Amavesi eBhayibheli adumile avela kokuthi ꠁꠘ꠆ꠎꠤꠟ ১: ꠝꠕꠤ 24

Dlulisela

ꠘꠣꠚꠞꠝꠣꠘꠤꠞ ꠙꠞꠤꠝꠣꠘ ꠛꠣꠠꠤꠎꠤꠛ, ꠄꠞꠟꠣꠉꠤ ꠛꠃꠔ ꠝꠣꠘꠡꠞ ꠝꠣꠄꠀ-ꠝꠝꠔꠣ ꠇꠝꠤꠎꠤꠛ। ꠅꠁꠟꠦ ꠢꠦꠡ ꠙꠞ꠆ꠎꠘ꠆ꠔ ꠎꠦꠞꠣ ꠐꠤꠇꠤꠀ ꠞꠁꠛꠣ, ꠄꠞꠣꠃ ꠞꠦꠢꠣꠁ ꠙꠣꠁꠛꠣ।

ꠢꠇꠟ ꠎꠣꠔꠤꠞ ꠉꠦꠍꠦ ꠡꠣꠇ꠆ꠇꠤ ꠢꠤꠡꠣꠛꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠁꠛ, ꠄꠞꠛꠣꠖꠦꠃ ꠇꠤꠀꠝꠔ ꠀꠁꠛ।

ꠢꠥꠘꠅ, ꠎꠥꠖ꠆ꠖꠞ ꠀꠅꠀꠎ ꠀꠞ ꠟꠣꠠꠣꠁꠞ ꠈꠛꠞ ꠔꠥꠝꠞꠣ ꠙꠣꠁꠛꠣꠄ, ꠅꠁꠟꠦ ꠁꠔꠣꠄ ꠒꠞꠣꠁꠅ ꠘꠣ। ꠁꠔꠣ ꠘꠤꠌꠄ ꠊꠐꠛ, ꠊꠐꠟꠦꠅ ꠁꠔꠣ ꠔ ꠡꠦꠡ ꠘꠣꠄ।

ꠄꠇ ꠎꠣꠔꠤꠄ ꠀꠞꠇ ꠎꠣꠔꠤꠞ ꠟꠉꠦ, ꠄꠇ ꠖꠦꠡꠦ ꠀꠞꠇ ꠖꠦꠡꠞ ꠟꠉꠦ ꠟꠣꠠꠣꠁ ꠇꠞꠛ। ꠛꠃꠔ ꠎꠣꠉꠣꠔ ꠜꠂꠍꠣꠟ ꠀꠞ ꠘꠤꠖꠣꠘ ꠖꠦꠈꠣ ꠖꠤꠛ। ꠅꠁꠟꠦ ꠁꠔꠣ ꠔ ꠈꠣꠟꠤ ꠝꠍꠤꠛꠔꠞ ꠡꠥꠞꠥ।

ꠀꠍꠝꠣꠘ-ꠎꠝꠤꠘ ꠢꠇꠟꠔꠣ ꠛꠤꠘꠣꠡ ꠅꠁꠎꠤꠛ, ꠅꠁꠟꠦ ꠀꠝꠣꠞ ꠇꠣꠟꠣꠝ ꠢꠣꠝꠦꠡꠣ ꠎꠣꠞꠤ ꠞꠁꠛ।

ꠛꠃꠔ ꠎꠘꠦ ꠀꠝꠣꠞ ꠘꠣꠝ ꠗꠞꠤꠀ ꠀꠁꠛ, ꠀꠁꠀ ꠇꠁꠛ, ꠀꠝꠤꠃ ꠀꠟ-ꠝꠍꠤ, ꠇꠁꠀ ꠛꠃꠔꠞꠦ ꠐꠉꠤꠛ।

“ꠅꠃ ꠡꠝꠄ ꠀꠁꠟꠦ ꠝꠣꠘꠡꠦ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠣꠞ ꠟꠣꠉꠤ ꠗꠞꠣꠁ ꠖꠤꠛ ꠀꠞ ꠈꠥꠘ ꠇꠞꠣꠁꠛ। ꠀꠝꠣꠞ ꠟꠣꠉꠤ ꠢꠇꠟ ꠎꠣꠔꠤꠄ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠛ। ꠔꠦꠃ ꠛꠃꠔ ꠎꠘ ꠙꠤꠍꠟꠤꠎꠤꠛ, ꠄꠇꠦ-ꠅꠁꠘ꠆ꠘꠞꠦ ꠊꠤꠘ꠆ꠘꠣꠁꠛ ꠀꠞ ꠗꠞꠣꠁ ꠖꠤꠛ। ꠛꠃꠔ ꠜꠘ꠆ꠒ ꠘꠛꠤ ꠀꠁꠀ ꠝꠣꠘꠡꠞꠦ ꠐꠉꠤꠛꠣ।

ꠁꠍꠣꠄ ꠇꠁꠟꠣ, “ꠖꠦꠈꠤꠅ, ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠘꠣ ꠐꠉꠦ।

ꠄꠞꠟꠣꠉꠤ ꠔꠥꠝꠞꠣꠅ ꠢꠣꠝꠦꠡꠣ ꠔꠤꠀꠞ ꠞꠁꠅ, ꠎꠦ ꠡꠝꠄꠅꠞ ꠇꠕꠣ ꠔꠥꠝꠞꠣ ꠌꠤꠘ꠆ꠔꠣꠅ ꠇꠞꠔꠣꠄ ꠘꠣꠄ, ꠢꠃ ꠡꠝꠄ ꠛꠤꠘ-ꠀꠖꠝ ꠀꠁꠛꠣ।

ꠄꠞꠟꠣꠉꠤ ꠇꠁꠞꠣꠝ, ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠔꠥꠝꠞꠣꠞ ꠝꠣꠟꠤꠇ ꠇꠥꠘꠖꠤꠘ ꠀꠁꠛꠣ, ꠁꠔꠣ ꠔ ꠔꠥꠝꠞꠣ ꠎꠣꠘ ꠘꠣ।

“ꠢꠃ ꠖꠤꠘ ꠀꠞ ꠢꠤ ꠡꠝꠄꠅꠞ ꠛꠦꠙꠣꠞꠦ ꠈꠣꠟꠤ ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠍꠣꠠꠣ ꠀꠞ ꠇꠦꠃ ꠎꠣꠘꠂꠘ ꠘꠣ। ꠀꠍꠝꠣꠘꠤ ꠚꠤꠞꠤꠡ꠆ꠔꠣ ꠛꠣ ꠁꠛꠘꠥꠟ꠆ꠟꠣꠄꠅ ꠎꠣꠘꠂꠘ ꠘꠣ।

ꠇꠣꠞꠘ ꠀꠟ-ꠝꠍꠤ ꠘꠣꠝ ꠟꠁꠀ ꠛꠃꠔ ꠜꠘ꠆ꠒ ꠀꠁꠛꠣ, ꠘꠛꠤ ꠢꠣꠎꠤꠀꠅ ꠛꠃꠔ ꠜꠘ꠆ꠒ ꠀꠁꠛꠣ। ꠁꠔꠣꠄ ꠛꠃꠔ ꠛꠠ ꠛꠠ ꠀꠌꠣꠘꠇ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠁꠛꠣ। ꠔꠣꠞꠣ ꠌꠣꠁꠛꠣ, ꠡꠥꠎꠥꠉ ꠙꠣꠁꠟꠦ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣꠞꠦ ꠗꠥꠇꠣ ꠖꠤꠀ ꠛꠦ-ꠙꠕꠦ ꠘꠤꠔꠣꠉꠤ।

ꠘꠥꠢ ꠘꠛꠤꠞ ꠀꠝꠟꠅ ꠎꠦ ꠢꠣꠟꠔ ꠅꠁꠍꠤꠟ, ꠀꠝꠤ ꠛꠤꠘ-ꠀꠖꠝ ꠖꠥꠍꠞꠣꠛꠣꠞ ꠀꠅꠀꠞ ꠡꠝꠄ ꠑꠤꠇ ꠅꠟꠣꠈꠣꠘꠃ ꠅꠁꠛ। ꠛꠁꠘ꠆ꠘꠣ ꠡꠥꠞꠥ ꠅꠀꠞ ꠀꠉꠦ ꠘꠥꠢ ꠘꠛꠤ ꠎꠣꠎꠅ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠘꠡꠦ ꠈꠣꠅꠀ-ꠖꠣꠅꠀ ꠇꠞꠍꠦ, ꠄꠇꠦ-ꠅꠁꠘ꠆ꠘꠞꠦ ꠛꠤꠀ-ꠡꠣꠖꠤ ꠇꠞꠍꠦ। ꠘꠥꠢ ꠘꠛꠤꠞ ꠛꠁꠘ꠆ꠘꠣꠞ ꠙꠣꠘꠤꠄ ꠁꠔꠣꠞꠦ ꠜꠣꠡꠣꠁꠀ ꠘꠦꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠣꠞꠣ ꠇꠥꠘ꠆ꠔꠣꠃ ꠐꠦꠞ ꠙꠣꠁꠟꠣ ꠘꠣ। ꠀꠝꠤ ꠛꠤꠘ-ꠀꠖꠝ ꠀꠁꠛꠣꠞ ꠡꠝꠄꠅ ꠑꠤꠇ ꠅꠟꠣꠈꠣꠘ ꠅꠁꠛ।