Nwoŋim 8
8
2. Nanchane
1 Baŋa Wɛ déem ma ta de Moses o we, “Véi n ta Ejipti Pɛ wom we, ‘Baŋa Wɛ ni dem mo tento:
Pa a nɔɔna bam chwoŋa se ba viiri se ba taa wae ba zuli-ne. 2Nmo nam ná ve, ta‑n yei we amo wó pa se nanchane puli se su nmo logo kom jei maama se daane abam. 3Nanchane sem wó tiini se puli se su Naili buga kam maama. Se laam maa wó daare se zo Pɛ sɔŋɔ wone, ko ná ye nmo tete diga de n peiga jei mo de. Se ta wó zo nmo nakwa bam de sam ne, de teo kom sam maama ne. Se ta wó vo se peini á kaligwonnu wone, de á maasa fɔgem zwe sem wone. 4Nanchane sem lage se taa faŋe mo se taa diini nmo tete de n nakwa bam de n nɔn-bia bam maama baŋa.’ ”
5 Baŋa Wɛ laam ma ta de Moses o we, “Ta de Aron se o twe o nacheiga kam na wo o jeŋa ne to se ko jeeri bwi sem, de nabare sem, de chwaro tem maama. Konto ná kea, nanchane wó nwoŋi bwi sem wone se faare Ejipti tega kam maama.” 6Aron ma seene o twe o jeŋa o jeeri na bam na tigi Ejipti jei selo maama ne to. Nanchane ma nwoŋi na bam wone se faare Ejipti tega kam maama. 7Ejipti liri-keira bam de ma kwei ba liri kikia ba lwoni ba ke konto dwoŋi, pa se nanchane sedwonna de nwoŋi tega kam baŋa ne.
8Ejipti Pa-faro wom ma toŋe o bwoŋi Moses de Aron ye o ta de-ba o we, “Lwoori-na Baŋa Wɛ se o pa se nanchane sem lage jei se daare amo de a nɔɔna bam. Ke-na konto se amo de pa abam nɔɔna bam chwoŋa se ba vo ba ke kaanem ba pa Baŋa Wɛ.” 9Moses ma leiri Pɛ wom o we, “Tɔ, nam da yiga n ta n bere-ne maŋa kalo n na lage se a lwoori Wɛ a pa nmo de n nakwa bam de n nɔn-bia bam maama to. Amo laam wó lwoori Wɛ se o pa nanchane sem jei nmo de n nɔɔna bam sam ne. Se laam wó taa wo Naili buga kam wone yerane mo.” 10Pɛ wom ma leiri‑o o we, “Jwa ne se n ke konto.” Moses ma ta o we, “Nmo nam na tage tei to mo wó toŋe, se nmo ma n lɔre we debam Tu Baŋa Wɛ ba jege dwoŋi. 11Nanchane sem wó seene se viiri mo se daare nmo, de n nakwa bam, de n nɔn-bia bam, de abam sam dem maama. Se laam wó maŋe Naili buga kam wone yerane mo.”
12Moses de Aron ma nwoŋi da Pɛ wom tei ne. Moses déem ma lwoori Baŋa Wɛ nanchane sem ŋwaane, de o na pɛ se zaŋe se daane Pɛ wom to. 13Baŋa Wɛ ma sɛ Moses wɛ-lworo kom, ye o pa se nanchane sem te. Selo déem na wo Ejipti tiina di sem wone, de ba konkwallo tem wone, de ba kadwi sem ne to maama ma te. 14Ejipti tiina bam ma chwooli-se ba tiŋi pwoa dedɛ. Teo kom maama déem chɛ mo de nanchane sem lwom. 15Se ko ná ye Pa-faro wom, o déem na maane we nanchane sem daa ba daane-ba to, mo o daa ta pɛ se o bochare dana. O daa ta wo sɛ se o cheigi Moses de Aron taane dem, ne Baŋa Wɛ na maŋe o ta we ko wó taa ye tei to.
3. Yeena
16 Baŋa Wɛ déem ma ta de Moses o we, “Ta n bere Aron se o twe o nacheiga kam o ma mage tega kam, se Ejipti tega kasolo kom maama ji yeena.” 17Ba ma sɛ. Aron ma twe o jeŋa o mage tega kam de o nacheiga kam. Yeena ma zaŋe ba meeli nabiina de vara maama. Ejipti teo kom ni maama kasolo déem ma ji yeena. 18Ejipti liri-keira bam de ma kwei ba liri kikia ba kwaane se ba lwoni ba pa se yeena ba, ye ba ga ko ŋwa. Yeena yam déem faare teo kom maama mo. 19Liri keira bam ma ta de Pa-faro wom ba we, “Wɛ keim mo tento.” De konto maama de, Pɛ wom bochare daa taa dana mo, ye o wo sɛ se o cheigi-ba. Baŋa Wɛ nam maŋe o ta we ko wó taa ye konto mo.
4. Zɔɔro
20 Baŋa Wɛ déem ta ma ta Moses o we, “Zaŋe zezeŋa ne n vo n che Pɛ wom chwoŋa maŋa kalo o na maa vei buga kam ni to. Laam ta ded‑o we, ‘Baŋa Wɛ ni dem mo tento:
Pa amo nɔɔna bam chwoŋa se ba viiri, se ba vo ba zuli-ne. 21Nmo nam ná wo pɛ-ba chwoŋa, amo wó toŋe zɔɔro dedɛ se te daane nmo, de n nakwa bam de n nɔn-bia bam maama. Zɔɔro wó su á sam, ye te faare Ejipti tega kam maama. 22Se ko ná ye amo tete nɔɔna bam ba na zoore Gosen laŋa kam ne to, zɔɔro bá taa wo banto jei sem ne.#Pulim 47:4 Amo ná tiŋi popɔra kam konto, abam wó ma á lɔre we amo Baŋa Wɛ mo toŋe a totoŋa tega baŋa ywo-seeni. 23Amo wó pa popɔra kam peini amo nɔɔna bam de abam nɔɔna bam tetare ne. Jwa ne mo amo wó ke wo-kenkagele dem konto.’ ”
24 Baŋa Wɛ déem ma seene o toŋe zɔɔro dedɛ o yage Pɛ wom sɔŋɔ ne, de o nakwa bam sam ne. Te déem tiini te chɔge Ejipti teo kom maama. 25Pa-faro wom ma bwoŋi Moses de Aron ye o ta-ba o we, “Véi-na á kaane á pa á Wɛ wom debam teo konto ne ywo.” 26Moses ma leiri‑o we, “Konto bá wane. Debam na wó kwei vara dwi delo dé ma dé ke kaanem dé pa dé Tu Baŋa Wɛ to mo chula Ejipti tiina bam tei ne. Debam nam ná lage dé ke kaanem dem ye ba na debam, ba wó dole debam de kandwa mo ba go. 27Debam wó kwei da yatɔ mo dé maa zo kagoa kam wone dé ke kaanem dáane dé pa dé Tu Baŋa Wɛ. O ni dem konto mo o pɛ debam.”
28Pɛ wom de laam ma ta o we, “Tɔ. Amo wó pa abam chwoŋa se á zo kagoa kam wone á kaane á pa abam Tu Baŋa Wɛ. Se á yé véi-na yiga yiga. Nam lwoori-na Wɛ á pa amo.” 29Moses ma leiri‑o o we, “Amo ná yɔɔre a nwoŋi ywo-seeni, a lage a lwoori Baŋa Wɛ mo. Jwa ne zɔɔro tem wó yage abam yera, Pɛ wom de o nakwa bam de o nɔɔna bam maama. Pɛ, nam ta‑n yei se n daa‑n yé gane debam. Nam yé che nɔɔna bam se ba vo ba ke kaanem ba pa Baŋa Wɛ.”
30Moses déem na nwoŋi o daare Pɛ wom to, o vei o lwoori Baŋa Wɛ mo. 31Baŋa Wɛ ma sɛ Moses kwora kam. O déem ma pa se zɔɔro tem yage Ejipti Pɛ wom, de o nakwa bam, dedaane o nɔn-bia bam maama. Zɔɔ dedoa tete déem daa wo daare da. 32Pɛ wom daa ta ma pa se o bochare dana. O ma ve se o pa nɔɔna bam chwoŋa se ba viiri.
Àwon tá yàn lọ́wọ́lọ́wọ́ báyìí:
Nwoŋim 8: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)