VAROME 13
13
Kya iindya vaniini va uruka
1Wo nndu nainndye ushilyi yelo uniini, mashika nkwiifo ushilyi lulaukye kwa Iruva-fo. Ushilyi lwiiyo loose mmbo lukee uvavasye ni Iruva. 2Neewo vekukyikyisa na ushilyi lwiiyo mmbo vashekuwonisyaa uvingo. 3Mashika yewo veshillya mmbaeresee vandu mashika elyi vatana mesha-fo, kuuta ni elyi vatana maravi. A mmbo kulakunndye iiryaa yeto atiri ushilyi? Kyasia, tana efyo fikwaani naambo kuwoni-u irerwa kisha. 4Mashika we mmbo avikkywa ni Iruva nasalallye kutannywa fya usha. Naasa, kwatana firavi iryaa, mashika yeto mwiishillya nnyatira nsengye wa ushilyi ruu-fo, ni elyi akee mmbike ni Iruva, nataiye yewo veetana makasha kivavavise. 5Nkyoony, nkuti iirikya ushilyi, nshi iryaa unyafi-da-fo, lyo ni kyimaruma kya usakiro nriminy. 6Nkyo na kyimaruma-da kwataa kodi mmashika elyi veeshillya vakeerundya Iruva elyi vakee ishoreny elyo lyawo. 7Niingyeny vandu woose usumanu lwawo, wa kodi naniingywa kodi, na wa usanu naniingywa usanu, yeto asumani yeerewa neerewa, neeto wa wiindi naniingwa wiindi.
Ikundana nisha
8Mulatire sye ya nndu kuuta ukundi-fo. Mashika yeto mwiikunda ungyi mmbo ainutya uvavaso. 9Mashika elyi lwavio kulatuuse, kulawae, kulaive, kulalange, na mavavaso yoo engyi-da, fyoose efyo kwasanda, mmbo kyaamba. Kunda nndu ungyi shaasa kukukunndye kumuni. 10Ukundi llutannyaa nndu ungyi kindo kikasha-fo. Naasany, ukundi llo lwiinutyaa mavavaso moose. 11Kimmba niindo, ulaalu lumanyi sheelyi kyeeri kya yuuka rony mmbo kyamfika. Mashika ulaalu ukiro lweru mmbo lwanserikkya kufii mmwasi ngota llya lulebatiswa lukakusirya-u. 12Kio mmbo kyammikkwa, nkufii kukye. Naasany luute-fo mitannyi ya ireema, luipoo fisha fya sa. 13Mashora a nsanyiny ni itira wiindi, nta lulasheeva veelya nnu na inangwa, nta itana fya uravi na fya utuusi, nta isyana myaandu, kififi. 14Mmbo musheraa Nndumi Yesu muuny wany, nta mulalolaa mwiili na yaanta lango ta vayo.
The Holy Bible in Kimashami © Bible Society of Tanzania, 2016.