Roma 14
14
Faŋ bàw vɨɨ mbɨə faŋ vəŋ weꞌ maa nu Kristo, gaŋtə vɨɨ mbɨə faŋ vəŋ kee yiweꞌ me
1Viŋ kɨ meꞌtə wə ntɨə faŋ ŋwə kee weꞌ maa nu Nwi me taa ŋwaa viŋ, kɨ viŋ vɨ vəŋ sɨɨnə yigi maa vənu vi me. 2Wə mɔ́ꞌ yaa kɨ bɨꞌtə laa ŋkə kùꞌnə maa məzɨ taŋ fazɨ nshə. Wuu mɔ́ꞌ faŋ ŋwə kee lùu weꞌ maa nu Nwi me, kwə luu sheꞌ mbasə biisə. 3Kɨ wə ntɨə faŋ ŋwə zɨ taŋ fazɨ nshə, kee kɨ shiasə wə ntɨə faŋ ŋwə kee zɨzɨ nə me. Gə fɨ maa wə ntɨə faŋ ŋwə kee zɨzɨ me, kɨ ŋwə shia nsɔꞌ tɔ wə ntɨə faŋ ŋwə kwə mbasə nyaa me, buꞌ laa Nwi bìŋ ŋwə. 4A sii lùu ndə, tɨ́ kaꞌ a kɨ sɔꞌ wuu faꞌ wə dɨday? Luu sheꞌ tɨɨ faꞌ wi faŋ kaꞌ ŋwə gì laa ŋwə faꞌ jəə, tɨꞌnə me bwə. Luu nə, mə kɨɨ laa nu ki taa kuꞌnə, ŋwə kee gù me, buꞌ laa tɨta wi kìi wutə maa məbɨŋsə ŋwə. 5Wə mɔ́ꞌ yuu kɨ bɨꞌtə laa shi kəmɔ́ꞌ kwàlə shɔ̀ɔ vəshi vəmɔ́ꞌ. Wə dɨday bɨꞌtə ŋkii laa vəshi vənshə luu nɨndɨŋ. Kee luu nsɔꞌ me. Bàw wə tɨ̀ me wə kii ŋkitə yi maa nu, tɨ̀ŋnə shɔ. 6Wə ntɨə faŋ ŋwə bɨꞌtə shi mɔ́ꞌ laa ŋkə luu kəkwalə tɨ́ ŋwə, buu ŋwə bɨꞌtə nɨniŋ, bəŋsə tɨta ŋwaa-nsiŋ nɨniŋ. Gə fɨ maa wə ntɨə faŋ ŋwə kwə mbasə, ŋwə kwə lùu maa yizii tɨta ŋwaa-nsiŋ, buꞌ faŋ ŋwə bwaŋ Nwi maa fazɨ kɔ́. Wə ntɨə faŋ ŋwə twèy maa məkwə mbasə, yɨ nɨniŋ buꞌ tɨta ŋwaa-nsiŋ nɨzi, bwaŋ Nwi sheꞌ nɨniŋ. 7Tuu wə fɨ taa ŋwaa nsiŋ kee shi maa wutə ki me. Tuu wə fɨ taa ŋwaa nsiŋ kee ku buꞌ wutə ki me. 8Kɨ luu nsiŋ duꞌ vəbwey, buu lùu tɨ́ tɨta ŋwaa-nsiŋ faŋ nsiŋ duꞌ vəbwey. Kɨ luu nsiŋ kukə, nsiŋ kukə maa yizii tɨta ŋwaa-nsiŋ nɨzi. Nɨniŋ, nsiŋ duꞌ vəbwey, tɨꞌnə me kùkə, buu luu sheꞌ fa kəmuꞌ. Kii sheꞌ tɨta Kristo kìi nsiŋ. 9Lùu ŋiꞌ nu ŋkɨə faŋ tɨta Kristo nə ku, baa ywèy fɨ shɨ yiku, laa ŋwə ndɔ sɔꞌ vəŋku və nsisə, baa nə vɨɨ bweynə. 10Jwi fɨ maa ghɔ, faŋ a kee kwə mbasə me, sii yɨ kə, buu a kɨ shia nsɔꞌ tɔ weenshu wə? Nə ghɔ faŋ a kwə vətɔ vənshə, sii yɨ kə buu a kɨ shiasə weenshu wə? Maa nsiŋ vənshə ndɔ tɨŋnə vɨsɨ Nwi, ŋwə sɔꞌ nsiŋ. 11Luu sheꞌ faŋ ŋkə lùu taa ŋwaꞌlə Nwi laa,
«Mɔꞌmbi gì laa,
ŋkee maa yinsəŋ, sheꞌ faŋ mə dùꞌ bwey nə,
vɨɨ vənshə ndɔ kɨ tuŋ vətɔ vəyəə vəvəŋ nsi vɨsɨ mə.
Wə tɨ̀ me wə ndɔ kɨ bəŋsə Nwi.» #Aysaya 45.23.
12Nɨniŋ, nsiŋ vənshə ndɔ kɨ kɔ bəŋsə tɨ́ Nwi buꞌ vənu vaŋ-nsiŋ tɔ tɔ.
Kaa yɨ nu faŋ ŋkə bɨsə fwi weenshu wə me
13Nɨniŋ, kɨ nsiŋ baa kɨ sɔꞌ vaŋ-nshwi vaŋ-nsiŋ me. Viŋ bee kii tə sɨ laa kɨ viŋ kɨ yɨsə nu faŋ kaꞌ weenshu wə tùŋ ghuu ki shɔ gu, gaasə ghɔ Nwi me. 14Mə kɔꞌ kɨɨ, baa nùŋ fwi nyaa shɔ maa yizii tɨta Yeso, laa tuu fa kee lùu fa bwə maa nshɨ-tɔ wi me. Fa lùu fa bwə sheꞌ tɨ́ wə ntɨə faŋ ŋwə bɨꞌtə laa luu fa bwə. 15Luu nə, a zɨ fa faŋ weenshu wə taa luŋ buꞌ faŋ ŋwə bɨꞌtə laa lùu fa bwə, buu a kee yɨ̀ jəə me, toꞌ ghuu yitoꞌ kə, kee kàw vɨɨ me. Kaa bɨsə fwi wə ntɨə faŋ Kristo nə kù tɔ ŋwə nə, buꞌ fazɨ kɔ́ me. 16Nɨniŋ laa kɨ viŋ yɨsə vɨɨ kɨ ndasə viŋ maa nu jəə faŋ Nwi kɔ̀ tɨ́ viŋ nə me. 17Ŋiꞌ nu yifwàŋ Nwi kee lùu nu məzɨ fa, baa nə nu mənu fa me. Nu yifwàŋ Nwi lùu nu faŋ Zwitə Ley Nwi ŋìi taa fwi wə, kìasə nu ki, ŋkə loomə, fwi yi zutə, lwàŋ nə məŋaytə. 18Wə ntɨə faŋ ŋwə faꞌ faꞌ Kristo maa jɨɨ nyə̀, bàw tɨ́ Nwi, baa kùꞌnə tɨ́ vɨɨ nɨzi. 19Nɨniŋ, nsiŋ kɨ beꞌsə fɨ yiba nu faŋ ŋkə yɨsə nsiŋ duꞌ nə mənɔŋ-bwaŋnə, gaŋtə yiŋwaa nyaa-nsiŋ maa məgə vɨsɨ maa nu Kristo. 20Kaa bɨsə faꞌ Nwi buꞌ nu fazɨ me. Kaꞌ vɨ zɨ vətɔ vəzɨvə vənshə, luu nə, ŋkə lùu kəbwə maa məzɨ fa mɔ́ꞌ faŋ wə bɨꞌtə fɨ taa fwi ŋwə laa lùu nu bwə. 21Ŋkə bàw maa məmeꞌtə maa məkwə mbasə, baa nə maa mənu məluꞌ, tɨꞌnə me yɨ̀ nu mɔ́ꞌ faŋ ŋkə taa bɨ tɨ́ weenshu wə, ŋwə gu shɔ. 22Nu ŋkɨə faŋ a bìŋ taa fwi ghɔ, a nùŋsə maa nshɨ-tɔ wə vɨsɨ Nwi. Mənɔŋ-bwaŋnə tɨ́ wə ntɨə faŋ ŋwə biŋ nu, tɨ́ kaꞌ fwi yi kee baa sɔꞌ ŋwə buꞌ nu kɔ́ faŋ ŋwə biŋ nə me. 23Kɨ luu wə zɨ fa, faŋ ŋwə kɔlə bɨꞌtə fɨ taa fwi ŋwə laa ŋkə kee kùꞌnə maa məyɨsə nɨniŋ me, buu ŋwə gù nsɔꞌ, buꞌ faŋ ŋwə yɨ̀ nu faŋ ŋwə kee biŋ laa lùu nu jəə me. Vənu vənshə faŋ wə yɨsə, faŋ ŋwə kee biŋ laa lùu nu jəə me, buu lùu nu bwə.
Okuqokiwe okwamanje:
Roma 14: bav
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1993, Wycliffe Bible Translators, Inc. All rights reserved.