p á? Akáánɛ́ Nutimɛ́ɛ́yɛ́ pesúmbí pisɛn pɛ́nyɛɛ́ nɔ pilɔk pí imbítáákítɛ́n á? 5Ɔ́núpítɔ́líkɛ́n, paandimán páámɛ pí iŋɔyɔ fío! Támbák timayɔ́ɔn epé pɛ́nyɛɛ́ pɔsúkɔsukɔ ké eŋis yé kúúsí é kuéyi pɔ́ inɛ́m á kuátap andíkɛ́k pɔ́kɔ́l niap é kiséé kí pufuŋ umaátánɛ́n epé pɔ́ɔyɔnɛ́ɛ wɔ́ á? 6Maná panɔ́ nuɛyɛɛnɛt ɔsúkɔsukɔ kɛ́ɛ́yɛ́ ké etényí. Kútípá inɛ́m sí pɛɛnd sínúséésenyée síond sínúsɔ́ɔ́mɔnɔn á? 7Sítipá sísikan opótí u kisiɛ́n Yésus maánúfá? 8Nuɛ́kɛɛlɛ peseé, índɛ nuówóónyosi kikotí kí Pufuŋ pú mɛnɛ́mɛnɛ́ɛ kíɔyɔnɛ́ɛ ɛ́ɛ́: Ɛɛ́kɛsikɛɛnɛn kuɔyɔ waakúánɔ́ ɛlɛɛ́ aŋú muɛ́t. 9Maná índɛ nuápian tusalasala káánɔ́ ɛ́ kikɛtɛ́kɛtɛ́ɛ, nuɛ́kɛɛlɛ kifal; kíi kínúpɛnɛnɛ́ɛ ɛ́ kuɛlɛɛ́ numɛ́ɛlɛ́ pitúkɔ́l. 10Índɛ ɛɛ́nɛkɛn pikotí piim oond aanan kimoómí, amánaná pikotí piim. 11É kémuémue wɔ́ umɔɔ́yɛ́t ɛ́ɛ́: «Ɛtiɛndɛ́t isɔm», waand kuɔyɛ́t ɛ́ɛ́: «Ɔtiɔ́n mɔɔnd». Índɛ ɛsiɛl ɛtiɛndít isɔm, maná ɔɔ́n mɔɔnd, amánaná kikotí. 12Ánukálá núond núɛlɛ niaŋ ní pɛɛnd póónyísóósosié pɔ́ ó kikotí kí weéŋelí. 13É kémuémue Támbák tiányipiá niɛ́nɔsúkɛ é péépé pátiányípá pɛ́ɛ́ninɛn ɔsɔk; maná ewú wɛɛ́nɛninɛ́ ɔsɔk, tipá waand apianan puwaá ni isɔ́ɔ́sɔ.
Kuátap kati meelínyélinyée nyɛ kukúén
14Paandimán «tiɛkíɛ́ nuyɛɛ́ kuɔyɛt ɛ́ɛ́: tuápian kuátap kati meelínyélínyée? Kuátap kukáánɛ́ nyɛ pɔ́kukuɔk á?» 15Índɛ andimán ááwɔ tipá na puandá pu kupílɛŋ kúnyaánɛ pú kunyá pú metúk meem, 16sɔ́k káánɔ́ ɔ́ kíɔp ɛ́ɛli kɔ́ɔ́p ɛ́ɛ́: «Ánuupɔ́ é kiyeéwe, ɔ́nupíɔ́nyɔ́ puyo, púnúsópon» kɔ́ɔk etiméekí wɔ́ epú utiányípá upian? Kiákí kiitámb kɔk. 17Yá anakáánɛ́ kuátap kútiányípá ne meelínyélínyényée kɛ́ɛ́yɛ́ nyɛ kukúén. 18Maná mɔɔnd kɔɔyɛt ɛ́ɛ́: «Anyɛ na kuátap, niŋúɛ inyɛ ne meelínyélínyée; índínyí kuátap kúáwɔ kati meelínyélínyée niŋúɛ íŋgutíínyi melínélínyée máámɛ métíínyenyée kuátap kúámɛ.» 19Índɛ aákaátapan ɛ́ɛ́: Támbák nyɛ omoómí, ɛɛ́kɛlɛ peseé. Pilɔk pí piliínditíe áákaátapan kɔ́kɔ́ɔ́p anakáánɛ́ píond pítɛɛtinɛ. 20Kikendél ekie, áákamba pulinsí ɛ́ɛ́ kuátap kúkati meelínyélínyée nyɛ kukúén á? 21Kiákí kímɛɛ́l ɛ́ɛ́ síí waasɔ́ Ápilaháam ɛɛ́yí mɔɔnd u indɛ́ndɛ́nɛ ó pusíó pú Támbák. Kútipá ɛ́ɛ́ umeekí muɔ́nɔ́ wɛɛyɛ́ Isáakɛ kifunɔ́ kí pipítɛkɔ́ á? 22Ɛɛ́kɛɛ́nɛn ɛ́ɛ́ kuátap kúɛ́yɛ́ ne meelínyée mɛ́ɛ́yɛ́ mapá embúl, meelínyée mɛ́ɛ́yɛ́ mówóónyósíé kuátap kúɛ́yɛ́. 23Káakáánɛ́ imfíóŋ ɔ́ɔ́yɔɔnɛ́ɛ ɛ́ɛ́: «Ápilaháam mapiá pipíóndínyí ɔtɛ́m á Támbák, púɛkɛɛ́nɛk ɛ́ɛ́ unyɛ mɔɔnd u indɛ́ndɛ́nɛ,» waapia kisiɛ́n ɛ́ɛ́ ekúl Támbák. 24Nuɛ́kɛɛ́nɛn ɛ́ɛ́: Támbák éémenyen kiluŋaluŋa kí indɛ́ndɛ́nɛ é meelínyélínyée mɛ́ɛ́yɛ́, kútipá kɔ́ɔ́m kɛ́ɛ́yɛ́ á kuátap. 25Yá anakáánɛ́ púmaápá ó pusíó pú Láhap umaápá kiɛndɛndɛ: púmapá kɛ́ɛ́yɛ́ é meelínyée umɛɛ́nɛ́k indɛ́ndɛ́nɛ ké eŋis yá Támbákɛ́ɛ kuɛl ɛ́ɛ́ umokólí pooyí insɔ́m pí Isilayɛl woond weekúúki pɔ́ kí iŋilí ilotí. 26Pilɔŋ pímoómí aná nuɔ́l nútiányípá núpian kiélum nyɛɛ́ nukúén, yá anakáánɛ́ kuátap kútiányípá ne meelínyélínyée nyɛɛ́ kukúén.
Okuqokiwe okwamanje:
Isáak 2: yav
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2026, CABTAL