1 Korɛ̃tɩ 15
15
A Kɩrɩta kũu-pʋɔ-lɛb-yibu yele
1 Yɛbr i, ɩ̃ lɛb'a sɩ̃wnɛ a nyɩ tɩɛrʋ a Yel-nʋ̃ɔ̀ ɩ̃ na manɩ kʋ̀ nyɩ a ƴãw, a Yel-nʋ̃ɔ̀ ŋa nyɩ na wõ ɛ́ sàw de ʋ kpɛ̃w za a. 2Ʋlɛ n'ʋ na faa nyɩ, nyɩmɛ wa tɛr ʋ vla mɛ̃ a lɛ ɩ̃ na wa wa man ʋ kʋ̀ nyɩ a. Alɛ bɛ wa ɩ lɛ a, nyɩ nãà wa sàw na de zawla.
3A wulu ŋa mãa mɩŋa na tɩ páw a, ɩ̃ de nɩ niwn lʋɔr'ʋ kʋ̀ nyɩ: Kɩrɩta kpi n a tɩ yel-bebe ƴãw, mɛ̃ a lɛ a Sɛb-son na tɩ yel a. 4Bɛ ũù ʋ na, ʋ lɛb'a yi a kũu pʋɔ a bibie ata sob, mɛ̃ a lɛ a Sɛb-son na tɩ yel a. 5Ʋ wul'ɩ ʋ tʋɔra a Pɩɛr, al pùorí ʋ wul ʋ tʋɔra a nɩ-toni pie nɩ ayi. 6A pùorí, ʋ lɛb'a wul ʋ tʋɔra yɛbr kɔbr anũu (500) nɩ dɔwlɛ, bɛ za lãw nyɛ̃ ʋ. A bɛ yaga zie cãà na vʋʋrɛ, ɛcɛ bɛ mɩnɛ kpi na. 7Al pùorí ʋ wul ʋ tʋɔra Zakɩ, ɛ́ lɛb wul ʋ tʋɔra a nɩ-toni za.
8Ʋ na wul a ʋ tʋɔra a bɛ ŋa za baar'a, ʋ pãa mɩ̀ wa bɩɛr'a wul ʋ tʋɔra a mãa mɩ̀, mãa na ɩ mɛ̃ bɛ dɔw mɛ̃ na ɩ̃ bɛ ta a. 9Bʋ̃ʋ n'ʋ vɛ̃, ɩ̃ ɩ n a nɩ-toni za pʋɔ pʋrɩ woro, ɩ̃ mɩ̀ bɛ sɛw kɛ́ bɛ bʋɔlɛ mɛ̃ nɩ-tona ɩ, ɩ̃ na dɔwrɩ a Naaŋmɩn Lãw-yir a ƴãw. 10Naaŋmɩn maalʋ n'a so ɩ̃ ŋmɛ̃ à à ŋá ɩ̃ na ŋmɛ̃ a, ɛ́ a ʋ maalʋ a ɩ̃ zie bɛ ɩ zawla ɩ. Ɩ̃ nɩ̃ɛ na tõ zuo bɛ za: mãa bɛ n'ʋ ɛ, a Naaŋmɩn maalʋ na be a ɩ̃ zie a n'ʋ. 11A na ɩ à ŋá a, a mãa n'ʋ o, a bɛlɛ nɛbɛ o, a yel ŋa n'ʋ tɩ hiere yere kʋ̀rɛ nyɩ, ɛ́ ʋlɛ n'ʋ nyɩ sàw de.
A tɩ kũu-pʋɔ-lɛb-yibu yele
12Tɩ hiere na kɛ́ a Kɩrɩta lɛb'a yi a kũu pʋɔ, ŋmɩŋmɩn za n'a nyɩ mɩnɛ yere kɛ́ kũuni-lɛb-yibu bɛ ka? 13Kũuni-lɛb-yibu bɛ wa ka be a, a Kɩrɩta mɩ̀ bɛ lɛb yi a kũuni pʋɔ ɩ, 14ɛ́ a Kɩrɩta bɛ wa lɛb yi a kũu pʋɔ a, a yele tɩ na hiere yere kʋ̀rɛ nyɩ a ɩ n zawla, ɛ́ a nyɩ naaŋmɩn-sàw-deb mɩ̀ ɩ n zawla. 15Lɛb waar mɩ̀, a nɩbɛ na nyɛ̃ tɩ na tɩ ɩ Naaŋmɩn dãsɩ-ziri dem, bʋ̃ʋ n'ʋ vɛ̃, tɩ yel'a k'ʋʋ ɩ n a Kɩrɩta lɛb yi a kũu pʋɔ, zɩ̃ k'ʋʋ bɛ ɩ a lɛ ɩ, alɛ wa ɩ sɩza n'a k'aa kũuni bɛ lɛbr yire a. 16Ɛ́ a kũuni bɛ wa lɛbr yire a, a Kɩrɩta mɩ̀ bɛ lɛb yi a kũu pʋɔ ɩ. 17Ɛ́ a Kɩrɩta bɛ wa lɛb yi a, a nyɩ Naaŋmɩn sàwfʋ ɩ n zawla, ɛ́ nyɩ cãà na be a nyɩ yel-bebe pʋɔ. 18Ɛ́ alɛ wa ɩ à ŋá a, a bɛlɩ dem mɩ́ na saa sàw de a Kɩrɩta ɛ́ kpi a, bɛ wɛ na. 19Tɩmɛ wa ƴãw a tɩ tɩɛrʋ a Kɩrɩta ƴãw tẽw zu ka nyɔ-vʋʋrʋ ŋa tɛwr ƴãw a, tɩ yúor'ɩ we a nɩsaalbɛ za pʋɔ!
20Ɛcɛ lɛ bɛ n'a ɩ! Kɩrɩta lɛb'a yi a kũuni pʋɔ, wul k'aa bɛlɩ dem na kpi a mɩ̀ na lɛb'a yi. 21Nɩ-been na n'ʋ so a kũu be a, nɩ-been n'ʋ mɩ̀ so a kũu-pʋɔ-lɛb-yibu be. 22Mɛ̃ a lɛ a nɩsaalbɛ za na lãw nɩ a Adama kpiir a, lɛ n'a bɛ za na lãw nɩ a Kɩrɩta lɛb vʋʋrɛ, 23ŋa za a ʋ pal pʋɔ: a dãw-niwn sob n'ɩ a Kɩrɩta, al pùorí a bɛlɩ dem na na ɩ a Kɩrɩta nɩ-sori a ʋ lɛb-waa daar a. 24Al pùorí, a yele za nʋɔr na kʋ na, a lɛn daar a Kɩrɩta nãà wa sãw nɩ-kpɛ̃ɛnʋ dɩb za bɛr a, sãw fãw za nɩ kpɛ̃w bʋʋrɛ za bɛr ɛ́ de a naalʋ kʋ̀ a Naaŋmɩn Sãà a. 25Bʋ̃ʋ n'ʋ vɛ̃, a fɛr'a k'aa Kɩrɩta dɩrɛ naalʋ ɛ́ gù a Naaŋmɩn wa tɩ nɛb a ʋ dɔ̃ dem za bin a ʋ pile. 26A dɔ̃ sob pɛ-baara bɛ na na sãw bɛr a n'ɩ a kũu. 27Bʋ̃ʋ n'ʋ vɛ̃, a Sɛb-sõw yel'a: «Naaŋmɩn nɛ̃ nɩ bom za bin a Kɩrɩta pile#15:27 Nyɛ̃ Ssy 110.1..» Ɛcɛ a Sɛb-sõw ƴɛ̀r-bie á ŋá: «Naaŋmɩn nɛ̃ nɩ bom za bin a Kɩrɩta pile», wule nɩ cãàmɩlɛ k'aa Naaŋmɩn na nɛ̃ bom za bin a Kɩrɩta pile a bɛ pʋɔ ɩ.
28Ɛ́ a Bie wa so bom za a, a Naaŋmɩn na ƴãw ʋ so bom za a, mɩ̀ na so ʋ na, lɛ n'a a Naaŋmɩn na dɩrɛ naalʋ bom za zu.
29Alɛ bɛ wa ɩ à ŋá a, a bɛlɩ dem na mɩ́ ƴãw bɛ kʋ̀ bɛ a suob a kũuni ƴãw a, bʋ̃ʋ n'ʋ bɛ pãa mɩ̀ tɩɛrɛ kɛ́ bɛ na páw na a? Alɛ wa ɩ sɩza n'a k'aa kũuni bɛ lɛbr yire a, bʋ̃ʋ so bɛ mɩ́ ƴãw bɛ kʋ̀ bɛ a suob a kũuni ƴãw? 30Ɛ́ a tɩɩm tɛɛ za, bʋ̃ʋ so a kũu mɩ́ jɩɛrɛ tɩ kʋralɛ. 31Yɛbr i, bibir za n'a ɩ̃ kpiir, a yel ŋa ɩ n sɩza, mɛ̃ a lɛ nyɩ na sɩrɩ ɩ a ɩ̃ dɛpaal-bom, mãa nɩ a tɩ Sore Yeezu Kɩrɩta na lãw taa a ƴãw a. 32Alɛ tɩ ɩ nɩsaalʋ tɛwr ƴãw n'a a, bʋ̃ʋ ƴãw n'a ɩ̃ tɩ zɛb'ɩ a wɛ-dʋn a Efɛɛzɩ? A kũuni bɛ wa lɛbr yire a, mɛ̃ a lɛ a zʋkpar na yel a, tɩ dɩrɛ ɛ́ nyúur, tɩ na na kpi bio a ƴãw#15:32 Nyɛ̃ Ɩza 22.13..
33Nyɩ ta bɛ̀lɛ nyɩ tʋɔra ɩ: a tu-taa na bɛ vɩɛl a sãwnɛ nɩ a nyɔ-vʋʋr-vla bɛrɛ. 34Nyɩ ƴãw fãw lɛb bãw yã ɛ́ bɛr a yel-bier maalʋ. Ɩ̃ yel ƴãw nyɩ vĩ: nyɩ mɩnɛ bɛ bãw a Naaŋmɩn ɛ.
A nɩbɛ na na lɛb yi a kũuni pʋɔ a ƴã-gamɛ yele
35Ɛcɛ nɩbɛ na sowre na: «Ŋmɩŋmɩn n'a a kũuni lɛbr yire? Ƴã-gã-buor'ʋ bɛ mɩ́ lɛb yi n?» 36Dãbol nɛ b! A bʋ̃-bir fʋ na mɩ́ bʋ̀r a, ʋlɛ bɛ wa kpi a, ʋ na ɩ n ŋmɩn bul? 37Bʋ̃-bul bɛ n'ʋ fʋ mɩ́ bʋ̀r ɛ, bʋ̃-bir'ʋ, ka-bir bɩɩ bʋ̃-kãw bir. 38A pùorí n'a a Naaŋmɩn mɩ́ ɩ a bʋ̃-bir bul tɛr a ƴã-gan ʋl a Naaŋmɩn na bɔbr a, bʋ̃-bʋʋrɛ za mɩ́ bul'a tɛr ʋ ƴã-gan.
39Ƴã-gã-nɛn za be n ʋ tʋɔra: a nɩsaal ƴã-gã-nɛn nɩ a dʋn dem, nɩ a lili dem nɩ a zʋ́mɛ́ dem bɛ ɩ been ɛ.
40Salom zu bome ƴã-gamɛ be n be, tẽw zu bome ƴã-gamɛ mɩ̀ be be, ɛ́ a vɩɛlʋ bɛ ɩ been. 41A mʋ̃tɔ̃w nyɩwrʋ be n ʋ tʋɔra, a cuw dem mɩ̀ be ʋ tʋɔra, ŋmar-bie dem mɩ̀ be ʋ tʋɔra, ŋmar-bir kãw mɩ́ nyɩwrɛ na zuo ʋ tɔ mɩ̀.
42Lɛ mɩ̀ n'a a ŋmɛ̃ a bɛlɩ dem na na lɛb yi a kũuni pʋɔ a zie. Ƴã-gã-kpiira n'ʋ bɛ mɩ́ ũù, ɛ́ ʋlɛ wa lɛb yi a kũuni pʋɔ a, ʋ bɛ mɩ́ lɛb tɛr kũu daar ɛ. 43Ƴã-gã-jewra n'ʋ bɛ mɩ́ ũù, ʋʋ lɛb yi n vɩɛlʋ. Bãbàalʋ ƴã-gan n'ʋ bɛ mɩ́ ũù, ʋʋ lɛb yi tɛr fãw bɛ dɩ vuo ɩ. 44Nɩsaal ƴã-gan tɛwr'ʋ bɛ mɩ́ ũù, ʋʋ lɛb yi ɩ ƴã-gan Naaŋmɩn Vʋʋrʋ na so a. Nɩsaal ƴã-gan tɛwr be n be, ƴã-gan Vʋʋrʋ na so a mɩ̀ be be. 45Al ƴãw n'a a Sɛb-sõw yel a ƴɛ̀r-bie á ŋá: «A nɩsaal-dãw-niwn sob, a Adama#15:45 A Adama dãw-niwn sob: Nyɛ̃ Yzt 2.7. — A Adama pɛ-baara: Ʋlɛ n'ɩ a Kɩrɩta., ʋ tɩ ɩ n bʋ̃-vʋʋra. A Adama pɛ-baara ɩ n Vʋʋrʋ nɩr na tɩrɛ nyɔ-vʋʋrʋ a.» 46Ɛcɛ a Vʋʋrʋ nɩr bɛ n'ɩ a dãw-niwn sob ɛ, a ʋl na ɩ nɩsaal tɛwr'a n'ʋ, a Vʋʋrʋ nɩr pãa tu. 47A Nɩsaal-dãw-niwn sob bɛ na maal'ɩ tẽsɔw tanɛ a, ɩ n tẽsɔw bom. A nɩsaal ayi sob ʋl yi n salom zu. 48A tẽsɔw bome ŋmɛ̃ na taa nɩ a ʋl bɛ na tɩ maal'ɩ tẽsɔw tanɛ a, ɛcɛ a salom zu bome mɩ̀ ŋmɛ̃ taa nɩ a ʋl na yi a salom zu a. 49Mɛ̃ a lɛ tɩ na ŋmɛ̃ taa nɩ a tẽsɔw nɩr a, lɛ n'a tɩ mɩ̀ nãà ŋmɛ̃ taa nɩ a nɩr ʋl na yi a salom zu a.
50Yel ŋa n'ʋ ɩ̃ bɔbr k'ɩ̃ɩ yel, yɛbr i: nɩsaal na ɩ ƴã-gan nɩ zɩ̃ɩ tɛwr'a kʋ̃ tʋ̃ɔ́ kpɛ a Naaŋmɩn Naalʋ pʋɔ ɩ, ɛ́ bʋ̃-kpiira kʋ̃ tʋ̃ɔ́ pʋɔ bʋ̃-bɛ-kpiira yele pʋɔ ɩ.
51Nyɩ vɛ̃ ɩ̃ yel yel-sɔwla kãw kʋ̀ nyɩ. Tɩ za bɛ kpiir ɛ, ɛcɛ tɩ za na lɩɛb'a, 52daƴen daadaa, tɩ na lɩɛb'ɩ fɔ̃wlɛ a wɩ-pɛ-baara wa pɛblɩ a. Bʋ̃ʋ n'ʋ vɛ̃, a wɩ́ɛ wa pɛblɩ a, a kũuni na lɛb'a yi kʋ̃ lɛb kpi towtow ɛ, ɛ́ a tɩɩm ƴã-gamɛ na lɩɛb'a. 53Bʋ̃ʋ n'ʋ vɛ̃, a fɛr'a kɛ́ a nɩr ʋl na na wɛ a, su a nɩr ʋl na bɛ wɛrɛ a. A nɩr ʋl na na kpi a, su a nɩr ʋl na bɛ kpiir a. 54A nɩr ʋl na na wɛ a, wa su a nɩr ʋl na bɛ wɛrɛ a, ɛ́ a nɩr ʋl na na kpi a, su a nɩr ʋl na bɛ kpiir a, lɛ n'a a Sɛb-sõw ƴɛ̀r-bie á ŋá na tu:
«Bɛ zɛb'a tʋ̃ɔ́ a kũu pẽlẽpẽlẽ.
55Alɛ kũu u, nyɩn lowr'a fʋ zɛb tʋ̃ɔ́?
Alɛ kũu u, a fʋ pĩi-zɛl wa mɔ̃?#15:55 Nyɛ̃ Ɩza 25.8, Oze 13.14.»
56A kũu pĩi-zɛl n'ɩ a yel-bier ɛ́ a yel-bier fãw n'ɩ a Moyiir wulu. 57Naaŋmɩn so puoru, ʋl na ɩrɛ kɛ̀ tɩ zɛbr tʋ̃ɔ́nɛ, ɛ́ a ɩ a tɩ Sore Yeezu Kɩrɩta ƴãw n'a a.
58A na ɩ lɛ a, ɩ̃ yɛb-nɔnɩ i, nyɩ ƴãw fãw kpɛmɛ, ɛ́ taa bãwnɛ damnʋ ɛ. Nyɩ kɛrɛ kʋralɛ a Sore tome pʋɔ, ɛ́ bãwnɩ a kɛ́ nyɩ bɛ hanɛ lãwnɛ nɩ a Sore zawla ɩ.
Đang chọn:
1 Korɛ̃tɩ 15: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.