Geenesis 2
2
1Jiya cajiniocuani, nio jiyacuajuhuaj, puetunu tii quijiaca casaajanaari naa tucuatasaaquiaari shipinijionutej. 2Siete juucajinia, Pueyasoori puetunu na poonijiosanojuanaa tucuataquiaari. Cuno juuca samaatereeri. 3Naacuatej, Pueyasoori cuno seeptimo juuca jiyatequiaari tamaatia juucara tamasaca juucajiniji. Naacuatej cuno juuca jiyatequiaari na juucaraari puetunu pueyarajanaa. Naa miiquiaariiri cuno juuca na samaatenuucua puetunu na poonijiosano na tucuatanu nuhuajijianaa. 4Puetunu niojuanaari jiya cajiniocua, jiya shipinishaanujiniji pohuatasano.
Edeen cuhuariquiajinia pueyano quishacari
5Naa Pueyaso shipininiu nuhuaji jiya cajiniocua jiyajaajatej, jiyacaritij, majaari juhuanojuaja nacuhua moritianu quiriquiaa. Naajuhuaj majaari juhuanojuaja jiyasocua moritianu quiriquiaajuhuaj. Pueyasoori juhuanojuaja jiyacari maja na nitiniu quiquiaari maru puetunu na shipinishano jiya cacojuanaa. Majaari juhuanojuaja pueyano quiniu quiriquiaajuhuaj, tii poonijioriquiano. 6Naa maru niyaquishacarijiatej, jiyajiniji pacaretacojuaari mohuaca na piquiojonura puetunu jiyajanaa. 7Jiyacaritij, Pueyasoori mara paniacuquiaari pueyano na shipininiuria. Naa na miiniu nuhuajitij, na najuhuajinia na nooquiaariiri. Naa na shipinishano jiyatequiaari paratu rijiojuaraari, quijiarajuhuaj.
15Camarnu Pueyaso jaara pueyano niaquiaari Edeen jiyanishano na cuhuariquiajinia, nojuajaari tii na niaquiaari na cojuanura, na namiriojotariquianojuhuaj. 16Jiyacaritij Pueyasoori maatia na nacasuquiaari. Na sequereeri:
—Puetunu nio Edeen cuhuariquiajinijijanaani, quia naatacuajaari puetunu naana jajaujinijijanaa mianu. 17Maja cutaraari noo naana jajau mianu, maninia casaa, sesa casaa niishitijia pueyanotej jaara na miare. Janiyajanaacuajaari quia sequeyani: Majaari cuno naana jajau mianu, quiaa mariqui cusojuara jataqueeri.
18Na nuhuaji Pueyasoori naa sequequiaarijaaja: “Majaari maninia pueyano quiniuria tamajaaja. Tamonu shipiniriiriaquij maninia na naacuna quiriquiano.”
19Pueyasoori maraujiniji puetunu casaajanaa shipinijioquiaari, puetunu jaacuatujuaca casaajanaanio. Naa na shipinijionu nuhuajitij, Pueyasoori pueyanoocua jiyataquiaari puetunu na shipinishano casaajanaa. 20Jiyacaritij, pueyanoori puetunu cuno casamijianaa jiyaniquiquiaari; seesano casami, puetunu jaacuatujuaca casaajuhuanajaj, puetunu nacujiniaaco quijiaca casamijianaanio. Naacuatej, puetunu casamijianaari naa cuno na sesacataja quiyajaa quiarijia. Jiyacari naa pueyano jiyaniquishacari puetunu Pueyaso shipinijiosano casaajanaatej, puetunu cuno casamijiniajanaani, majaari quenaaja niquiriyatu casaa na riuriatanu quiquiaari juhua na naacuna quiriquiano. 21Naacuatej, Pueyasoori pueyano maquiojoquiaari shitimia. Naa na maquesacari na shuucuaji riataquiaariiri. Niquimiaca na riuquiocua tamaca riquiaari tijiiri. Naa na miiniu nuhuajitij juhua juhuanoraja na mishiquiorohuariuhuaj. 22Cuno, pueyano riuquiocua tamacajinijini, Pueyasoori tiji shipiniquiaari maaji. Naa na shipininiu nuhuaji nucujiniji maajitij, pueyanoocua na jaatucureeri. 23Pueyano jaara niquiquiaari maaji, naa sequequiaariiri:
—¡Juhuej! Cuno cutaratej tama cua shujinijiniojaaja, tama cua nucujinijijaajanio. Naacuatej, na sesa cuaara quiiria “maaji.” Cunoori Pueyaso shipininiuucua maaji cayajiniji.
24Naacuatej, pueyano cuaara na que, na nucua cartera necora na caminiuria. Naa na camiyotoosacaritij, nojoriiri juhua niquiriyatu pueyano quiriquiano.
Đang chọn:
Geenesis 2: arl
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 1986, 2008, Wycliffe Bible Translators, Inc. All rights reserved.