اعمال رَسولان 14
14
پولُس و بَرنابا قونیه دِلِه
1پولُس و بَرنابا قونیه یه شهرِ دِلِه هَم یَهودِ عِبادتگاهِ دِلِه بَشَن و جوری گَب بَزَن که خِیلی از یَهودیِان و یونانیِان ایمان بیاردِن. 2وَلی یهودیِانی که ایمان نیاردِ بان، غیر یهودیِانِ آنتریک هَکُردَن و اوشانِ فکرِ علیِه آداشان، مَسموم هَکُردَن. 3پس پولُس و بَرنابا خِیلی زَمان اوجِه بُمانِسَّن و جرأتِ هَمرهَ خُداوند وَسین گَب بَزَن، خُداوندی که اوشانِه قوَّت هَدَه تا نِشانه ها بیارِن و مُعجِزات هَکُنَن، اینجوری خودِشِه فیض بَخشِ پِیغامِ تأیید کانه با. 4اون شَهرِ مَردم دو دَسِّه هَبان؛ یه دَسِّه یَهودیِان طَرَفدار هَبان و یِه دَسِّه رَسولانِ طَرَفدار. 5وختی غیرِ یَهودیِان و یَهودیِان خودِشانِه گَتِه شانِ هَمرهَ تَصمیم بِیتَن که پولس و برنابا رِه اَذیَت هَکُنَن و سَنگسار هَکُنَن، 6پولُس و بَرنابا این جریانِ جی خَبَردار هَبان، لِسترِه و دِربه یه سَمت که لیکائونیِه یه شهرانِ جی با، وَ اون دور و اطرافِ منطقه فَرار هَکُردَن. 7وَ اوجِه خُدای خَبَرِ خوشِ اعلام کِانِه بان.
پولُس و بَرنابا لِستْره یه دِلِه
8لِستْره یه دِلِه ایتا مَردای نیشته با که نَتَّنِسِّه خودِشِه لِنگِ تِکان هَدِه و هیچ وَخت راه نَشَه با، چون مادَر زادی چُلاق با. 9وَختِی که پولُس گَب زَنِه با، اون گوش دَنِه با. پولُس اونِه زُل بَزه و بَدییِه این ایمانِ داره که شَفا هَگیره. 10پولُس بلَندِ صِدایِ هَمرهَ اونِه باگوتِه: «تی لِنگِ سَر راس بیَاس!» اون مَردای خودِشِه جایِ سَر بَپِّرِسِّه و رادَکِتِه.
11وَختِی مَردم اونچه که پولُس هَکُردِه با رِه بَدییَن، لیکائونی یه زبانِ هَمرهَ داد بَزَن: «خدایِان آدَمی یه مِثان اَمِی میِن جیر بومَن!» 12اوشان باگوتِن بَرنابا ’زئوسِ‘ و پولُس ’هِرمِسِ‘ چون پولُس با که گَب زَنِه با. 13زئوسِ کاهِن که اونِه مَعبَد شهرِ دَروازِه یه دِرگایِ وَر با، چَن تا گُو و چَن دَسِه گُل شَهرِ دَروازِه یه وَر بیاردِه، اون و جَماعت خَسَّن اوشانِ وَسین قربانی هَکُنَن.
14وَلی وَختِی اون دُتا رَسول، یَعنی بَرنابا و پولُس، این کفرِ بِشنَوِسَّن، خودِشانِه لواسان رِه چاک هَدَئن و جَماعتِ دِلِه بَشَن، داد بَزَن که: 15«اِی مَردم، چِرا اینجور کانین؟ اَما هَم ایتا شِیمی مِثان، آدَمِیم. اَما خَبَرِ خوشِ شِمِرِه دَنیم تا این بیخِدِ کارانِ جی دَس بَکِشین و زندِه خَدا رِه ایمان بیارین که آسِمان و زَمین و دریا و اونچه که اوشانِ دِلِه دَرِه رِه، خَلق هَکردِه. 16قَبلاً خدا تمام قومِشانِ خودِشانِ حال وِل هَکردِه که هر کُدام خودِشِه راهِ پِی بوشون، 17وَلی با این حال خودِشه بی شَهادت نُذاشته، اون آسِمانِ جی وارِش بَرِساندَن و پُر بارِفصلهای بِبَخشیَن هَمرهَ، شِمِرِه خُوبی هَکردِه، خِیلی غذا شِمِرِه هَدَه و شِیمی دِلِ خوشحالی یه جی پُر هَکردِه.» 18حتی این گَبانِ هَمرهَ هَم، اوشان سَختی یه هَمرهَ بَتنِسَّن مَردُمِ قربانی هَکِردنِ جلوه بِگیرِن.
19وَلی یَهودیِان، اَنطاکیه و قونیه یه شهرانِ جی بومَن و مَردمِ خودِشانِه هَمرهَ هَمدَس هَکُردَن، پولُسِ سَنگسار هَکُردَن و این گمانِ هَمرهَ که بَمِردِه، اونِه شَهرِ جی دِرگا بَبِردَن. 20وَلی وَختِی شاگِردان اونِه دُور جَم هَبان، پولس وَرِسَه و به شَهرِ وَگرِسِّه. فَردَئی، اون و بَرنابا دِربِه یه شهرِ سَمت رادَکِتَن.
به اَنطاکیۀ وَگِرِسِّن
21اوشان اون شَهرِ دِلِه هَم خَبَرِ خوشِ اعلام هَکُردَن و خِیلیان رِه عیسی یه شاگِرد هَکُردَن. ایما به لِستْره و قونیه و اَنطاکیه وَگَرِسَّن. 22اون شَهرانِ دِلِه شاگِردانِ جانِ قُوَّت هَدَن، اوشانِه تشویق کِانِه بان خودِشانِه ایمانِ دِلِه بُمانَن و نَصیحَت کِانِه بان که «بایسّی خِیلی مصیبَتا رِه تَحمِل هَکنیم تا خُدایِ پادشاهی یه دِلِه بیشیم.» 23اوشان هر کلیسای دِلِه مشایخی رِه ایماندارانِ وَسین بَنَن و دُعا و روزه یه هَمرهَ اوشانِه خُداوندی که اونِه ایمان بیارد بان دَس، بِسپارِسَّن.
24ایما پیسیدیه منطقه یه جی بگذشتِن و پامفیلیه یه منطقه یه دِلِه بَشَن، 25اوشان پِرجِه یه دِلِه خُدای کَلامِ تعلیم هَدَن و اوجِه یه جی به آتّالیا بَشَن.
26آتّالیای جی کَشتی یه هَمرهَ به اَنطاکیه وَگِرِسَّن، هَموجه که ایمانداران پولُس و بَرنابا رِه خُدای فیضِ دَس بِسپارِسّه بان تا اون کاری رِه هَکُنَن که اَلان اونِه اَنجام هَدَبان. 27وَختِی پولُس و بَرنابا اوجِه بَرِسین کلیسای آدَمانِ جَم هَکُردَن، باز اوشانِ وَسین باگوتِن که خدا اوشانِ هَمرهَ چیها هَکردِه و چِطور ایمانِ دَرِ غیرِ یَهودیِان وَسین واز هَکردِه. 28ایما شاگِردانِ هَمرهَ خِیلی زَمان اوجِه بُمانِسَّن.
Đang chọn:
اعمال رَسولان 14: GMB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
@ 2024 Korpu Company
