Likarkar ntiiri Bulus yǝ nyorsǝ Timotawus wa 4
4
Fǝɗkǝra u paara wa
1Wis Kaa wa yǝ wee nkeen a talte me a tǝro feɗefeɗe wa, ɓaata ɓǝkǝ lee na ɓongtǝra ɓora ɓǝ bǝɗ wisa nlaata sa, ma mbu nsaamse yǝn fǝɗkǝ ɓǝsǝ ɓa. 2Nkamǝra fǝɗkǝra kara, ǝn fiɗ a ɓaa ma ɗǝlmara raɓ ɓa, ma ɓan nlaata ɓa, ɓaa senta ɓota yabta woɗɗon, nga ɓaa kǝɗ ma mɓaa u fiɗsǝ a ara wa. 3Ɓǝn saa ɓeta me ɓǝn kon toona ra, ɗǝm ɓǝn ti ɗaɗ me ɓǝ se fera mbuseya ra, u Kaa yǝ marsǝ me ɓaa ɓǝ nasǝ ɓongtǝra ɓa ɗǝm ɓǝ maa ɓongtǝran me ɓǝ kon ma himara. 4Me mbu Kaa marsǝ ɓa nsaad kwalari, me maaso ndǝ ɓisi hana mbusa nsaad da me ndǝ kon ma himaran, 5me tom mbu ɗekɗek ɓa ma lau mara Kaa ra wa ma kǝnara.
6Me ngǝ nkee mbusǝsa ɓaata ɓǝnga ɓan bǝɗ Yeso ɓan, ngǝ kaɗ an tom tinima kwalari Krisiti Yeso ma, u ɓaa mbar a mara ɓongtǝra ra ma fǝɗkǝra u yaɓ ngǝn bǝɗsǝ wa. 7A tom mǝbmǝb ma tikaa u sem u Kaa ra wa, a tom tikaa u hautǝma wa ra, pa me maaso a fǝɗkǝ ee nwango mbuka tǝǝ Kaa ɓa. 8Me fǝɗkǝra nyaa maabiri wa yǝma kwasira, pa kaɗɗo a tǝǝ Kaa wa faɗ kwasira nsaad nǝn, hana ma lau nawa, me yǝn wo ma huurtu ete a kaɗɗo taandi wa waso wa ma ɗǝm u ka wo a wiiyo wa.
9Mara ra ǝn ɓongtǝra, pamman hana yam ni yǝ kon ma kuɗa fin. 10Ən mbu kwaasǝ ndǝ tom tinima ndǝ kweetǝ ɓa, me ndǝ ti kanggo a Kaa ni yaa ma huurtu ya, yaa yǝn konsǝ nkweera ɓeta nsaad ya, nga ɓaa ɓǝ nasǝ ɓongtǝra ɓa.
11A ti ɓeta ɓǝ ɓǝɗǝ, ɗǝm ngǝ fǝɗkǝ mbu ɓa. 12Ngǝ lee yaake yǝ ngǝ tǝblǝ me ngǝn auwe ra, pa ngǝ kaɗ mbu mǝɗkǝra ɓa a ɓan bǝɗ Kaa ɓa ni, ma lau mara ngǝn kansǝ ra, ma mbu ngǝn tomsǝ nsaad ɓa, ma lau tom yauta wa, ma lau naɓongtǝra wa, ɗǝm ma lau kaɗɗo ɗekɗek wa. 13Ndub me nǝ won, a tomaa kau likarkar Kaa wa a ɗaaso ɓeta wa, ngǝ ɓǝ nkee mara Kaa ra ngǝ ɓǝ fǝɗkǝ ɗǝm. 14Ngǝ roo seu ma naa mbu Kaa na ngǝsǝ u yǝsǝ a ngani wa ra, ma lau mara Kaa ra kansǝwa fer wiina kwausǝ ɓǝ ngǝ ti nema ɓosa wa.
15A kweetǝ ngǝ na ɗuura nga, ngǝ tom mbu ɓa, me hanan yamni yǝ wǝr se wiiyo wango. 16A tomaa nhii nwa wa ma siko wango ma fǝɗkǝra ngǝn fǝɗkǝsǝ ra. A se wiiyo ma tommo maaso wa, kǝngǝ ta konnkweera ee wango ma ɓaa ɓǝn kura ngǝsǝ ɓa ɗǝm.
©2023 Seed Company in collaboration with Language Developers and Bible Translators Association