Markus 1

Guma Mbulum ana Yuhana metsìlwìɓè à mburma a yam

a tsik a

Mata 3:1-12; Luka 3:1-18; Yuhana 1:19-28

1Naha Ŋgwal Bazlam ana a ɗif à Yesuw Kiristi Kəla Mbulum a. 2Bazlam ata a dza ahər ba ka, kamala ana Ezaya, mala məma à guma Mbulum a wetse aba a bəɗ a kaɗəŋ. A wetse piŋŋe, a gwa:

«Araha», Mbulum a gwa,

«I slirehe a mala metsìkè bazlam gà naha

aka miɗ yak, dite mà làmbaɗak vatwa yak.*fa*

3Mburma ŋa a riŋ i kusak,

à fèfil a ŋgəlakəkka, a gweɗe a:

<Làmbaɗum aba vatwa a Əbay a gəzləŋ kurum a,

ki fefetwimer a fehhè lele.> «*fb*

4Kamala ana Mbulum a gwa: I slirehe a mala metsìkè bazlam gà naha ya ka, aka sle kaɗəŋ. Mburma ŋa a riŋ i kusak, zləm ŋgar Yuhana. A tsik a bazlam Mbulum a mburma. A gwaɗawa a tar: «Mbəɗum à madzala gà gər kurum, dite i tsilwiɓ à kurum a a yam, dite Mbulum à pìl a kurum a à bakal kurum.» I dəba ŋa ya, a tsilwiɓewa à tar a yam. 5Akahər ata ka, gà mburma ana i Yeruzalem a, nda gà na a riŋ ika ahəɗ Yuda ya tserdze, tə dawara a təv Yuhana ya. Ti ɗifewa à bakal tar aka miɗ mburma tserdze, dite Yuhana a tsilwiɓewa à tar a yam i dulwa Yurdan i fata.

6Yuhana ata a ndzawa ka, nda gà petek ŋguz zlìgwèmè, madànà ba ŋa i magər ba ya nda kwiye. Dukw mezime ŋgar ka, say məpapəɗa heyew nda mazəma amum ana i dala ya ɗekɗek. 7A gwaɗawa a gà mburma ana tar riŋ i təv ŋgar a: «Mìsle ŋgiɗ a riŋ, a dere a i dəba gà ya mba. Ŋgat ka, à zè a iye nda ndzəɗa kweleŋ fètìte. I sle a aà mesirikaha a təv ŋgar, aà məpəla à liɓir tsàpà ŋgar tsidze, ku mege nda mekìrìɗèhè gurmits a biye tekeɗe, i sle a tsa. 8Aɗaba taŋa iye ka, i tsilwiɓ à kurum a ka, a yam pəra. Ama ŋgat aka dara ka, a tsilwiɓ à kurum a ka, a yam asa tsa, say a Mezite Mesife Mbulum.»

Metsìlwìɓè à Yesuw ana Yuhana a tsilwiɓ dər a yam a,

nda Əbay sitene ana a dzik à Yesuw a

Mata 3:13—4:11; Luka 3:21-22; 4:1-13; Yuhana 1:32-34

9Akahər ata Yesuw a hitsera i kwite ŋa a riŋ ika ahəɗ Galile ya, tə zalar Nazaret. A dara a təv Yuhana a dulwa Yurdan a. A daha, Yuhana a tsilwiɓ à ŋgat a yam i dula ata. 10I təv ana Yesuw a riŋ a tsilere a i yam a ka, kuvəl mbulum a hə̀ndə̀k ba tùwaŋ. A ŋgataha a Mezite Mesife Mbulum a riŋ a terre a iɗəm i fataya, zərawwa kamala maadagwar ana a ndze a a bəɗ a, aka gər ŋgar. 11A tsarakara mifefile ana a ɗera i mbulum a. Mbulum a gwaɗarra: «Kər na kà ne mandərkwasla gà ya, Kəla gà. Maŋgayaba gà fit dze ka, ika gər yak.»

12I dəba mifefile ata ya tsara ka, Mezite Mesife Mbulum a da à ŋgat a kusak diriŋ. 13A ndza riŋ i fata mehinne dzik faɗ. Hawa mèkwède ŋgat a riŋ i təv gà dukw dala. I huɗ mehinne ata ya ka, tar riŋ nda gà Əbay sitene a dzik a à ŋgat kəla pat. Ama gà gawla Mbulum ana i gər ŋa ya, tar riŋ nda gà ŋgat, tə zlàkawa ŋgat mbaŋa.

Yesuw a zal a gà ɓəzla magàsà kilif faɗ

Mata 4:12-22; Luka 4:14-15; 5:1-11

14Akahər ata ta gəs Yuhana, ti tike ŋgat a daŋgay gədzə̀zl. I dəba ŋa ya, Yesuw a tsaraka tàa gəs Yuhana ka, a mbəɗaha gər aka ahəɗ Galile. A daha ka, a dza ba aà metsìkè bazlam ŋgwal ŋa ana a da dərra i təv Mbulum a, a mburma. A gwaɗawa a tar: 15«Pat ana Mbulum a tike məpàslà ahər a ka, aka sle kuɗa. Aɗaba mekwere ŋgar ana a kwere a ya ka, aka à mendzera. Mbəɗum à madzala gà gər kurum a təv ŋgar, dite kə̀ gəsum bazlam ŋgwal ŋa aaha a gəzləŋ kurum ədəts lele.»

16I dəba ŋa ya, Yesuw a da aà gùva duluv Galile. A daha, a sùwaya i fata ka, aka le aà gà Simun nda damər ŋgar Andire, tar riŋ ta pìl a à ndzàràwà tar a yam a duluv ata, aɗaba megemir tar ka, magàsà kilif. 17Yesuw a gwaɗa a taraha aɗəm: «Dumara, tàkwa, ka zazamum iye, i ne à kurum a gà ɓəzla mayahara mburma i luvuŋ a, kamala kilif aaha kurum riŋ ihər ki geswimere a i yam a, dite ka, gà mburma ata ibam, tə dara a təv dzaydzay ŋa ya.» 18I dəba bazlam ŋgar ata ya tsara ka, gà wele ata ta məsak aba à gà ndzàràwà tar a fataya, tə dara, tə dəɗ akaba, tə zazam ŋgat.

19Yesuw a da i fataya zaakwa ka, aka ŋgataha a gà Zakup nda damər ŋgar Yuhana, gà ɓəza Zebede asa. Tar riŋ i slə̀làh yam i duluv, tì lèmbeɗe a ndzàràwà tar mbaŋa. 20Yesuw a zal a taraha aɗəm tsara. Gà wele ata ta hitsera iɗəm a. Ta məsak riŋ à tsir tar Zebede i slə̀làh yam ata nda gà ɓəzla meslire ŋgar. Tə da nda gà Yesuw tserdze.

Wele ana sitene a darra i ba ya

Luka 4:31-37

21I dəba ŋa ya, gà Yesuw nda gà ɓəzla mazazama ŋgat tə da a kwite Kafarnahum. A pat mesìfìkà ba ana a ndzera ya ka, a da a ga mahàmà a Mbulum. A daha, a tsik guma ŋgar a mburma. 22Guma ŋgar ata a tsik a ya ka, arəv a da dər aà tar a, a ge aà tar kamala dukw mene aà mburma ya. Aɗaba guma ŋgar ata a tsik a ter a ya ka, kamala biy gà ɓəzla medzeŋge məpala ahəm Mbulum a tsa. Ama ka, nda ndzəɗa hinne, kamala ana ŋgat Əbay a, na a tsik a tar a.

23I dəba ŋa ya, Yesuw a ndəv à mifefile ŋgar ata tsara ka, wele duwa a riŋ i magər gà mburma ata, sitene a gasawa ŋgat. A dza ba aà mifefile ŋgəlakəkka hinne nda magala. 24A gwaɗa a Yesuw: «Ki yehe a à mər la ya, kər ana kà dara i Nazaret a? Ka dara ana, aà medzeye à mər kəla ya? I sər kər lele, kər ka, wur ana bakal ŋgar a riŋ tsa, Mbulum a slərra a faha ya.» 25Yesuw a kwara akaba sitene ata. A gwaɗar: «Ndza ɗikɗik. Dara i ba wele aka ya.» 26Sitene ata a dzadzar à wele ata hinne, dite a darra i ba ya, nda gà Mewideye ya.

27Gà mburma aaha tserdze ya, ta ŋgat a dukw mene aà mburma ata ka, tə dzadzar hinne mbaŋa. Ta gwaɗaba ika magər tar: «Naha ana, là? Bazlam wara naha a tsik a awiya ŋa asa ya? Dukw ana a tsik a ya ka, nda ndzəɗa ndzer kaɗəŋ. Mege a kwere akaba a gà sitene tekeɗe, ta gis a bazlam ŋgar a.» 28I dəba ŋa ya bise tsara, gà mburma ana ika ahəɗ Galile ya, ti ɗewa zləm à Yesuw hinne.

Yesuw a mbala à gà ɓəzla dukw məməta hinne

Mata 8:14-17; Luka 4:38-41

29Aləka i dəba ŋa ya, gà Yesuw nda gà ɓəzla mazazama ŋgat, gà Zakup nda Yuhana, tə dara i ga mahàmà a Mbulum a. Ta mah ba, tə da a bəra gà Simun nda Andire. 30Ti ta medeha ka, dzìdze Simun a riŋ mahə̀nà ŋa ŋgwala tsa, a dzedzeriŋa ika slə̀làh ŋgar i ga. Ta gwaɗa a Yesuw: «Məkəs aaha ka, ŋgwala tsa.» 31Yesuw a daha a təv ŋgar, a gəs ŋgat i ahər a. A hitse dər aà mbulum. Tùŋ a ndza dər a bəɗ nda mendzwil ŋgar. Màràɓàraɓ ŋgar ata a ndala ihər a tsara. I dəba ŋa ya, a sle a aà mege a tar mbəlakw lele kuɗa.

32Aləka pat a dəɗ ndaàwa ŋana ka, gà mburma ata i fataya, tə ndzakaha gà ɓəzla dukw məməta nda gà ɓəzla sitene a təv Yesuw. 33Gà mburma ana i kwite ata ya fit dze, tə ndəv akabaha aka biye hərmaga ata Yesuw iɗəm a. 34Yesuw a mbala à gà mburma i dukw məməta tar a pampam hinne. A dalawa gà sitene aà gà mburma ana duwa a gasawa tar a mbaŋa. A hə̀ndə̀kaha aà bazlam a gà sitene, aɗaba tar ka, tə sər ŋgat, a dara ka, i təv Mbulum a ndzer.

Yesuw a tsikeye guma ŋgar ika ahəɗ Galile tserdze

Luka 4:42-44

35Ndidwe ŋana aka tuwa mendzikwir ka, Yesuw a dara i ga ya, a hitse i fataya, a da a təv ana mburma a riŋ iɗəm tsiye. A ndzeha a fata ka, a dza ba aà mahàmà a Mbulum Tsir ŋgar. 36Gà Simun nda gà mìsle ŋgiɗ ana ti zezem a Yesuw a, tə da a mayaha ŋgat. Aləka ta ŋgat Yesuw ka, ta gwaɗar: 37«Gà mburma a riŋ hinne ta wiz a kər ana, meme?» 38I dəba ŋa ya, Yesuw a gwaɗa a tar: «I waya ka, ki tèkwe a a təv ŋa, a təv ana a mbera a kwite aaha ya. Say i ti tsik a bazlam ana Mbulum a slər dərra iye ya, a fata mbaŋa. Agəra taŋa na i dara ya.» 39Yesuw a tsik aba ya kataya ka, a mah ba, a da. A daha, a sùwaya ika ahəɗ Galile tserdze. A ləm aka kwite ata i fataya à bazlam ata. A tsikewa guma ŋgar a gà mburma tserdze i ga mahàmà a Mbulum ana ika ahəɗ ata ya. A dalawuwa gà sitene aà mburma ya mbaŋa.

Yesuw a mbəl à mala vèdègwè duwa

Mata 8:1-4; Luka 5:12-16

40Akahər ata mala vèdègwè duwa a daha a təv Yesuw. A ndzeha a təv ŋgar ka, a dzar gurmits a biye, dite mà zlak ŋgat i dukw məməta ŋgar a. A gwaɗar: «Na mege kà waya ka, ki sle a aà mimbile à iye te.» 41Ama wele ata a tsiker kataya, a ndze are tsehe a Yesuw hinne. A daha, a ləm ahər, a gwaɗar: «Haya, a sèsiŋ na ki mbil a ya. Kinehe ka, mbəl i dukw məməta yak a.» 42I fataya ka, mbəlak ba wele ata a ndala ihər a suwut tsara. Ba ŋgar a làmbaɗa ba lele kuɗa. 43I dəba ŋa ya, Yesuw a tiriɓe akaba wele ata nda bazlam, a gwaɗar: «Daba. 44Ama kəla ka, ka ti tsik a wura tsidze. Kàa daha ka, kà pàt à ba yak a mala mandəva kuɗa a Mbulum, dite mà samata kər, ma sər dər ka, meme na kà ndza kinehe kuɗa ya. I dəba ŋa ya, ka vəl dukw masakəŋa ana Musa a gwa i wakita ka, ki vilwim a a Mbulum a. Dite na gà mburma ta ŋgeteke a, ti sir a dər ka, kàa mbəl kaɗəŋ a.»

45Tsaatsa, bazlam Yesuw ata a tsiker nda ndzəɗa nda magala ya ka, wele ata a da i təv ŋgar a tsara. A daha, a dza ba aà maɗàmà dukw ata Yesuw a ge nda ŋgat a. Aɗaba taŋa, Yesuw tekeɗe, a sle a aà mipète à ba ŋgar bise a gà mburma ana i gà kwite ata ya asa tsa, tsəka, ti sir a ŋgat. Agəra taŋa a sùwayawa ba nda təv ana mburma a riŋ i fata tsiye. Ama gà mburma pampam tə dayara i gà kwite tar a, tə dawaha a təv ŋgar a fata.

Đang chọn:

Markus 1: gnd

Tô màu

Sao chép

So sánh

Chia sẻ