Lok 2
2
Oboswa wa Yɛso
(Mat 1.18-25)
1M'maya masuku, ɔlɔ Aisaliya Agushitɔ kwa Lɔma kwehunyinyɛ m'benda okana machǐna ma bato bɔsɛ bɛnɛ bebɛlɛ olɔliwa na ebalɔ ya baloma babaliwɛ#2.1 Oya okɔla machǐna ma bato i yolo ya n'to kɛkɛsɛ kobɛ uhunya n'lambo wa ɔlɔ minɛ kwebɛlɛ Lɔma. 2Okɔla wa lwɛndɔ lwa lotangi wêteyɛ mɛngɔ mɛnɛ Kulɛniɔ kwebɛlɛ m'hɛla kwa ebalɔ ya Suliya. 3Bato bɔsɛ bekelɛ okɔliwa kwabâlwa m'ebalɔ yakɛ ya oboswa, yolo chǐna lyakɛ lyekɔliwɛ oya. 4Yosofo lwakɛ kwehuminɛ m'ebalɔ ya Galilaya m'mboka kya Nasalɛti. Kwekělɛ ebalɔ ya Yolɛa m'mboka kyebusilwɛ ɔlɔ Laole kyehobochiwa Bɛtɛlɛ̌mu. Kwekělɛ oya ebalɔ kwebɛlɛ kwa m'ɔka kwa Laole. 5A hokya obalwa, kwekělɛ hamwɛchi na m'achiǎkɛ Maliya minɛ kwebɛlɛ na kumɔ hɔka na obota. 6Habebɛlɛ Bɛtelɛ̌mu, nǎ lusuku lwakɛ lwa obota lwehǐlɛ. 7Kwebutilɛ mwanakɛ kwan'tangi kwa n'lomyana. Kwem'builɛ ngobɔ cha bolɛla na kwem'bichichɛ m'elɛkɔ ya oleshesha nyama, yolo bashibamɔnɛ ibu n'sɛsɛ kya bakɛnyi
n'kɛnji kwasambela baumbi mwanɔ kwa oboswa wa Yɛso
8M'eya ebalɔ mwebɛlɛ baumbi. Baya baumbi bebɛlɛ oshama obitola m'ǒmba bisukanywa byabɔ busuku. 9N'kɛnji* kwa Ɔlɔ Abɛcha kwebatɔbɔɛlɛ ekaka, na lwɛ̌ngɛ lwa okɛngɛta lwa Ɔlɔ Abɛcha lwebakɛngɛtɛlɛ ngobe chɔsɛ, bemɔninɛ bɔ̌ba bwɛ̌nɛ. 10Ela n'kɛnji* kwebasambelɛ binɔ: «Mushibɛ na bɔ̌ba, yolo nan'chula na mwanɔ kosɔka kwa sasɔ leolo lyɛnɛ lyeba o bato bɔsɛ: 11lenɔ M'hɔnya kwɛnyu kwaboswa m'mboka kya Laule minɛ kohobuchiwa Kilishito* eyaka Ɔlɔ lyɛnyu. 12Yem'ɔnya nakɛ nǎ kɛnyikɛ nǎ enɔ: mwem'banga mwǎna kwa alɛlá kwen'chuiwɛ ngobɔ cha bolɛlá kwem'bichiwɛ m'elɛkɔ ya olesha nyama.» 13Hɔka haya koya n'kɛnji* kwemɔne nǎ eoto eolo ya bangɛ bakɛnji uhuma hakolo m'otɔna Abɛcha kɛte: 14«Abɛcha kotɔnwɛ hakolo na bato bakebabɛnja m'ebalɔ babe na talala!»
Baumbi bakya omɔna mwana Bɛtɛlɛ̌mu
15Ohwa bîya, bakɛnji belɛanɛ na baumbi na besowela hakolo, haya baumbi betolilɛ osambelana kɛte: «Binɔ tobɛkewa Bɛtɛlɛ̌mu, tokyɛ omɔna biya byɛnɛ byetosambelɛ Ɔlɔ.» 16Bekělɛ oya abelɔ, bebangilɛ Maliya na Yosofo na koya mwǎna kwa alɛla kwabichiwa m'elɛkɔ yebalela nyama. 17Baumbi habehulɛ omɔna mwǎna, bekělɛ okana mwanɔ kwɛnɛ n'kɛnji* kwebasambelɛ yolo ya koya mwǎna. 18Bato bɔsɛ bɛnɛ beholechɛ binywa bya baumbi, bekakelwɛ wɛ̌nɛ. 19Ela Maliya kwebǐlɛ biya binywa n'ta n'tema kwakɛ na obilanga wɛ̌nɛ. 20Nǎ baya baumbi besuelɛ. Bebɛlɛ okya m'on'tɔna Abɛcha na on'kembela yolo ya binywa byɔsɛ byabeholechɛ na omɔna. Ebalɔ bebangilɛ binywa byɔsɛ byebasambelɛ n'kɛnji.
Mwǎna kwakinyiwa chǐna
21Mwǎna hakehilɛ masuku enana ma oboswa, bem'hichichɛ o kombe#2.21 Kombe lya Bayola lishilehutanɛ na kombe lya Baboyo lya bubisɔkɔlɔ, ben'kinyiyɛ chǐna lya Yɛso, lyɛnɛ n'kɛnji kwesambelɛ Malia hambɛlɛ ha kɛ obá na kumɔ.
Maliya na Yosofo bam'hicha Yɛso n'Lobonga*
22Masuku ma ohahachwa* wa Yosofo na Maliya olamana na ndɔ kya Musa mewelelɛ. Betɛtilɛ mwǎna Yɛso Yɛlusalɛma yolo bam'beyɛ hambɛlɛ ha Ɔlɔ#2.22 Sɔmakwɛ Balawi 12.2-6. 23Beitilɛ biya, yolo ibikɔliwɛ n'ta ndɔ* kya Ɔlɔ kɛte: «Kɛkɛsɛ m'boswa kwa n'tangi kwa n'lomyana kwetangelwa wa Ɔlɔ Abɛcha#2.23 Sɔmakwɛ Uhuma 13.2, 12. 24Eyǎka betangelɛ tambekɔ*olamana na koya m'benda kwa Abɛcha kohokana kɛte: «Tohɛlɛ tobele aɔ miombo kebele kya tokondolo#2.24 Sɔmakwɛ Balawi 12.8.»
Bolangochi bwa Shimɛɔni
25M'mboka kya Yɛlusalema mwebɛlɛ komwɛ n'to kwebɛlɛ buchiwa Shimɛɔni. Koya Shimɛɔni kwebɛlɛ n'to kwa chikelwɛ hambɛlɛ ha Abɛcha na om'oka. Kwebɛlɛ hɛmba wa yǒma ohɔnywa wa elɔngɔ ya Ishilaɛli. N'tema Kohaha kwebɛlɛ hamwɛchi nǎkɛ, 26eyaka kwebɛlɛ on'kanina kɛte kushîwa nâmbɔ kushinamɔna Kilishito minɛ kwehilwa na Ɔlɔ. 27Na Shimɛɔni wa olɔmbɔlwa na N'tema Kohaha, kwekingelɛ n'Lobonga*. Bibushi bya Yɛso byekingelɛ na mwanǎbɔ n'ta, yolo bam'etɛ byɛnɛ M'benda* kwebakana. 28Shimɛɔni kwetɛtilɛ mwǎna Yɛso m'mabɔ̂ makɛ, kwetolilɛ otɔna Abɛcha okana:
29«Ɔlɔ, waeta enywa ya welakilɛ,
obɛndɛa nɛnɛ n'kambi kɔ̌bɛ nilewelɛ wa talala.
30Yolo nɛnɛ minɛ namɔna wa mɛ̌sɔ manyi M'hɔnya minɛ kwawahila.
31Wan'lɔngya ebalɔ kobɛ m'hɔnya* hambɛlɛ ha bato bɔsɛ.
32Koya m'hɔnywa i yɛ̌ngɛ yɛnɛ yelamia bilɔngɔ byɔsɛ,
eyaka nǎ kwêha elɔngɔ yɔbɛ Ishilaɛli bɛjibɛji.»
33Biya binywa byetɔkɔmɛ Shimɛɔni yolo ya Yɛso, bikakechɛ bibushi byakɛ. 34Ohwa Shimɛɔni kwebahalilɛ na kwen'sambelɛ Maliya n'nakɛ kwa mwǎna kɛte: «Holechiwɛ: koko mwǎna kwaboswa yolo kokushɛ bato bɛ̌ngi hawingi ha Baishilaɛli na okimia bɛ̌ngi m'ebalɔ ya Ishilaɛli. Nakɛ kweba ekake ohuma wa Abɛcha, yɛnɛ bato bɛ̌ngi behanya. 35Obibyɔ malanga ma bato bɛ̌ngi mabiswɛ, mebisulwa. Na kɔkwɛ minɛ wesosoa nɛhɛ minɛ kwatɛwa o n'tema.»
36Hebɛlɛ komwɛ m'achana m'ongo wɛ̌nɛ, kwebɛlɛ n'languchi, chǐna lyakɛ kwebɛlɛ buchiwa Ana, kwebɛlɛ enyundu ya Fanuɛli, kwa lobotɔ lwa Ashɛli. Koya Ana kweetilɛ myâ njwe kya osɔngwa n'lomɛakɛ kwebulɛ. 37Kɛ nôshikala bila n'lomɛ miâ maumi enana na bina. Maya mɛngɔ mɔsɛ kweshaminɛ n'Lobonga* m'oetela Abɛcha n'kelɔ, m'ohamba na osaba busuku na chǒba. 38Kwehǐlɛ m'mɔka maya mɛngɔ ma Shimɛɔni, na kwetolilɛ otɔna Abɛcha. Kwebelɛ okana mwanɔ kwa Yɛso o bato bɔsɛ bɛnɛ bebɛlɛ hɛmba byɛnɛ Abɛcha kwehɔnya bato ba Yɛlusalɛma m'masoso mabɔ.
Bibushi bya Yɛso byasuela Nasalɛti
39Bibushi bya Yɛso habyehulɛ oeta byɔsɛ, byɛnɛ m'benda kwa Abɛcha ikotɔkɔmɛ, byesuelɛ nakɛ wabɔ Nasalɛti m'ebalɔ ya Galilaya. 40Yɛso kwebɛlɛ ǒla na oɔma, kwebɛlɛ na lwɛ̌nyi lwingi, na mwandɔ kya Abɛcha kyebɛlɛ hamwɛchi nakɛ.
Yɛso n'ta Lobonga*lwa Abɛcha
41Kila mwâ, bibushi bya Yɛso byebɛlɛ okya Yɛlusalɛma mɛngɔ ma m'onda kwa Pasaka*. 42Mɛngɔ mɛnɛ Yɛso kwebɛlɛ na miâ umi na kebele, kɛ na bibushi byakɛ behɛlilɛ okya o koya m'onda nɛhɛ kyebɛlɛ kɔlɔbɛchi lya Bayola#2.42 Obayola, mɛngɔ mɛnɛ mwǎna kwahiya myâ umi na kebele, bebɛlɛ okana kɛte kushi eyaka mwǎnyuɛ. Haya, bebɛlɛ okana kɛte kwahoba hɔka na baya bato bahosenga n'ta dini . 43M'onda kwa Pasaka* hakwehulɛ, bibushi bya Yɛso byesuelɛ wabɔ. Ela Yɛso kweshikalɛ Yɛlusalɛma, bibushi byakɛ bishimanyinyɛ. 44Byelangilɛ kwebɛlɛ hamwɛchi na eoto ya bɛndɔ nakɛ. Habenyatilɛ chǒba lyɔsɛ, betolilɛ om'ɛbɛla hawǐngi ha bashiwabɔ na bɛnɛ bebamananɛ nǎbɔ. 45Ela bashim'mɔninɛ. Obibyɔ, besuelɛ eyǎka Yɛlusalɛma m'om'ɛba.
46Ohwa musuku matato, bem'bangilɛ n'Lobonga* lwa Abɛcha kwen'shamɛ na nɔmbɔchi cha ndɔ*, m'obaholecha na obabocha binywa. 47Bɔsɛ bɛnɛ beholechɛ binywa byakɛ, bekakelwɛ na lwɛ̌nyi lwakɛ na okaa wakɛ. 48Bibushi byakɛ habyem'mɔninɛ, byekakelwɛ. Nǎ Maliya n'nakɛ kwem'buchichɛ kɛte: «Haa! Mwananyi, yolo ya e watoetela bibyɔ? Sɔbɛ na nɛnɛ twabaohoɛba na anyɔngɔtɛla hɛ̌nɛ!» 49Yɛso kwebakailɛ kɛte: «Yolo ya e môkɛba? Mushibamǎnɛ okana i bibɛnju nɛnɛ oba n'sɛsɛ kya Tata?» 50Ela bɔnyibɔ bashimaninɛ yolo ya e kwebasambelɛ biya. 51Uesula, Yɛso kwesuelɛ Nasalɛti hamwɛchi nǎbɔ. Kwebɛlɛ oeta byɛnɛ byebɛlɛ on'sambela bibushi byakɛ. Biya binywa byɔsɛ, n'nakɛ kwebɛlɛ bibea n'ta n'tema kwakɛ. 52Na Yɛso kwebɛlɛ ǒla n'ta lwɛ̌nyi na echuli, eyaka kwebɛlɛ obɛnja Abɛcha na bato.
2025 Forum Communautairre des Traducteurs de la bible et Alphabetisation