१ कोरिन्थी 15
15
ख्रीष्ट सीइदेबे सोम्बो क्यूरब
1अत-अची च्योन्यू, ङैदे नमयूने प्रचार चीक्कब सूगब खबर फेरि नमयूने ह्वे चीम्मीतीङ् र ख्यङ्, ङैदे स्य्वेब सूगब खबर नमयूदे सेम्ने येत्दे, मेस्ये हम्बने नमयूदे बोङ्बे विश्वास चीत्दे। 2कादेये ङैदे नमयूने प्रचार चेब सूगब खबरने बोल्यो विश्वास चीन्नूदेयलो अम्ब सूगब खबरदे चीत्देबे नमयूदे उद्धार प्रे-ख्यङ्, नत्र नमयूदे सीत्तीने विश्वास चीन्नत्या थून्क्य।
3 #
यशैया 53:5-12
ङैदे प्रेब अम्ब पात्ता केन् पोजे रूप्ने नमयूजे लाने पीने ख्यङ्, हम्ब अम्बने ख्यङ्, पवित्र धर्मशास्त्र अनुसार ख्रीष्ट ङीन्जे पापजे लागि सीइदे। 4#भजनसंग्रह 16:8-10; मत्ती 12:40; मूल स्यूस्स्यायूजे कामजे किताब 2:24-32ङूने पोप्पीदे, मेस्ये पवित्र धर्मशास्त्र अनुसार सोम्म्यानीदे फेरि ङूने सोम्बो चीम्मीदे। 5#लूका 24:34; मत्ती 28:16,17; मर्कूस 16:14; लूका 24:36; यूहन्ना 20:19ङू केफासजे खूम्ने, होर्दे बाह्र जना स्यूस्स्यायूजे खूम्ने तङ्रदे। 6होर्दे ङ्येदे ङू सै ङ यली थेप् अत-अची च्योन्यूजे खूम्ने त्याफेने तङ्रदे, हम्बयू नङ्ने कूमप्र मीयू दीनीसेमे सोम्बोने ख्यङ् तर कोइ-कोइ सीये जेङ्क ख्यङ्। 7होर्दे ङ्येदे याकूबजे खूम्ने मेस्ये मूल स्यूस्स्यायू क्वाजे खूम्ने तङ्रदे। 8#मूल स्यूस्स्यायूजे कामजे किताब 9:3-6होर्दे पात्ता ङ्येदे बीलने अन्क्यूर जन्मीदेबे मीजे खूम्नेप्र ङैजे खूम्नेये ङू तङ्रदे।
9 #
मूल स्यूस्स्यायूजे कामजे किताब 8:3
चेनेयलो मूल स्यूस्स्यायू नङ्ने पात्ता चीद ङने ख्यङ्। ङ मूल स्यूस्स्या य खल्जे त्वो। चेनेयलो ङैदे परमेश्वरजे मण्डलीने सोरो सतनम् चीत्दे। 10तर दीनी ङ कर ख्यङ्, हम्ब परमेश्वरजे अनुग्रहदेने ख्यङ्, मेस्ये ङै फ्याने ख्यब प्रभुजे अनुग्रह सीत्तीने खेर अङ्गीली। बरू थमयू क्वादेने चेयली थेप् छेम्प्रे ङैदे चीत्दे। होरेक्यूल्लीने अम्ब ङैदे दी, ङैप्रे ख्यब परमेश्वरजे अनुग्रहदे ख्यङ्। 11येरेक्यूत्देबे ङैदे प्रचार चील्लीने या थमयूदे प्रचार चील्लीने, ङीयूदे च प्रचार चीत्दे, नमयूदे हम्बने विश्वास चीत्दे।
सीयेबयू सोम्बो क्यूरब पो
12परमेश्वरदे ख्रीष्टने सीयेबयूदे सोम्बो चीम्मीदे यब पो प्रचार चीक्क्य यलो नमयू नङ्ने कोइ-कोइदे सीयेब मी सोम्बो अन्क्यूर् यदेबे केरे य खूइय? 13कादेये सीयेबयू सोम्बो अन्क्यूर् यलो परमेश्वरदे सीयेब ख्रीष्टनेये सोम्बो चीम्मीक दी। 14कादेये परमेश्वरदे ख्रीष्टने सीयेबदे सोम्बो चीम्मीक दी यलो ङीदे चेब प्रचार सीत्तीने क्यूक्क्य, मेस्ये नमयूजे विश्वासये सीत्तीने क्यूक्क्य। 15हम्बयली थेप् परमेश्वरजे बारेने लूच्च गवाही पीनबयू ङी ठर्दीय, चेनेयलो परमेश्वरदे ख्रीष्टने सीयेबदे सोम्बो चीम्मीक ख्यङ् यदेबे ङीदे परमेश्वरजे बारेने गवाही पीङ्क ख्यङ्। तर तम्दम्ने सीयेबयू सोम्बो अन्क्यूर् यलो परमेश्वरदे ख्रीष्टनेये सोम्बो अन्चीम्मीक ख्यङ्। 16चेनेयलो कादेये सीयेबयू सोम्बो अन्क्यूर् यलो परमेश्वरदे सीयेब ख्रीष्टनेये सोम्बो अन्चीम्मीक ख्यङ्। 17परमेश्वरदे ख्रीष्टने फेरि सोम्बो अन्चीम्मीक यलो नमयूजे विश्वास सीत्तीने क्यूक्क्य, मेस्ये अझ नमयू रङ्सेजे पापनेने क्यून्नीय। 18होरेयलो ख्रीष्टने विश्वास चीत्देबे सीयेबयूये क्वाने नाश क्यूरे ख्यङ्। 19कादेये ङीनदे अम्ब जीयाजे लागित्या ख्रीष्टने आशा चेख्यङ् यलो मीयू क्वाजे यली ङीन थेप् ङ्येमत्या क्यूक्क्य।
20तर तम्दम्ने परमेश्वरदे ख्रीष्टने सीयेबदे सोम्बो चीम्मीक ख्यङ्। सीयेबयू नङ्ने पात्ता खूम् सोम्बो क्यूरब ङूने ख्यङ्। 21चेनेयलो मी त्यादे चीत्देबे क्वाने सीब परदीदे। होरप्रने सूजो मी त्यादे चीत्देबे सीयेबयूये क्वाने सोम्बो क्यूक्क्य। 22चेनेयलो केर्बे आदमदे चीत्देबे मीयू क्वाने सीबीय, होरप्रने ख्रीष्टदे चीत्देबे मीयू क्वाने सोम्बो चीम्मीय। 23तर क्वाने रङ्से रङ्सेजे पलो अनुसार- सीयेबयू सोम्बो क्यूक्क्य: पात्ताखूम् ख्रीष्ट सोम्बो क्यूत्दे, होर्दे ख्रीष्ट ल्वारब ङूने विश्वास चेबयू सोम्बो क्यूक्क्य। 24कन्छ्वाब ङूदे हुकुमयू, हकयू मेस्ये शक्तियू क्वाने नाश चीत्देबे प-परमेश्वरने राज्य सूम्दीबीय हन्छ्वाब संसारजे अन्त क्यूक्क्य। 25#भजनसंग्रह 110:1चेनेयलो परमेश्वरदे रङ्सेजे शत्रुयू क्वाने ख्रीष्टजे तोप् त्याङ् नङ्ने अङ्येत्तासेमे ख्रीष्टदेने राज्य चेने पर्तीय। 26पात्ता ङ्येदे नाश चेपर्ते शत्रुब सीबबने ख्यङ्। 27#भजनसंग्रह 8:6चेनेयलो परमेश्वरदे साप्ताकूरूने ख्रीष्टजे तोप् त्याङ् नङ्ने येक्क ख्यङ्। जेम्से “साप्ताकूरूने ङूजे हक नङ्ने क्यूक्क ख्यङ्”, यलो साप्ताकूरूने ख्रीष्टजे हक नङ्ने चीम्मेब परमेश्वर रङ्सेब हम्ब हक नङ्ने त्वो यब पो चेलाबे स्ये खूइय। 28कन्छ्वाब साप्ताकूरूने परमेश्वरदे ख्रीष्टजे हक नङ्ने रेक्क्य, हन्छ्वाब परमेश्वरजे च ख्रीष्ट रङ्सेब परमेश्वरजे हक नङ्ने क्यूक्क्य, परमेश्वरदे साप्ताकूरूने ङूजे हक नङ्ने येम्मीय, येर्बे साप्ताकूरू फ्याने परमेश्वर पात्ता केन् क्यूर ख्यङ्।
29कादेये सीयेबयू सोम्बो अन्चीम्मीदे यलो सीयेबयूजे लागि मीयूदे चेने बप्तिस्मा कीन? सीयेबयूजे लागि बप्तिस्मा कीनब चै-फाइदा क्यूत्दे? 30खात्या खात्याने ङैये चेने खतराने पर्तीन? 31अत-अची च्योन्यू नमयूदे चीत्देबे ङ प्रभु येशूजे मीन्ने केन् त्वोक्क्य, मेस्ये ङ दिनजे पीछीने सीबने तयार ख्यङ् यदेबे य खूइय। 32#यशैया 22:13कादेये मीदेने यप्र पो चेयलो, एफिससने ङैदे नाजे जन्तूप्रे जीङ्देबे ङैने चे फाइदा क्यूत्दे स्व? सीयेबयू सोम्बो अङ्क्यूर्यलो, ‘‘ङीन च-थूङ चीदे, चेनेयलो नेदेब ङीन सीबीय!” 33मीयूदे नमयूने छाक्दीकने। नोङ्ब मीयूप्रे प्रे-प्रे प्रलो ज्य बनीये नोङ्बीय।
34होस्ने ख, जेम्सेमेस्ये पाप अन्चील्लाची। चेनेयलो नमयू नङ्ने कोइदे परमेश्वरजे पोने अन्स्ये ख्यङ्, नमयूने त्वालाबे चेने ङैदे अम्ब पो य ख्यङ्।
सोम्बो क्यूरेब ङ्व
35तर कोइदे लोस्स्ये, “सीयेबयू केर्बे सोम्बो क्यूक्क्य, मेस्ये थमयूदे कर खल्जे ङ्व टेल्देबे लङरीय?” 36मूर्ख! नमयूदे रङ्ने चैलू थर्क्य हम्ब लू अन्सीबदासेमे फीट्टस्ये त्वो। 37नदे रङ्ने चैलू थर्ब ङ्येदे फेब पोङ् अन्थर्, तर ह्व या सूजो थर्जे सेयू चनेक्यूल्लीने लूत्यामे थर्क्य। 38तर परमेश्वरदे रङ्से इच्छा अनुसार हम्ब लूने पोङ्जे रुप् पीन्क्य, मेस्ये थर्-थर्जे लू अनुसार प्वब ङ्व पीन्क्य। 39स ख्यब क्वाजेने त्याप्र ङ्व अन्क्यूर्। मीजे ङ्व थर्त्या खल्जे, मेस्ये रोलायूजे सूजो खल्जे, मूने स्यूनब ययूजे सूजो खल्जे, मेस्ये क्यूने टूङब ङयूजे सूजो खल्जे ङ्व क्यूक्क्य। 40होर्दे स्वर्गने ख्यब ङ्व थर्त्या ख्यङ्, मेस्ये पृथ्वीने ख्यब ङ्व सूजो थर्जे ख्यङ्, तर स्वर्गने ख्यब ङ्वजे तेज थर्त्या ख्यङ्, मेस्ये पृथ्वीने ख्यब ङ्वजे तेज सूजो थर्जे ख्यङ्।
41मीयाजे ओथ्याङ् थर्त्या, लीनीजे ओथ्याङ् सूजो थर्जे, मेस्ये कर्चेन्यूजे ओथ्याङ् सूजो थर्जेने क्यूक्क्य। चेनेयलो कर्चेन्यू नङने त्या-त्याजे ओथ्याङ्ये सूजो सूजो थर्जे क्यूक्क्य।
42सीयेबयू सोम्बो क्यूट्टबये येरप्रने क्यूक्क्य। कम्ब ङ्व नाश क्यूरने पोप्पीय, हम्ब ङ्व कलङ्बेये अन्सीबब जीया प्रेने सोम्बो क्यूक्क्य। 43गेसेन् अन्चील्लाबे हम्ब सीयेब ङ्वने पोप्क्य, महिमाने हम्ब सोम्बो क्यूक्क्य। बोङ् त्वब बीलने हम्ब पोप्पीय, शक्ति प्रेत्देबे हम्ब सोम्बो क्यूक्क्य। 44नाश क्यूरब ङ्वने हम्ब पोप्पीय, आत्माजे ङ्वने सोम्बो क्यूक्क्य।
नाश क्यूरब ङ्व क्यूक्क्य यलो आत्माजे ङ्वये तम्दम्ने क्यूक्क्य। 45#उत्पत्ति 2:7येरेक्यूत्देबे धर्मशास्त्रने येरे लिख्दीये ख्यङ्, “पात्ता खूम्जे मी आदम जीया प्रेब मी क्यूत्दे।” तर आखिरीजे आदम या ख्रीष्ट जीया पीनब आत्मा क्यूत्दे। 46पात्ता खूम्जे मी आत्मा प्रेब मी दी, तर स ख्यब ङ्व खूम् ख्य, होर्दे ङ्येदेम आत्माजे ङ्व रदे। 47पात्ता खूम्जे मी या आदम पृथ्वीजे सदे बन्दीयेब ख्यङ्। मेस्ये दोस्रो मी या ख्रीष्ट स्वर्गजे ख्यङ्। 48पृथ्वीजे सदे बन्दीयेब मी कर ख्य, सदे बन्देबयू क्वाने होरप्रने क्यूक्क्य, मेस्ये स्वर्गजे मी कर ख्य, स्वर्गजेयू क्वाने होरप्रने क्यूक्क्य। 49ङीनदे केर्बे पृथ्वीजे सदे बन्दीयेब मीजे रूप् टेल्ले ख्यङ्, होरप्रने ङीनदे स्वर्गजे मीजे रूप्ये टेल्क्य।
50जेम्से अत-अची च्योन्यू, ङ नमयूने अम्ब यीय, स्य मेस्ये कादे बन्दीयेब ङ्व परमेश्वरजे राज्याने क्योबब हक प्रेस्स्ये त्वो। नाश क्यूरब ङ्वदे कलङ्बेये नाश अन्क्यूप्पब ङ्वजे हक प्रेस्स्ये त्वो। 51#१ थेसलोनिकी 4:15-17अन्छो ङ्यीन्, ङ नमयूने नङ्सू पो त्या यीय, ङीन क्वाने अन्सीब, तर ङीन क्वाने स्वर्गजे मीप्र क्यूप्पीय, 52खात्याने, म्या झीमीक्के चीप्पने, पात्ता ङ्येदे तब धूङ्कूर्जे केने। चेनेयलो कन्छ्वाब धूङ्कूर् तपब तैय, मेस्ये सीयेबयू कलङ्बेये अन्सीबब जीया प्रेत्देबे सोम्बो क्यूक्क्य, होर्दे ङीनयूब स्वर्गजे मीयूप्र क्यूप्पीय। 53चेनेयलो अम्ब नाश क्यूप्पब ङ्व कलङ्बेये नाश अन्क्यूप्पब ङ्वने, मेस्ये अम्ब सीबब ङ्वदे कलङ्बेये अन्सीबब ङ्वजे रूप् टेल पर्दीय। 54#यशैया 25:8कन्छ्वाब नाश क्यूप्पब ङ्व कलङ्बेये नाश अन्क्यूप्पब ङ्वने, मेस्ये सीबब ङ्वदे कलङ्बेये अन्सीबब ङ्वजे रूप् टेल्क्य, हन्छ्वाब धर्मशास्त्रने लिख्दीयेब हम्ब पो पूरा क्यूक्क्य, “मृत्यु नाश क्यूत्दे, मेस्ये हम्ब च्याप्पाने फूङ्गदे।”
55 #
होशे 13:14
“काल, नदे ट्याब खोइ?
काल, सकस् पीनब नैजे बोङ् खोइ?”
56“कालदे सकस् पीनब बोङ् पाप ट्यादे प्रेक्क्य, मेस्ये पापजे बोङ् मोशाजे नियम ट्यादे रीय?” 57तर परमेश्वरने धन्यवाद पीने, ङीनजे प्रभु येशू ख्रीष्टप्रे क्यूत्देबे ङूदे ङीनने ट्यासे पीन्क्य।
58येरेक्यूत्देबे ङैजे छेब अत च्योनयू, सेम् केन् चीत्देबे ढल्मल् अन्क्यूल्लाबे टूङ्। प्रभुजे कामने येतार्ने सेम् पीन्देबे फर्नू, चेनेयलो प्रभुजे कामने चेब छेम्प्रे सीत्तीने खेर अम्प्र यदेबे नमयूदे स्ये ख्यङ्।
Ghale New Testament © Nepal Bible Society, 2011.