Vaeburania 13
13
Mwino inoneye ümüyanjisya Muungu
1Fwaghëëri giyanja gënyandughu. 2Mutaëwee uvaghenyifa aghenyi, gusoko gwa utenda uvii antu vangëja vëgavaghenyifa malaëka gwa udëa umanya. 3Vakümbükwi vasaa nëvatungiwe ëtende mwino mutungiwe itambëëmwe na veeso. Vakümbükwi avoo nëvëukhasëkaa ëtende mwino nyeenoo muukhasëka mwino veeso.
4Uroghoe unoneye ukuriwe na antu voong'e na urëë wa uroghoe utakhombwee. Muungu ügüvaramuëya alehadi nanë afümbu.
5Mutatendee mu uduvi wanyu anya uyanjëcha hela, iküti na mantu asaa nëmukweti. Muungu mughonjo uguhanya, “Ntiugureka mbanduvë, mbesa ntiugüjughuta.” 6Gusoko ësëë fana tutë guuhanya,
“Müküü unë waarëëyi wanë,
ntighooghofa.
Mwaamuntu uguntenda ntunihe?”
7Vakümbükwi atongeeri vanyu nëvamutanantëye ukhani wa Muungu. Ghemi mweenendo wawe, muhore nyinkhori a uhuvëi wawe. 8Yesu Kiristo uu në mweeso uyuuyouyuuyo, ighoo rëo na khae na khae. 9Mutafeempuchiwee kunu nanë kunu gwa masëyo hiyahiya agëghenyi. Mboto a Muungu unë ëguyinkhomyaa nkhoo yitu na tiësa maraghëëyo a malëwa, maraghëëyo asaa inamwaarëëya mbanduvë muntu gëkaku nëagayahonga.
10Sese gwina masabahu asaa në avoo ëkëë vëuyatümëa mu iheme ra Ayahudi vëtinoneye ula mantu ayo. 11Mükumbëki në Müküü wa Gëyahudi ügweetaa saghami a maimwana Fana Gweru na umëduya ikumbëko gusoko a mahutye, ëgweeso nyama ya maimwana asaa igurungwëëriwaa günji a nkhambë. 12Uu gusoko ësëë Yesu noo, gwa ndolyo adahe uvoya antu gwa saghami akwe mughonjo, agakhasiwa na ukuya günji a muji. 13Uvii, gumweendëe kuuko günji a nkhambë, gukenke ijumwa rakwe. 14Gusoko afaa mü urëmi gutikweti muji në wa matiku oong'e, ëgweeso guuwufenja wasuu nëujie. 15Uvii gwa njëa amwa Yesu, gumufunyiye Muungu ikumbëko ra iküryo matiku oong'e, uunë iküryo nërëuduiywaa na antu nëvëurikumua rina rakwe. 16Mutaëwee utenda nëmaja na gëarëëya, gusoko ayaa unë makumbëko nëëgümüyanjisyaa Muungu.
17Vategheeyi atongeeri vanyu na uyakwatëëra maraghëëyo awe, veeso vëudëmaa nkhoo yanyu utiku nanë mümwë, na vëjie uduya sayu a utumami wawe usonge amwa Muungu. Nëmbaa muvategheeye vëutenda mëëmo awe gwa uyanjo, nësa ti uvii, vëumëtenda gwa uvavi, na ësëë itiutendeka ina nsao kunë nyee.
18Gurombei nanë sese. Gumanyie tutë mwino gwina samiri në njija, gusoko guufenjaa utenda në maja matiku oong'e. 19Ngumunëna ino munombëe Muungu ansuche kunë nyenye ruvë ino.
Marombi
20Uvii, Muungu wa majëghana nëagamweeta kangë ufuma gwa akuyi Mudëmi Müküü wa nkhoo, gwa saghami a iraghano ra khae na khae, mweeso Müküü witu Yesu, 21amutende nyee utendeka mukhondekie gwa mu rasëë në muurëtendaa në ija, mudahe uyatenda mafenji akwe, mweesonoo sa ugutenda mukhatë itu nërëuyanjisya usonge akwe, fana Yesu Kiristo, üküü wina mweeso khae na khae, amina.
Nkhani ya Umpeo
22Uvii, anyandughu, ngumunena mughenyife gwa vija sayu ëyëë a umukhomya nkhoo. Ëyëë unë keeti nkufë gutufu nëna mwaandëkëa. 23Ngumufa sayu mwino muuna witu Timoteo wadahie urughwëëwaa ugeresa. Nëwafika afaa ruvë, nëjie ginakwe neikwë nëjie kunë nyee.
24Varamuchi atongeeri vanyu oong'e itambëëmwe na antu va Muungu! Anyandughu va Italia vëumuramucha. 25Mboto ëtendeke kunë nyenye nyoong'e.
Kirimi New Testament © Bible Society of Tanzania, 2008.