Akts 10
10
Faŋ Kɔrniliɔs, tɨɨ vəsogeꞌ, nə bìŋ nu Yeso
1Wə mɔ́ꞌ nə luu shɔ, ntɨꞌ Sisaria, yizii yi luu Kɔrniliɔs. Ŋwə nə luu tɨɨ vəsogeꞌ taa ŋii njɔŋ faŋ vɨ nəə tii nə ŋii njɔŋ vɨɨ Itali. 2Ŋwə nəə fee Nwi, nùŋ fwi yi maa nu Nwi ghɔ vɨ ŋii yi yinshə. Ŋwə nə faꞌ jəə maa məgaŋtə mbəəsə fɨ shɨ Judia, ndɔ shɔꞌtə Nwi ghee nshə. 3Shi mɔ́ꞌ bwafu nshiiŋii Nwi fuu yikəꞌ ŋwə, tii ŋwə laa, «Kɔrniliɔs.» 4Ŋwə ndeynə fee, gì laa, «Tɨta, lùu nu kə?» Nshiiŋii Nwi yɔ́ gi tɨ́ ŋwə laa, «Nwi zɔ̀ məshɔꞌtə wə, baa nə vəkɔ və faŋ a gaŋtə vɨɨ ŋɨꞌ shɔ nə. Nwi kàw vənu vɔ́. 5Nɨniŋ, bàw a tɔŋ vɨɨ, vəŋ gə Jɔpa, gə bə̀ŋ jwì nə Saymon faŋ vɨ tii ŋwə nə Pita. 6Ŋwə shi shɔ taa ŋii Saymon mɔ́ꞌ, faŋ luu wuu məbaysə gɔsə, ŋii yi lùu mbɨɨ mamuu.» 7Nshiiŋii Nwi yɔ́ metə yigi yɔ́, ndɔ̀ gə̀. Kɔrniliɔs tii vɨɨ faꞌ vi vəbɔɔ nə sogeꞌ muꞌ faŋ ŋwə nəə fee Nwi, fɨ taa ŋwaa vɨɨ mbɨə faŋ vəŋ nəə kɨꞌ ŋwə. 8Ŋwə naysə vənu vənshə tɨ́ vəŋ, kɨ nii tɔŋ vəŋ Jɔpa.
9Fu kɨ lee, faŋ vɨɨ vɔ́ nə duꞌtə vəŋ toꞌ, kɨ kəə ziꞌ Jɔpa, Pita koꞌ tɔ ŋii maa məshɔꞌtə Nwi. Nə luu maa yizɔ buꞌtə. 10Jɨŋ za ŋwə, ŋwə nə kəə fa zɨ, faŋ vɨ kɨ bii naysə, njyəə shi ŋwə. 11Ŋwə ye yizɔ ŋaꞌnə, fa mɔ́ꞌ nee nə siꞌ jwi, kəꞌ yaa njwi yifusə yikwalə faŋ vɨ jìa maa ŋgɔŋsə yishwe, kɨ suꞌsə nsi. 12Nyaasə sənshə luu taa tey yi, nə vətɔ faŋ mbə toꞌ suu fɨ nsi, nə mənwə fɨ taa yizɔ. 13Gɨ yimɔ́ꞌ gi tɨ́ ŋwə laa, «Pita, ndɔ yizɔ, zwìlə kwə!» 14Pita gi laa, «Bey, tɨta, mə nə kee ta zɨ̀ fa faŋ lùu fa bwə me, tɨꞌnə me, fa faŋ lùu fa faŋ ŋkə kee lùu kəley vɨsɨ Nwi me.» 15Gɨ yɔ́ baa kii bəŋsə jwì maa ŋwə lwesə ghee bɔɔ, gì laa, «Fa ŋkɨə faŋ Nwi sɔ̀ ŋkə ley, kaa baa tii laa lùu fa bwə me!» 16Nu kɔ́ nə gày nɨniŋ ghee tia. Vɨ baa kɨ nii ndì, gə̀ nə ŋkə yizɔ. 17Tɔ Pita shii maa ŋiꞌ njyəə yɔ́, faŋ ŋwə nə ye nə. Sheꞌ yighee yɔ́ vɨɨ mbɨə faŋ Kɔrniliɔs nə tɔŋ vəŋ nə, tɨŋ shuu ŋkɔꞌ, tɨ́ vəŋ bitə, kɨ̀ɨ nə ŋii Saymon. 18Vəŋ tɨŋnə, kɨ tii, bitə laa, «Saymon faŋ vɨ tii ŋwə nə Pita, shi feenə mu?» 19Pita nəə kɨ bii kəə maa məkɨɨ nə ŋiꞌ njyəə yɔ́, Zwitə Ley Nwi gi tɨ́ ŋwə laa, «Ye vɨɨ vətia faŋ vəŋ kəə ghɔ. 20Ndɔ fɨ nsi, siꞌ gə ye vəŋ, viŋ vɨ vəŋ gə, kee bɨbɨꞌtə me, buꞌ laa tɔ̀ŋ mə tɔ̀ŋ vəŋ.» 21Pita siꞌ, gə̀ gì tɨ́ vɨɨ vɔ́ laa, «Mə lùu wə ntɨə faŋ viŋ kəə. Viŋ jwi kəə kə?» 22Vəŋ bəŋsə tɨ́ ŋwə laa, «Tɔŋ Kɔrniliɔs, tɨɨ vəsogeꞌ, wə faŋ ŋwə fee Nwi, tɔ̀ŋ yia. Jɨɨ yi lùu yiloomə. Vɨɨ vənshə fɨ shɨ Judia gisə jəə buꞌ ŋwə. Nshiiŋii Nwi fùu yikəꞌ ŋwə, gì tɨ́ ŋwə laa ŋwə tii ghɔ, laa a jwi taa ŋii ŋwə, ŋwə taa zɔ nu ŋkɨə faŋ a taa gi tɨ́ ŋwə.» 23Pita zɔ nɨniŋ, ŋìisə vɨɨ vɔ́ taa ŋii, ndì vəŋ maa vəndɔ vi. Fu kɨ lee ŋwə ndɔ, fùu, ghɔ vɨ vəŋ gə. Vɨɨ məbiŋ nu Yeso vəmɔ́ꞌ fɨ Jɔpa beꞌsə ŋwə. 24Fu kɨ lee vəŋ ziꞌ ntɨꞌ Sisaria, tɨ́ Kɔrniliɔs kɨꞌ vəŋ, bàytə vɨɨ yikuu vi nə vɨɨmba vi shəŋ muꞌ. 25Faŋ Pita nə jwì shɔ nə, Kɔrniliɔs ndɔ, gu ghuu ŋwə, bə̀ŋsə ŋwə. 26Pita shaꞌsə ŋwə yizɔ, gì laa, «Tɨŋnə, mə lùu wə nɨzi!» 27Nɨniŋ, vəŋ gi, ŋìi taa ŋii, Pita ye vɨɨ ŋkee vəyaŋ faŋ vəŋ nə bàytə yifi. 28Ŋwə gi tɨ́ vəŋ laa, «Maa viŋ kɨɨ laa vɨ twèy tɨ́ vɨɨ Jus ŋkee nəŋay, laa kɨ vəŋ kɨ zɨnə, tɨꞌnə me, kɨ shɔɔnə ghɔ vɨ vɨɨ faŋ lùu vɨɨ tɔmə day me. Luu nə, Nwi də̀ shee laa, kɨ mə tii wə laa ŋwə lùu wuu bwə, tɨꞌnə me laa ŋwə kee lùu ley vɨsɨ Nwi me. 29Nɨniŋ, mə jwì feenə, kee twey me, faŋ viŋ tìi mə nə. Mə bitə tɨ́ viŋ laa viŋ tìi mə laa kə?» 30Kɔrniliɔs gi tɨ́ ŋwə laa, «Shɔ̀ɔ vəshi yishwe ndwə, sheꞌ faŋ ndwə nee, maa vəshɨshwi vətia, mə duꞌ taa ŋii mə, kɨ shɔꞌtə Nwi. Wə mɔ́ꞌ gwəkə tɨ̀ŋnə vɨsɨ mə nə njwi si səndwaꞌlə, 31gì shee laa, «Kɔrniliɔs, Nwi zɔ̀ məshɔꞌtə wə, faŋ a shɔꞌtə Nwi shɔ nə. Nwi lumə vətɔ mbɨə faŋ a kɔ tɨ́ vɨɨ ŋɨꞌ nə. 32Nɨniŋ, tɔŋ ntɔŋ ntɨꞌ Jɔpa, tìi Saymon faŋ vɨ tii ŋwə nə Pita nə, laa ŋwə jwi. Ŋwə shi taa ŋii Saymon, wuu məbaysə gɔsə fɨ yɨ mamuu.» 33Nɨniŋ, mə tɔ̀ŋ ntɔŋ tɨ́ ghɔ yighee muꞌ. A yɨsə jəə faŋ a jwì nə. Yia vənshə baytə feenə ndwə vɨsɨ Nwi, kɨꞌ maa məzɔ nu ŋkɨə faŋ Mɔꞌmbi tɔ̀ŋ ghɔ nə ŋkə.»
34Pita ŋaꞌ shuu wi, gì laa, «Mə kɨɨ ŋkee yinsəŋ ndwə laa, Nwi kee yaa kɨ yɨsə nu ŋkuŋ me. 35Kɔlə kɨ luu tɔmə kə, wə faŋ ŋwə fee Nwi, baa yɨsə nu ŋkɨə faŋ ŋkə lùu kəloomə, Nwi kaw ŋwə. 36Viŋ kɔꞌ kɨɨ nə yigi njyə faŋ Nwi nə tɔ̀ŋ tɨ́ vɨɨ Isirayl laa, mənɔŋ-bwaŋnə lùu fɨ yiba Yeso Kristo. Yeso lùu wuu məsɔꞌ mbi yinshə. 37Viŋ kɨ̀ɨ nə vənu mbɨə faŋ mbə nə gày shɨ Judia, tèy fɨ shɨ Galilii fɨ yiba nu məfi muu, faŋ Jɔn nə fɨꞌtə nə. 38Nwi nə yòꞌ Yeso, wuu Nazaret, nə Zwitə Ley Nwi, baa nə wutə, ŋwə ndɔ kɨ toꞌ vəshəŋ vənshə, yɨsə vənu vəjəəvə, baa shùꞌ vəza fɨ maa vɨɨ mbɨə faŋ zwitə bwə nə luu taa ŋwaa vəŋ, buꞌ laa Nwi nə luu yiba jɨŋ ŋwə. 39Yia nə yè vənu vənshə faŋ ŋwə yaa yɨsə shɨ Judia nə sɨ, baa nə mbə faŋ ŋwə nə yɨ̀ ntɨꞌ Jerusalem. Vɨ kɨ nii zwì ŋwə, faŋ vɨ nə bèy ŋwə fuu fəŋkɔꞌ. 40Vəshi kɨ shɔɔ vətia, Nwi yweysə ŋwə fɨ shɨ yiku, yɨ̀sə laa ŋwə fuu ntee sɨ vɨɨ. 41Luu nə, ŋwə nə kee fùu sɨ vɨɨ vənshə me, fuu sheꞌ sɨ yia, buꞌ laa yia lùu vɨɨ mbɨə faŋ Nwi nə shoꞌ laa yia ye ŋwə nə sɨ. Ŋwə nə fùu fɨ shɨ yiku, yia vɨ vəŋ zɨ, ndɔ nu. 42Ŋwə nə nàysə tɨ́ yia laa yia kɨ fɨꞌtə nu Yeso tɨ́ vɨɨ, baa naysə tɨ́ vɨɨ laa, Nwi nùŋsə Yeso laa ŋwə luu wuu məshia nsɔꞌ vɨɨ bweynə nə vəŋku vənsisə. 43Nshiisə-ŋii sɔghɔ vənshə fɨ ywaŋ-vɨsɨ, nə gi kɔ̀ŋ ŋwə ntee, laa wə tɨ̀ me wə faŋ ŋwə bìŋ ŋwə, buu vənu vəbwəvə vi taa mè, sheꞌ buꞌ yizii Yeso.» #Aysaya 53.5-6. 44Sheꞌ faŋ Pita nəə kɨ bii gisə, Zwitə Ley siꞌ lwaŋ taa ŋwaa vɨɨ vənshə faŋ vəŋ nə zɔ̀ yigi yɔ́ nə. 45Nu kɔ́ ghɔꞌ vɨɨ məbiŋ Kristo fɨ taa ŋwaa vɨɨ Jus, faŋ vəŋ nə jwì ghɔ vɨ Pita nə. Shuu vəŋ yɔŋ laa Nwi tù Zwitə Ley ki maa vɨɨ faŋ vəŋ nə kee lùu vɨɨ Jus me, faŋ vɨ nə kee sɨ̀ɨtə vəŋ me. Nwi nə key vəŋ nə Zwitə Ley ki, 46vəŋ gisə təghaŋ nɨŋkwiŋ nɨŋkwiŋ, bəŋsə Nwi. Pita gi laa, 47«Kaꞌ wə twèy tɨ́ vɨɨ və̀ maa məfi muu mə Nwi mu? Vəŋ duꞌtə vəŋ fi Zwitə Ley Nwi sheꞌ yaa nsiŋ.» 48Nɨniŋ, Pita gi laa vɨ kɔ muu mə Nwi tɨ́ vəŋ maa yizii Yeso Kristo. Vəŋ kɨ nii bùꞌ ghɔ tɨ́ ŋwə laa ghɔ vɨ vəŋ shi vəshi vəmɔ́ꞌvə.
Okuqokiwe okwamanje:
Akts 10: bav
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1993, Wycliffe Bible Translators, Inc. All rights reserved.