Паччагьлугъар-1 22
22
Новдиан вуйи Заанурин гъуллугъчйир
1Давуд душвʼан гъушу ва Адуллам кӀуру шагьрин багахь хьараъ жин гъахьи. Дугъан чвйир ва вари багахьлуйир, дидкан аьгъю дубхьну, Давуддихьна гъафи. 2Шлиз истисмар апӀуруш, шлихьан буржар ктирчуз шулдарш, фуж нарази вуш, гьадрар вари дугъахьна гъюрайи. Гьаци юкьудварж касдихьна уч гъахьнийи. Давуд дурарин улихь хьайир гъахьи. 3Душвʼан Давуд Муавдиъ айи Мицпа кӀуру шагьриз гъушу, ва дугъу Муавдин паччагьдиз гъапи:
– Ккун апӀурза увкан, Заанури узуз фициб кьисмат гьязур апӀураш, узу аьгъю апӀайиз, йиз адаш ва дада увухь уьрх.
4Дугъу дурар Муавдин паччагьдихьна хъади гъафи, ва дурар дугъахь, Давуд чан гъалайиъ имидикьан гагьди, яшамиш гъахьи. 5Амма Гад пайгъамбри Давуддиз гъапи:
– Гъалайиан удучӀв ва Ягьудайиз гъарах.
Гьаддиз Давуд Херет ярквраз гъушу.
6Гьадму арайиъ Саулиз дидкан аьгъю шулу: варишвариъ Давуддикан ва дугъан адмийирикан улхбар гъягъюрайи. Думуган Саул Гивайиъ айи, тепейиин али тамариск гьарикк, хлиъ жидара дибисну, дийигънайи чан везирарин арайиъ деънайи. 7Саули чалан илдицнайидариз гъапи:
– Хъебехъай, вениаминлуйир#22:7 Вениаминлуйир: Саул Вениаминдин тухумдиан, хъа Давуд Ягьудайин тухумдиан вуйи. Давуд паччагь гъахьиш, чан тухумдиан аьхюрар дерккрувал Саули кӀваин апӀура.! Белки, Ессейин бали учвуз хутӀлар ва тӀумтӀин багълар тувур, учву чан кьушмиъ агъзрарин ва варжарин аьхюдарди дерккур? 8Рябкъюрайиганси, гьаддиз учву вари узуз къаршу жини йикьрариъ учӀвунчва, ва сарира йиз бай Ессейин балихъди йикьрариъ айиваликан узуз улихь ккимиди гъапундарчва? Учвкан сарра йиз гъайгъушнаъ гъахьундарчва ва сарира йиз бали йиз лукӀ узуз тӀапӀар дивуз алаурайиваликан улихь ккимиди хабар дебккундарчва!
9Паччагьдин багахь хьайидарин арайиъ дийигънайи Эдумдиан вуйи Доэгди жаваб туву:
– Узуз гъябкъюнзуз, Ессейин бай Нов шагьриз, Ахимелехдихьна, Ахитувдин балихьна, фици гъафнуш. 10Ахимелехди РАББИЙИХЬАН, Давудди фу дапӀну ккундуш, гьерхнийи. Дугъу думу ипӀрубдихъди тямин гъапӀнийи, дугъахьна филистим Голиафдин тур тувнийи.
11Саули чахьна Заанурин гъуллугъчи Ахимелехдиз, Ахитувдин бализ, ва дугъан Новдиъ Заанурин гъуллугъчйирди айи вари багагьлуйириз дих гъапӀнийи. Паччагьдихьна вари гъафиган, 12Саули гъапи:
– Хъебехъ, Ахитувдин бай.
Тугъу жаваб туву:
– Ав, йиз жанаби.
13Саули гьерху:
– Уву Ессейин балихъди узуз къаршу жини йикьрариъ гьаз учӀвунва: гьаз дугъаз ипӀруб, тур тувунва, дугъхъанди Заануриз гьаз ккарагунва, думу гьамус узуз къаршуди удучӀвбан ва дугъу узуз тӀапӀрар гьязур апӀбан бадали?
14Ахимелехди паччагьдиз жаваб туву:
– Яв багахь хьайидарикан, Давудси, увуз фуж вафалу ву? Думу паччагьдин язна, яв ужубсиб кьушмин кӀулиъ айир ву, ва дугъаз яв хулаъ гьюрмат а. 15Думу бадали Заануриз узу гъи сабпи ражну ккарагнийинхъа? Ваъ, гъит паччагьди я яв лукӀрак, я йиз вари тухмарик жиниди йикьрар апӀбан тахсир кидрипри, гьаз гъапиш яв лукӀраз жини йикьрарикан фукӀа мялум дар.
16Паччагьди гъапи:
– Уву йикӀну ккунду, Ахимелех, увура яв вари мирасарра, саркьан имдарди.
17Ва паччагьди учв уьрхюрайидариз гъапи:
– Гъарахай, РАББИЙИН, Заанурин гъуллугъчйир йивну йихай. Дурар Давуддихъанди ву, гьаз гъапиш дурариз думу гьергуб аьгъяйи, хъа узуз дидкан хабар дебккундар.
Амма паччагьдин гъаравашари РАББИЙИН, Заанурин гъуллугъчйириина хил за апӀуз кӀул ккивундайи. 18Паччагьди Доэгдиз гъапи:
– Гъарах ва Заанурин гъуллугъчйир йивну йикӀ!
Эдумдиан вуйи Доэг гъушу, ва дугъу Заанурин гъуллугъчйир йивну гъакӀи. Думу йигъан дугъу гинбин ирин улгьани#22:18 Гинбин ирин улгьани: Заанурин гъуллугъчийи алабхьрударикан саб. гьабхъру миржцӀурна хьур кас йивну гъакӀнийи. 19Заанурин гъуллугъчйирин шагьур вуйи Новдин вари агьалйир турихъди гъурккнийи, я жилариз, я дишагьлийириз, я бицӀидариз, я никкдихъ хъайидариз, я йицариз, я дажйириз, я марччариз рягьим дарапӀди. 20Анжагъ Авиатар, Ахитувдин бай Ахимелехдин баярикан сар, къутармиш гъахьнийи; думу гьергнийи ва Давуддик ктикьнийи.
21Авиатари Давуддиз Саули РАББИЙИН, Заанурин гъуллугъчйир йивну йихуваликан ктибтнийи.
22Давудди Авиатариз гъапи:
– Узуз гьадму йигъантӀан душваъ ади гъахьи Эдумдиан вуйи Доэгди Саулиз варибдикан ктибтруб аьгъяйзуз. Яв вари мирасарин аьжлин тахсиркар узу вуза. 23Узухь гъуз ва гучӀ мапӀан. Узу йивну йикӀуз ккунириз увура йивну йикӀуз ккунду, хъа узухь уву хатӀасузвалиъ хьидива.
© Институт перевода Библии, 2010, 2013, 2016, 2018, 2023