मरकुस 13
13
मंदीर खत्तम हयवा ना बारा मे देखाड़े
(मत्ती 24:1-2; लुका 21:5-6)
1अळतेण ईसु मंदीर मे गेथो नीकळ्यो, ता तीनो एक चेलो केदो, “ए मास्तर, देख, आहया मंदीर ना बंगला घणा घटाळा से अने आना जमाड़ला दगड़ा घणा मोटा से?”
2ईसु तीने केदो, “तु ते आहया बंगला ने देखीन वहराय र्यो। पण आहयु आखु ओदार नाखहे; आञे लग के आञे ह़ारीक दगड़ा पोर दगड़ो बी नी बचे।”
ईसु वेला अने दुख देखाड़े
(मत्ती 24:3-14; लुका 21:7-19)
3अळतेण ईसु जेतुन नाम ना बड़ा पोर, बह र्यो हतो, तां गेथो मंदीर ह़ाम्बो देखायत्लो। तत्यार पतरस अने याकुब, अने युहन्ना अने अंदर्यास ईसु ने आंग्ये ली जाय्न पुछ्या, 4“आमने के तु आहयी वात कत्यार पुरी हयहे? अने जे दाड़ा मे आहयी वात पुरी हयवा वाळी से, तीहया दाड़ा ह़ातेत आय र्या आहयु ह़मजवा नी सेलाणी ह़ु रेहे?”
5ईसु तीमने केवा बाज ज्यो, “चेतीन रेवो, कोय बी तमने भंगलाड़वा नी जोवे।” 6घणा ढेरका मारा नामे आवीन केहे, के “मे मसी से” अने घणा ढेरका भंगलाड़ देहे। 7जत्यार तमु लड़ाय अने झगड़ा नु हुकवाड़ो ह़मळो, ता घबरायजो नी, काहाके ईसम ते हयहेन-हयहे। पण आहयुत कळ नी छेव नी हय। 8काहाके एक जाती ना माणहु बीजी जाती पोर। एक राज्य ना माणहु बीजा राज्य ना माणहु ह़ाते झुमायहे। जां तां काळ पड़हे। अने जां तां धरती फाट जहे। आहयी ते, आव्वा वाळी गरा सुरु हयवा नी सेलाणी से।
9 #
मत्ती 10:17-20; लुका 12:11,12 पण तमु आह़फा ना बारा मे चेतीन रेवो; काहाके वेरी माणहु तमने धरहे अने मोट्ली पंचु ना अगळ लीजहे; अने तीमना भक्ती ना घोर मे तमने ली जाय्न ठोकहे; अने मारा नाम सी राजा अने नीयाव करन्या अगळ उबा करहे, तीहयी टेमे तमने तीमनी अगळ मारी खुस-खबर ह़मळावा नो मोखो जड़हे। 10अने कळ खत्तम हयवान पेले खुस-खबर नी वात आखी जाती मे परच्यार करवा जोवे। 11जत्यार तीहया तमने बंदी बणावीन पंचु अगळ ली जाय, ता पेले गेथात आहयी फीकर नी करजो, के आमु ह़ु केहु, पण जे कंय तमने तीहयी टेम मे भगवान देखाड़हे, तीहयुत केजो; काहाके बोलवा वाळा तमु नी, पण चोखली आत्मा से।#मत्ती 10:17-20; लुका 12:11,12 12तीहया दाड़ा मे भाय आह़फा ना भाय ने अने बाह आह़फा ना सोरा-सोरी ने मारवा करीन धराय देहे, अने सोरा-सोरी आह़फा ना आय्ह़-बाहा ना वीरोद मे हय्न तीमने मराय नाखहे। 13#मत्ती 10:22अने तमु मारा नाम पोर भरहो कर र्या करीन आखा माणहु तमारी सी बुराय करहे। पण जे कोय आखरी लग मार पोर भरहो करहे, तीनेत छुटकारो जड़हे।#मत्ती 10:22
मोट्ली वेला अने काळ
(मत्ती 24:15-28; लुका 21:20-24)
14पण जत्यार तमु तीहया उजाड़वा वाळी बगड़ली चीज ने जां वारु नी हय तां उबी हयली देखो, भणवा वाळो ह़मजी लेय, तीहया टेमे, जे माणहु युहद्या जीला मे हय, तीमने तत्यारुत आह़फा ने बचाड़वा करीन बड़ा मे नाह जवा जोवे।#दानीयल 9:27; 11:31; 12:11 15#लुका 17:31जे घोर नी पडाळ पोर हय, तीहयो आह़फा ना घोर मे गेथु कंय बी ह़मान लीजवा करीन हेटो नी उतरवा जोवे। 16अने जे खेतर मे हय, तीहयो आह़फा ना लुगड़ा ने लेवा पासो नी आव्वा जोवे।#लुका 17:21 17तीहया दाड़ा मे जे बयर भारेपोगे हहे अने सोरु ने धाय धवाड़ती हहे, तीनी जुगु गरा ना दाड़ा केवायहे! 18-19#परकासीतवाक्य 7:14तीहया दाड़ा घण-जबर गरा ना रेहे। भगवान कळ घड़्यो तां गेथी आज तक एतरी मोटी गरा नी आयी हय, एतरी मोटी गरा आवहे। अने अळी एवी गरा कदी नी आवे। एतरे भगवान पांह वीन्ती कर्या करो ह़ीयाळा ना दाड़ा मे आहयी गरा नी आव्वा जोवे।#दानीयल 12:1; परकासीतवाक्य 7:14 20कदी मालीक पोर भरहो करन्या टाळला माणहु घण दाड़ा लग वेला करता नी रेवा जोवे करीन तीहयो तीहया गरा ना दाड़ा कम कर देहे। कदीम मालीक तीहया दाड़ा मे कम नी करे ता एक बी जीव नी बचे।
21-22तीहया दाड़ा मे झुटा मसी, अने झुटा भगवान वगे गेथी वात केण्या माणहु जां तां आवहे, अने जुदा-कामु सेलाणी ना रुप मे देखाड़हे; हय सके ता भगवान ना टाळला ने बी धोको दीन भंगलाड़वा नी कोसीत करहे। तीहयी टेमे कानो केहे; देखो मसी आञे से, नीता “देखो ह़ेले से” ता तीमनी पोर भरहो नी करजो। 23पण तमु जाळवीन रेवो: देखो, मे ते तमने एवु हयवा नी पेलेत आखी वात की र्यो।
ईसु पासो केम आवहे?
(मत्ती 24:29-31; लुका 21:25-28)
24 #
परकासीतवाक्य 6:12
तीहया दाड़ा मे, आहयु दुख ना बाद दाहड़ु अंदारु डुब हय जहे, अने चांद वीजाळु नी आपे।#यसाया 13:10; यहेजकेल 32:7; योएल 2:10,31; 3:15; परकासीतवाक्य 6:12 25#परकासीतवाक्य 6:13ह़रग मे गेथा तारा हेटा पड़वा बाज जहे, अने ह़रग नी आखी सक्ती हील पड़हे।#यसाया 34:4; योएल 2:10; परकासीतवाक्य 6:13 26#परकासीतवाक्य 1:7तत्यार माणहु, मनख्यान सोरा ने आखा मे जोर भरी सक्ती अने बड़ाय भेळे वादळा मे आवत्लो देखहे।#दानीयल 7:13; परकासीतवाक्य 1:7 27तीहयी टेमे तीहयो, आह़फा ह़रग वाळा ह़रगदुत ने मोकलीन तीमनीन तेम धरती नी आहयी धेड़े गेथो ह़ेली धेड़े लग, अने ह़रग नी आहयी धेड़े गेथो ह़ेली धेड़े लग च्यारो-मेर गेथा आह़फा ना टाळला माणहु ने भेळा करहे।
गुलर ना झाड़ नो दाखलो
(मत्ती 24:32-35; लुका 21:29-33)
28ईसु अगो केतो ज्यो, “गुलर नु झाड़ ना दाखलान लारे ह़ीको; जत्यार तीना डाळ्या मे गेथा ह़ुवाळा डीरा अने पान्टा फुटवा बाज जाय, ता तमु जाण लेवो के, उनाळा ना दाड़ा आव्वा वाळा से। 29एमेत जीसम मे तमने केदो तीहयु हयत्लु देखो, तत्यार जाण लेजो के, जे आव्वा वाळो से अने तीहयो झापला पोर से। 30मे तमने ह़ाचलीन आहयु केम, मे केदलो तीहयी आखी वात पुरी हयहेन-हयहे, अने आहयी पीड़ी ना माणहु मरवा नी पेलेत आहयी वात पुरी हयवा सुरु हयहे। 31ह़रग अने धरती टळ जहे पण मारी वात कदी नी टळे।”
चेतीन रेवो
(मत्ती 24:36-44)
32 #
मत्ती 24:36
ईसु अगो केतो ज्यो, “मारो आव्वा नो दाड़ो अने टेम ना बारा मे कोयने मालम नी हय, ह़रगे वाळा ह़रगदुत ने अने मने बी मालम नी हय, आहयो दाड़ो अने टेम भगवान बाह एतरोत जाणे।#मत्ती 24:36; नेवताळा ना काम 1:7 33चेतीन रीन वीन्ती करता रेवो। काहाके तमने नी मालम के तीहयी टेम कत्यार आवहे। 34#लुका 12:36-38आहयु तीहया माणेह ने तेवु से, जे पारका मुलक मे जवा नी टेमे आह़फा ना घोर ने सोड़ीन जाय, अने आह़फा ना पावर्या ने हक आपे, अने आखा ने काम देखाड़ीन जाय, अने झापलु रखवाळ्या ने चेतीन रीन जागली करवा नो हुकम आपे।#लुका 2:36-38 35एतरे तमु बी जागली करता जाय्न चेतीन रेवो, काहाके तमु नी जाणो के घोर नो मालीक कत्यार आवहे, ह़ांतो के आदी राते, के कुकड़ा वाहरे के ह़वारे। 36ईसम नी हयवा जोवे के तीहयो उचकाहलोत आय लागे अने तमु ह़ुवत्ला तीने देखाव पड़े। 37अने जे मे तमने केम तीहयुत आखा ने केम, के चेतीन रीन जागला रेवो।”
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025