Luka 24
24
Okhusisimukha khwa Yesu
(Mat. 28.1-10; Mrk. 16.1-8; Yoh. 20.1-10)
1Khulutalo lwamberi olwechuma, mumaweriweri, avakhasi avo vachia enasirindwa nivakingire esing'ari esivali nivacheresise. 2Ne vanyola ekina nilikolongomiswe aleyi nesirindwa, 3olu vengira mukachi sivawona omuviri ta. 4Olu vali nivasiwuka khukhuwa lino, wona, avanju vaviri avefwaye enguo ching'inang'ina, vema aambi navo. 5Avakhasi avo vava nowuchi, venama aasi. Avanju avo vavawolera, “Esikira sina mutakhatakha omulamu muvafu? 6Khewulire nga kavawolera olu kali nasiri Galilaya, 7mbo Omwana womunju okhwola aanwe mumakhono kavanju voni, navo vamuvambe nendalo yakhatachu achia okhusisimukha.”
8Awenao vechulira amakhuwa kake, 9Vachula enasirindwa, vawolera avachumwa ekhumi na mulala nende avalondi vandi kano kosi. 10Khanu kali Maria Magdalena, Yoana nende Maria mayi wa Yakopo, alala nende avakhasi vandi avalondana navo njavawolera avachumwa amakhuwa ako. 11Nausa amakhuwa kano kawonekhana khunivo ngakawuma owung'ali, khanu sivasuvira ta. 12Petero kachekukha, katima embiro okhuchia khusirindwa. Olukenama okhulengera mukachi, kawona wusa esanda yong'ene. Kakoola engo nawuka khukali nikekholekhire.
Olukendo Okhuchia Emau
(Mrk. 16.12-13)
13Olutalo lwenolwo, vaviri khuvalondi va Yesu vali vachia musikwenyi silala esilangwa Emau, owuleyi wa ekilomita ekhumi na ndala okhuchula Yerusalemu. 14Vali valomaloma khwako kosi akali nekekholekhire. 15Olu vali nivalomaloma nokhuwolana, Yesu mwene kachulira, kakenda alala navo. 16Nausa emoni chiawe sichiamumanyirisa ta.
17Kavacheva, “Mbakha sina eyimulosa nimukenda yino?” Navo vema vawulera chii, nivavereye. 18Mulala, olangwa Kleopa, kamuchipa, “Niwe omukeni weng'ene Yerusalemu okochiswe akekholekhireyo endalo chino?” 19Naye kavachipa, “Makhuwa sina?” Navo vamuchipa, “Amakhuwa kamunyola Yesu wa Nazareti. Niye kali omunabii oli nowunyali muvikhole nende mukhuwa emberi wa Nyasaye nende emberi wavanju vosi. 20Nga avakuhani vakhongo nende avachuki vamuyira kakhalakirwa efwa, vamuvamba. 21Nausa efwe khwali khwasuvira mbo njowakhananuye Israeli. Okhuvicha khukenako kosi, nyingayino lutalo lwa khatachu okhuchula amakhuwa ako nikekholekha. 22Nundi, avakhasi vomukanda kwefwe vachuwukisie. Vavaye khusirindwa mumaweriweri, 23ne sivanyoye omuviri kukwe ta. Vakoola vawola mbo engelosi yivawonekheye yavawolera mulamu. 24Valala khwavo avali nafwe vachiye enasirindwa, ne vanyola ngavakhasi vavaye nivawoye, nausa niye sivamuwene ta.”
25Yesu kavawolera, “Enywe avanju vasiru, avemioyo emisicho ekichasuvira kosi akavanabii vawola! 26Sikenyekhana Kristo anyaswe nende evinju vino ta, ne kengire muwukhumi wuwe?” 27Okhwanjira khu Musa nende avanabii vosi, kavachera awulafu mumaandiko evinju viosi evilondana ninaye. 28Olu vola aambi nende esikwenyi esivali nivachiamo, Yesu kava ngochianakana nolukendo. 29Nausa nivo vamwesaya nivawola, “Yikhala alala nafwe, njie wirire, nesiro siolire.” Khanu, kengira, kekhala alala ninavo. 30Olu kali aamesa ninavo, kawukula omukati, kakuanira ekhavi, kakumekula, kavaweresa. 31Emoni chiawe chiamala chiekukha, vamumanya, ne niye kakhamiukha akachi wawe. 32Vawolana avene khuvene, “Koo, emioyo kiefwe sikitundumire mukachi mwefwe olu avaye nalomaloma khwifwe khungira, ngachufunukhuliyenge akaandikwa?” 33Vachekukha evise evio, vakoola Yerusalemu, ne vanyola avachumwa ekhumi na mulala nivakhung'anire alala nende avavali navo, 34vamala vavawolera, “Omwami asisimukhire ng'ali yene, awonekheye Simoni.” 35Khanu, avalondi vaviri avo vavawolera akekholekhire khungira, ne nga vamumanyirisise mukhumekula omukati.
Yesu Awonekhera Avalondi Vave
(Mat. 28.16-20; Mrk. 16.14-18; Yoh. 20.19-23; Evikh. 1.6-8)
36Olu vali nivavawolera ako, Yesu mwene kema akachi wawe, kavawolera “Omulembe kuve nanywe.” 37Vesindukha nokhutirwa nowuchi vapara mbo vawene esisieno. 38Kavawolera, “Esikira sina nimuenda? Nundi esikira sina nimuva namacheva mumioyo kienywe? 39Wone amakhono kange namakulu kange, mbo nise samwene. Ndirekho muwone, esikira esisieno siwuma omuviri namakumba nga mumbona.”
40Olu kamala okhuwola ako, kavekesa amakhono kake nende amakulu kake. 41Olu vali nivachasuvira esikira owusangafu, nivawuka kavacheva, “Mulikho nesiokhulia siosisiosi ano?” 42Vamuwa esitonye sieng'eni endekhe. 43Kawukula, kalia emberi wawe. 44Khanu kavawolera, “Kano njamakhuwa kange aka navawolera, olunali nisiri nanywe: Mbo siawuli sinju siaandikwa khwise mumalako ka Musa nende avanabii nende mu saburi okhwola kekholekhe.”
45Khanu kekula enganakani chiawe vave nivamanya amaandiko, 46kavawolera, “Kho kaandikwa, mbo Kristo achia okhunyaswa nendalo yakhatachu achia okhusisimukha okhuchula muvafu. 47Mbo eliekanira nende esilekhero siowoni virwachwe mulicha lilie khumaanga kosi, okhwanjira Yerusalemu. 48Enywe muli avaloli vamakhuwa kano. 49Njuma omulako kwa Papa khwinywe, nausa tong'e mwitookho, okhwola nga muchiakhunyola owunyali okhuchula amukulu.”
Yesu Akulukha Mwikulu
(Mrk. 16.19-20; Evikh. 1.9-11)
50Khanu kavachusa erwanyi wetookho okhwola Bethania, kakingula emikhono kikie amukulu kavaanira ekhavi. 51Olu kali nikakhavaanira ekhavi, kavalekha; kawukulwa mwikulu. 52Vakoola Yerusalemu nowusangafu owukali: 53Vachianakana mu Etemperi nivafumia Nyasaye.
Àwon tá yàn lọ́wọ́lọ́wọ́ báyìí:
Luka 24: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024
