3. Mose 24
24
I momlia oun mare o baro Debleske
1O baro Devel penas ap o Mose: 2-3Pen ap i Israelitarya, te anenn le touke o lačeder olivtikro djet, te nay rhačenn le haki rat i tikne momlia ap i momelengri an o Debleskro plarhteno kheer. Kay momelengri vell tardo vin glan ko kouč kotar than, hoy glan ko morhton pandlo hi, kay o Debleskre deesh laba dren hi. Kote dell o Aron yak, te rhačell i momelengri i tseli rat. Kava te vell yaake kerdo hako tsireske pash i Israelitarya oun lengre čavende, kay pal lende venna. 4O Aron hounte dell yak ap i momlia ap i sonakaskri momelengri, te rhačenn le hako tsiro glan o baro Debleste.
5Mouk deesh-te-douy mare te pekell dran lačo yarro, hako maro dran douy-te-paash kilogramme yarro! 6Oun čip len douy kope shob kotya khetne ap koy sonakaskri rhapaskri glan o baro Debleste. 7Čip lačo soungepaskro koova#24:7 lačo soungepaskro koova encens ap kal mare. Ko soungepaskro koova vell rhačedo o baro Debleske, oun yaake vell siklo, te hi kal mare o baro Debleske. 8Hako kourko#24:8 kourko semaine ap o Debleskro dives čivell o Aron neve mare glan o baro Debleste. Yaake hounte krenn i Israelitarya hako tsiro, hoy vella. 9Kal mare hi o Aroneske oun leskre morsh čavenge. Oun yon hounte rhan len ap i Debleskri platsa. Kal mare hi lengro kotar kolestar, hoy o baro Debleske rhačedo vell, oun hi kokres i rashayenge. Yaake hounte vell kova kerdo hako tsireske.
I phagi koleske, kay bari doosh ap peste anas
10-11Mank i Israelitarya his i morsh, koleskri day i Israeltikri djouvel his oun leskro dad i Egiptari. Leskri day kharas Shelomit. Lakro dad hi o Dibri dran o kheer Dan. Ko morsh čingras pes i morsheha dran Israel. An kava čingepen čingras lo ap o baro Debleste djoungele labentsa. Koy anan le les pash o Moseste, 12oun stilan les, bis te penas lenge o baro Devel, hoy te krenn le leha. 13O baro Devel penas ap o Mose: 14An ko morshes vin glan koy platsa, kay i menshe hi! Hakeno, kay shounas, hoy lo penas, kova čivell peskre vasta ap leskro shero. Palle vitsrenn i tsele menshe les moulo i barrentsa. 15Ap i Israelitarya peness: Koon praasell peskro Debles, hounte hidjrell peskri phagi. 16Kova, kay čingrell ap o baro Debleste djoungele labentsa, hounte vell moulo dino. I tsele menshe hounte vitsrenn les i barrentsa moules. Hi yek, te hi lo i Israelitari oder i vi-themari.
17Koon i menshes moulo dell, hounte vell moulo dino. 18Koon i firhes moulo dell, kova hounte dell sau firho pale: I djipen i djipaske. 19Koon i vavares doukrell, koleske vell kerdo, hoy yob kras: 20Te phagas lo yekeske i kokalo, hounte vell leske i kokalo phagedo. Te das lo leske i yak oder i dand vin, hounte vell leske i yak oder i dand vin dino. Yaake har yek o vavareske kras, yaake vell leske pale dino.
21Koon i firhes moulo dell, hounte dell sau firhes pale. Koon i menshes moulo dell, hounte merell. 22T'menge oun kolenge dran i vi-them, kay pash t'mende djivenna, hounte vell yek čačepen, pal kova lauter vin kerdo vell. Me, o baro Devel, hom t'maro Devel.
23O Mose penas kova i Israelenge. Oun yon kran yaake, har penas o baro Devel ap o Moseste, oun anan ko morshes, kay o baro Debles praasas, vin glan koy platsa, kay i Israelitarya his, oun vitsran les i barrentsa moulo.
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.