EPH 1
1
Tooma
1Bulus, ǝn ɓahone Yeso Almaseho ya ma lau yauwo Kaa wa ya, ndǝ sase yǝ nyorsǝ likarkar wa ya, aa ko a ɓet bǝɗ Kaa ɓǝsa ur Afisa wa ni, ɓaa ɓǝn bǝɗsǝ Yeso Almaseho ma kuɗa fin ya ɓa.
2Kwasira ma kaɗɗo hurhur u fiɗsǝ a Kaa Paande ni ya, ma u Ankundi Yeso Almaseho ya wa, aa kaɗ ke ma saase.
Saltǝra Wiso ra u yǝsǝ ɗaan a Almaseho ni wa
3Nyoota aa kaɗ a Kaa ni, Paapa u Ankundi yaande Yeso Almaseho wa, yaa yǝ na ndǝsǝ saltǝra ma nsaad nkaamǝra saltǝra wiso ra wa, u yǝsǝ ma lau Almaseho a kuɓsutu usu ɓoti a liura wa. 4Yǝ tau ndǝ ma lau Almaseho wa si ɓaa mar put taandi wa sundu ra, me ndǝ kaɗ ɓaa ɗekɗek ɓa, ɗǝm nkweera helek a wii usu.
Yauta u Kaa wa ndǝ siso mbu kwaasǝ, 5yǝ weesǝ tiyo me ndǝ kaɗ emɓisa ma lau Yeso Almaseho wa, yǝ tom maaso me, ǝn mbu tǝǝsǝsǝ ɓa, ɗǝm ǝn yauwo usu. 6Yǝ tom maaso me ndǝ nyoo kwasira ira, u yǝ na ndǝsǝ sal nema hoo wa, ma lau Au isi yǝn yausǝsǝ ya wa. 7Ma lau Almaseho wa ndǝ taasǝ konnkweera wa ma lau monma imma wa, u ǝn siso lee a senda tenatenato nwaado wa, a pelerto kwasira Kaa ra wa, 8u yǝ na ndǝsǝ neme hoo ma maawo dem wa, ɗǝm ma maa mbuka wa ya. 9Kaa yǝ ti ndǝ maa mbu a nhuukǝra yǝn yausǝ ɓa, me ǝn mbu tǝǝsǝsǝ ɓa, ɗǝm yǝ werkǝsǝ me kiyǝ kung ma lau Almaseho wa. 10Mbusǝsa nsaad ǝn werkǝ me, me fer usu tommon, yǝ tǝmba mbu nsaad u a liura wa ma mbu a put taandi wa ɓa, aa kunda kwangto ɗuura fin wa, ɗuura sǝra ndǝ Almaseho.
11Ma lau Almaseho wa, ɓaa tau ndǝsǝ wa, me Kaa yǝ wee tiyon kiyǝ tom maaso, me yǝ yaa yǝn tisǝ mbusa nsaad aa tom nga yǝn yausǝ wa ya. 12Yǝ tau ndǝ, ndase ɓaa ndǝ ntiisǝ ti kanggo a Almaseho ni ɓa, me ndǝ tom kaɗɗo nyoota u too usu wa. 13Ma lau Almaseho wa, saase sǝ kurasǝ mara ɓongtǝrato ra wa, u ǝn siso mara kwalari u konnkweera wa. A fer sǝ nasǝ ɓongtǝra a Almaseho ni wa, Kaa yǝ nasǝ Wis Ɗekɗek wa, nga yǝ tomsǝsǝ waa kiyǝ na wa, me aa kaɗ mbu maa a ɗuuti yaase, me sǝn ɓet bǝɗ ɓisa. 14Wis Ɗekɗek wa, ǝn sase yǝ weɗasǝ me, Kaa kiyǝ ndǝ na kangge u yǝ tomsǝ waa wa, u ka tom waando wa a fer Kaa kiyaa kon nkweera ɓaa ɓǝsǝn usu ɓa. U nwa tom maaso, me aa tom nyoota u too usu wa.
Kǝnara Bulus a ɗuura ɓaa Afisawa ɓa
15Ndǝ siso mbu kwaasǝ, tǝng nǝ kurasǝ mara a ɗuura naɓongtǝra waaso a Ankundi Yeso ni wa, ɗǝm ma yauta saa a ɗuura ɓet bǝɗ Kaa ɓa nsaad wa, 16nǝ fǝta lee tom nahimara Kaa wa a ɗuura saa wa ra, nǝn ɗim ma saase a kǝnara na. 17Nǝ tomaa kǝnara me Kaa u Ankundi Yeso Almaseho yaate wa, Paapa yaa ma too dem ya wa, yǝsǝ na Wiso u ǝn nasǝ maawo wa, ma u nwanyǝ mbusa wa ya. 18Nǝn tom kǝnara Kaa me yǝ ti ɗekɗekto usu a kuti yaase, me sǝ maa ma ti kanggo wa, u yǝ yarsǝsǝ a si wa, ɗǝm sǝ maa pelerto saltǝra u kangge ɓaa tomsǝ me ɓet bǝɗ Kaa ɓa wa, 19ɗǝm sǝ maa kokrokto kwangto usu u aa nkaa aa mǝɗkǝ ra wa, yǝn tom tinima a dani, ndase ɓaa ndǝ nasǝ ɓongtǝra ɓa. Kwangto siso u yǝn tomsǝ tinima daan a ndani wa ǝn u fino ma kokrokto kwangto, u 20yǝ tomsǝ tinima ɗaan a Almaseho ni wa, a fer yǝ niksǝsǝ a woɗɗa wa, ɗǝm yǝ nasǝ han kaɗɗa yaɓ a nem seya ɓisa a kuɓsutu usu ɓoti a liura wa. 21Ɓoti kǝnso, Almaseho yǝn tomsǝ kuɓsutu a ɗuura nsaad ɓaa ɓǝn tomsǝ kuɓsutu ɓoso a liuta wa, ma ɓaa ɓǝsǝ ma kwangto ɓolɓol ɓa. Sase yǝ ma ɗǝnda u yǝ faɗsǝ hana ɗǝnda nara wa, sem a put taandi waando waso seɗɗe ra, pa hana a kaare ka wo ya. 22Kaa yǝ ti mbusa nsaad aa kunda kwangto Almaseho ra, ɗǝm yaa ti yǝ kaɗ an ndǝ wii a ɗuura mbusa ra nsaad me ɓet bǝɗ Kaa ɓa, ɓǝ hima. 23Ndǝ ɓosa maabiri Almaseho ɓa. Ɗǝm ɗaan a ɗaaso ɓoso, Almaseho ndǝ sase kungsǝ ya, nga sase nkweera ira, yǝ kungsǝ mbusa nsaad wa ya.
©2023 Seed Company in collaboration with Language Developers and Bible Translators Association