Roma 16
16
Faŋ Pɔɔl nə bùꞌ ghɔ tɨ́ vɨɨ Rom maa məgaŋtə wəzwi mɔ́ꞌ
1Mə buꞌ ghɔ tɨ́ viŋ tɔ weenshu ŋwaa-nsiŋ Fibee, faŋ lùu wuu məgaŋtə faꞌ Nwi taa nshəŋtə vɨɨ Kristo fɨ shɨ Keŋkria. 2Viŋ jia ŋwə jəə maa yizii Kristo, yuu ŋkə kùꞌnə tɨ́ vɨɨ ley Nwi. Viŋ kɨ gaŋtə ŋwə maa vənu vənshə faŋ mbə taa kɨ ghɔꞌ ŋwə, buꞌ laa nshɨ-tɔ wi nəə gaŋtə vɨɨ vəyaŋ, baa gaŋtə nshɨ-tɔ ŋwaa nɨzi.
Shɔꞌtə Pɔɔl tɨ́ vɨɨ Kristo fɨ shɨ Rom
3Viŋ shɔꞌtə Prisila nə Akwila, faŋ yia vɨ vəŋ nəə faꞌ faꞌ Kristo mɔ́ꞌ nə. 4Vəŋ nəə kəə biŋ ŋkee maa məku tɔ mə, maa məbweysə mə faŋ vɨɨ nəə shoꞌ ghuu ŋaa nə. Kee bwaŋ mə bwaŋ vəŋ nɨnɔŋ me, vəməshəŋtə və vɨɨ Kristo vənshə fɨ taa tətɔŋ fu bwaŋ vəŋ nɨzi. 5Viŋ shɔꞌtə vəŋ, baa shɔ̀ꞌtə nshəŋtə vɨɨ Kristo fɨ taa ŋii vəŋ, baa shɔ̀ꞌtə Epaynetɔs, faŋ mə kàw ŋwə nə. Ŋwə nə luu mfɔŋ wə faŋ ŋwə nə fìŋ tɔ ki tɨ́ Kristo fɨ shɨ Asia. 6Viŋ shɔꞌtə Meri nɨzi, faŋ ŋwə nə sàŋ ŋwaa dɨdɨꞌ buꞌ viŋ nə. 7Viŋ shɔꞌtə Andronikɔs nə Junias, faŋ lùu vɨɨ shɨ vaŋ nə, yia vɨ vəŋ nə luu taa ŋii mfiŋ mɔ́ꞌ. Vəŋ lùu vɨɨ kwalə fɨ taa ŋwaa vɨɨ ntɔŋ Kristo, baa lùu vənshɔɔ vɨsɨ vaŋ maa nu Kristo. 8Viŋ shɔꞌtə Ampliatɔs faŋ mə kàw ŋwə maa yizii tɨta Kristo. 9Shɔꞌtə Urbanɔs, faŋ nsiŋ vɨ vəŋ nəə faꞌ faꞌ Kristo mɔ́ꞌ nə, nə Stakis faŋ mə kàw ŋwə. 10Shɔꞌtə Apeles, faŋ ŋwə wèꞌ maa nu Kristo nə. Shɔꞌtə vɨɨ fɨ fu Aristɔbulɔs, 11nə Herodiɔn, faŋ lùu wuu shɨ ŋwaa nə. Shɔꞌtə vɨɨ fɨ fu Narsisəs nɨzi, faŋ vəŋ lùu vɨɨ tɨta Kristo. 12Shɔꞌtə Trifayna nə Trifosa faŋ vəŋ sàŋ ŋwaa vəŋ maa məfaꞌ faꞌ tɨta Kristo. Shɔꞌtə Persis nɨzi, faŋ mə kàw ŋwə; ŋwə nə fàꞌ faꞌ Mɔꞌmbi dɨdɨꞌ. 13Shɔꞌtə Rufɔs faŋ tɨta Kristo nə shòꞌ ŋwə nə, ghɔ nshu wi, faŋ lùu nshu ŋwaa nɨzi. 14Viŋ shɔꞌtə Asinkritɔs, nə Flegɔn, nə Hermis, nə Patrobas, nə Hermas, nə vaŋ-nshwi vaŋ-nsiŋ mbɨə faŋ ghɔ vɨ vəŋ lùu mɔ́ꞌ nə. 15Shɔꞌtə Filolɔgɔs nə Julia, nə Nereɔs ghɔ weenshu wi wəzwi, nə Olimpas, nə vɨɨ ley Nwi vənshə faŋ ghɔ vɨ vəŋ lùu mɔ́ꞌ nə.
16Viŋ kɨ shɔꞌtə yiŋwaa yiŋ, baynə maa yizii Nwi. Vəməshəŋtə və vɨɨ Kristo vənshə shɔꞌtə viŋ nɨzi.
Baw vɨɨ Kristo tɔfə buꞌ vɨɨ məbuulə nu Nwi
17Vaŋ-nshwi vaŋ, mə tɨsə viŋ laa, viŋ kɨ tɔfə maa vɨɨ mbɨə faŋ vəŋ jwi nə ŋgaasə, yɨsə vɨɨ gu maa nu Kristo, faŋ viŋ nə zwètə nə. Viŋ nyɨŋ fɨ yɨ vəŋ, 18buꞌ laa kəŋ vɨɨ vɔ́ kee faꞌ luu tɨ́ tɨta ŋwaa-nsiŋ Yeso Kristo me, vəŋ faꞌ luu tɨ́ njyoꞌ vəŋ, bweꞌsə vɨɨ faŋ məbiŋ vəŋ lùu ŋoo-shuu vəŋ nə yigisə yibwaŋnə nə yigisə yisɨꞌsə. 19Gə fɨ maa viŋ, vɨɨ vənshə duꞌtə vəŋ zɔ̀ kɔ̀ŋ məzɔnə wiŋ, faŋ viŋ zɔ̀nə Nwi nə. Mə kìi məŋaytə shɔ buꞌ viŋ. Mə kəə laa viŋ kɨ tɔfə maa nu faŋ lùu nu jəə, manə nu faŋ lùu nu bwə. 20Nwi faŋ ŋwə kɔ məduꞌ-nyɔŋ tɨ́ vɨɨ nə, taa fiitə tɨɨ vəzwitə vəbwəvə Satan ŋiꞌ ghuu viŋ, ŋkə kee baa luu ntaŋ me. Tɨta ŋwaa-nsiŋ Yeso tu mənɔŋ-bwaŋnə tɔ viŋ!
Məshɔꞌtə mɔ́ꞌ tɨ́ vɨɨ Rom
21Timoti, faŋ yia ŋwə faꞌ mɔ́ꞌ nə, nə Lusiɔs, nə Jason, nə Sosipata, faŋ lùu vɨɨ shɨ vaŋ nə, shɔꞌtə viŋ. 22Mə Tertiɔs, faŋ mə nyɔ̀ꞌ ŋwaꞌlə ŋwə̀ tɨ́ viŋ (maa yizii Pɔɔl), shɔꞌtə viŋ nɨzi maa yizii Yeso Kristo. 23Gayɔs faŋ mə shì taa ŋii ŋwə, shɔꞌtə viŋ nɨzi. Nshəŋtə vɨɨ Kristo yinshə luu taa ŋii ŋwə. Erastɔs, wuu məndeynə ka, ghɔ weenshu ŋwaa-nsiŋ Kwartɔs, shɔꞌtə viŋ nɨzi. [ 24Tɨta ŋwaa-nsiŋ Yeso Kristo tu mənɔŋ-bwaŋnə tɔ viŋ! Ŋkə lùu nɨniŋ.]
Pɔɔl bəŋsə Nwi
25Nsiŋ kɨ bəŋsə Nwi faŋ kaꞌ ŋwə kwàŋ wutə maa viŋ, viŋ weꞌ maa nu Yeso Kristo faŋ lùu ŋiꞌ ntɔŋ yijəə Nwi faŋ mə fɨꞌtə tɨ́ vɨɨ nə. Nyə nə ndènə shù fɨshi, 26baa fùu yikəꞌ vɨɨ ndwə. Nwi faŋ ŋwə nə luu shɔ shù fɨ yighee vɨsɨ, ndɔ goꞌsə yighee muꞌ nə, gì laa, vɨ gə fɨ̀ꞌtə nu Kristo kɔ́ tɨ́ vɨɨ taa məshɨ mənshə, laa vəŋ kɨɨ nə ŋiꞌ nu ŋkɨə faŋ ŋkə lùu taa ŋwaꞌlə nshiisə-ŋii sɔghɔ nə, nùŋ fwisə vəŋ maa Kristo, kɨ zɔnə ŋwə. 27Nɨniŋ, nsiŋ kɨ bəŋsə Nwi faŋ yitɔfə yinshə ndɔ̀ fɨ ghɔ ŋwə, buꞌ nu Yeso Kristo maa vəshi və mbi vənshə, kee ndɔ shìa ki me. Ŋkə lùu nɨniŋ.
Okuqokiwe okwamanje:
Roma 16: bav
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1993, Wycliffe Bible Translators, Inc. All rights reserved.