Likarkar ntiiri Bulus yǝ nyorsǝ Timotawus wa 1
1
1Likarkar nwa, fiɗa Bulus ni ɓahone Krisiti Yeso ya, nga nkee Kaa an kon nkweera yaande ma Krisiti Yeso yaa nɗǝn tisǝ kanggo a sani ya.
2Nǝn nyora ngǝ Timatawus auwane tene a ɗaan ma lau na ɓongtǝra wa.
Aa lee Kwasira ma nyorataara ma kaɗɗo hurhur u fiɗsǝ a Kaa Paapa ni ma Yeso Almaseho Ankundi yaande, aa kaɗ ke ma saase.
Hoɓ wanto wa a Ɗuura Malǝmma Fǝɗkǝta Parasa
3Nga nǝ kǝna ngǝsǝ a fer nǝ kosǝ Makidoniya wa, a kaɗ kǝnso Afisa me ngǝ nkee ɓaataka me ɓǝn fǝɗkǝ fǝɗkǝra paara ra ɗǝm ra, 4hana ɓǝ ti nwa a tikaa ma bǝɗɗo kauwo ɗǝnta sirta u feɗefeɗe semra wa. Mbusǝsa ǝn wo ma renǝta maɗ, yǝ wosaa ma se wiiyo a tinima Kaa u yǝsǝ ma lau na ɓongtǝra wa ra. 5Pa senta na a mbu nǝ tisǝsǝ me sǝ tom ɓa wa, ndǝ siso me, sǝ tom ma yauta u fiɗsǝ a kuɗa fin wa, ma senta u yaɓ wa, ɗǝm ma naɓongtǝra u ɓong wa. 6Ɓaata ɓǝ lee mbusǝsan ɓǝ kang a mara kwalakwala ra. 7Ɓǝn taa me ɓǝ kaɗ malǝma masaka Kaa sa, pa ɓǝ maa mbu ɓǝn kansǝ a si ɓa ra, hana kaɓǝn sensǝ nga ɓǝ maan siso.
8Ndǝ maan me Masaka yǝ kwalari, me ete yǝ tomsǝ tinima yaɓ nǝn. 9Ndǝ maan me ɓaa nyor masaka men ɓan ma ɓongtǝra ɓa ra, pa men ɓaa ɓǝ kura handa ra ɓa, ma ɓan kidsa ɓa, ɓaa ɓǝ maa Kaa ra ɓa, ma ɓaa ma tentenato ɓa, ma ɓaa ɓǝn na mbarta Kaa ra ɓa, ɓaa ɓǝn toɗsǝ papamse ɓose ma mamamse ɓose ɓa, ma ɓan toɗ ɓeta ɓa, 10ma pǝlauwa ma parata ɓǝn tǝrsǝ ɓaatǝ ma parata a ɓosa ɓa, ma toona ɓǝn tǝrsǝ ɓaatǝ toona a ɓoso ɓa, ma ɓan tang ɓeta ɓǝ fang ɓa, ma ɓan paapara ɓa, ma ɓan nkee mbu sem keke ra ɓa, ma mbu nsaad u same keke ma fǝɗkǝra ɓa ra, 11u nwa yǝ keke ma mara kwalari Kaa nanǝsǝ ra.
Kwasira Kaa ra a Bulus ni.
12Nǝ hima Krisiti Yeso Ankundi yaande, yaa yǝ nanǝsǝ kokrokto ya, me nǝ ma ɓongtǝra, yǝ taunǝ me naa tom tinima. 13Hana ka a fer siso nǝsǝ an kan mbuka kwalakwala a ɗuura Krisiti ra ya, ɗǝm nǝn na kongsa ɓan bǝɗ ɓǝsa, nǝn mbu sem ɗaura ɓa, pa Krisiti weɗa nǝ yauta, me a fer siso nǝ maa mbuka ra, ɗǝm nǝ na ɓongtǝra a Krisiti ni ra. 14Kwasira Ankundi yaande ra, wo a ɗuura naa dem dem, ke ma naɓongtǝra wa ma yauta u a Krisiti Yeso ni wa.
15U nwa ndǝ mara ɓongtǝra ra, pamman hana yam ni yǝ kon ma kuɗa fin. Krisiti Yeso wo a kaɗɗo put taandi wa me, yǝ kon nkweera ɓaa ma tenatenato ɓa, u nii na nǝ faɗ ɓǝsǝ nsaad wa. 16Pa me maso Kaa yǝ weɗanǝ yauta nii na samto nǝ faɗsǝ ɓeta nsaad tentenato ya, Krisiti Yeso yǝ weɗa kungsǝto sǝmmo usu a ɗuura naa me nǝ kaɗ mǝɗkǝra a wiiyo ɓaa ɓǝka na ɓongtǝra a sani ɓa, ɗǝm ɓa taa huurtu pakarese wa. 17Waso a Kuɓ yaa feɗefeɗe sem ra ya, yaa yǝ woɗɗa ra ya, yaa ɓaa wǝr saa ra ya, yǝn Kaa fin mbusa, a sanii mbarta ma too aa kaɗ ke ma sase feɗefeɗe sem ra. Aa kaɗ maaso.
18Timatawus auwane, nǝn nkee ngǝ mbu ɓa, me ngǝ maa mbu ɓa nasǝ wanto a ɗuura nga ra, mee me ngǝ ɗimin kǝngǝ nkaa ngǝ tom kǝɗ usu ɓongɓong, 19ngǝ ma ɓongtǝra ma kuɗa fin. Pa ɓaata ɓǝ ɓisi mbu sǝsan, wa ɓǝ tǝblǝ na ɓongto ɓoson. 20A ɗaaso ɓoso ǝn Himnayas ma Askandari, u nǝ nasǝ Shaitan me yǝɓǝ na kongsa me ɓǝ maa me ɓǝ nkee mbu ka kwalakwala a ɗuura Kaa ra.
©2023 Seed Company in collaboration with Language Developers and Bible Translators Association