Ebl 11
11
'Lɩsaa ‑glɩa 'lɛ pɔɔtɛtɛ bha?
1Pɔɔtɛtɛ ‑glɩ ‑awobhaa nclɔɔ ‑ka 'lɛ le ɩmɩa ɔ 'tɛlɩ 'lɛ pɔlɛ 'kʋ na, ɔ -kɩɩ tooto na. Ɛ ‑glɩ lʋʋa -ʋ gba 'lɛ 'nyɩ nclɔɔ cibhlili 'lɛ lɩɩa ɔla 'ci 'ta 'lɛ ‑jlɛ na. 2Ɛmɛ ‑ɛ gba 'lɛ 'nyɩ ‑godogodoncɛlɩa ya 'lɛ Laagɔ 'tʋpla.
3Pɔɔtɛtɛ ‑a ‑ka 'lɛ dɛ ‑a cibhlili 'lɛ lebhe Laagɔ 'la wɔɔnyɩtʋa ʋmʋ ‑ʋ nʋ 'lɛ ‑tɛtɛa 'fɩan. Ɩ pala lebhe lɩɩa ma ‑jlɛ 'lɛ na, ɩ 'wlʋlʋ lɩɩa ma 'ta 'lɛ ‑jlɛ na nɩkplaan.
4Pɔɔtɛtɛ Abɛlɩ ‑kaa 'lɛ dɛ ɔ ya 'lɛ ‑teyiyilʋʋa ‑ʋ zi 'lɛ Kayɛɛn 'nʋa 'kʋ na Laagɔ va. Ɛmɛ ‑ɛ gba 'lɛ 'nyɩ Laagɔ ya 'lɛ ɔla ‑danʋfʋɛ li lebhe ɔ ‑glɩ 'kʋnylugolunyɔ 'nyɩ ɔla ‑teyiyilʋʋa yɔɔ 'lɛ 'tʋpla. Abɛlɩ ya 'ku 'bhlɩɩ, ‑ma ɛmɛ gba 'lɛ 'nyɩ ɔ nyɩtɛ ka ‑azla 'lɛ.
5Pɔɔtɛtɛ Enɔkʋ ‑kaa 'lɛ, dɛ Laagɔ ‑sɔɔ 'lɛ ‑laagɔzɔan le ɔ 'la ka 'ku, 'nyɩ ma 'tanɩɔ 'lɛ 'lɩ, ‑ofi lebhe Laagɔ yaa 'mɔɔ ‑laagɔzɔan ‑sa. ‑Ma 'fɩɔn ɔ 'kɔɔ 'lɛ ‑laagɔzɔan ‑sa na, Laagɔ yaa ɔla ‑danʋfʋɛ li lebhe ɔ yɔɔ 'tʋpla. 6'Nyɩ nclɔɔ cɩ 'ta Laagɔ 'tʋpla, ɩ ‑ka ‑kʋ lebhe ɔ 'ta pɔɔtɛtɛ ‑ka na. ‑Masa, ɔmɔa ‑ɔ mɛ 'lɛ Laagɔ cɩ na, ɩ ‑fata lebhe ɔ kalɩ pɔɔtɛtɛ lebhe Laagɔ ‑kʋ, 'nyɩ ɔ plʋ maa ‑ɔ 'matɩɔ 'lɛ na dlu.
7Pɔɔtɛtɛ Nowee ‑kaa 'lɛ, dɛ daa Laagɔ zʋɔ 'lɛ flɩɩn 'nyɩ ɔ palɔɔ ɩmɩa ncɛlɩ 'la 'ci 'ta ka kaa 'lɛ ‑jlɛ na, ɔ ya 'lɛ Laagɔ wɔɔnyɩtʋa ɔla 'ciin 'la wɔlɩ la, 'nyɩ ɔ ya 'lɛ gɔlʋ tɛlɩ le ɔ 'kaa ɔla 'lɔlʋa gbʋʋnsa. ‑Sa ɔ ‑salɩ 'lɛ ‑laagɔzɔan 'ge, 'nyɩ ɔ ya 'lɛ 'kʋnylugolulɩɛa ma 'lɩlɩ 'lɛ pɔɔtɛtɛ nɩkplaan na ‑aja 'kʋ lili.
8Pɔɔtɛtɛ Ablaamʋ ‑kaa 'lɛ, dɛ ɔ ya 'lɛ Laagɔ 'la lalɩɛa neenŋonu, ɔ yɔɔ 'lɛ zʋ, 'nyɩ ɔ ya 'lɛ 'plɩ ɔ ya 'lɛ 'bhlɩ bhlo, ɔ cɩ 'kaa 'lɛ ‑aja 'kʋ lili na, 'kʋ mʋ. Ɔ ya mʋ, ‑ma ɔ 'taa daa 'titia ɔ mʋa 'lɛ na ‑ci. 9Pɔɔtɛtɛ ɔ ‑kaa 'lɛ, dɛ ɔ ya 'lɛ ‑dʋdʋa Laagɔ talɩa 'mɔɔ 'lɛ ‑ndanyɩ 'kʋ na, 'kʋ sakʋkan mʋ, lowlunyɔ 'bhisa, 'nyɩ ɔ ‑kʋa 'lɛ ‑paaplu ‑zɔn. 'Sɛtɛɛ bhlogbɩɩ ɩ 'plɩ 'lɛ Izakɩ ɩya Zakɔpʋ ‑ma, ‑ɔyɔɔsɔ 'wlalɩ 'lɛ ‑ndanyɩa 'kʋ na 'la gbazɔ. 10Sa ɔ ‑bɛa 'dua ʋla ‑gbidia ya 'lɛ 'nanɩ ‑gluu ‑zʋɔ, 'nyɩ Laagɔ 'titi ‑glɩ 'lɛ ʋla bunyɔ ɩya ʋla 'slanyɔ na.
11Pɔɔtɛtɛ Salaa ‑kaa 'lɛ, dɛ ɔmɔ ‑ma, ɔla kplɩɩplapla -nanɔa ya 'lɛ mino 'nyɩ ɔ ya 'lɛ valɩnɩkpla 'lɩ, ‑ofi lebhe ɔ ‑cia sɛɛ lebhe ma cɩ ‑ndanyɩa 'la tanyɔa ‑delikʋtɛbhalɩ. 12Ɩla gbʋ, dɛ nclɔɔa 'kwɩ ‑kʋanɩa 'lɛ cɩ na, ncaabhutukpa ya 'lɛ ɔmɔ bhlogbɩɩ nɩkplaan 'wlʋlʋ, 'nyɩ ma ‑zu 'lɛ le ‑laagɔɔn 'la ‑zɔlʋ, ɩya ‑gezɔn 'la 'nyonua maa cɩ 'ta 'lɛ zɛlɩlɩɛ mino na.
13Pɔɔtɛtɛa nɩkplaan, ncɛlɩ ‑naa ‑tɛtɛa 'kulu 'lɛ. Ma 'ta ‑ndanyɩa Laagɔ taa 'lɛ na 'lɩ, ɩ 'ka 'kʋglalɩ, ‑ma ma yɩɩ 'vʋʋn 'lɩlɩ 'nyɩ ɩ ya maa pɔlɛkʋmɛnɔ nʋ. Ma ya macɩ 'cla lebhe lowie ɩya 'plɩplɩnya ma ‑glɩa 'lɛ ‑dʋdʋa 'kʋ. 14Maa ‑ɔ nyɩtɛ 'lɛ ‑sa na, ka ma pala 'lɛ 'kpataa lebhe 'bhlɩa ‑ɩ ‑bhɔsʋa 'lɛ mala gbʋ na, ɩmɩ ma 'matɩ 'lɛ. 15'Nyɩ ma ‑ka kaa 'bhlɩa 'kʋa ma 'wlʋ 'lɛ na 'la wɔlɩ gugua na, ma yaanɩa 'yɛpɩ cɔlɔ. 16‑Nʋawlɛ nanɩ 'lɛ na, 'bhlɩa ‑ɩ nanɩ 'lɛ 'nyɩ ‑ɩ zi 'lɛ 'bhlɩa ‑tɛtɛa 'kʋ na, ɩmɩ ma 'matɩ 'lɛ, ‑laagɔɔn 'la bhlɩa ma 'matɩ 'lɛ. Ɩla gbʋ, dɛ ɩ 'ta 'lɛ Laagɔ ‑zo ‑ka le ncɛlɩ lɔɔ maa ‑naa 'la Laagɔ. Ɔ ya maa 'du bhlo bhɔsʋa.
17Pɔɔtɛtɛ Ablaamʋ ‑kaa 'lɛ, dɛ daa Laagɔ clɔɔ 'lɛ nɩkplaan na, ɔ ya 'lɛ Izakɩ ‑sa. Ɔla 'cʋa bhlogbɩɩa ɔ ‑kaa 'lɛ na, ɔmɔ ɔ ‑saa 'lɛ, 'bhlɩmɔɔn, Laagɔ yaa 'mɔɔ tooto ‑ndanyɩ ta 18'nyɩ ɔ yaa 'mɔɔ 'cla lebhe:
Izakɩ ‑n ‑cɩ ka 'lɛ 'kʋ 'plɩlɩ ɩya ‑n ka 'lɛ valɩnɩkpla 'lɩ.
19Ka Ablaamʋ claa 'lɛ ɔcɩ lebhe 'kuo 'titio, Laagɔ cɩ mino 'nyɩ ɔ cɩa 'kwɩɩnkʋbho. Dɛ Laagɔ calɔɔ 'lɛ ɔla 'cʋa le ɩ 'ka ghleda 'plɩ.
20Pɔɔtɛtɛ Izakɩ ‑kaa 'lɛ, dɛ ɔ palɩ Zakɔpʋ ɩya Esayuu 'nyu, wɔlɩa ‑ɩ ‑bɛlɩa 'lɛ maa 'kʋklʋʋn na ɩla gbʋ.
21Pɔɔtɛtɛ Zakɔpʋ ‑kaa 'lɛ, dɛ daa ɔ 'kaanɩa 'lɛ 'ku na, ɔ ya 'lɛ Zozɛfʋ 'la 'cuoa, nclɔɔ nclɔɔ 'nyupalɩ, 'nyɩ ɔ ya 'lɛ ɔla ‑kpamaa 'kʋ 'wlusagɩ 'nyɩ ɔ ya 'lɛ Laagɔ gʋgwla.
22Pɔɔtɛtɛ Zozɛfʋ ‑kaa 'lɛ, dɛ daa ɔla 'kuda mɛanɩa 'lɛ cɩ na, ɔ ya 'lɛ Izlayɛlɩnyaa* 'la Ejibhitibhlɩa 'kʋ la 'wlʋwɔlɩa nyɩtɛ 'nyɩ ɔ ya 'lɛ maa saa ma cɩ 'kaa 'lɛ ɔla 'kɔa nʋnʋnʋ na ɩla wɔlɩa solu.
23Pɔɔtɛtɛ Moyizi 'la valɩnyaa ‑kaa 'lɛ, dɛ daa ma valɩɔ 'lɛ na, ma 'ta 'lɛ ‑jlɩmaa nyɩbhɛlʋa zʋ 'lɛ na 'gulu, 'nyɩ ma yɔɔ 'lɛ zizie ‑aan 'cɩ ‑mɔta, sa ma yaa 'lɩ lebhe mala 'cʋa nanɩa na.
24Pɔɔtɛtɛ Moyizi ‑kaa 'lɛ, dɛ daa ɔ ‑glɛɛ 'lɛ na, ɔ 'tanɩ 'lɛ wabha lebhe ma laanɩa 'mɔɔ Ejibhitibhlɩa 'la ‑kwletoa ‑nyɔŋlɔa 'la 'cʋ. 25Ɔ ya ŋonu le ɔ 'ka 'lɛ liowli ‑zlʋsaasa nɩkplaan nyinyi 'la pɔlɛkʋmɛnɔ li na, ‑afalɩma 'naa ma ‑sa ɔya Laagɔ 'la 'lɔlʋa gbaylɩ. 26Ɔ ya 'lɩ lebhe Klisi 'la sʋkpʋɛa ‑glɩ 'bhɛlɩa ‑ɩ zi 'lɛ Ejibhitibhlɩa 'kʋ 'la gbakabhalɩɩa 'kʋ na, sa ɔla 'cia ‑kʋa dluuplʋlɩɛ 'kʋ.
27Pɔɔtɛtɛ ɔ ‑kaa 'lɛ, dɛ ɔ 'ta 'lɛ nyɩbhɛlʋa 'la dɔgbɛa 'gulu, 'nyɩ ɔ ya 'lɛ Ejibhitibhlɩa 'kʋ 'wlʋ. Ɔ ya kpaan 'nylugo le nclɔɔa ‑ɔ ‑jlɛ 'lɛ ɔmɔa maa 'lɩ 'ta 'lɛ na.
28Pɔɔtɛtɛ ɔ ‑kaa 'lɛ, dɛ ɔ gba 'lɛ ma ya geyliinwlʋfɛtlɩa* li, 'nyɩ ma ya 'lɛ mla 'la ‑dolu gbinia 'kʋ 'moni, le danyumonyɔa 'la ka Izlayɛlɩnyaa 'la ‑bɛka -ciŋodicuoa 'bhla.
29Pɔɔtɛtɛ Izlayɛlɩnyaa ‑kaa 'lɛ, dɛ ma 'tɔ 'lɛ ‑gezalɛa, le saa ma 'plɩlɩa 'lɛ ‑dʋdʋsʋsʋɛ 'kʋ na, 'nyɩ daa Ejibhitinyaa mʋ 'lɛ maa dɩbalɩkan na, maa 'fɩan ya 'lɛ gea nɩkplaan ‑gbɩɔlʋ.
30Pɔɔtɛtɛ Izlayɛlɩnyaa ‑kaa 'lɛ, dɛ daa ma bi 'lɛ Zelikoodua 'la ‑gbidia ‑aan clɩɩ ‑ngbɔɔsɔ na, ɩ ya 'lɛ bhli. 31Pɔɔtɛtɛ ‑badaagluliŋlɔa ma laa 'lɛ Ghlaabʋ na ‑kaa 'lɛ, dɛ ɔya Laagɔ 'la gbatlɩmʋnʋnyaa 'ta 'lɛ nebhlo 'kulu, sa ɔ yaa ncɛlɩa ‑ɔ mʋa 'lɛ 'dua dɩdɛkan na 'nanɩ kla na.
32'Nyɩ wɔɔsaa n cɩ 'kanɩ ‑awlɛ 'lɛ nyɩtɛ bha? 'N 'ta ne ‑ka ɩya n 'ka Zedeɔɔn, Balakɩ, Samʋsɔɔn, Zɛfʋtee, Daviti, Samɩɛlɩ ɩya Laagɔnekʋnyɩtɛnyaa 'la wɔlɩa zɛlɩ. 33Maa ‑naa ‑ɔla pɔɔtɛtɛ ya 'lɛ gba, 'nyɩ ‑ɔ ya 'lɛ nyɩbhɛlɩdi ‑sɩa, ɔ ya 'lɛ 'kʋnylugolulɩɛ nɩkplaan namʋnʋ, ‑ɔ ya 'lɛ ɩmɩa Laagɔ talɩ 'lɛ ‑ndanyɩ 'kʋ na 'lɩ, ‑ɔ ya 'lɛ ‑bhedicɩ 'la ni kpaslɩlɩ, 34‑ɔ ya 'lɛ ‑kosu ‑gbagbalu ŋomu, ‑ɔ 'ta 'lɛ lɛtɛ neen 'kulu, ‑ɔ ya 'lɛ guun 'wlʋ 'nyɩ ‑ɔ ya 'lɛ 'tɛtɩ 'lɩ, ‑ɔ ‑ka 'lɛ tavʋtɛtɩ, 'nyɩ ‑ɔ ya 'lɛ lowlubhlɩ 'kʋ 'la tavʋkandi ‑sɩa na. 35Pɔɔtɛtɛ 'ŋwlɛ ‑anʋa ‑kaa 'lɛ, dɛ ma ya 'lɛ mala ncɛlɩa ‑ɔ 'kua 'lɛ na 'lɩ, ma ya 'lɛ 'kwɩɩnkʋbho, 'nyɩ ma ya 'lɛ maa maa 'nyɩnɩ. 'Nyɩ ncɛlɩ ‑anʋa ya ŋonu le ma cɩ gbaylɩsalɩɛ 'lɩ, 'nyɩ ma 'taa ŋonu le ma saa maa gbʋʋn, ɩya ma 'ka 'kwɩɩnkʋbhuea ‑ɛ zi 'lɛ 'dɛ 'la gbʋʋnsalɩɛa 'kʋ na 'lɩ. 36Ma ya ‑anʋa 'kʋkɔtɔlʋ, ma ya ‑anʋa ‑ngblieen bhutili, ma ya ‑anʋa gʋa, 'nyɩ ma ya ‑anʋa ‑palʋʋn 'pa. 37Ma ya ‑anʋa cɔkʋ vʋ, ma ya ‑sukusuku 'ma 'nyɩ ma ya ‑anʋa kli ‑mɔsɔɔn 'dɩ, ma ya lɛtɛ 'ma, ma ya ‑anʋa 'bhla. Ncɛlɩ ‑naa -plaa 'bhlabhlɩ ‑aana wli 'la kwi nɩkplaan, 'nyɩ ma plɩa 'lɛ ‑leke ‑leke. Ma ‑miea lɩɩa ‑tɛtɛa, ncɛlɩ ‑kʋlʋa maa 'kʋ, ma saa maa gbaylɩ, 38maa ‑naa ‑laagɔzɔan ‑ya maasɔ 'taa 'lɛ ‑fata na. Ma plɩa ‑leke ‑leke 'pʋpʋa nɩkplaan ɩya 'kikia 'wlu, ma pʋlʋa cɔkʋ 'la kofuun ɩya 'bhukwiin.
39Maa ‑naa ‑tɛtɛa, Laagɔ li mala ‑danʋfʋɛ 'nanɛ mala pɔɔtɛtɛa 'la gbʋ 'bhlɩɩ, ‑ma ma 'ta ‑ndanyɩa ɔ ta 'lɛ na 'lɩ ɩ 'ka 'kʋglalɩ. 40‑Masa Laagɔ yaa 'lɛ ɩmɩa ‑ɩ zi 'lɛ ma 'nɩa 'kʋ na, ‑ala gbʋ bhɔsʋa na, ‑ndanyɩa cɩ 'taa ‑ala leen 'kʋglalɩlɩɛ mino.
Àwon tá yàn lọ́wọ́lọ́wọ́ báyìí:
Ebl 11: NTLD13
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.