मत्ती 9
9
येशू पाप क्षमा देलक
मर्कूस २:१-१२; लूका ५:१७-२६
1तबदोस्र येशू लाऊम चिहुर्ल ओ घुम्क समुद्रक उपार आपन बैठल सहरम गैल। 2मनै प्यारालाइस रोग लागल एकठो मनैयह बिस्तारासैँट बोक्क उहाँकठे अन्ल। हुँकन्हक विश्वास देख्क येशू उ रोग्यह कल, “भैया, साहस करो, टुँहार पाप क्षमा होगैल्।”
3येशूक कहल यी बात सुन्क शास्त्रीमध्ये कत्रा जन मनमन विचार करलग्ल, “यी त परमेश्वरक बदनाम करटा।”
4तर येशू हुँकन्हक मनक बात बुझडर्ल ओ कल, “टुह्र मनम काकर दुष्ट विचार करटो? 5यी मनैयह ‘टुँहार पाप क्षमा होगैल्’ कना ओ ‘उठ्क नेङ्गो’ कना कौन सजिलो हो, कहो त? 6हेरो, मै मनैयक छावह यी पृथ्वीम मनैन्हक पाप क्षमा कर्ना अधिकार रहल बात मै टुँहन देखैम।” तब ऊ बेरम्हेह कल, “उठो, आपन बिस्तारा बोक्क घर जाओ।” 7तबदोस्र उ मनैया जुरुक्कसे उठल, ओ आपन घर गैल्। 8यी अचम्मक काम देख्क भीडक मनै डरैल, ओ मनैन असिन शक्ति देना परमेश्वरक प्रशंसा कर्ल।
येशू मत्तीह बलैलक
मर्कूस २:१३-१७; लूका ५:२७-३२
9येशू उहँरसे जाइबेर एक जन मत्ती नाउँक मनैयह कर उठैना अड्डम बैठल देख्ल। तब येशू उ मनैयह कल, “म्वार पाछ लागो।” मत्ती उठ्ल ओ उहाँक पाछ लग्ल।
10येशू ओ उहाँक चेलन मत्तीक घर खाए बैठल ब्याला कर उठुइयन ओ और पापीहुँक्र फे अइल, ओ उहाँहुँकन्हकसँग खाए बैठ्ल।#लूक १५:१-२ 11यी देख्क फरिसी समूहक मनै उहाँक चेलन कल, “काजे टुन्हक गुरु कर उठुइया ओ पापीन्हकसँग खानपिन कर्ठ?”
12हुँकन्हक बात सुन्क येशू कल, “निरोगी मनैन डाक्टर नैचहटन, तर रोगी मनैन चहठन। 13टुह्र धर्मशास्त्रम लिखल बातक अर्थ बुझपर्ठा: ‘मै पशुक बलि नाही, दया करल चहठुँ।’ मै धर्मीन नाही, तर पापीन बलाए पो आरनु।”#मत्ती १२:७; होशे ६:६
ब्रत रना सम्बन्धी
मर्कूस २:१८-२०; लूका ५:३३-३५
14तबदोस्र यूहन्नक चेलन येशूकठे आक उहाँह पुछ्ल, “हम्र ओ फरिसीहुँक्र ब्रत रठी, तर अप्नक चेलन काजे ब्रत नैरट?”
15येशू हुँकन आहानम जवाफ देल, “दुल्हा भोजरेन्हकसँग रहट्सम हुँक्र शोक कर नैपर्टन, तर उ दिन आई जब दुल्हा हुँकन्हकठेसे लैजाजहीँ, तब हुँक्र ब्रत रह्हीँ।
16“पुरान लुगम कुई फे लौव लुगक पिउँडा नैलगाइट्। यदि लगैना हो कलसे, लौव पिउँडा मारी पैँस्क पुरान लुगह खिँच्ठा त झन् कर्रसे फटादेठा। 17ओसहेँक, पुरान छालक थैलीम कुई फे लौव अङ्गूरिक मद नैढरट्। यदि ढर्ना हो कलसे, थैलीह फुटादेठा ओ अङ्गूरिक मद अँराजैठा। लौव अङ्गूरिक मद त लौव छालक थैलीम ढरपर्ठा, तब थैली ओ मद दुनु सुरक्षित रठा।”
मुवल लौँर्या ओ बेराम महिला
मर्कूस ५:२१-४३; लूका ८:४०-५६
18येशू हुँकन यी बात कटीकटी एक जन यहूदी शासक उहाँ आपुग्ल। ओ येशूक पाउ पर्टी बिन्ती कर्ल, “हजुर, म्वार छाई आब भक्खर बितल, हजुर आक वाकरम आपन हाँठ ढैदेबी कलसे, ऊ जिजैनेबा।” 19येशू उठ्ल ओ आपन चेलन्हकसँग हुँकहार पाछ लग्ल।
20उहब्याला एक जन बाह्र वर्षसे रगत बहना रोग लागल महिला पाछओरसे आक येशूक लुगक किनार छुली। 21काकरकि “येशूक लुगऽ केल हुइलसे फे छुवम कलसे चोखाजैम” कना हुँकहीन लागलरहन।
22येशू पाछओर घुम्क हेर्ल त महिलह देख्ल, ओ कल, “बाबु, साहस करो। टुँहार विश्वासले टुँहीन चोखाराखल।” तबहेँ उ महिला चोखागैली।
23तबदोस्र जब येशू यहूदी शासकक् घर पुग्ल, उहाँ त शोकक् बाजा बजुइयन ओ भीडक मनैन रुवाबासी करँट् देख्ल। 24उहाँ हुँकन कल, “टुह्र सबजन बाहर जाओ। यी बाबु मुवल नैहुइटी, निदाइल केल बाटी।” यी बात सुन्क हुँक्र उहाँह हँस्ल। 25उहाँ भीडक सब मनैन बाहर निकार्क अप्न भित्तर गैल, ओ लौँर्यक हाँठ पकर्क उठैल त लौँर्या उठगैल्। 26तबदोस्र यी बातक बयान साराओर फैल्गैल्।
आन्धर मनै चोखैलक
27येशू उहाँसे जाइबेर दुइ जन आन्धर मनै “हे दाऊदक सन्तान, हमन दया करी” कटी उहाँक पाछपाछ लग्ल।
28येशू घरम पैँठ्ल त, उ दुइ जन आन्धर मनै फे उहँ आपुग्ल। येशू हुँकन कल, “का मै टुँहन चोखाइ सेकम कना टुन्हक विश्वास बा?” हुँक्र कल, “बा, प्रभु।”
29तब येशू हुँकन्हक आँख छुक कल, “टुन्हक विश्वास अनुसार टुँहन ह्वाए।” 30तबदोस्र हुँक्र देख्ना होगैल। येशू हुँकन कर्रा आज्ञा देल, “हेरो, यी बात कौनोजहन जिन बट्वैहो।” 31तर हुँक्र उहाँसे गैल त सारा इलाकम उहाँक करल कामक बात फैलादेल।
32जब उहाँहुँक्र निकर्क जाइटलह, तब मनै भूत्वा लाग्क लाट हुइल् एकठो मनैयह उहाँकठे अन्ल। 33येशू भूत्वह वाकरमसे निक्रादेल त, ऊ लाट मनैया ब्वाल लागल। यी देख्क भीडक मनै अचम्म मन्टी कहलग्ल, “इस्राएलम असिन बात कबु फे नैदेख्गैलरह।”
34तर फरिसी समूहक मनैजुन असिक कहलग्ल, “यी त भूतन्हक रज्वक शक्तिले भूतन निक्रैठा।”#मत्ती १०:२५; १२:२४; मर्क ३:२२; लूक ११:१५
डान्चे काम करुइयन
35येशू सहर-सहर ओ गाउँ-गाउँक सभाघरम शिक्षा देटी, स्वर्गक राज्यक खुशीक खबर प्रचार कर्टी ओ सब किसिमक रोगमसे मनैन चोखैटि नेङ्ग्ल।#मत्ती ४:२३; मर्क १:३९; लूक ४:४४ 36मनैन्हक भीड देख्क उहाँ दयाले भरगैल। काकरकि हुँक्र त चह्रुइया नैरहल भेँरीअस हैरान ओ बेसहारा रलह।#गन्ती २७:१७; १ राज २२:१७; २ इति १८:१६; इज ३४:५; मर्क ६:३४ 37तब उहाँ आपन चेलन कल, “सह्यार पर्ना बाली धेर बा, तर काम करुइयन डान्चे केल बाट। 38उहओर्से बालीक मालिकसे बाली सहेर्ना काम करुइयन पठादेहीँ कैक बिन्ती करो।”#लूक १०:२
Đang chọn:
मत्ती 9: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
