Nwoŋim 10
10
8. Kayere
1 Baŋa Wɛ ma ta Moses o we, “Jwoori n vo Ejipti Pɛ wom tei. A nam pɛ se o de o nakwa bam bochara dana mo, se a wane a da ko baŋa ne a ke wo-kenkagela yanto se ba na. 2Ko ta wó pa se abam jwa lwoni á bere á bia dedaane ba de bia, se ba lɔre amo na ke tei a waare Ejipti tiina bam de wo-kenkagela yalo a na ke ba tetare ne to. Abam maama laam wó lɔre we amo mo ye Baŋa Wɛ.”
3Moses de Aron déem ma vo Ejipti Pɛ wom tei ba ta ded‑o we, “Baŋa Wɛ na ye Hiburu tiina bam Wɛ wom to ni dem mo tento:
Nmo wó ve se n gwooni n tete amo yiga ne taa se n vo n maŋe yei ne mo? Pa a nɔɔna bam chwoŋa se ba viiri se ba taa wae ba zuli-ne. 4Nmo nam ta ná ve se n pa-ba pwola, amo wó pa se kayere jwa ba se daane n teo kom. 5Kayere sem lage se meeli jei maama mo, pa se abam daa bá taa nae tega kam. Se maa wó deilimi woŋo kolo maama ta na daare ye do-kandwa yam wo chɔge-ko to, ko woli de teeni delo maama ta na nwoŋi á tega kam ne to. 6Se lage se meeli á sam maama mo, nmo tete sɔŋɔ kom, de n nakwa bam sam dem, de n nɔn-bia bam sam dem maama. Ko na zege á nabaara maŋa ne se ko yi zem to, kayere dwi dem konto ta wo fɔge se yo á teo kom ne.”
Moses laam ma pipiri o nwoŋi o daare Pa-faro wom.
7Pɛ wom nakwa bam ma ta ded‑o ba we, “Dɛ dɔ mo nɔɔno wonto wó sɛ o yage yi-gigilu kolo o na jege o ke dé yera ne to? Nam pa nɔɔna bam chwoŋa se ba vo ba zuli ba Tu Baŋa Wɛ. Nmo ta wo maane we dé teo kom maama chɔge nɔɔno wonto ŋwaane mo na?” 8Ba ma bwoŋi Moses de Aron se ba jwoori ba ba Pɛ wom tei. O ma ta-ba o we, “Tɔ, chwoŋa laam wora se á vo á zuli á Tu Baŋa Wɛ. Se abam bera mo wó tɔge ba vo?” 9Moses déem ma leiri o we, “Debam maama mo wó vo. Ko wó taa ye dé nɔn-donno dedaane nɔn-kwe maama, ko woli de dé bu-baara dedaane dé bukwa maama. Dé ta wó kwei dé bone, de dé pei, dedaane dé naane dem maama. Kokuri to, dáane mo dé jege se dé vo dé di kuri dé zuli Baŋa Wɛ.” 10Pɛ wom ma ta o we, “Baŋa Wɛ seene o wó taa wo á tei ne mo nenɛɛne amo ná sɛ se abam kaana de á bia bam tɔge ba vo! Tento yɔɔre ko bere we á boŋe se á ke lwarem mo. 11Ko bá ke! Abam na lwoori chwoŋa se á vo á zuli Baŋa Wɛ to, á baara bam yerane mo wó vo.” Ba déem ma zeili Moses de Aron se ba nwoŋi da Pɛ wom yiga ne.
12 Baŋa Wɛ ma ta de Moses o we, “Zeiŋi n jeŋa n jeeri Ejipti teo kom baŋa, se kayere sem laam ba se meeli jei maama se deilimi ga-zuru dwi maama ta na wo tega kam ne ye do-kandwa yam wo chɔge to.” 13Moses ma zeiŋi o nacheiga kam o jeeri Ejipti teo kom baŋa. Dɛ dem konto ne mo Baŋa Wɛ déem pɛ se vio nwoŋi wɛ-puli seeni ko ba ko jeeri logo kom. Ko déem dole wea de tete maama mo. Tega déem na jege ka poore to, de vio kom jaane kayere sem ko ba. 14Se kɔgɔ déem tiini se gaale dedɛ, ye se meeli teo kom tega kam maama. Ejipti tiina ta wo fɔge ba na kayere sem konto dwi. Se dwi dem konto de daa bá ba kɔtaa. 15Kayere sem déem ma kwoli tega kam maama pa se ka zwori ligi-ligi. Se ma di kolo maama do-kandwa yam na daare to. Ko maa ye teeni-bia maama, de ga-zuru, de ba kare wodiiru maama mo. Ejipti wone kolokolo déem daa wo daare ye ko jege zurim.
16Pa-faro wom ma ke lela o toŋe o bwoŋi Moses de Aron ye o we, “Amo tusi abam yiga ne de á Tu Baŋa Wɛ wom yiga ne. 17Nam yage-na a tusim dento á ma á chɛ-ne, se á daare á lwoori á Tu Baŋa Wɛ se o pa se cham dento kɛ dáa se a sii.” 18Moses ma nwoŋi Pɛ wom tei ne ye o vo o lwoori Baŋa Wɛ. 19Baŋa Wɛ ma pa se vo-dɛɔ kom pipiri ko nwoŋi Wɛ-zoore seeni. Ko ma dole ko kale kayere sem maama ko ja ko vo ko yage Nane-soŋo kom ne. Kayera dedoa tete déem daa wo daare Ejipti teo kom ne. 20Baŋa Wɛ déem daa ta ma pa se Pa-faro wom bochare dana mo. O ma ve se o pa Isarele tiina bam chwoŋa se ba viiri.
9. Lim
21 Baŋa Wɛ déem ta ma ta de Moses o we, “Twe n jeŋa n yɔɔre wɛyuu ne se lim ba de kwoli Ejipti tega kam baŋa maama. Lim dem wó tiini de zo nɔɔna bam yera.” 22Moses ma twe o jeŋa o yɔɔre wɛyuu ne. Ejipti tega kam baŋa maama ma tiini ka ke lim, se ko maŋe de da yatɔ. 23Kanto maŋa kam ne, Ejipti tiina bam déem daa ba nii ba nae da-jei. Nɔɔn-nɔɔno maa ware se o nwoŋi o sɔŋɔ ne o vo jei jei. Se ko ná ye Isarele tiina bam na zoore mɛ to, pwooni déem mo wora jei sem konto ne.
24Ejipti Pɛ wom déem ma bwoŋi Moses ye o we, “Chwoŋa laam wora se á vo á zuli á Baŋa Wɛ wom. Abam bia de á kaana wó wane ba tɔge ba vo. Nam yage-na á vara bam ywo se á vo.” 25Moses ma leiri o we, “Nmo jege se n yage chwoŋa mo se dé ja vara bam dé vo dé ma ke kaanem, ye dé zwɛ-ba dé pa debam Tu Baŋa Wɛ. 26Dé wó ja dé vara bam maama mo dé woli da dé vo. Varem dedwe tete bá daare Ejipti tega kam baŋa ne. Debam jege se dé kuri kaanem vara mo se dé taa mae dé zuli dé Tu Baŋa Wɛ. Dé ná wo yi jei sem, dé bá lɔre varem de varem wolo dé na wó le dé ma ke kaanem dé pa Baŋa Wɛ to.”
27 Baŋa Wɛ ta ma pa se Pa-faro wom bochare dana mo. Pɛ wom déem wo sɛ se o pa Isarele tiina bam chwoŋa se ba viiri. 28O ma ta de Moses o we, “Lage jei da amo yiga ne! Nam fɔge n nii n yuu ne, se dɛ dem nmo daa na wó jwoori n ba amo yiga ne to, n lage n te mo.” 29Moses de ma leiri o we, “Dé nam zege n kwora kam kwaga ne. Nmo seene n daa‑n bá‑n na amo.”
Àwon tá yàn lọ́wọ́lọ́wọ́ báyìí:
Nwoŋim 10: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)