मत्ती 8

कोररोगमसे चोखैलक

मर्कूस १:४०-४५; लूका ५:१२-१६

1येशू पर्वत्‍वमसे टर ओल्‍हाइबेर मनैन्‍हक भारी भीड उहाँक पाछ लागल। 2उ ब्‍याला एकठो कोररोग लागल मनैया आक उहाँक पाउ पर्टी कहल, “प्रभु, अप्‍न चहबी कलसे महीह चोखाइ सेक्‍नेबाटी।”

3येशू वाकरम हाँठ ढैक कल, “मै चाहटुँ, टुँ चोखाजाओ।” तबहेँ कोररोग लागल मनैया चोखागैल्। 4येशू ओहीह कल, “हेरो, यी बात किहुह जिन कहहो। बेनसे पूजारीकठे जाक अपन्‍हेह देखाओ ओ अप्‍न चोखैलक बात मनैन्‍हक आघ साबित कराइक लाग मोशक व्‍यवस्‍था अनुसार बलि चह्राओ।”#लेवी १४:१-३२

कप्‍तानक नोकर चोखैलक

लूका ७:१-१०

5येशू कफर्नहुम सहरम पैँठबेर एक जन रोमी कप्‍तान आक उहाँसे बिन्‍ती कर्ल, 6“प्रभु, म्‍वार नोकर प्‍यारालाइस रोगले घरम थलापरल बा।”

7येशू ओहीह कल, “मै जाक ओहीह चोखुइयाबाटुँ।”

8कप्‍तान कल, “मै हजुरह आपन घर लैजिना योग्यक मनैया नैहुइटुँ। हजुर यिहँसे आज्ञा केल कैदी, त म्‍वार नोकर चोखाजाई। 9मै फे आपनसे बरा हाकिमक अधीनम रठुँ। म्‍वार अधीनम फे सिपाहीहुँक्र बाट। मै एकठो मनैयह ‘जा’ कठुँ, त ऊ जैठा, ओ और मनैयह ‘आ’ कठुँ, त ऊ अइठा। आपन नोकरह ‘यी कर’ कठुँ, त ऊ कर्ठा।”

10हुँकहार बात सुन्‍क येशू अचम्‍म मन्‍ल, ओ आपन पाछ लागल मनैन कल, “जाट्‌टीसे मै टुँहन कहटुँ, असिन भारी विश्‍वास त मै इस्राएलीन्‍हक बीचम फे नैदेख्‍लहुँ। 11मै टुँहन कहटुँ, पूरुब ओ पश्‍छिउँसे गैरयहूदी मनै धेर अइहीँ ओ स्‍वर्गक राज्‍यम अब्राहाम, इसहाक ओ याकूबकसँग सँग खाए बैठहीँ।#लूक १३:२९ 12तर स्‍वर्गक राज्‍यम रहपर्ना इस्राएलीहुँक्रजुन बाहर अन्‍धकारम फाँकजैहीँ, ओ उहाँ मनै दुःखले दाँत पिस्‍टी रुवाबासी करहीँ।”#मत्ती २२:१३; २५:३०; लूक १३:२८

13तबदोस्र येशू कप्‍तानह कल, “आब अप्‍न घर जाई, अप्‍नक विश्‍वास करलअस हुइनेबा।” उ नोकर तबहेँ चोखागैल्।

धेर रोगीहुँक्र चोखैलक

मर्कूस १:२६-३४; लूका ४:३८-४१

14येशू पत्रुसक घर गैल। उहाँ हुँकहार सासू जरकमार सुत्‍लकसुत्‍ल रलही। 15येशू हुँकहार हाँत छुल त हुँकहीन जर छोर्लिन। तब ऊ उठ्‌ली ओ उहाँक मानमर्जाट्‍ कर्ली।

16सन्‍झ्‍या हुइल् त, मनै भूत लागल धेर जहन येशूकठे अन्‍ल। येशू आपन बोलीले मनैन्‍हकमसे भूत निक्रैल ओ सक्‍कु बेरम्‍हेन चोखादेल। 17असिक अगमवक्तन्‍हक कहल बात पूरा हुइल्,

“उहाँ जो हमार कमजोरी बोकदेल,

ओ हमार रोग हटादेल।”#यशै ५३:४

येशूक पाछ लग्‍लसे तिरपर्ना मूल्‍य

लूका ९:५७-६२

18येशू आपन आञ्‍जरपाञ्‍जर मनैन्‍हक भारी भीड देख्‍ल त आपन चेलन “ले आब हम्र समुद्रक उपार जाई” कैक कल। 19उहब्‍याला एकठो शास्‍त्री उहाँकठे आक कल, “गुरु, अप्‍न जहाँ गैलसे फे मै अप्‍नकसँग जैम।”

20तब येशू हुँकहीन कल, “फेहोरेन्हक ड्वान्डर रठन, चिरैँचुरुङ्‌गन्हक ठाँट रठन, तर मै मनैयक छावक आराम कर्ना ठाउँ फे नैहो।”

21तब उहाँक चेलन्‍हक बीचमसे और एकठो चेला कल, “प्रभु, पैल्‍ह मै घर जाक आपन बाबह माटी देलिउँ, त अप्‍नक पाछ लगम।”

22येशू हुँकहीन कल, “मुवलअस मनै मुवल मनैन माटी देह्‍हीँ, टुँ म्‍वार पाछ लागो।”

आँधीह शान्‍त पर्लक

मर्कूस ४:३५-४१; लूका ८:२२-२५

23येशू लाऊम चिहुर्ल ओ उहाँक चेलावँ फे उहाँकसँग गैल। 24एकचोट्‌टे समुद्रम भारी आँधीबौखा चल लागल, ओ पानीक छल्‍कले लाऊ भर लागल। तर येशूजुन मस्‍तसे निदाइल रलह। 25तब चेलाहुँक्र उहाँह असिक कटी जगैल, “प्रभु, हमन बचाई, हम्र मुवलग्‍ली।”

26येशू हुँकन कल, “काजे असिक डराइटो? खै टुन्‍हक विश्‍वास?” तब उहाँ उठ्‌क आँधीबौखा ओ छल्‍कह हप्‍कैल, त आँधीबौखा ओ छल्‍का जाट्‍से शान्‍त होगैल्।

27असिन हुइल् देख्‍क सबजन छक्‍क पर्ल ओ कल, “यी कसिन मनैया हुइट? हिँकहार कहल त आँधीबौखा ओ छल्‍का समेत मन्‍ठ!”

भूत लागल मनै चोखैलक

मर्कूस ५:१-२०; लूका ८:२६-३९

28जब येशू समुद्रक उपार गदरिनीहुँकन्‍हक मुलुकम पुग्‍ल, तब भूत लागल दुइ जन मनै उहाँकठे अइल। हुँक्र दुनु जन मुवल मनै गर्ना ठाउँओर बैठट्। हुँक्र महाडरलग्‍टिक रलह, ओ उ डगर कुई फे नेङ्‌गघुम कर नैस्‍याकट्‍। 29हुँक्र दुनु जन असिक चिच्‍याइ लग्‍ल, “हे परमेश्‍वरक छावा, अप्‍न हमन का करक लाग अइलही? का हमार समय बिना पुग्‍ल हमन दुःख देहक लाग अइलही?”

30हुँकनसे टनिक दूर एक बगाल सुवर चह्रटलह। 31भूत उहाँह असिक कैक बिन्‍ती कर्ल, “हमन निक्राइ जो चहठी कलसे हमन उह सुरिन्‍हकम जाइदी।”

32तबदोस्र येशू हुँकन कल, “जाओ।” तब हुँक्र निकर्क सुरिन्‍हकम गैल, त सक्‍कु सुवर भीरमसे ढनमनैटी समुद्रम गिर्क मुगैल। 33सुवर चह्रुइयन भाग्‍क सहरम गैल। सहरम जाक सक्‍कु घटना ओ भूत लागल मनै कसिक चोखैल कना बात समेत सुनादेल। 34यी बात सुन्‍ल त येशूह भ्‍याँट कर सारा सहरक मनै उलट्‌क अइल। उहाँह देख्‍ल त, मनै आपन क्षेत्रसे जाइक लाग बिन्‍ती कर्ल।

Đang chọn:

मत्ती 8: thl

Tô màu

Sao chép

So sánh

Chia sẻ