2 Korɛ̃tɩ 3
3
A Wõ-ta-paala tõ-tõ-biir
1Tɩ lɛb'a maal tĩ wule a tɩɩm mɩŋa tɩ na ɩ nɩ-vɩɛlɩ a bɩɩ? Bɩɩ a fɛr'a kɛ́ tɩ mɩ̀ mɩ́ tɛr bãwfʋ sɛb-tʋɔlɩ wa n a nyɩ zie bɩɩ? Bɩɩ kɛ́ nyɩ mɩ́ kʋ̀ tɩ bãwfʋ sɛb-tʋɔlɩ mɛ̃ a nɩbɛ bɛ mɩnɛ a bɩɩ? 2Nyɩmɛ nɛbɛ ɩ a tɩ sɛb-tʋɔla, sɛb-tʋɔla bɛ na sɛb ƴãw a tɩ socie pʋɔ a, sɛbɛ nɩsaalbɛ za na na tʋ̃ɔ́ bãw ɛ́ kanɩ a. 3Sɩza n'a, a sãá nɩ cãàmɩlɛ kɛ́ nyɩ ɩ n a sɛb-tʋɔla a Kɩrɩta na sɛb ɛ̀ tɩ de lʋɔrɩ tɩr a. Sɛb-dale kʋ̃ɔ bɛ n'a bɛ sɛb'ɩ ɛ, ɛcɛ a Naaŋmɩn na vʋʋrɛ a Vʋʋrʋ Sõw n'ʋ. Kʋsɛ-pamɛ zu bɛ n'a bɛ sɛb ɛ#3:3 A Moyiir wulu n'ʋ a Pol tɩɛrɛ a ka. Nyɛ̃ Ety 24.12. A Wul-paala ƴãw a, nyɛ̃ Zer 31.33, Ezek 11.19, 36.26-27., a nɩsaalbɛ socie pʋɔ n'a.
4À ŋá n'a tɩ mɩ́ bɛr tɩɛrʋ a Naaŋmɩn niŋé a Kɩrɩta zũú. 5A bɛ kaar mɛ̃ tɩ na tʋ̃ɔ́ na tõ a ton ŋa tɔ nɩ a tɩɩm mɩŋa fãw, a ɩ mɛ̃ tɩɩm zie n'a a yi ɛ. Tɩmɛ wa tɛr fãw a, a tɩ fãw yi n Naaŋmɩn zie. 6Ʋlɛ n'ʋ ɩ tɩ tʋ̃ɔ́ lɩɛbɩ Wõ-ta-paala tõ-tõ-biir. Sɛbrʋ Wõ-ta-paala bɛ n'ʋ ɛ, Vʋʋrʋ Wõ-ta-paala n'ʋ, bʋ̃ʋ n'ʋ vɛ̃, a sɛbrʋ kʋrɛ na ɛ́ a Vʋʋrʋ tɩrɛ nyɔ-vʋʋrʋ.
7Bɛ tɩ sɛb'ɩ a Naaŋmɩn wulu ƴɛ̀r-bie kʋsɛ-pamɛ zu, ɛ́ a Naaŋmɩn yúor-vɩɛlʋ-danʋ tɩ sãá nyɩwrɛ a lɛn daar. A Moyiir niwn tɩ nyɩwrɛ na k'a Ɩsɩrayɛl biir bɛ tʋɔr jɩ́rɛ a ʋ niwn nɩ mimie ɩ#3:7 Nyɛ̃ Ety 34.29-35., ɛcɛ a vɩɛlʋ ŋa tɩ ɩ n bʋ̃-tɔla. A Naaŋmɩn wulu a tõ-nʋɔr na tɩ n'ɩ k'ʋʋ kʋrɛ a, a Wulu ŋa wa sãá nɩ yúor-vɩɛlʋ-danʋ sɛw á ŋá a, 8ŋmɩŋmɩn za n'a a tõ-nʋɔr a Vʋʋrʋ Sõw na tone a, kʋ̃ tɛr yúor-vɩɛlʋ-danʋ zuo lɛ? 9A tõ-nʋɔr na waar'ɩ kũu a nɩsaalbɛ zie a tɩ tɛr'ɩ yúor-vɩɛlʋ-danʋ. Ŋmɩŋmɩn za n'a a tõ-nʋɔr na so a nɩsaalbɛ mɩ́ ɩ nɩ-mɩn a Naaŋmɩn niŋé a, kʋ̃ tɛr yúor-vɩɛlʋ-danʋ zuo lɛ? 10Mɔ̃ mɩ̀, a dãwdãw yúor-vɩɛlʋ-danʋ bɔr'ɩ a ƴɛrɛŋa yúor-vɩɛlʋ-danʋ niŋé, ʋ na zuo ʋ polpol lɛ a ƴãw. 11Bʋ̃ʋ n'ʋ vɛ̃, a bom ʋl na tɔlɛ a wa tɩ dãw tɛr yúor-vɩɛlʋ-danʋ a, ŋmɩŋmɩn za n'a a bom nɛ na bere kʋralɛ a kʋ̃ tɛr yúor-vɩɛlʋ-danʋ zuo lɛ?
12A yel ŋa ƴãw tɩ na ƴãw a tɩ tɩɛrʋ a n'a so, tɩ ɓãá ƴãw bɛr dɛ̃bɩ̃ɛ. 13Tɩ bɛ ɩrɛ mɛ̃ a Moyiir na mɩ́ tɩ de pɛn pàw a niwn k'aa Ɩsɩrayɛl biir ta nyɛ̃ a yúor-vɩɛlʋ-danʋ ŋa, na ɩ bʋ̃-tɔla a, baarʋ ɛ. 14Ɛcɛ a bɛ tɩɛrʋ tɩ kpawl'a, ɛ́ wa tɩ tɔ a dɩ̃a a, bɛlɛ mɩ́ wa kanɛ a Wõ-ta-kʋra sɛbr a, a pɛn-been nɛ n'ʋ mɩ̀ cãà pàw a bɛ tɩɛrʋ. Bʋ̃ʋ n'ʋ vɛ̃, a Kɩrɩta cãà n'ʋ íre a pɛn ŋa bɛrɛ. 15Cãà wa tɩ tɔ a dɩ̃a mɩ̀ a, a lɛn daar za bɛ na mɩ́ wa kanɛ a Moyiir sɛbr a, pɛn mɩ́ pàw nɩ a bɛ tɩɛrʋ. 16A fʋ na lɩɛbɩ a fʋ ɩb tu a Sore a pʋɔ n'a bɛ mɩ́ ír a pɛn ŋa bɛr#3:16 Nyɛ̃ Ety 34.34.. 17Bʋ̃ʋ n'ʋ vɛ̃, a Sore n'ɩ a Vʋʋrʋ Sõw, ɛ́ be a Sore Vʋʋrʋ na be a, be n'a a tʋɔra-sob be. 18Tɩɩm za bɛ na ír a pɛn bɛr tɩ a niwn ƴãw a, tɩ ɩrɛ nɩ a Sore yúor-vɩɛlʋ-danʋ sãanɛ mɛ̃ caala pʋɔ a, tɩ lɩɛb'a ŋmɛ̃ taa nɩ a Sore, ʋl na ɩ a Vʋʋrʋ a, ʋlɛ n'ʋ mɩ́ ɩ tɩ yi yúor-vɩɛlʋ-danʋ pʋɔ kpɛ yúor-vɩɛlʋ-danʋ na vɩɛl zuo a pʋɔ.
Đang chọn:
2 Korɛ̃tɩ 3: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.