رسولون اَعمال 3
3
مادرزاد لنگ شفا
1ای روز پِطرُس و یوحنا ساعت سه، ناهار پَش که دِعا وقت به، شَینده معبد. 2اَ لحظه، چند نفر، ای مردکیشون بایرد که مادرزاد شَل به. اَوُن اَ مردکشون هر روز معبده دروازه ور که چو نوم ’قشنگه دروازه‘ به ناعشون تا مردمیه دَ که معبد دله شَینده، صدقه ایگیره. 3وختی اَ شله مردک بوینتشه که پِطرُس و یوحنا گونده بیشینده معبد دله، چون کودَ صدقه بگَوِس. 4پِطرُس و یوحنا اَ شله مردکه خیرَه ببنده؛ پِطرُس اَجو بواتشه: «اَجَما دِدِس!» 5پس اَ شله مردک اَجون دِدِشت و منتظر بِه که اوُن اَجو ای چی آدینده.
6امّا پِطرُس اجو بوات: «از نه نقرَه دارِم نه طِلا که اَتَه آدیم، امّا اَ چی که دارم اَته آدیم! عیسی مسیح ناصری نومییَم اوپاب ببه و بِمج!» 7چو پَش پطرس اَ شَله مردکه راسه بالش بِگَت و اَوِش اوپاب بکه. هَه لحظه شله مردکه لنگون و چو ساقه قوّتشون بِگَت 8اِشتن یقا دَ اوپاب ببه و اِشتن لنگون سر وِندرد، راه دِکَت. اُخُری همنه که وازِش کردیَی خداش شکر بکه و چونییم بِشه معبد دله. 9همهی مردم اَوشون بوینت که مِتَی و خداش شکر کردَی، 10و بِزونسشونه اَو، هَه شَله مردکیه که چو پیش تر صدقه ایگَتنه را معبده ’ قشنگه دروازه‘ ور نِشتَی؛ پس، از اَ چی که چو را اتفاق دِکَته به، تعجبشون بکه و مات ببنده.
پِطرُسه لاوعون سلیمانه ایوانَ دَ
11هه موقع که اَ مردک پِطرُس و یوحنا خمنا شی اَی و چون کودَ جِدا نِبَی، همَّه ی جماعت حیران ’سلیمان پاتشا ایوانَ دَ‘ چون طرف بِدَوِسِنده. 12وختی پِطرُس اَمِش بوینت، جماعتِش دِدِشت و بوات: «ای اسرایلیه مردمِ، چرا اَم کارَ دَ تعجب کرا؟ چرا مات آبَیا اَجَما دِدِسا، فکر کرا اَما چما قوت و دین دارییم، کاریمون بکه که اَ مردک راه بیشی؟ 13ابراهیمه خدا و اسحاقه خدا و یعقوبه خدا، چما په عون خدا، اِشتن خادم، عیسیش جلال بدا، هَه کسی که شما اَورون تسلیم بکه و پیلاتُس والی وَر اَورون هاشا بکه، هر چند پیلاتس تصمیم اَم بِه که اَجو آزاد بکَره. 14ولی شما اَ قدوس و صالحه مردکرون هاشا بکه و چو عوض بگوسَیو ای قاتلی شما را آزاد بیبی. 15شما، اَ کسی رون که زیندگی سرچشمه به بکوشت، امّا خدا اجو مردعون دلَ زندِش بکه و اَما چو شاهدیوم. 16عیسی نوم و چو نوم ایمانییم اسه که ام مردک قوتش گَته، ام مردکی که اَجو وینو و آزونا. ایمانی که چو نومه واسطییم ام مردکِش، همن چشمون پیش کامل شفاش داعه.
17«و هننه ای برارون، زونِم که شما کار و شما قومه پیله ترون کار، نادانیه دَ بِه. 18ولی خدا هَم راهییم اَ چی ای که همهی پیغَمبرون زونییم پیشگوییش کرده به انجامِش بدا: که چو مسیح رنج کشه. 19پس توبَه بِکَرا و آگردا خدا طرف تا شما گناهِ پاک ببینده و خداونده طرف شما را تازه قُوتی آرسه، 20تا خدا، عیسی، یعنی هَه مسیح موعود که پیش تر شما را انتخابِش کرده، بخرسه. 21که آسمون گون اَجو قبول بکره تا روزونی که همَّه چی، مطابق اَ چی ای که خدا قَدیم دَ همهی مقدسه پیغمبرون زونییم واتشه، اتفاق دگننده. 22موسی پیغمبره واتشه: ”خداوندْ شما خدا، شما برارون دلَ، چِمن شارین پیغمبری، شما را خرسه؛ هر چه که اَو شما وا،گون گوش بکرا. 23هر که اَ پیغمبره لاوعون گوش مَکره، خدا قوم دلَ نابود بی.“
24«همَّهی پیغمبره نی، سموئیله پَش، ای صدا ام روزون درباره پیشگوییشون کرده. 25و شما، پیغَمبرون خوردگونییا. اَ عهدی وارث اِسییا که خدا شما په عونییم دِبَستِشِه. اَو ابراهیمش بوات: ” اِشته نسل واسطییم همَّهی مردم زمینه سر برکت گیرنده.“ 26وختی که خدا اِشتن خادم، عیسیش انتخاب بکه، اول اَوش بخرسا شما ور تا شماهون برکت بیدییه، و اَم کارییم شماهون، شما شرورونه راهونَ دَ آگاردونه.»
Okuqokiwe okwamanje:
رسولون اَعمال 3: KTT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
@ 2024 Korpu Company