Amavesi eBhayibheli adumile avela kokuthi അപ്പൊസലല 20

Dlulisela

ഇച്ചെ ണാന് ണിമാക്ക് സെയ്‌ദ് കാട്ടി തന്തിര്‌ക്ക പാസെ ണിമ്മ എല്ല കാര്യാത്തിലിമ് റമ്പ പാഡ്‌പട്ട് ണോയിക്കാറാര്‌ണ കയ്യിതാങ്കുഡൊ. <കെ്ഡേക്കാദ്‌ണ ബ്‌ഡ കൊഡുക്കാദ്‌ണത്തെ പിര്യപഡുഡൊ> എന്ത് ഏസു ആണ്ടവാ് സൊല്ലിര്‌ക്കാദ്‌ണ ണിമ്മ മറാക്ക ബേ്ഡ.>>

ആന ണാന് സാരാദൊ പെ്ളേക്കാദൊ എനാക്ക് ബെല്ല്യാദല്ല. ണാന് സെയ്യ ഏസു ആണ്ടവാ് എനാക്ക് തന്തിര്‌ക്ക ബേലെന ണലമായി സെയ്‌ദ് മുഡിക്കുഡൊ എങ്കാദ്‌ത്തെ എനാക്ക് ഇര്‌ക്ക ഒരേ ഒരു ആസെ. സാമിക്ക് ആള്‌ഗോഡിര്‌ക്ക ഗവണ പറ്റി സൊല്ലുറ ണല്ല സേദിന ആള്‌ഗാക്ക് സൊല്ലുഡൊ എന്താദാക്കു സാമി എനാക്ക് തന്തിര്‌ക്ക ബേലെ.

ണിമ്മ ണിമാണ താനേമ് സൂസാരിക്കുഡൊ പിന്നെ സാമിണിഗാല് ണോഡി ണഡാത്ത്യ ബേ്ണ്ടി ണിമാക്ക് തന്തിര്‌ക്ക ആള്‌ഗണാമ് ണിമ്മ പാദ്‌ഗാക്കുഡൊ. സാമിദ് മഗാ് ഏസു തന്ന് ഉജുറുണ കൊഡുത്ത് ബാങ്കിര്‌ക്ക ഏസുക്കാറാര് കൂട്ടഗണ ഒരു മാട്ട്യാ് തന്ന് ആഡ്‌ഗണ ണോഡുറപാസെ ണിമ്മ ണോഡി ണഡാത്തുഡൊ.

സാമി ണിമാണ ണോഡി ണഡാത്ത്യ ബേ്ണ്ടി സാമി കയ്യിക്ക്‌മ് ണിമാക്ക് പ്‌ണ്ണ്യ കെ്ഡേക്ക തന്ന് സേദിക്ക്‌മ് ണാന് ഇപ്പ് ണിമാണ ഒപ്പഡിക്കെ. അച്ചെ സാമിക്ക് ബേ്ണ്ടി പെ്ളേക്ക്യ ണിമാക്ക് ണല്ല ബില കെ്ഡേക്കു. സാമി തന്ന് ആള്‌ഗാക്ക് ണല്ലാദ്‌ണ കൊഡുക്ക പാസെ ണിമാക്ക്‌മ് ണല്ലാദ്‌ണ തരുവാ്.