Паччагьлугъар-1 24
24
Давудди Саулин уьмур уьбхюру
1Душвʼан душну, Давудди Эн-Гедийиъ чаз жин хьуз йишв гъабгу. 2Ва Саул филистимарихъди дявдиан гъафиган, дугъаз гьамус Давуд Эн-Гедийин багахь ичӀи чюлиъ айиваликан хабар дебкку.
3Саули шубуд агъзур ужударсдар эскрар-израилар уч гъапӀу ва ЧӀурдин ЦӀигьарин Гъарзарихъна, Давуд ва дугъан адмийир агбан бадали, рякъюъ учӀву. 4Рякьюхъ хъайи марччар тӀаъру йишварихьантина гъягъюри, Саул чӀат кудучӀвуз хьараъ учӀвру. Хъа думу хьаран дериндиъ чан адмийирихъди Давуд айи. 5Ва адмийири Давуддиз гъапи:
– РАББИЙИ увуз гаф тувнайи йигъ улубкьну! Дугъу увуз гъапнийи: «Узу яв душман яв хилариз тувдиза, ва уву дугъкан увуз ккуниб апӀидива».
Давуд жиниди багагьна гъафи ва Саулин палатдин канчӀ кадабтӀу. 6Амма дишлади Давуддиз Саулин палатдин канчӀ кадабтӀбан нач гъабхьи. 7Дугъу чан адмийириз гъапи:
– РАББИЙИЗ кадагъну, инсандикан зейтундин ччим ктатнуш, дугъаз дициб ляхин апӀбахьан ва дугъʼина хил за апӀбахьан РАББИЙИ уьрхри!
8Гьамцдар гафариинди чан адмийириз нач ккапӀну, Давудди дурариз Саулиин алархьуз ихтияр тувундар. Саул хьарʼан удучӀву ва чан рякъюъди гъушу.
9Думуган Давудди, хьарʼан удучӀвну, Саулиз дих гъапӀу:
– Паччагь, йиз жанаби!
Саул кьяляхъ илдицу, ва Давуд, гьюрматнан лишан вуди, дугъан улихь маш исизди жилиин дахъу. 10Давудди Саулиз гъапи:
– Узкан адмийири кӀурубдихъ, яни Давудди увуз пис кьаст апӀура кӀурайивалихъ, уву гьаз хъугърава?? 11Гъи хьараъ, увузра рябкъюравуз, РАББИЙИ уву йиз хилариз тувнийи. Узуз, уву йивну йикӀ, гъапнийи, амма узу йиз жанабийиина хил за апӀидарза: думу РАББИЙИ ччим кадатнайир ву дупну, рягьим гъапӀнийзавуз. 12Лиг, йиз адаш, лиг: йиз хлиъ яв палатдин канчӀ айиз. Эгер узу яв палатдин канчӀ кадабтӀнуш, амма уву йивну гъакӀундарш, уву аьхирки гъавриъ ахъ – узу тахсиркар дарза; уву узухъ хюрч апӀурашра, яв улихь сабдинра тахсир ктарзук. 13Гъит РАББИЙИ ихь диван апӀри, гъит РАББИЙИ узхъанди увлан кьисас алдабгъри, хъа узу увʼина хил за апӀидарза. 14Йирси мисали кӀура: «Фуж пис вуш, дугъу писвал апӀуру». Хъа узу увʼина хил за апӀидарза. 15Израилин паччагьди шлиз къаршуди дяви гъабхура? Уву шлихъ хъерграва? Мурдал хуйихъ, фициб-вуш чӀудрахъ! 16Гъит РАББИ диванчи ишри! Гъит Дугъу ихь диван апӀри, гъит Дугъаз рябкъри, Думу узхъан хъюгъри, ва Дугъу увхьан узу уьрхри!
17Давудди гьаму гафар дупну ккудубкӀиган, Саули гъапи:
– Яв сес ебхьурайин узуз, йиз бай Давуд? – ва думу зарбди гъишу.
18Дугъу Давуддиз гъапи:
– Уву гьякь вува, хъа узу яв улихь гьякь дарза. Уву узуз ужʼвал апӀуйва, хъа узу увуз писвалиинди гьякъи тувуйза. 19Узухьна рягьимлуди янашмиш хьуваликан дюзди гъапунва гьамус: РАББИЙИ узу яв хилариз тувну, хъа уву узу йивну гъакӀундарва. 20Душман ккахъну, шли думу сагъди, зарар тутрувди деетиди? Яв гъийин ляхниз увуз РАББИЙИ пешкеш туври! 21Гьаци вуйиган, узуз уву паччагь шлувал ва Израилиин гьюкум яв хилариз гъюрувал аьгъязуз. 22Уву йиз насил тӀанкь ва йиз тухумдиъ йиз ччвур терг дарапӀрувалин узуз РАББИЙИИНДИ ху апӀин.
23Давудди Саулиз ху гъапӀу, ва Саул хулаз кьяляхъ хътарку, хъа Давуд чан адмийирихъди учв жин духьнайишваз кьяляхъ гъафи.
© Институт перевода Библии, 2010, 2013, 2016, 2018, 2023