Римвийриз 6
6
Гунагь патал кьенва, Аллагь патал чан ала
1Бес гила вучда? Берекат гзаф хьун патал, гунагьар авун давамардани? 2Гьелбетда ваъ! Гунагь патал чун кьенва. Гунагьда чавай уьмуьр гьикӀ давамариз хьурай? 3Чун, Иса Месигьдин ТӀварцӀелай цик акахьун къачунвайбур яз, Адан кьиникьа Адахъ галаз сад хьанвайбур тирди квез чизвачни бес? 4Гьа икӀ Бубадин баркалла алай къудратдалди Месигьдал кьейидалай кьулухъ чан хкайвал, цӀийи жуьреда уьмуьр тухун патал чна цик акахьун къачудай чӀавуз Адахъ галаз кьенвайбур яз кучукнай. 5Чун Адахъ галаз Адан кьиникьа сад хьанатӀа, чун Адахъ галаз Адал чан хтунани сад жеда. 6Чун мад гунагьдин лукӀар тежедайвал, чи уьмуьр гунагьдин гьукумдикай азад авун патал, чи виликан гунагькар тӀебиат Адахъ галаз санал хашуниз ягъайди чаз чизва, 7гьикӀ лагьайтӀа, кьейиди гунагьдикай азад хьанва.
8Чун Месигьдихъ галаз кьенатӀа, Адахъ галаз уьмуьр тухуз жедайдахъни чун агъунва. 9Месигьдал кьена чан хтайдалай кьулухъ Ам мад рекьин тийидайди чаз чизва: ажалдиз Адан винел мад гьукум амач. 10Кьейи чӀавуз Ам гунагь патал садра ва эбеди яз кьена, амма, чан алаз, Ада Аллагь патал уьмуьр тухузва. 11Гьа саягъда Иса Месигьда авай куьнни гунагь патал кьенвайбур яз, амма Аллагь патал чан алайбур яз гьисабзава.
12Гьавиляй ажал галай куь беденда гунагьдив агъавал ийиз тамир ва адан гьашер гьевесрин таъсирдик кваз жемир. 13Куь бедендин паяр гунагьдив вугумир, абур гьахъ-михьи туширвилин алатриз элкъуьрмир. Куьне куьн, кьена чан хтайбур хьиз, Аллагьдиз це, куь бедендин паярни Адаз гьахъ-михьивилин алатар яз це. 14Гунагьди квел агъавална кӀандач, вучиз лагьайтӀа куьн Къанундин ихтиярда ваъ, берекатдин ихтиярда ава.
Гунагьдин лукӀвиликай азад хьун
15Вучда, чун Къанундин ваъ, берекатдин ихтиярда ава лугьуз гунагьар ийидани? Гьелбетда, ваъ! 16Квез чизвачни кьван – куьне куьн са низ ятӀани муьтӀуьгъ хьун патал лукӀвиле твазватӀа, квекай адан табий лукӀар жезва: ажалдихъ тухузвай гунагьдин лукӀар ва я гьахъ-михьивилихъ тухузвай чӀалаз килигунин лукӀар. 17Аллагьдиз шукур хьурай, куьн гунагьдин лукӀар тир, амма гила куьне квев агакьай тербетдин рехъ кьун рикӀин сидкьидай къетӀ авунва. 18Куьн, гунагьдикай хкатна, гьахъ-михьивилин лукӀар хьана. 19За идакай, куьн гъавурда такьун мумкин тирди гьисабда кьуна, адетдин чӀалалди лугьузва.
Куьне виликдай куь бедендин паяр чиркинвилин ва къанунсузвилин лукӀвиле турвал ва идалди чӀуру кар авурвал, гилани абур паквилихъ тухудай гьахъ-михьивилин лукӀвиле тур. 20Куьн гунагьдин лукӀар тирла, куьн гьахъ-михьивиликай азад тир. 21А чӀавуз авур ва чпикай гила квез регъуь тир крарикай квез вуч хийир жезвай? Абурун эхир ажал я! 22Гила лагьайтӀа, куьн гунагьдикай азад хьанва ва квекай Аллагьдин лукӀар хьанва, и кардин майва – паквал, адан эхирни эбеди уьмуьр жеда. 23ГьикӀ лагьайтӀа гунагьди гузвай гьакъи ажал я, амма Аллагьдин пай чун Ребби Иса Месигьда хьунай гузвай эбеди уьмуьр я.
Okuqokiwe okwamanje:
Римвийриз 6: ЛезПК
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Институт перевода Библии, 2010-2024