Icitendekelo 27
27
Yakobo apoka amapaalo yali nokupeelwa kuli Esau
1Ilyo Isaki akotele, na menso yakwe yanakuka icakuti alafilwa no kumona, aitile umwana mwaume mukalamba Esau, amweba ati, “We mwana wandi!” Nao mwane ayasuka ati, “Epo ndi.” 2Isaki amweba ati, “Mona, nomba ninkota, kabili nshishibe no bushiku ningafwa. 3Kanshi nomba buula ifyanso fyobe, imifwi yobe no buta bobe, uye mu mpanga mukulunga, unjipaileko inama. 4Elyo wise umpekanishisheko icakulya icanunkila, cilya natemwa, ulete njise ndye. Epakuti nkupaale ilyo nshilafwa.”
5Kanshi Rebeka aleumfwako ilyo Isaki alelanda kuli mwane Esau. Ilyo aile mu mpanga mukulunga inama nokuti alete, 6Rebeka aeba mwane Yakobo ati, “Mona, naumfwako ifyo bawiso bacilaeba munonko Esau, baleti, 7‘Undetele inama elyo umpekanishishe icakulya icanunkila icakuti ndye, uleke nkupaale pa cinso cakwa Yawe ilyo nshilafwa.’ 8Kanshi we mwana wandi, umfwa bwino kuli ine, ucite nefyo ndekweba. 9Kabiye ku mukuni wa mbushi, undeteleko utwana twa mbushi tubili utusuma pakuti njise mpekanishishe bawiso icakulya icanunkila umusango bacitemenwamo. 10Elyo wise utwalile bawiso balye pakuti bakupaale ilyo bashilafwa.”
11Lelo Yakobo aebele nyina Rebeka ati, “Munyinane Esau muntu uwamapipi, lelo ine ndi muntu wa mubili uwatelela. 12Nga cakuti batata baya mpampanta, cileya moneka kwati ndebomfya ubucenjeshi. Lyena ninshi te paalo ndeya poka, lelo kuiletelelafye ukulapishiwa.” 13Nyina amweba ati, “We mwana wandi, leka uko kulapishiwa kukese pali ine. Iwe citafye ifyo nandile. Kabiye, kandetele utwana twa mbushi.” 14Kanshi Yakobo epakuya buula utwana twa mbushi, atuleta kuli nyina. Nyina nao epakupekanya icakulya icanunkila mu musango wishi atemenwe. 15Elyo Rebeka abuula ifyakufwala ifyawamishe ifyali mu ŋanda ifya mwana mukalamba Esau, afwika no mwana wakwe mwaice Yakobo. 16Elyo apomba impapa sha twana twa mbushi ku maboko yakwa Yakobo na mu mukoshi umushali mapipi. 17Apeela mwane Yakobo mu minwe icakulya icanunkila no mukate apangile.
18Yakobo aya kuli wishi, asosa ati, “Tata wandi!” Wishi nao ayasuka ati, “Epo ndi. Niwe ani we mwana wandi?” 19Yakobo ayasuka wishi ati, “Nine Esau ibeli lyenu. Nincita ifyo mwacinjeba. Aleni imeni mulyeko inama yandi, pakuti mumpeele ipaalo lyenu.” 20Isaki aipusha mwane ati, “We mwana wandi, apa pene epo wasanga inama?” Yakobo ayasuka ati, “Ni Yawe, Lesa wenu uwampeela ishuko.” 21Elyo Isaki aebele Yakobo ati, “Palama kuno mwana wandi uleke nkupampante, pakuti njishibe nga cine niwe mwana wandi Esau nangu iyoo.” 22Yakobo epakupalama kuli wishi Isaki. Wishi nao alamupampanta elyo asosa ati, “Ishiwi lyena lishiwi lyakwa Yakobo, lelo amaboko yena maboko yakwa Esau.” 23Isaki taishibe ukuti ni Yakobo pantu amaboko yakwe yali na mapipi kwati yakwa Esau munyina. Kanshi Isaki epakupaala Yakobo. 24Lelo Isaki amwipusha ati, “Bushe cine cine niwe mwana wandi Esau?” Yakobo ayasuka ati, “Ee nine wine.” 25Elyo Isaki asosa ati, “Mwana wandi, ndetelako inama wipeye mukulunga, uleke ndye, pakuti nkupaale.” Yakobo epakumuletela inama no kulya alya. Amuletelako no mwangashi, nao anwa. 26Elyo Isaki wishi amweba ati, “Palama kuno mwana wandi untomone pakumposha.” 27#Bahi 11:20Kanshi Yakobo epakuya tomona Isaki pakumuposha. Cilya Isaki aumfwa icena ca nsalu shakwe, alamupaala, no kusosa ati,
“Eya! Icena ca mwana wandi
caba kwati cena ca mwibala ilyo Yawe apaala.
28Lesa engakupeela umume wa ku mulu,
no mushili uwafunda,
ne fisabo ifingi no mwangashi upya.
29 #
Icite 12:3
Imishobo ingalakutumika
na bantu bonse balekunakila.
Niwe ube imfumu ya bamunonko,
na bana abaume bakwa noko bengalakunakila.
Abo abakulapisha nabo balapishiwe,
na bakupaala nabo bapaalwe.”
Esau nao alomba ipaalo kuli Isaki
30Atilefye cilya Isaki apwa ukupaala Yakobo, na Yakobo afuma pali wishi, Esau munyina nao abwela kukulunga. 31Esau nao apekanya icakulya icanunkila, atwala na kuli wishi. Elyo aeba wishi ati, “Tata wandi, imeni mulyeko inama njipeye kukulunga pakuti mumpeele ne paalo lyenu.” 32Isaki wishi amwipusha ati, “Bushe niwe ani?” Nao ayasuka ati, “Nine mwana wenu, ibeli lyenu Esau.” 33Isaki epakulakanka no mwenso ukalamba ati, “Nga kanshi uwacibamba inama no kundetela nani? Nalyafye ili line ninshi taulaisa elyo nimupaala, kabili nalala napaalwa.” 34Cilya Esau aumfwa ifyo wishi alanda, alila umusowa uukalamba kabili uukali, alaeba wishi ati, “Mpaaleni, na ine, tata wandi!” 35Lelo Isaki amweba ati, “Munonko acisa mu bucenjeshi, napoka ne paalo lyobe.” 36#Icite 25:29-34Esau epakusosa ati, “Bushe tacalungama ukumwinika ishina lya Yakobo? Nomba ancenjesha imiku ibili. Alimpokele insambu sha bubeli bwandi. Kabili apoka ne paalo.” Elyo aipusha ati, “Bushe tamunshilileko ipaalo?” 37Isaki ayasuka Esau ati, “Mona nimusonta ukuba imfumu yobe, kabili nimupeela ba lupwa lwakwe bonse ukuba ababomfi bakwe. Elyo nimupeela ifyakumusunga, ifisabo elyo no mwangashi upya. Kanshi finshi fimbi ningakucitila mwana wandi?” 38#Bahi 12:17Esau aebele wishi ati, “Bushe tata mwakwatafye ipaalo limo epela? Tata wandi mpaaleniko na ine wine!” Elyo Esau asansula ishiwi lyakwe alalila.
39 #
Bahi 11:20
Isaki wishi epakwasuka mwane ati,
“Icifulo cobe cikaba ukutali na ku mushili uwafunda,
cikaba ukutali na ku mume wa mu mulu.
40 #
Icite 36:8; 2 Isham 8:20 Ni ku lupanga eko ukamwena ukwikala umumi.
Kabili ukalatumika munonko.
Lelo ilyo ukalwisha,
lyena elyo ukafuma mwikoli lyakwe.”
Yakobo afulumukila kuli Labani
41Kanshi Esau nomba alipatile Yakobo, pa mulandu we paalo wishi amupeele. Alaisosha umwine ati, “Inshiku shakuloosha batata shilifye mupepi. Elyo ninshi nkepaya munyinane Yakobo.” 42Ilyo Rebeka bamwebeleko ifyo umwana mukalamba Esau alandile, Rebeka epakutuma abakwita Yakobo umwana mwaice. Amweba ati, “Mona munonko Esau aleitalalika umutima ne pange lya kukwipaya. 43Kanshi nomba we mwana wandi, cita ifyo nalakweba, fulumukila kuli ndume yandi Labani ku Harani. 44Uye ikala nankwe pa nshita ino mpaka munonko icipyu cikapwe. 45Ilyo munonko akaleka ukukufulilwa kabili akalabe nefyo wamucita, elyo nkakutumina amashiwi ukabwelulukeko. Nga cinshi ningalekela ukuti ndufye abana bandi bonse babili mu bushiku bumo bwine?”
46Kabili Rebeka aebele Isaki ati, “Ine nintendwa ukuba umumi pa mulandu wa aba banakashi abena Hiti.#27:46 Banakashi abena Hiti: Banakashi abo Esau aupile. Nga cakuti Yakobo nao aupa umwanakashi umo pa banakashi ba muli cino calo pali aba abena Hiti, ine ninshi no kufwa kwawama.”
Okuqokiwe okwamanje:
Icitendekelo 27: ILL15
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Bible Society of Zambia