If you would like a copy of this version please contact info@davaraudiobibles.org

Lhomi New Testament

हीनी स्‍यक्‍पु ढुक् ॱसोङ्‌नी, येशुगी पत्रुस्, याकुब्, याकुब्‍गी पी़न् युहन्‍ना झ्‍यीब ठीक्‍न लदोक् थोया च्‍यीक्‍ल जेन फीम्‍ब बेत्। ॱनी हुगी लदोक् दीदु हुबे दोङ्‌दु येशुगी कुस्‍सी़ दी ज्‍युर्नर बेत्। खोङ्‌गी स्‍यारे दी ङीम डस्‍सी धङ् खोङ्‌गी घो़ दी च्‍यत् थीङीय ओ़च्‍च्‍य छ्‌यीम्‍मुल ज्‍युर्नर बेत्। ॱनी हुगी यङ्‌ल हुदु मोशा धङ् एलीया खोङ् च्‍याल केच्‍च्‍य लप्‍तु थो़न्‍न युङ बेत्। हीगो थोङ्‌नी पत्रुस्‍की येशुल चोव ज्‍यीन्‍दक् हज्‍यरङ् हीदु दो़प्‍पल गस्‍सी युङेत्। नीज्‍यरङ्‌गी थुल यो़त्‍न, ङे हीदु दीर ॱसुम् सो़गी। च्‍यीक् नीज्‍यरङ्‌ल, च्‍यीक् मोशाल, च्‍यीक् एलीयाल झ्‍यीब बेत्। हीगो सीरे यङ्‌ल ॱमुब टक्‍सी च्‍यीक् युङ्‌न खोङ्‌जोसो तुम् तङ बेत्। ॱनी ॱमुबे नङ् दीनी मल्‍ल हीगो ङे झ्‍यम्‍बे भु हीन्। हील ङ गुव दुक्। हीगी झ्‍यीबल खीत्‍रङ् नेन्‍ज्‍यीत् सीरे ॱसुङ्‌गेत् च्‍यीक् युङ बेत्। हीगी केच्‍च्‍य हीगो घोनी ॱलोप्‍टुक् दीब ज्‍यीक्‍टक्‍की म दीरङ् खेबुक्‍ल डीनर बेत्। ॱनी हुबे लोल येशु फीन्‍न लक्‍पे सीन्‍न हुबल ज्‍यीब मत् झ्‍यीत्। लोङ् झ्‍यीब बेत्। हुनी हुब लोङ्‌न तेनी, उन येशुरङ् च्‍यीगी च्‍यीक्‍पु यो़प्‍प थोङ बेत्।
हुनी खोङ्‌जोसो हुगी लदोक् दीनी मल्‍ल भप्‍न युङे यङ्‌ल येशुगी ॱलोप्‍टुक् ॱसुम्‍बु दील खीत्‍रङ्‌गी हुन्‍दो घङ् थोङ घयेत् हीगो कोलीमीगी ॱरेबु ॱस्‍यीनी, यङ् ॱसोम्‍बुल ॱलोङ् ॱलोङ् थुक्‍ल ॱसुल आक् ॱमत् ॱस्‍यो़च्‍च्‍यीत् सीन्‍न ॱङाब बेत्। ॱनी हुबे खोङ्‌ल छ्‌यो़डीम्‍गी चयेलम घयेक्‍की केच्‍च्‍यल एलीया एल्‍ला थो़न् गोगेन् बेत् सीगुक् न? सीन्‍न ढीब बेत्। ॱनी खोङ्‌गी लेल्‍ल एलीया थो़न्‍न हुगी कुरीक् ठोक्‍क सो़न डीक्‍न डोगेन् बेत् सीक्‍केन् हुगो खुङ्‌देन् बेत्। ङे खीत्‍रङ्‌ल ॱस्‍येत् योङ्। हुगी एलीया हुगो थो़न् छर बेत्। ॱनी थो़न्‍न आक्, मी घयेक्‍की हुगो एलीया हीम्‍ब दी ङु ॱमत् ॱस्‍यीब बेत्। हुबे हुगोल घङ् झ्‍यीक्‍कीन् थेच्‍चो़त् झ्‍यीब बेत्। ॱनी हुगो डस्‍सी कोलीमीगी ॱरेबुल आक् हुबे हुन्‍दुक् दीरङ् झ्‍यीक्‍केन् बेत् झ्‍यीब बेत्। हीगो सीन्‍नी क, ॱलोप्‍टुक् ॱसुम्‍बु दीगी खोङ्‌गी केच्‍च्‍य हीगो युहन्‍ना बप्‍तीस्‍की ढीक्‍ल ॱस्‍येत्‍तुक् ॱनो़न ॱह घोव बेत्।

हीनी खोङ्‌जोसो लस्‍स्‍यम्‍ल मी घयेत् झ्‍यीस्‍सल युङ बेत्। ॱनी उन मी च्‍यीक् येशु च्‍याल युङ्‌न हुगी पीमुङ् चुन खोङ्‌ल चोव ज्‍यीन्‍दक् ङे भुल सम्‍ज्‍येन् लङ्‌न दुक्‍स्‍यी गन्‍दीक्‍म दुक्। ॱङीङ्‌ज्‍यी जेत्‍रो ॱनङ्। हुगो यरी मील घप् डोगुक्। यरी छ्‌युल स्‍यु डोगुक्। ॱनी हीगो नीज्‍यरङ्‌गी ॱलोप्‍टुक् हीब च्‍याल ङे ठीक्‍न युङेन्। ॱनी हीबे हुगो ढक्‍तु ची़त् ॱमत् छुसोङ् झ्‍यीब बेत्। ॱनी हीगी लेल्‍ल येशुगी हुब घयेत्‍ल ॱवे छ्‌य मीत् स्‍योक्‍केन् धङ् छ्‌यी़रीय धीङ्‌सङ्‌गी मी घयेस्‍सो, खीत्‍तङ् दल ङ घजो़त् च्‍यीक्‍रङ् दो़च्‍च्‍ये व ॱनी? घजो़त् च्‍यीक्‍रङ् गुर्च्‍ये व ॱनी? हुगो ङ च्‍याल ठीक्‍लेत् ॱसुङ बेत्। हुनी येशुगी हुगी ॱनो़प्‍प अयेक्‍प दील कगो़त् तङ्‌न दीत्‍नी, हुगी ॱनो़प्‍प दी थो़न्‍नर बेत्। ॱनी भीज दी हुगी यङ्‌लरङ् ढक्‍नर बेत्।
हुनी मी ॱयोङ् मीप्‍पे यङ्‌ल ॱलोप्‍टुक् दीबे येशुल ॱनो़प्‍प हुगो ङीक्‍की घन्‍डल तो़न्‍न दीत् ॱमत् छुब बेक्‍क? सीन्‍न ढीब बेत्। ॱनी हील खोङ्‌गी खीत्‍रङ्‌गी छ्‌य दीरङ् गन्‍दीक्‍म मीत् स्‍योक्‍पे। ङे खीत्‍रङ्‌ल गन्‍दीय ॱस्‍येत् योङ्। खीत्‍रङ्‌गी छ्‌य स्‍यक्‍प दी तोरीगी ॱसो़न्‍दोक् चो़त्‍म च्‍यीक् यो़त्‍न ॱनी, हुगी लदोक् हुगो ॱयोङ्‌ल पो़ल ज्‍युक् सीर् तङ्‌न आक्, हुगो पो़ डोगेन् बेत्। खीत्‍रङ्‌ल मीत् डुप्‍केङ्‌गी धो घन्‍ड अक् मीप्‍प बेत्। [हीगो डस्‍सीगी ॱनो़प्‍प दीप्‍पल को़न्‍ज्‍योक्‍ल ॱसुव तप्‍न ॱनुक्‍नेल स्‍युन देत्‍न मेन्‍द, दीत् ॱमीत् छुगेन् बेत् झ्‍यीब बेत्।]

हुनी तीङ्‌ला येशुसो गालीलागी नङ्‌ल गीरे यङ्‌ल खोङ्‌गी ॱलोप्‍टुक् दीबल कोलीमीगी ॱरेबु मी घयेक्‍की डलक्‍ल तङ्‌न ॱसो़क्‍केन् बेत्। हुनी स्‍यक्‍पु ॱसुम् ॱसोङे ङीन् दी यङ् ॱसोम्‍बुल ॱलोङ्‌गेन् बेत् झ्‍यीब बेत्। ॱनी हील ॱलोप्‍टुक् दीब ॱसीम्‍दुक् गन्‍दीक्‍म लङ बेत्।

हुनी तीङ्‌ला येशुसो कफर्नहुम्‍ल ॱलीत्‍नी, हुदु छ्‌यो़गङ्‌गी ढीक्‍ल ठेम दी़क्‍केन् यरी युङ्‌न हुबे पत्रुस्‍ल खीक्‍की चयेलमे ठेम जप्‍को़प्‍प न मीत् जप्‍को़प्‍प? सीन्‍न ढीब बेत्। ॱनी पत्रुस्‍की लेम्‍बुल जप्‍केन् बेत् झ्‍यीब बेत्। हुनी पत्रुस् खीम्‍गी नङ्‌ल स्‍युन फीन्‍नी, हुदु ॱस्‍यर्च्‍यक् येशुगी पत्रुस्‍ल ॱवे शीमोन्, जम्‍बुलीङ्‌गी ज्‍याबु घयेक्‍की गोल धङ् ठेम ॱसी़ लक्‍नी लीङ्‌गो़प्‍प बेक्‍क? रोरङ्‌गी मीजङ्‌गी लक्‍नी न, न मी ॱयोङ्‌म घयेक्‍की लक्‍नी? हील खोक्‍की घन्‍दुक् ॱनो़गुक्‍क? सीन्‍न ढीब बेत्। ॱनी हील पत्रुस्‍की मी ॱयोङ्‌म घयेक्‍की लक्‍नी दी़क्‍केन् बेत् झ्‍यीब बेत्। ॱनी येशुगी हुगो हीन्‍न ॱनी, रोरङ्‌गी मीजङ्‌गी जप् मीत् गो़गेन् बेत्। ॱनी हीन्‍न अक्, हज्‍यरङ्‌गी हुगो मत् जप्‍न, हुबे हज्‍यरङ्‌ल गज्‍ये ॱमीत् छोर यो़ट्‌टो। हीगी ढीक्‍ल रङ् हुगी छो हुल फीन्‍न न सुङ्‌गेन् ॱअप्‍चीन् च्‍यीक् जीक्‍न, हुल थीबे न ॱएन्‍स्‍युक्‍म दीगी ख दीनी ॱङुगी टङ्‌ग च्‍यीक् ॱङीक्‍केन् बेत्। हुगो रङ् धङ् ङे ठेम दी हीन् सीन्‍न जोप् सीन्‍न ॱङाब बेत्।

Lalela मत्‍ती 17